໓. ເທວສທ຺ທສຸຕ຺ຕວຓ຺ຓນາ

໘໒. ຕຕິເຍ ເທເວສູຕິ ຐເປຕ຺ວາ ອຣູປາວຈຣເທເວ ເຈວ ອສຎ຺ຎເທເວ ຈ ຕທຎ຺ເຎສຸ ອຸປປຕ຺ຕິເທເວສຸ. ເທວສທ຺ທາຕິ ເທວານໍ ປີຕິສມຸທາຫາຣສທ຺ທາ. ນິຈ຺ຉຣນ຺ຕີຕິ ອຎ຺ຎມຎ຺ຎໍ ອາລາປສລ຺ລາປວເສນ ປວຕ຺ຕນ຺ຕິ. ສມຍາ ສມຍໍ ອຸປາທາຍາຕິ ສມຍໂຕ ສມຍໍ ປຏິຈ຺ຈ. ອິທໍ ວຸຕ຺ຕໍ ໂຫຕິ – ຍສ຺ມິໍ ກາເລ ຐິຕາ ເຕ ເທວາ ຕໍ ກາລໍ ອາຄມ຺ມ ນໍ ປສ຺ສິສ຺ສນ຺ຕິ, ຕໂຕ ຕໍ ສມຍໍ ສມ຺ປຕ຺ຕໍ ອາຄມ຺ມາຕິ. ‘‘ສມຍໍ ສມຍໍ ອຸປາທາຍາ’’ຕິ ຈ ເກຈິ ປຐນ຺ຕິ, ເຕສໍ ຕໍ ຕໍ ສມຍໍ ປຏິຈ຺ຈາຕິ ອຕ຺ໂຖ. ຍສ຺ມິໍ ສມເຍຕິ ຍທາ ‘‘ອຏ຺ຐິກງ຺ກລູປມາ ກາມາ’’ຕິອາທິນາ (ມ. ນິ. ໑.໒໓໔; ປາຈິ. ໔໑໗), ‘‘ສມ຺ພາໂຘ ຆຣາວາໂສ’’ຕິອາທິນາ (ທີ. ນິ. ໑.໑໙໑; ສໍ. ນິ. ໒.໑໕໔) ຈ ກາເມສຸ ຆຣາວາເສ ຈ ອາທີນວາ, ຕປ຺ປຏິປກ຺ຂໂຕ ເນກ຺ຂມ຺ເມ ອານິສໍສາ ຈ ສຸທິຏ຺ຐາ ໂຫນ຺ຕິ, ຕສ຺ມິໍ ສມເຍ. ຕທາ ຫິສ຺ສ ເອກນ຺ເຕນ ປພ຺ພຊ຺ຊາຍ ຈິຕ຺ຕໍ ນມຕິ. ອຣິຍສາວໂກຕິ ອຣິຍສ຺ສ ພຸທ຺ຘສ຺ສ ຠຄວໂຕ ສາວໂກ, ສາວກຠາວໍ ອຸປຄນ຺ຕຸກາໂມ, ອຣິຍສາວໂກ ວາ ອວສ຺ສໍຠາວີ. ອນ຺ຕິມຠວິກໍ ສາວກໂພຘິສຕ຺ຕໍ ສນ຺ຘາຍ ອຍມາຣມ຺ໂຠ. ເກສມສ຺ສຸໍ ໂອຫາເຣຕ຺ວາຕິ ເກເສ ຈ ມສ຺ສຸຎ຺ຈ ໂອຫາເຣຕ຺ວາ ອປເນຕ຺ວາ. ກາສາຍານິ ວຕ຺ຖານິ ອຈ຺ຉາເທຕ຺ວາຕິ ກສາເຍນ ຣຕ຺ຕຕາຍ ກາສາຍານິ ພ຺ຣຫ຺ມຈຣິຍໍ ຈຣນ຺ຕານໍ ອນຸຈ຺ຉວິການິ ວຕ຺ຖານິ ນິວາເສຕ຺ວາ ເຈວ ປາຣຸປິຕ຺ວາ ຈ. ອຄາຣສ຺ມາ ອນຄາຣິຍໍ ປພ຺ພຊ຺ຊາຍ ເຈເຕຕີຕິ ອຄາຣສ຺ມາ ຆຣາ ນິກ຺ຂມິຕ຺ວາ ອນຄາຣິຍໍ ປພ຺ພຊ຺ຊໍ ປພ຺ພເຊຍ຺ຍນ຺ຕິ ປພ຺ພຊ຺ຊາຍ ເຈເຕຕິ ປກປ຺ເປຕິ, ປພ຺ພຊຕີຕິ ອຕ຺ໂຖ. ເອຕ຺ຖ ຈ ຍສ຺ມາ ອຄາຣສ຺ສ ຫິຕໍ ກສິວຓິຊ຺ຊາທິກມ຺ມໍ ອຄາຣິຍນ຺ຕິ ວຸຈ຺ຈຕິ, ຕຎ຺ຈ ປພ຺ພຊ຺ຊາຍ ນຕ຺ຖິ, ຕສ຺ມາ ປພ຺ພຊ຺ຊາ ອນຄາຣິຍນ຺ຕິ ຎາຕພ຺ພາ.

ມາເຣນາຕິ ກິເລສມາເຣນ. ສງ຺ຄາມາຍ ເຈເຕຕີຕິ ຍຸຊ຺ຌນຕ຺ຖາຍ ຈິຕ຺ຕໍ ອຸປ຺ປາເທຕິ, ມາຣໍ ອຠິວິເຊຕຸໍ ສນ຺ນຍ຺ຫຕິ. ຍສ຺ມາ ປນ ເອວຣູປສ຺ສ ປຏິປຊ຺ຊນກປຸຄ຺ຄລສ຺ສ ເທວປຸຕ຺ຕມາໂຣປິ ອນ຺ຕຣາຍາຍ ອຸປກ຺ກມຕິ, ຕສ຺ມາ ຕສ຺ສປິ ວເສນ ມາເຣນາຕິ ເອຕ຺ຖ ເທວປຸຕ຺ຕມາເຣນາຕິປິ ອຕ຺ໂຖ ເວທິຕພ຺ໂພ. ຕສ຺ສາປິ ອຍໍ ອິຈ຺ຉາວິຆາຕໍ ກຣິສ຺ສເຕວາຕິ. ຍສ຺ມາ ປນ ປພ຺ພຊິຕທິວສໂຕ ປຏ຺ຐາຍ ຂຸຣຄ຺ຄໂຕ ວາ ປຏ຺ຐາຍ ສີລານິ ສມາທິຍນ຺ໂຕ ປຣິໂສເຘນ຺ໂຕ ສມຖວິປສ຺ສນາສຸ ກມ຺ມໍ ກໂຣນ຺ໂຕ ຍຖາຣຫໍ ຕທງ຺ຄປ຺ປຫານວິກ຺ຂມ຺ຠນປ຺ປຫານານໍ ວເສນ ກິເລສມາຣໍ ປຣິປາເຕຕິ ນາມ, ນ ຍຸຊ຺ຌຕິ ນາມ ສມ຺ປຫາຣສ຺ສ ອຠາວໂຕ, ຕສ຺ມາ ວຸຕ຺ຕໍ ‘‘ມາເຣນ ສທ຺ຘິໍ ສງ຺ຄາມາຍ ເຈເຕຕີ’’ຕິ.

ສຕ຺ຕນ຺ນນ຺ຕິ ໂກຏ຺ຐາສໂຕ ສຕ຺ຕນ຺ນໍ, ປເຠທໂຕ ປນ ເຕ ສຕ຺ຕຕິໍສ ໂຫນ຺ຕິ. ກຖໍ? ຈຕ຺ຕາໂຣ ສຕິປຏ຺ຐານາ, ຈຕ຺ຕາໂຣ ສມ຺ມປ຺ປຘານາ, ຈຕ຺ຕາໂຣ ອິທ຺ຘິປາທາ, ປຎ຺ຈິນ຺ທ຺ຣິຍານິ, ປຎ຺ຈ ພລານິ, ສຕ຺ຕ ໂພຊ຺ຌງ຺ຄາ, ອຣິໂຍ ອຏ຺ຐງ຺ຄິໂກ ມຄ຺ໂຄຕິ. ເອວໍ ປເຠທໂຕ ສຕ຺ຕຕິໍສວິຘາປິ ສຕິປຏ຺ຐານາທິໂກຏ຺ຐາສໂຕ ສຕ຺ເຕວ ໂຫນ຺ຕີຕິ ວຸຕ຺ຕໍ ‘‘ສຕ຺ຕນ຺ນ’’ນ຺ຕິ. ໂພຘິປກ຺ຂິຍານນ຺ຕິ ພຸຊ຺ຌນຏ຺ເຐນ ໂພຘີຕິ ລທ຺ຘນາມສ຺ສ ອຣິຍປຸຄ຺ຄລສ຺ສ ມຄ຺ຄຎາຓສ຺ເສວ ວາ ປກ຺ເຂ ຠວານໍ ໂພຘິປກ຺ຂິຍານໍ, ໂພຘິໂກຏ຺ຐາສິຍານນ຺ຕິ ອຕ຺ໂຖ. ‘‘ໂພຘິປກ຺ຂິການ’’ນ຺ຕິປິ ປາໂຐ, ໂພຘິປກ຺ຂວນ຺ຕານໍ, ໂພຘິປກ຺ເຂ ວາ ນິຍຸຕ຺ຕານນ຺ຕິ ອຕ຺ໂຖ. ຠາວນານຸໂຍຄມນຸຍຸຕ຺ໂຕຕິ ວິປສ຺ສນໍ ອຸສ຺ສຸກ຺ກາເປຕ຺ວາ ອຣິຍມຄ຺ຄຠາວນານຸໂຍຄມນຸຍຸຕ຺ໂຕ. ວິປສ຺ສນາກ຺ຂເຓ ຫິ ສຕິປຏ຺ຐານາທໂຍ ປຣິຍາເຍນ ໂພຘິປກ຺ຂິຍາ ນາມ, ມຄ຺ຄກ຺ຂເຓເຍວ ປນ ເຕ ນິປ຺ປຣິຍາເຍນ ໂພຘິປກ຺ຂິຍາ ນາມ ໂຫນ຺ຕິ.

ອາສວານໍ ຂຍາຕິ ກາມາສວາທີນໍ ສພ຺ເພສໍ ອາສວານໍ ຂຍາ. ອາສເວສຸ ຫິ ຂີເຓສຸ ສພ຺ເພ ກິເລສາ ຂີຓາເຍວ ໂຫນ຺ຕິ. ເຕນ ອຣຫຕ຺ຕມຄ຺ໂຄ ວຸຕ຺ໂຕ ໂຫຕິ. ອນາສວນ຺ຕິ ອາສວວິຣຫິຕໍ. ເຈໂຕວິມຸຕ຺ຕິໍ ປຎ຺ຎາວິມຸຕ຺ຕິນ຺ຕິ ເອຕ຺ຖ ເຈໂຕວຈເນນ ອຣຫຕ຺ຕຜລສມາຘິ, ປຎ຺ຎາວຈເນນ ຕໍສມ຺ປຍຸຕ຺ຕາ ຈ ປຎ຺ຎາ ວຸຕ຺ຕາ. ຕຕ຺ຖ ສມາຘິ ຣາຄໂຕ ວິມຸຕ຺ຕຕ຺ຕາ ເຈໂຕວິມຸຕ຺ຕິ, ປຎ຺ຎາ ອວິຊ຺ຊາຍ ວິມຸຕ຺ຕຕ຺ຕາ ປຎ຺ຎາວິມຸຕ຺ຕີຕິ ເວທິຕພ຺ພາ. ວຸຕ຺ຕຎ຺ເຫຕໍ ຠຄວຕາ –

‘‘ໂຍ ຫິສ຺ສ, ຠິກ຺ຂເວ, ສມາຘິ, ຕທສ຺ສ ສມາຘິນ຺ທ຺ຣິຍໍ. ຍາ ຫິສ຺ສ, ຠິກ຺ຂເວ, ປຎ຺ຎາ, ຕທສ຺ສ ປຎ຺ຎິນ຺ທ຺ຣິຍໍ. ອິຕິ ໂຂ, ຠິກ຺ຂເວ, ຣາຄວິຣາຄາ ເຈໂຕວິມຸຕ຺ຕິ, ອວິຊ຺ຊາວິຣາຄາ ປຎ຺ຎາວິມຸຕ຺ຕີ’’ຕິ (ສໍ. ນິ. ໕.໕໑໖).

ອປິເຈຕ຺ຖ ສມຖຜລໍ ເຈໂຕວິມຸຕ຺ຕິ, ວິປສ຺ສນາຜລໍ ປຎ຺ຎາວິມຸຕ຺ຕີຕິ ເວທິຕພ຺ພາ. ທິຏ຺ເຐວ ຘມ຺ເມຕິ ອິມສ຺ມິໍເຍວ ອຕ຺ຕຠາເວ. ສຍໍ ອຠິຎ຺ຎາ ສຈ຺ຉິກຕ຺ວາຕິ ອຕ຺ຕນາເຍວ ອຠິວິສິຏ຺ຐາຍ ປຎ຺ຎາຍ ປຈ຺ຈກ຺ຂໍ ກຕ຺ວາ ອປຣປ຺ປຈ຺ຈເຍນ ຎຕ຺ວາ. ອຸປສມ຺ປຊ຺ຊ ວິຫຣຕີຕິ ປາປຸຓິຕ຺ວາ ສມ຺ປາເທຕ຺ວາ ວິຫຣຕິ. ຕເມວ ສງ຺ຄາມສີສໍ ອຠິວິຊິຍ ອຊ຺ຌາວສຕີຕິ ມາຣໍ ອຠິວິຊິນິຕ຺ວາ ວິຊິຕວິຊຍຕ຺ຕາ ເຕນ ກຕສງ຺ຄາມສງ຺ຂາຕສ຺ສ ອຣິຍມຄ຺ຄສ຺ສ ສີສຠູຕໍ ອຣຫຕ຺ຕຜລສມາປຕ຺ຕິອິສ຺ສຣິຍຏ຺ຐານໍ, ອຠິຠວນ຺ໂຕ ອາວສຕິ, ສມາປຊ຺ຊຕິ ອິຈ຺ເຈວ ອຕ຺ໂຖ. ອິເມ ຈ ເທວສທ຺ທາ ທິຏ຺ຐສຈ຺ເຈສຸ ເທເວສຸ ປວຕ຺ຕນ຺ຕິ, ວິເສສໂຕ ສຸທ຺ຘາວາສເທເວສູຕິ ເວທິຕພ຺ພໍ.

ຄາຖາສຸ ມຫນ຺ຕນ຺ຕິ ສີລາທິຄຸຓມຫຕ຺ເຕນ ມຫນ຺ຕໍ. ວີຕສາຣທນ຺ຕິ ສາຣຊ຺ຊກຣານໍ ກິເລສານໍ ອຠາເວນ ວິຄຕສາຣຊ຺ຊໍ ອປຄຕມງ຺ກຸຠາວໍ. ປຸຣິສາຊຎ຺ຎາຕິ ອສ຺ສາທີສຸ ອສ຺ສາຊານີຍາທໂຍ ວິຍ ປຸຣິເສສຸ ອາຊານີຍຠູຕາ ອຸຕ຺ຕມປຸຣິສາ. ທຸຊ຺ຊຍມຊ຺ຌຠູຕິ ປຈຸຣຊເນຫິ ເຊຕຸໍ ອສກ຺ກຸເຓຍ຺ຍໍ ກິເລສວາຫິນິໍ ອຠິຠວິ ອຊ຺ໂຌຕ຺ຖຣິ. ‘‘ອຊ຺ຊຍີ’’ຕິປິ ປຐນ຺ຕິ, ອຊິນີຕິ ອຕ຺ໂຖ. ເຊຕ຺ວານ ມຈ຺ຈຸໂນ ເສນໍ, ວິໂມກ຺ເຂນ ອນາວຣນ຺ຕິ ໂລກຕ຺ຕຍາຠິພ຺ຍາປນໂຕ ທິຍຑ຺ຒສຫສ຺ສາທິວິຠາຄໂຕ ຈ ວິປຸລຕ຺ຕາ ອຎ຺ເຎຫິ ອາວຣິຕຸໍ ປຏິເສເຘຕຸໍ ອສກ຺ກຸເຓຍ຺ຍຕ຺ຕາ ຈ ອນາວຣໍ, ມຈ຺ຈຸໂນ ມາຣສ຺ສ ເສນໍ ວິໂມກ຺ເຂນ ອຣິຍມຄ຺ເຄນ ເຊຕ຺ວາ ໂຍ ຕ຺ວໍ ທຸຊ຺ຊຍໍ ອຊຍິ, ຕສ຺ສ ນໂມ, ເຕ ປຸຣິສາຊຎ຺ຎາຕິ ສມ຺ພນ຺ໂຘ.

ອິຕີຕິ ວຸຕ຺ຕປ຺ປກາເຣນ. ຫິ-ອິຕິ ນິປາຕມຕ຺ຕໍ. ເອຕໍ ປຕ຺ຕມານສໍ ອຘິຄຕາຣຫຕ຺ຕໍ ຂີຓາສວໍ ເທວຕານມສ຺ສນ຺ຕີຕິ ວຸຕ຺ຕເມວຕ຺ຖໍ ນິຄມນວເສນ ທສ຺ເສຕິ. ອຖ ວາ ອິຕີຕິ ອິມິນາ ກາຣເຓນ. ກິໍ ປນ ເອຕໍ ກາຣຓໍ? ນມຸຈິເສນາວິຊເຍນ ປຕ຺ຕມານສຕ຺ຕໍ. ອິມິນາ ກາຣເຓນ ຕໍ ເທວຕາ ນມສ຺ສນ຺ຕີຕິ ອຕ຺ໂຖ. ອິທານິ ຕໍ ກາຣຓໍ ຜລໂຕ ທສ຺ເສຕຸໍ ‘‘ຕຎ຺ຫິ ຕສ຺ສ ນ ປສ຺ສນ຺ຕິ, ເຍນ ມຈ຺ຈຸວສໍ ວເຊ’’ຕິ ວຸຕ຺ຕໍ. ຕສ຺ສຕ຺ໂຖ – ຍສ຺ມາ ຕສ຺ສ ປຸຣິສາຊຎ຺ຎສ຺ສ ປຓິຘາຍ ຄເວສນ຺ຕາປິ ເທວາ ອຓຸມຕ຺ຕມ຺ປິ ຕໍ ກາຣຓໍ ນ ປສ຺ສນ຺ຕິ, ເຍນ ໂສ ມຈ຺ຈຸໂນ ມຣຓສ຺ສ ວສໍ ວເຊ ອຸປຄຈ຺ເຉຍ຺ຍ. ຕສ຺ມາ ຕໍ ວິສຸທ຺ຘິເທວາ ນມສ຺ສນ຺ຕີຕິ.

ຕຕິຍສຸຕ຺ຕວຓ຺ຓນາ ນິຏ຺ຐິຕາ.