໖. ສາຬ຺ຫສຸຕ຺ຕວຓ຺ຓນາ

໑໙໖. ຉຏ຺ເຐ ທ຺ວເຍນາຕິ ທ຺ວີຫິ ໂກຏ຺ຐາເສຫິ. ໂອຆສ຺ສ ນິຕ຺ຖຣຓນ຺ຕິ ຈຕຸໂຣຆນິຕ຺ຖຣຓໍ. ຕໂປຊິຄຸຈ຺ຉາເຫຕູຕິ ທຸກ຺ກຣກາຣິກສງ຺ຂາເຕນ ຕເປນ ປາປຊິຄຸຈ຺ຉນເຫຕຸ. ອຎ຺ຎຕຣໍ ສາມຎ຺ຎງ຺ຄນ຺ຕິ ເອກໍ ສມຓຘມ຺ມໂກຏ຺ຐາສໍ. ອປຣິສຸທ຺ຘກາຍສມາຈາຣາຕິອາທີສຸ ປຸຣິເມຫິ ຕີຫິ ປເທຫິ ກາຍິກວາຈສິກເຈຕສິກສີລານໍ ອປຣິສຸທ຺ຘຕໍ ທສ຺ເສຕ຺ວາ ປຈ຺ຉິເມນ ປເທນ ອປຣິສຸທ຺ຘາຊີວຕໍ ທສ຺ເສຕິ. ຎາຓທສ຺ສນາຍາຕິ ມຄ຺ຄຎາຓສງ຺ຂາຕາຍ ທສ຺ສນາຍ. ອນຸຕ຺ຕຣາຍ ສມ຺ໂພຘາຍາຕິ ອຣຫຕ຺ຕາຍ, ອຣຫຕ຺ຕຎາຓຜສ຺ເສນ ຜຸສິຕຸໍ ອຠພ຺ພາຕິ ວຸຕ຺ຕໍ ໂຫຕິ. ສາລລຏ຺ຐິນ຺ຕິ ສາລຣຸກ຺ຂໍ. ນວນ຺ຕິ ຕຣຸຓໍ. ອກຸກ຺ກຸຈ຺ຈກຊາຕນ຺ຕິ ‘‘ຠເວຍ຺ຍ ນຸ ໂຂ, ນ ຠເວຍ຺ຍາ’’ຕິ ອຊເນຕພ຺ພກຸກ຺ກຸຈ຺ຈໍ. ເລຂຓິຍາ ລິເຂຍ຺ຍາຕິ ອວເລຂນມຕ຺ຕເກນ ອວລິເຂຍ຺ຍ. ໂຘເວຍ຺ຍາຕິ ຆໍເສຍ຺ຍ. ອນ຺ໂຕ ອວິສຸທ຺ຘາຕິ ອພ຺ຠນ຺ຕເຣ ອສຸທ຺ຘາ ອປນີຕສາຣາ.

ເອວເມວ ໂຂຕິ ເອຕ຺ຖ ອິທໍ ໂອປມ຺ມສໍສນ຺ທນໍ – ສາລລຏ຺ຐິ ວິຍ ຫິ ອຕ຺ຕຠາໂວ ທຏ຺ຐພ຺ໂພ, ນທີໂສຕໍ ວິຍ ສໍສາຣໂສຕໍ, ປາຣໍ ຄນ຺ຕຸກາມປຸຣິໂສ ວິຍ ທ຺ວາສຏ຺ຐິ ທິຏ຺ຐິໂຍ ຄເຫຕ຺ວາ ຐິຕປຸຣິໂສ, ສາລລຏ຺ຐິຍາ ພຫິທ຺ຘາ ສຸປຣິກມ຺ມກຕກາໂລ ວິຍ ພຫິທ຺ຘາ ຕປຈຣຓໍ ຄາຬ຺ຫໍ ກຕ຺ວາ ຄຫິຕກາໂລ, ອນ຺ໂຕ ອສຸທ຺ຘກາໂລ ວິຍ ອພ຺ຠນ຺ຕເຣ ສີລານໍ ອປຣິສຸທ຺ຘກາໂລ, ສາລລຏ຺ຐິຍາ ສໍສີທິຕ຺ວາ ອໂຘຄມນໍ ວິຍ ທິຏ຺ຐິຄຕິກສ຺ສ ສໍສາຣໂສເຕ ສໍສີທນໍ ເວທິຕພ຺ພໍ.

ຜິຍາຣິຕ຺ຕໍ ພນ຺ເຘຍ຺ຍາຕິ ຜິຍຎ຺ຈ ອຣິຕ຺ຕຎ຺ຈ ໂຍເຊຍ຺ຍ. ເອວເມວາຕິ ເອຕ຺ຖາປິ ອິທໍ ໂອປມ຺ມສໍສນ຺ທນໍ – ສາລລຏ຺ຐິ ວິຍ ອຕ຺ຕຠາໂວ, ນທີໂສຕໍ ວິຍ ສໍສາຣໂສຕໍ, ປາຣໍ ຄນ຺ຕຸກາມປຸຣິໂສ ວິຍ ໂຍຄາວຈໂຣ, ພຫິທ຺ຘາ ສຸປຣິກມ຺ມກຕກາໂລ ວິຍ ຉສຸ ທ຺ວາເຣສຸ ສໍວຣສ຺ສ ປຈ຺ຈຸປຏ຺ຐິຕກາໂລ, ອນ຺ໂຕ ສຸວິໂສຘິຕຠາໂວ ວິຍ ອພ຺ຠນ຺ຕເຣ ປຣິສຸທ຺ຘສີລຠາໂວ, ຜິຍາຣິຕ຺ຕພນ຺ຘນໍ ວິຍ ກາຍິກເຈຕສິກວີຣິຍກຣຓໍ, ໂສຕ຺ຖິນາ ປາຣິມຕີຣຄມນໍ ວິຍ ອນຸປຸພ຺ເພນ ສີລໍ ປູເຣຕ຺ວາ ສມາຘິໍ ປູເຣຕ຺ວາ ປຎ຺ຎໍ ປູເຣຕ຺ວາ ນິພ຺ພານຄມນໍ ທຏ຺ຐພ຺ພໍ.

ກຓ຺ຑຈິຕ຺ຣການີຕິ ສຣລຏ຺ຐິສຣຣຊ຺ຊຸສຣປາສາທສຣສາຓິສຣໂປກ຺ຂຣຓິສຣປທຸມານີຕິ ອເນການິ ກຓ຺ເຑຫິ ກຕ຺ຕພ຺ພຈິຕ຺ຣານິ. ອຖ ໂຂ ໂສ ຕີຫິ ຐາເນຫີຕິ ໂສ ເອວໍ ພຫູນິ ກຓ຺ຑຈິຕ຺ຣການິ ຊານນ຺ໂຕປິ ນ ຣາຊາຣໂຫ ໂຫຕິ, ຕີຫິເຍວ ປນ ຐາເນຫິ ໂຫຕີຕິ ອຕ຺ໂຖ. ສມ຺ມາສມາຘິ ໂຫຕີຕິ ມຄ຺ຄສມາຘິນາ ຈ ຜລສມາຘິນາ ຈ ສມາຫິໂຕ ໂຫຕີຕິ ອຍເມຕ຺ຖ ອຕ຺ໂຖ. ສມ຺ມາທິຏ຺ຐີຕິ ມຄ຺ຄສມ຺ມາທິຏ຺ຐິຍາ ສມນ຺ນາຄໂຕ. ອິທໍ ທຸກ຺ຂນ຺ຕິອາທີຫິ ຈຕູຫິ ສຈ຺ເຈຫິ ຈຕ຺ຕາໂຣ ມຄ຺ຄາ ຕີຓິ ຈ ຜລານິ ກຖິຕານິ. ອຍໍ ປນ ມຄ຺ເຄເນວ ອວິຣາຘິຕໍ ວິຊ຺ຌຕິ ນາມາຕິ ເວທິຕພ຺ໂພ. ສມ຺ມາວິມຸຕ຺ຕີຕິ ອຣຫຕ຺ຕຜລວິມຸຕ຺ຕິຍາ ສມນ຺ນາຄໂຕ. ອວິຊ຺ຊາກ຺ຂນ຺ຘໍ ປທາເລຕີຕິ ອຣຫຕ຺ຕມຄ຺ເຄນ ປທາເລຕິ ນາມາຕິ ວຸຈ຺ຈຕິ. ອິມິນາ ຫິ ເຫຏ຺ຐາ ອຣຫຕ຺ຕມຄ຺ເຄນ ອວິຊ຺ຊາກ຺ຂນ຺ໂຘ ປທາລິໂຕ, ອິຘ ປນ ປທາລິຕໍ ອຸປາທາຍ ປທາເລຕີຕິ ວຕ຺ຕຸໍ ວຏ຺ຏຕີຕິ.