໓. ມູລກສຸຕ຺ຕໍ

໘໓. [ອ. ນິ. ໑໐.໕໘ ປສ຺ສິຕພ຺ພໍ] ‘‘ສເຈ, ຠິກ຺ຂເວ, ອຎ຺ຎຕິຕ຺ຖິຍາ ປຣິພ຺ພາຊກາ ເອວໍ ປຸຈ຺ເຉຍ຺ຍຸໍ – ‘ກິໍມູລກາ, ອາວຸໂສ, ສພ຺ເພ ຘມ຺ມາ, ກິໍສມ຺ຠວາ ສພ຺ເພ ຘມ຺ມາ, ກິໍສມຸທຍາ ສພ຺ເພ ຘມ຺ມາ, ກິໍສໂມສຣຓາ ສພ຺ເພ ຘມ຺ມາ, ກິໍປມຸຂາ ສພ຺ເພ ຘມ຺ມາ, ກິໍອຘິປເຕຍ຺ຍາ ສພ຺ເພ ຘມ຺ມາ, ກິໍອຸຕ຺ຕຣາ ສພ຺ເພ ຘມ຺ມາ, ກິໍສາຣາ ສພ຺ເພ ຘມ຺ມາ’ຕິ, ເອວໍ ປຸຏ຺ຐາ ຕຸມ຺ເຫ, ຠິກ຺ຂເວ, ເຕສໍ ອຎ຺ຎຕິຕ຺ຖິຍານໍ ປຣິພ຺ພາຊການໍ ກິນ຺ຕິ ພ຺ຍາກເຣຍ຺ຍາຖາ’’ຕິ? ‘‘ຠຄວໍມູລກາ ໂນ, ຠນ຺ເຕ, ຘມ຺ມາ, ຠຄວໍເນຕ຺ຕິກາ ຠຄວໍປຏິສຣຓາ. ສາຘຸ, ຠນ຺ເຕ, ຠຄວນ຺ຕໍເຍວ ປຏິຠາຕຸ ເອຕສ຺ສ ຠາສິຕສ຺ສ ອຕ຺ໂຖ. ຠຄວໂຕ ສຸຕ຺ວາ ຠິກ຺ຂູ ຘາເຣສ຺ສນ຺ຕີ’’ຕິ.

‘‘ເຕນ ຫິ, ຠິກ຺ຂເວ, ເທເສສ຺ສາມິ. ຕໍ ສຸຓາຖ, ສາຘຸກໍ ມນສິ ກໂຣຖ; ຠາສິສ຺ສາມີ’’ຕິ. ‘‘ເອວໍ, ຠນ຺ເຕ’’ຕິ ໂຂ ເຕ ຠິກ຺ຂູ ຠຄວໂຕ ປຈ຺ຈສ຺ໂສສຸໍ. ຠຄວາ ເອຕທໂວຈ – ‘‘ສເຈ, ຠິກ຺ຂເວ, ອຎ຺ຎຕິຕ຺ຖິຍາ ປຣິພ຺ພາຊກາ ເອວໍ ປຸຈ຺ເຉຍ຺ຍຸໍ – ‘ກິໍມູລກາ, ອາວຸໂສ, ສພ຺ເພ ຘມ຺ມາ, ກິໍສມ຺ຠວາ ສພ຺ເພ ຘມ຺ມາ, ກິໍສມຸທຍາ ສພ຺ເພ ຘມ຺ມາ, ກິໍສໂມສຣຓາ ສພ຺ເພ ຘມ຺ມາ, ກິໍປມຸຂາ ສພ຺ເພ ຘມ຺ມາ, ກິໍອຘິປເຕຍ຺ຍາ ສພ຺ເພ ຘມ຺ມາ, ກິໍອຸຕ຺ຕຣາ ສພ຺ເພ ຘມ຺ມາ, ກິໍສາຣາ ສພ຺ເພ ຘມ຺ມາ’ຕິ, ເອວໍ ປຸຏ຺ຐາ ຕຸມ຺ເຫ, ຠິກ຺ຂເວ, ເຕສໍ ອຎ຺ຎຕິຕ຺ຖິຍານໍ ປຣິພ຺ພາຊການໍ ເອວໍ ພ຺ຍາກເຣຍ຺ຍາຖ – ‘ຉນ຺ທມູລກາ, ອາວຸໂສ, ສພ຺ເພ ຘມ຺ມາ, ມນສິກາຣສມ຺ຠວາ ສພ຺ເພ ຘມ຺ມາ, ຜສ຺ສສມຸທຍາ ສພ຺ເພ ຘມ຺ມາ, ເວທນາສໂມສຣຓາ ສພ຺ເພ ຘມ຺ມາ, ສມາຘິປ຺ປມຸຂາ ສພ຺ເພ ຘມ຺ມາ, ສຕາຘິປເຕຍ຺ຍາ ສພ຺ເພ ຘມ຺ມາ, ປຎ຺ຎຸຕ຺ຕຣາ ສພ຺ເພ ຘມ຺ມາ, ວິມຸຕ຺ຕິສາຣາ ສພ຺ເພ ຘມ຺ມາ’ຕິ, ເອວໍ ປຸຏ຺ຐາ ຕຸມ຺ເຫ, ຠິກ຺ຂເວ, ເຕສໍ ອຎ຺ຎຕິຕ຺ຖິຍານໍ ປຣິພ຺ພາຊການໍ ເອວໍ ພ຺ຍາກເຣຍ຺ຍາຖາ’’ຕິ. ຕຕິຍໍ.