໔. ສາມຸຄິຍາສຸຕ຺ຕວຓ຺ຓນາ

໑໙໔. ຈຕຸຕ຺ເຖ ສາມຸຄິຍາຕິ ສາມຸຄນິຄມວາສິໂນ. ພ຺ຍຄ຺ຆປຊ຺ຊາຕິ ເຕ ອາລປນ຺ໂຕ ເອວມາຫ. ໂກລນຄຣສ຺ສ ຫິ ໂກລຣຸກ຺ເຂ ຫາເຣຕ຺ວາ ກຕຕ຺ຕາ ໂກລນຄຣນ຺ຕິ ຈ ພ຺ຍຄ຺ຆປເຖ ມາປິຕຕ຺ຕາ ພ຺ຍຄ຺ຆປຊ຺ຊນ຺ຕິ ຈ ທ຺ເວ ນາມານິ. ເອເຕສຎ຺ຈ ປຸພ຺ພປຸຣິສາ ຕຕ຺ຖ ວສິໍສູຕິ ພ຺ຍຄ຺ຆປຊ຺ຊວາສິຕາຍ ພ຺ຍຄ຺ຆປຊ຺ຊວາສິໂນ ພ຺ຍຄ຺ຆປຊ຺ຊາຕິ ວຸຈ຺ຈນ຺ຕິ. ເຕ ອາລປນ຺ໂຕ ເອວມາຫ. ປາຣິສຸທ຺ຘິປຘານິຍງ຺ຄານີຕິ ປາຣິສຸທ຺ຘິອຕ຺ຖາຍ ປຘານິຍງ຺ຄານິ ປທຫິຕພ຺ພວີຣິຍສ຺ສ ອງ຺ຄານິ, ໂກຏ຺ຐາສາຕິ ອຕ຺ໂຖ. ສີລປາຣິສຸທ຺ຘິປຘານິຍງ຺ຄນ຺ຕິ ສີລປຣິໂສຘນວີຣິຍສ຺ເສຕໍ ນາມໍ. ຕຎ຺ຫິ ສີລປາຣິສຸທ຺ຘິປຣິປູຣຓຕ຺ຖາຍ ປຘານິຍງ຺ຄນ຺ຕິ ສີລປາຣິສຸທ຺ຘິປຘານິຍງ຺ຄໍ. ເສເສສຸປິ ເອເສວ ນໂຍ. ຕຕ຺ຖ ຕຕ຺ຖ ປຎ຺ຎາຍ ອນຸຄ຺ຄເຫສ຺ສາມີຕິ ຕສ຺ມິໍ ຕສ຺ມິໍ ຐາເນ ວິປສ຺ສນາປຎ຺ຎາຍ ອນຸຄ຺ຄເຫສ຺ສາມິ. ໂຍ ຕຕ຺ຖ ຉນ຺ໂທຕິອາທີສຸ ໂຍ ຕສ຺ມິໍ ອນຸຄ຺ຄຓ຺ຫເນ ກຕ຺ຕຸກາມຕາຉນ຺ໂທຕິ ອິມິນາ ນເຍນ ອຕ຺ໂຖ ເວທິຕພ຺ໂພ. ສຕິສມ຺ປຊຎ຺ຎໍ ປເນຕ຺ຖ ສຕິໍ ອຸປຏ຺ຐເປຕ຺ວາ ຎາເຓນ ປຣິຈ຺ຉິນ຺ທິຕ຺ວາ ວີຣິຍປຄ຺ຄຫນຕ຺ຖໍ ວຸຕ຺ຕໍ. ຣຊນີເຍສຸ ຘມ຺ເມສຸ ຈິຕ຺ຕໍ ວິຣາເຊຕີຕິ ຣາຄປຈ຺ຈເຍສຸ ອິຏ຺ຐາຣມ຺ມເຓສຸ ຍຖາ ຈິຕ຺ຕໍ ວິຣຊ຺ຊຕິ, ເອວໍ ກໂຣຕິ. ວິໂມຈນີເຍສຸ ຘມ຺ເມສຸ ຈິຕ຺ຕໍ ວິໂມເຈຕີຕິ ເຍຫິ ອາຣມ຺ມເຓຫິ ຈິຕ຺ຕໍ ວິໂມເຈຕພ຺ພໍ, ເຕສຸ ຍຖາ ວິມຸຈ຺ຈຕິ, ເອວໍ ກໂຣຕິ. ວິຣາເຊຕ຺ວາຕິ ເອຕ຺ຖ ມຄ຺ຄກ຺ຂເຓ ວິຣາເຊຕິ ນາມ, ຜລກ຺ຂເຓ ວິຣຕ຺ຕໍ ນາມ ໂຫຕິ. ທຸຕິຍປເທປິ ເອເສວ ນໂຍ. ສມ຺ມາວິມຸຕ຺ຕິໍ ຜຸສຕີຕິ ເຫຕຸນາ ນເຍນ ອຣຫຕ຺ຕຜລວິມຸຕ຺ຕິໍ ຎາຓຜສ຺ເສນ ຜຸສຕີຕິ.