໘. ອນ຺ຘກຣຓສຸຕ຺ຕວຓ຺ຓນາ

໘໗. ອຏ຺ຐເມ ອກຸສລວິຕກ຺ກາຕິ ອໂກສລ຺ລສມ຺ຠູຕາ ວິຕກ຺ກາ. ອນ຺ຘກຣຓາຕິອາທີສຸ ຍສ຺ສ ສຍໍ ອຸປ຺ປຊ຺ຊນ຺ຕິ, ຕໍ ຍຖາຠູຕທສ຺ສນນິວາຣເຓນ ອນ຺ຘໍ ກໂຣນ຺ຕີຕິ ອນ຺ຘກຣຓາ. ນ ປຎ຺ຎາຈກ຺ຂຸໍ ກໂຣນ຺ຕີຕິ ອຈກ຺ຂຸກຣຓາ. ອຎ຺ຎາຓໍ ກໂຣນ຺ຕີຕິ ອຎ຺ຎາຓກຣຓາ. ປຎ຺ຎານິໂຣຘິກາຕິ ກມ຺ມສ຺ສກຕາປຎ຺ຎາ, ຌານປຎ຺ຎາ, ວິປສ຺ສນາປຎ຺ຎາຕິ ອິມາ ຕິສ຺ໂສ ປຎ຺ຎາ ອປ຺ປວຕ຺ຕິກຣເຓນ ນິໂຣເຘນ຺ຕີຕິ ປຎ຺ຎານິໂຣຘິກາ. ອນິຏ຺ຐຜລທາຍກຕ຺ຕາ ທຸກ຺ຂສງ຺ຂາຕສ຺ສ ວິຆາຕສ຺ສ ປກ຺ເຂ ວຕ຺ຕນ຺ຕີຕິ ວິຆາຕປກ຺ຂິກາ. ກິເລສນິພ຺ພານໍ ນ ສໍວຕ຺ຕຍນ຺ຕີຕິ ອນິພ຺ພານສໍວຕ຺ຕນິກາ.

ກາມວິຕກ຺ໂກຕິ ກາມປຏິສໍຍຸຕ຺ໂຕ ວິຕກ຺ໂກ. ໂສ ຫິ ກິເລສກາມສຫິໂຕ ຫຸຕ຺ວາ ວຕ຺ຖຸກາເມສຸ ປວຕ຺ຕຕິ. ພ຺ຍາປາທປຏິສໍຍຸຕ຺ໂຕ ວິຕກ຺ໂກ ພ຺ຍາປາທວິຕກ຺ໂກ. ວິຫິໍສາປຏິສໍຍຸຕ຺ໂຕ ວິຕກ຺ໂກ ວິຫິໍສາວິຕກ຺ໂກ. ອິເມ ທ຺ເວ ຈ ສຕ຺ເຕສຸປິ ສງ຺ຂາເຣສຸປິ ອຸປ຺ປຊ຺ຊນ຺ຕິ. ກາມວິຕກ຺ໂກ ຫິ ປິຍມນາເປ ສຕ຺ເຕ ວາ ສງ຺ຂາເຣ ວາ ວິຕກ຺ເກນ຺ຕສ຺ສ ອຸປ຺ປຊ຺ຊຕິ, ພ຺ຍາປາທວິຕກ຺ໂກ ອປ຺ປິເຍ ອມນາເປ ສຕ຺ເຕ ວາ ສງ຺ຂາເຣ ວາ ກຸຊ຺ຌິຕ຺ວາ ໂອໂລກນກາລໂຕ ປຏ຺ຐາຍ ຍາວ ນາສນາ ອຸປ຺ປຊ຺ຊຕິ, ວິຫິໍສາວິຕກ຺ໂກ ສງ຺ຂາເຣສຸ ນ ອຸປ຺ປຊ຺ຊຕິ, ສງ຺ຂາຣາ ທຸກ຺ຂາເປຕພ຺ພາ ນາມ ນຕ຺ຖິ, ‘‘ອິເມ ສຕ຺ຕາ ຫຎ຺ຎນ຺ຕຸ ວາ ພຊ຺ຌນ຺ຕຸ ວາ ອຸຈ຺ຉິຊ຺ຊນ຺ຕຸ ວາ ວິນສ຺ສນ຺ຕຸ ວາ ມາ ວາ ອເຫສຸ’’ນ຺ຕິ ຈິນ຺ຕນກາເລ ປນ ສຕ຺ເຕສຸ ອຸປ຺ປຊ຺ຊຕິ.

ອິເມເຍວ ປນ ກາມສງ຺ກປ຺ປາທໂຍ. ອຕ຺ຖໂຕ ຫິ ກາມວິຕກ຺ກາທີນໍ ກາມສງ຺ກປ຺ປາທີນຎ຺ຈ ນານາກຣຓໍ ນຕ຺ຖິ, ຕໍສມ຺ປຍຸຕ຺ຕາ ປນ ສຎ຺ຎາທໂຍ ກາມສຎ຺ຎາທໂຍ. ກາມຘາຕຸອາທີນໍ ປນ ຍສ຺ມາ ປາຬິຍໍ –

‘‘ກາມປຏິສໍຍຸຕ຺ໂຕ ຕກ຺ໂກ ວິຕກ຺ໂກ…ເປ… ມິຈ຺ຉາສງ຺ກປ຺ໂປ, ອຍໍ ວຸຈ຺ຈຕິ ກາມຘາຕຸ, ສພ຺ເພປິ ອກຸສລາ ຘມ຺ມາ ກາມຘາຕຸ. ພ຺ຍາປາທປຏິສໍຍຸຕ຺ໂຕ ຕກ຺ໂກ ວິຕກ຺ໂກ…ເປ… ມິຈ຺ຉາສງ຺ກປ຺ໂປ, ອຍໍ ວຸຈ຺ຈຕິ ພ຺ຍາປາທຘາຕຸ. ທສສຸ ອາຆາຕວຕ຺ຖູສຸ ຈິຕ຺ຕສ຺ສ ອາຆາໂຕ ປຏິຆາໂຕ…ເປ… ອນຕ຺ຕມນຕາ ຈິຕ຺ຕສ຺ສ, ອຍໍ ວຸຈ຺ຈຕິ ພ຺ຍາປາທຘາຕຸ. ວິຫິໍສາປຏິສໍຍຸຕ຺ໂຕ ຕກ຺ໂກ ວິຕກ຺ໂກ ມິຈ຺ຉາສງ຺ກປ຺ໂປ, ອຍໍ ວຸຈ຺ຈຕິ ວິຫິໍສາຘາຕຸ. ອິເຘກຈ຺ໂຈ ປາຓິນາ ວາ ເລຑ຺ຑຸນາ ວາ ທຓ຺ເຑນ ວາ ສຕ຺ເຖນ ວາ ຣຊ຺ຊຸຍາ ວາ ອຎ຺ຎຕຣຎ຺ຎຕເຣນ ສຕ຺ເຕ ວິເຫເຐຕິ, ອຍໍ ວິຫິໍສາຘາຕູ’’ຕິ (ວິຠ. ໑໘໒, ໙໑໐) –

ອາຄຕຕ຺ຕາ ວິເສໂສ ລພ຺ຠຕິ.

ຕຕ຺ຖ ທ຺ເວ ກຖາ ສພ຺ພສງ຺ຄາຫິກາ ຈ ອສມ຺ຠິນ຺ນາ ຈ. ຕຕ຺ຖ ກາມຘາຕຸຍາ ຄຫິຕາຍ ອິຕຣາ ທ຺ເວປິ ຄຫິຕາ ນາມ ໂຫນ຺ຕິ. ຕໂຕ ປນ ນີຫຣິຕ຺ວາ ອຍໍ ພ຺ຍາປາທຘາຕຸ, ອຍໍ ວິຫິໍສາຘາຕູຕິ ທສ຺ເສຕີຕິ ອຍໍ ສພ຺ພສງ຺ຄາຫິກາ ນາມ. ກາມຘາຕຸໍ ກເຖນ຺ໂຕ ປນ ຠຄວາ ພ຺ຍາປາທຘາຕຸໍ ພ຺ຍາປາທຘາຕຸຏ຺ຐາເນ, ວິຫິໍສາຘາຕຸໍ ວິຫິໍສາຘາຕຸຏ຺ຐາເນ ຐເປຕ຺ວາວ ອວເສສໍ ກາມຘາຕຸ ນາມາຕິ ກເຖສີຕິ ອຍໍ ອສມ຺ຠິນ຺ນກຖາ ນາມ.

ສຸກ຺ກປກ຺ເຂ ວຸຕ຺ຕວິປຣິຍາເຍນ ອຕ຺ໂຖ ເວທິຕພ຺ໂພ. ເນກ຺ຂມ຺ມປຏິສໍຍຸຕ຺ໂຕ ວິຕກ຺ໂກ ເນກ຺ຂມ຺ມວິຕກ຺ໂກ. ໂສ ອສຸຠປຸພ຺ພຠາເຄ ກາມາວຈໂຣ ໂຫຕິ, ອສຸຠຊ຺ຌາເນ ຣູປາວຈໂຣ, ຕໍ ຌານໍ ປາທກໍ ກຕ຺ວາ ອຸປ຺ປນ຺ນມຄ຺ຄຜລກາເລ ໂລກຸຕ຺ຕໂຣ. ອພ຺ຍາປາທປຏິສໍຍຸຕ຺ໂຕ ວິຕກ຺ໂກ ອພ຺ຍາປາທວິຕກ຺ໂກ. ໂສ ເມຕ຺ຕາປຸພ຺ພຠາເຄ ກາມາວຈໂຣ ໂຫຕິ, ເມຕ຺ຕາຌາເນ ຣູປາວຈໂຣ, ຕໍ ຌານໍ ປາທກໍ ກຕ຺ວາ ອຸປ຺ປນ຺ນມຄ຺ຄຜລກາເລ ໂລກຸຕ຺ຕໂຣ. ອວິຫິໍສາປຏິສໍຍຸຕ຺ໂຕ ວິຕກ຺ໂກ ອວິຫິໍສາວິຕກ຺ໂກ. ໂສ ກຣຸຓາປຸພ຺ພຠາເຄ ກາມາວຈໂຣ, ກຣຸຓາຊ຺ຌາເນ ຣູປາວຈໂຣ, ຕໍ ຌານໍ ປາທກໍ ກຕ຺ວາ ອຸປ຺ປນ຺ນມຄ຺ຄຜລກາເລ ໂລກຸຕ຺ຕໂຣ. ຍທາ ປນ ອໂລໂຠ ສີສໍ ໂຫຕິ, ຕທາ ອິຕເຣ ທ຺ເວ ຕທນ຺ວາຍິກາ ໂຫນ຺ຕິ. ຍທາ ເມຕ຺ຕາ ສີສໍ ໂຫຕິ, ຕທາ ອິຕເຣ ທ຺ເວ ຕທນ຺ວາຍິກາ ໂຫນ຺ຕິ. ຍທາ ກຣຸຓາ ສີສໍ ໂຫຕິ, ຕທາ ອິຕເຣ ທ຺ເວ ຕທນ຺ວາຍິກາ ໂຫນ຺ຕິ.

ອິເມເຍວ ປນ ເນກ຺ຂມ຺ມສງ຺ກປ຺ປາທໂຍ. ອຕ຺ຖໂຕ ຫິ ເນກ຺ຂມ຺ມວິຕກ຺ກາທີນໍ ເນກ຺ຂມ຺ມສງ຺ກປ຺ປາທີນຎ຺ຈ ນານາກຣຓໍ ນຕ຺ຖິ, ຕໍສມ຺ປຍຸຕ຺ຕາ ປນ ສຎ຺ຎາທໂຍ ເນກ຺ຂມ຺ມສຎ຺ຎາທໂຍ. ເນກ຺ຂມ຺ມຘາຕຸອາທີນໍ ປນ ຍສ຺ມາ ປາຬິຍໍ –

‘‘ເນກ຺ຂມ຺ມປຏິສໍຍຸຕ຺ໂຕ ຕກ຺ໂກ ວິຕກ຺ໂກ ສງ຺ກປ຺ໂປ, ອຍໍ ວຸຈ຺ຈຕິ ເນກ຺ຂມ຺ມຘາຕຸ, ສພ຺ເພປິ ກຸສລາ ຘມ຺ມາ ເນກ຺ຂມ຺ມຘາຕຸ. ອພ຺ຍາປາທປຏິສໍຍຸຕ຺ໂຕ ຕກ຺ໂກ ວິຕກ຺ໂກ ສງ຺ກປ຺ໂປ, ອຍໍ ວຸຈ຺ຈຕິ ອພ຺ຍາປາທຘາຕຸ. ຍາ ສຕ຺ເຕສຸ ເມຕ຺ຕິ ເມຕ຺ຕາຍນາ ເມຕ຺ຕາເຈໂຕວິມຸຕ຺ຕິ, ອຍໍ ວຸຈ຺ຈຕິ ອພ຺ຍາປາທຘາຕຸ. ອວິຫິໍສາປຏິສໍຍຸຕ຺ໂຕ ຕກ຺ໂກ ວິຕກ຺ໂກ ສງ຺ກປ຺ໂປ – ອຍໍ ວຸຈ຺ຈຕິ ອວິຫິໍສາຘາຕຸ. ຍາ ສຕ຺ເຕສຸ ກຣຸຓາ ກຣຸຓາຍນາ ກຣຸຓາເຈໂຕວິມຸຕ຺ຕິ – ອຍໍ ວຸຈ຺ຈຕິ ອວິຫິໍສາຘາຕູ’’ຕິ. (ວິຠ. ໑໘໒) –

ອາຄຕຕ຺ຕາ ວິເສໂສ ລພ຺ຠຕິ. ອິຘາປິ ສພ຺ພສງ຺ຄາຫິກາ, ອສມ຺ຠິນ຺ນາຕິ ທ຺ເວ ກຖາ ວຸຕ຺ຕນເຍເນວ ເວທິຕພ຺ພາ. ເສສໍ ສຸວິຎ຺ເຎຍ຺ຍເມວ.

ຄາຖາສຸ ວິຕກ຺ກເຍຕິ ວິຕກ຺ເກຍ຺ຍ. ນິຣາກເຣຕິ ອຕ຺ຕໂນ ສນ຺ຕານໂຕ ນີຫເຣຍ຺ຍ ວິໂນເທຍ຺ຍ, ປຊເຫຍ຺ຍາຕິ ອຕ຺ໂຖ. ສເວ ວິຕກ຺ການິ ວິຈາຣິຕານິ, ສເມຕິ ວຸຏ຺ຐີວ ຣຊໍ ສມູຫຕນ຺ຕິ ຍຖາ ນາມ ຄິມ຺ຫານໍ ປຈ຺ຉິເມ ມາເສ ປຖວິຍໍ ສມູຫຕໍ ສມນ຺ຕໂຕ ອຸຏ຺ຐິຕໍ ຣຊໍ ມຫໂຕ ອກາລເມຆສ຺ສ ວສ຺ສໂຕ ວຸຏ຺ຐິ ຐານໂສ ວູປສເມຕິ, ເອວເມວ ໂສ ໂຍຄາວຈໂຣ ວິຕກ຺ການິ ມິຈ຺ຉາວິຕກ຺ເກ ຈ ວິຈາຣິຕານິ ຕໍສມ຺ປຍຸຕ຺ຕວິຈາເຣ ຈ ສເມຕິ ວູປສເມຕິ ສມຸຈ຺ຉິນ຺ທຕິ. ຕຖາຠູໂຕ ຈ ວິຕກ຺ກູປສເມນ ເຈຕສາ ສພ຺ເພສໍ ມິຈ຺ຉາວິຕກ຺ການໍ ອຸປສມນໂຕ ວິຕກ຺ກູປສເມນ ອຣິຍມຄ຺ຄຈິຕ຺ເຕນ. ອິເຘວ ທິຏ຺ເຐວ ຘມ຺ເມ, ສນ຺ຕິປທໍ ນິພ຺ພານໍ, ສມຊ຺ຌຄາ ສມຘິຄໂຕ ໂຫຕີຕິ.

ອຏ຺ຐມສຸຕ຺ຕວຓ຺ຓນາ ນິຏ຺ຐິຕາ.