໑. ໂສຕານຸຄຕສຸຕ຺ຕວຓ຺ຓນາ

໑໙໑. ປຎ຺ຈມສ຺ສ ປຐເມ ໂສຕານຸຄຕານນ຺ຕິ ປສາທໂສຕໍ ໂອທຫິຕ຺ວາ ຎາຓໂສເຕນ ວວຕ຺ຖປິຕານໍ. ຈຕ຺ຕາໂຣ ອານິສໍສາ ປາຏິກງ຺ຂາຕິ ຈຕ຺ຕາໂຣ ຄຸຓານິສໍສາ ປາຏິກງ຺ຂິຕພ຺ພາ. ອິທໍ ປນ ຠຄວຕາ ອຕ຺ຖຸປ຺ປຕ຺ຕິວເສນ ອາຣທ຺ຘໍ. ກຕຣອຕ຺ຖຸປ຺ປຕ຺ຕິວເສນາຕິ? ຠິກ຺ຂູນໍ ຘມ຺ມສ຺ສວນາຍ ອນຸປສງ຺ກມນອຕ຺ຖຸປ຺ປຕ຺ຕິວເສນ. ປຎ຺ຈສຕາ ກິຣ ພ຺ຣາຫ຺ມຓປພ຺ພຊິຕາ ‘‘ສມ຺ມາສມ຺ພຸທ຺ໂຘ ລິງ຺ຄວຈນວິຠຕ຺ຕິປທພ຺ຍຎ຺ຊນາທີຫິ ກເຖນ຺ໂຕ ອມ຺ເຫຫິ ຎາຕເມວ ກເຖສ຺ສຕິ, ອຎ຺ຎາຕໍ ກິໍ ກເຖສ຺ສຕີ’’ຕິ ຘມ຺ມສ຺ສວນຕ຺ຖໍ ນ ຄຈ຺ຉນ຺ຕິ. ສຕ຺ຖາ ຕໍ ປວຕ຺ຕິໍ ສຸຕ຺ວາ ເຕ ປກ຺ໂກສາເປຕ຺ວາ ‘‘ກສ຺ມາ ເອວໍ ກໂຣຖ, ສກ຺ກຈ຺ຈໍ ຘມ຺ມໍ ສຸຓາຖ, ສກ຺ກຈ຺ຈໍ ຘມ຺ມໍ ສຸຓນ຺ຕານຎ຺ຈ ສຊ຺ຌາຍນ຺ຕານຎ຺ຈ ອິເມ ເອຕ຺ຕກາ ອານິສໍສາ’’ຕິ ທສ຺ເສນ຺ໂຕ ອິມໍ ເທສນໍ ອາຣຠິ.

ຕຕ຺ຖ ຘມ຺ມໍ ປຣິຍາປຸຓາຕີຕິ ສຸຕ຺ຕໍ ເຄຍ຺ຍນ຺ຕິອາທິກໍ ນວງ຺ຄໍ ສຕ຺ຖຸສາສນຠູຕໍ ຕນ຺ຕິຘມ຺ມໍ ວຬຎ຺ເຊຕິ. ໂສຕານຸຄຕາ ໂຫນ຺ຕີຕິ ໂສຕໍ ອນຸປ຺ປຕ຺ຕາ ອນຸປວິຏ຺ຐາ ໂຫນ຺ຕິ. ມນສານຸເປກ຺ຂິຕາຕິ ຈິຕ຺ເຕນ ໂອໂລກິຕາ. ທິຏ຺ຐິຍາ ສຸປ຺ປຏິວິທ຺ຘາຕິ ອຕ຺ຖໂຕ ຈ ກາຣຓໂຕ ຈ ປຎ຺ຎາຍ ສຸຏ຺ຐຸ ປຏິວິທ຺ຘາ ປຈ຺ຈກ຺ຂໍ ກຕາ. ມຸຏ຺ຐສ຺ສຕິ ກາລໍ ກຸຣຸມາໂນຕິ ນຍິທໍ ພຸທ຺ຘວຈນໍ ອນຸສ຺ສຣຓສຕິຍາ ອຠາເວນ ວຸຕ຺ຕໍ, ປຸຖຸຊ຺ຊນກາລກິຣິຍໍ ປນ ສນ຺ຘາຍ ວຸຕ຺ຕໍ. ປຸຖຸຊ຺ຊໂນ ຫິ ມຸຏ຺ຐສ຺ສຕິ ກາລໍ ກໂຣຕິ ນາມ. ອຸປປຊ຺ຊຕີຕິ ສຸທ຺ຘສີເລ ປຕິຏ຺ຐິໂຕ ເທວໂລເກ ນິພ຺ພຕ຺ຕຕິ. ຘມ຺ມປທາ ປ຺ລວນ຺ຕີຕິ ອນ຺ຕຣາຠເວ ນິພ຺ພຕ຺ຕມຸຏ຺ຐສ຺ສຕິໂນ, ເຍປິ ປຸພ຺ເພ ສຊ຺ຌາຍມູລິກາ ວາຈາປຣິຈິຕພຸທ຺ຘວຈນຘມ຺ມາ, ເຕ ສພ຺ເພ ປສນ຺ເນ ອາທາເສ ຉາຍາ ວິຍ ປ຺ລວນ຺ຕິ, ປາກຏາ ຫຸຕ຺ວາ ປຎ຺ຎາຍນ຺ຕິ. ທນ຺ໂຘ, ຠິກ຺ຂເວ, ສຕຸປ຺ປາໂທຕິ ພຸທ຺ຘວຈນານຸສ຺ສຣຓສຕິຍາ ອຸປ຺ປາໂທ ທນ຺ໂຘ ຄຣຸ. ອຖ ໂສ ສຕ຺ໂຕ ຂິປ຺ປໍເຍວ ວິເສສຄາມີ ໂຫຕິ, ນິພ຺ພານຄາມີ ໂຫຕີຕິ ອຕ຺ໂຖ.

ອິທ຺ຘິມາ ເຈໂຕວສິປ຺ປຕ຺ໂຕຕິ ອິທ຺ຘິສມ຺ປນ຺ໂນ ຈິຕ຺ຕສ຺ສ ວສິຠາວປຕ຺ໂຕ ຂີຓາສໂວ. ອຍໍ ວາ ໂສ ຘມ຺ມວິນໂຍຕິ ເອຕ຺ຖ ວິຠາວນຕ຺ໂຖ ວາ-ສທ຺ໂທ. ຍຕ຺ຖາຕິ ຍສ຺ມິໍ ຘມ຺ມວິນເຍ. ພ຺ຣຫ຺ມຈຣິຍໍ ອຈຣິນ຺ຕິ ພ຺ຣຫ຺ມຈຣິຍວາສໍ ວສິໍ. ອິທມ຺ປິ ພຸທ຺ຘວຈນໍ ມຍາ ປຸພ຺ເພ ວຬຎ຺ຊິຕນ຺ຕິ ພຸທ຺ຘວຈນານຸສ຺ສຣຓວເສເນຕໍ ວຸຕ຺ຕໍ. ເທວປຸຕ຺ໂຕຕິ ປຎ຺ຈາລຈຓ຺ໂຑ ວິຍ ຫຕ຺ຖກມຫາພ຺ຣຫ຺ມາ ວິຍ ສນງ຺ກຸມາຣພ຺ຣຫ຺ມາ ວິຍ ຈ ເອໂກ ຘມ຺ມກຖິກເທວປຸຕ຺ໂຕ. ໂອປປາຕິໂກ ໂອປປາຕິກໍ ສາເຣຕີຕິ ປຐມໍ ອຸປ຺ປນ຺ໂນ ເທວປຸຕ຺ໂຕ ປຈ຺ຉາ ອຸປ຺ປນ຺ນໍ ສາເຣຕິ. ສຫປໍສຸກີຬິກາຕິ ເອເຕນ ເນສໍ ທີຆຣຕ຺ຕໍ ກຕປຣິຈຍຠາວໍ ທສ຺ເສຕິ. ສມາຄຈ຺ເຉຍ຺ຍຸນ຺ຕິ ສາລາຍ ວາ ຣຸກ຺ຂມູເລ ວາ ສມ຺ມຸຂີຠາວໍ ຄຈ຺ເຉຍ຺ຍຸໍ. ເອວໍ ວເທຍ຺ຍາຕິ ສາລາຍ ວາ ຣຸກ຺ຂມູເລ ວາ ປຐມຕຣໍ ນິສິນ຺ໂນ ປຈ຺ຉາ ອາຄຕໍ ເອວໍ ວເທຍ຺ຍ. ເສສເມຕ຺ຖ ປາຬິນເຍເນວ ເວທິຕພ຺ພໍ.