໗. ມລ຺ລິກາເທວີສຸຕ຺ຕວຓ຺ຓນາ

໑໙໗. ສຕ຺ຕເມ ມລ຺ລິກາ ເທວີຕິ ປເສນທິຣຎ຺ໂຎ ເທວີ. ເຍນ ມິເຘກຈ຺ໂຈ ມາຕຸຄາໂມຕິ ເຍນ ອິເຘກຈ຺ຈາ ອິຕ຺ຖີ. ທຸພ຺ພຓ຺ຓາຕິ ພີຠຈ຺ຉວຓ຺ຓາ. ທຸຣູປາຕິ ທຸສ຺ສຓ຺ຐິຕາ. ສຸປາປິກາຕິ ສຸຏ຺ຐຸ ປາປິກາ ສຸຏ຺ຐຸ ລາມິກາ. ທສ຺ສນາຍາຕິ ປສ຺ສິຕຸໍ. ທລິທ຺ທາຕິ ຘນທລິທ຺ທາ. ອປ຺ປສ຺ສກາຕິ ສເກນ ຘເນນ ຣຫິຕາ. ອປ຺ປໂຠຄາຕິ ອຸປໂຠຄປຣິໂຠຄຠຓ຺ຑກຣຫິຕາ. ອປ຺ເປສກ຺ຂາຕິ ອປ຺ປປຣິວາຣາ. ອຑ຺ຒາຕິ ອິສ຺ສຣາ. ມຫທ຺ຘນາຕິ ວຬຎ຺ຊນກຘເນນ ມຫທ຺ຘນາ. ມຫາໂຠຄາຕິ ອຸປໂຠຄປຣິໂຠຄຠຓ຺ຑໂຠເຄນ ມຫາໂຠຄາ. ມເຫສກ຺ຂາຕິ ມຫາປຣິວາຣາ. ອຠິຣູປາຕິ ອຸຕ຺ຕມຣູປາ. ທສ຺ສນີຍາຕິ ທສ຺ສນຍຸຕ຺ຕາ. ປາສາທິກາຕິ ທສ຺ສເນນ ປາສາທິກາ. ວຓ຺ຓໂປກ຺ຂຣຕາຍາຕິ ວຓ຺ເຓນ ເຈວ ສຣີຣສຓ຺ຐາເນນ ຈ.

ອຠິສຊ຺ຊຕີຕິ ລຄ຺ຄຕິ. ພ຺ຍາປຊ຺ຊຕີຕິ ປກຕິໍ ປຊຫຕິ. ປຕິຕ຺ຖີຍຕີຕິ ໂກຘວເສນ ຖິນຠາວໍ ຖທ຺ຘຠາວໍ ອາປຊ຺ຊຕິ. ນ ທາຕາ ໂຫຕີຕິ ນ ທາຍິກາ ໂຫຕິ. ເສຍ຺ຍາວສຖປທີເປຍ຺ຍນ຺ຕິ ເອຕ຺ຖ ເສຍ຺ຍາຕິ ມຎ຺ຈປລ຺ລງ຺ກາທິສຍນໍ. ອາວສໂຖຕິ ອາວສຖາຄາຣໍ. ປທີເປຍ຺ຍໍ ວຸຈ຺ຈຕິ ວຏ຺ຏິເຕລາທິປທີປູປກຣຓໍ. ອິສ຺ສາມນິກາຕິ ອິສ຺ສາຍ ສມ຺ປຍຸຕ຺ຕຈິຕ຺ຕາ. ອິມິນາ ນເຍນ ສພ຺ພຕ຺ຖ ອຕ຺ໂຖ ເວທິຕພ຺ໂພ. ໂກຘນາ ອໂຫສິນ຺ຕິ ໂກຘມນາ ອໂຫສິໍ. ອນິສ຺ສາມນິກາ ອໂຫສິນ຺ຕິ ອິສ຺ສາວິຣຫິຕຈິຕ຺ຕາ ອໂຫສິໍ. ເສສເມຕ຺ຖ ອຸຕ຺ຕານຕ຺ຖເມວາຕິ.