໒. ປຸຓ຺ຓິຍສຸຕ຺ຕໍ

໘໒. ອຖ ໂຂ ອາຍສ຺ມາ ປຸຓ຺ຓິໂຍ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ອາຍສ຺ມາ ປຸຓ຺ຓິໂຍ ຠຄວນ຺ຕໍ ເອຕທໂວຈ – ‘‘ໂກ ນຸ ໂຂ, ຠນ຺ເຕ, ເຫຕຸ ໂກ ປຈ຺ຈໂຍ ເຍນ ອປ຺ເປກທາ ຕຖາຄຕໍ ຘມ຺ມເທສນາ ປຏິຠາຕິ, ອປ຺ເປກທາ ນ ປຏິຠາຕີ’’ຕິ? ‘‘ສທ຺ໂຘ ຈ, ປຸຓ຺ຓິຍ, ຠິກ຺ຂຸ ໂຫຕິ, ໂນ ຈຸປສງ຺ກມິຕາ; ເນວ ຕຖາຄຕໍ ຘມ຺ມເທສນາ ປຏິຠາຕິ. ຍໂຕ ຈ ໂຂ, ປຸຓ຺ຓິຍ, ຠິກ຺ຂຸ ສທ຺ໂຘ ຈ ໂຫຕິ, ອຸປສງ຺ກມິຕາ ຈ; ເອວໍ ຕຖາຄຕໍ ຘມ຺ມເທສນາ ປຏິຠາຕິ. ສທ຺ໂຘ ຈ, ປຸຓ຺ຓິຍ, ຠິກ຺ຂຸ ໂຫຕິ, ອຸປສງ຺ກມິຕາ ຈ, ໂນ ຈ ປຍິຣຸປາສິຕາ…ເປ… ປຍິຣຸປາສິຕາ ຈ, ໂນ ຈ ປຣິປຸຈ຺ຉິຕາ… ປຣິປຸຈ຺ຉິຕາ ຈ, ໂນ ຈ ໂອຫິຕໂສໂຕ ຘມ຺ມໍ ສຸຓາຕິ… ໂອຫິຕໂສໂຕ ຈ ຘມ຺ມໍ ສຸຓາຕິ, ໂນ ຈ ສຸຕ຺ວາ ຘມ຺ມໍ ຘາເຣຕິ… ສຸຕ຺ວາ ຈ ຘມ຺ມໍ ຘາເຣຕິ, ໂນ ຈ ຘາຕານໍ ຘມ຺ມານໍ ອຕ຺ຖໍ ອຸປປຣິກ຺ຂຕິ… ຘາຕານຎ຺ຈ ຘມ຺ມານໍ ອຕ຺ຖໍ ອຸປປຣິກ຺ຂຕິ, ໂນ ຈ ອຕ຺ຖມຎ຺ຎາຍ ຘມ຺ມມຎ຺ຎາຍ ຘມ຺ມານຸຘມ຺ມປ຺ປຏິປນ຺ໂນ ໂຫຕິ. ເນວ ຕາວ ຕຖາຄຕໍ ຘມ຺ມເທສນາ ປຏິຠາຕິ.

‘‘ຍໂຕ ຈ ໂຂ, ປຸຓ຺ຓິຍ, ຠິກ຺ຂຸ ສທ຺ໂຘ ຈ ໂຫຕິ, ອຸປສງ຺ກມິຕາ ຈ, ປຍິຣຸປາສິຕາ ຈ, ປຣິປຸຈ຺ຉິຕາ ຈ, ໂອຫິຕໂສໂຕ ຈ ຘມ຺ມໍ ສຸຓາຕິ, ສຸຕ຺ວາ ຈ ຘມ຺ມໍ ຘາເຣຕິ, ຘາຕານຎ຺ຈ ຘມ຺ມານໍ ອຕ຺ຖໍ ອຸປປຣິກ຺ຂຕິ, ອຕ຺ຖມຎ຺ຎາຍ ຘມ຺ມມຎ຺ຎາຍ ຘມ຺ມານຸຘມ຺ມປ຺ປຏິປນ຺ໂນ ຈ ໂຫຕິ; ເອວໍ ຕຖາຄຕໍ ຘມ຺ມເທສນາ ປຏິຠາຕິ. ອິເມຫິ ໂຂ, ປຸຓ຺ຓິຍ, ອຏ຺ຐຫິ ຘມ຺ເມຫິ ສມນ຺ນາຄຕາ [ສມນ຺ນາຄໂຕ (ສີ. ປີ.), ສມນ຺ນາຄຕໍ (ສ຺ຍາ. ກ.)] ເອກນ຺ຕປຏິຠານາ [ເອກນ຺ຕປຏິຠານໍ (ສພ຺ພຕ຺ຖ) ອ. ນິ. ໑໐.໘໓ ປນ ປສ຺ສິຕພ຺ພໍ] ຕຖາຄຕໍ ຘມ຺ມເທສນາ ໂຫຕີ’’ຕິ. ທຸຕິຍໍ.