໒. ຐານສຸຕ຺ຕວຓ຺ຓນາ

໑໙໒. ທຸຕິເຍ ຐານານີຕິ ກາຣຓານິ. ຐາເນຫີຕິ ກາຣເຓຫິ. ໂສເຈຍ຺ຍນ຺ຕິ ສຸຈິຠາໂວ. ສໍວສມາໂນຕິ ເອກໂຕ ວສມາໂນ. ນ ສນ຺ຕຕກາຣີຕິ ນ ສຕຕກາຣີ. ນ ສນ຺ຕຕວຸຕ຺ຕິ ສີເລສູຕິ ສຕຕໍ ສພ຺ພກາລໍ ສີລຊີວິຕໍ ນ ຊີວຕີຕິ ອຕ຺ໂຖ. ສໍໂວຫາຣມາໂນຕິ ກເຖນ຺ໂຕ. ເອເກນ ເອໂກ ໂວຫຣຕີຕິ ເອເກນ ສທ຺ຘິໍ ເອໂກ ຫຸຕ຺ວາ ກເຖຕິ. ໂວກ຺ກມຕີຕິ ໂອກ຺ກມຕິ. ປຸຣິມໂວຫາຣາ ປຈ຺ຉິມໂວຫາຣນ຺ຕິ ປຸຣິມກຖາຍ ປຈ຺ຉິມກຖໍ, ປຸຣິມກຖາຍ ຈ ປຈ຺ຉິມກຖາ, ປຈ຺ຉິມກຖາຍ ຈ ປຸຣິມກຖາ ນ ສເມຕີຕິ ອຕ຺ໂຖ.

ຎາຕິພ຺ຍສເນນາຕິອາທີສຸ ຎາຕີນໍ ພ຺ຍສນໍ ຎາຕິພ຺ຍສນໍ, ຎາຕິວິນາໂສຕິ ອຕ຺ໂຖ. ທຸຕິຍປເທປິ ເອເສວ ນໂຍ. ໂຣຄພ຺ຍສເນ ປນ ໂຣໂຄເຍວ ອາໂຣຄ຺ຍວິນາສນໂຕ ພ຺ຍສນໍ ໂຣຄພ຺ຍສນໍ. ອນຸປຣິວຕ຺ຕນ຺ຕີຕິ ອນຸພນ຺ຘນ຺ຕິ. ລາໂຠ ຈາຕິອາທີສຸ ເອກໍ ອຕ຺ຕຠາວໍ ລາໂຠ ອນຸປຣິວຕ຺ຕຕິ, ເອກໍ ອລາໂຠຕິ ເອວໍ ນໂຍ ເນຕພ຺ໂພ. ສາກຈ຺ຉາຍມາໂນຕິ ປຎ຺ຫປຸຈ຺ຉນວິສ຺ສຊ຺ຊນວເສນ ສາກຈ຺ຉໍ ກໂຣນ຺ໂຕ. ຍຖາຕິ ເຍນາກາເຣນ. ອຸມ຺ມຄ຺ໂຄຕິ ປຎ຺ຫຸມ຺ມຄ຺ໂຄ. ອຠິນີຫາໂຣຕິ ປຎ຺ຫາຠິສງ຺ຂຣຓວເສນ ຈິຕ຺ຕສ຺ສ ອຠິນີຫາໂຣ. ສມຸທາຫາໂຣຕິ ປຎ຺ຫປຸຈ຺ຉນໍ. ສນ຺ຕນ຺ຕິ ປຈ຺ຈນີກສນ຺ຕຕາຍ ສນ຺ຕໍ ກຕ຺ວາ ນ ກເຖຕີຕິ ອຕ຺ໂຖ. ປຓີຕນ຺ຕິ ອຕປ຺ປກໍ. ອຕກ຺ກາວຈຣນ຺ຕິ ຍຖາ ຕກ຺ເກນ ນຍຄ຺ຄາເຫນ ຄເຫຕຸໍ ສກ຺ກາ ໂຫຕິ, ເອວໍ ນ ກເຖຕີຕິ ອຕ຺ໂຖ. ນິປຸຓນ຺ຕິ ສຓ຺ຫໍ. ປຓ຺ຑິຕເວທນີຍນ຺ຕິ ປຓ຺ຑິເຕຫິ ຊານິຕພ຺ພກໍ. ເສສໍ ສພ຺ພຕ຺ຖ ວຸຕ຺ຕານຸສາເຣເນວ ເວທິຕພ຺ພໍ.