೬. ಜೋತಿಸಿಕ್ಖಾಪದವಣ್ಣನಾ

ಅಗಿಲಾನೋತಿ ಯಸ್ಸ ವಿನಾ ಅಗ್ಗಿನಾ ಫಾಸು ಹೋತಿ, ಸೋ ಇಧ ಅಗಿಲಾನೋ ನಾಮ. ಜೋತಿನ್ತಿ ಅಗ್ಗಿಂ.

ಭಗ್ಗೇಸೂತಿ ಏವಂನಾಮಕೇ ಜನಪದೇ. ಭಗ್ಗಾನಾಮ ಜಾನಪದಿನೋ ರಾಜಕುಮಾರಾ, ತೇಸಂ ನಿವಾಸೋ ಏಕೋಪಿ ಜನಪದೋ ರುಳ್ಹಿಸದ್ದೇನ ‘‘ಭಗ್ಗಾ’’ತಿ ವುಚ್ಚತಿ. ತೇನ ವುತ್ತಂ ‘‘ಭಗ್ಗೇಸೂತಿ ಏವಂನಾಮಕೇ ಜನಪದೇ’’ತಿ. ತಥಾ ಪತಿಲಾತಂ ಉಕ್ಖಿಪನ್ತಸ್ಸಾತಿ ಡಯ್ಹಮಾನಂ ಅಲಾತಂ ಪತಿತಂ ಉಕ್ಖಿಪನ್ತಸ್ಸ ತಥಾ ದುಕ್ಕಟನ್ತಿ ಅತ್ಥೋ. ತಞ್ಚಾತಿ ದುಕ್ಕಟಂ ಪರಾಮಸತಿ. ಅವಿಜ್ಝಾತನ್ತಿ ಅನಿಬ್ಬುತಾಲಾತಂ. ಪದೀಪಜೋತಿಕಜನ್ತಾಘರೇತಿ ಪದೀಪುಜ್ಜಲನಪತ್ತಪಚನಸೇದಕಮ್ಮಾದೀಸು ಜೋತಿಕರಣೇ ಅಗ್ಗಿಸಾಲಾಯಞ್ಚ ಸಮಾದಹನ್ತಸ್ಸ ಅನಾಪತ್ತೀತಿ ಅತ್ಥೋ. ತಥಾರೂಪಪ್ಪಚ್ಚಯೇತಿ ಠಪೇತ್ವಾ ಪದೀಪಾದೀನಿ ಅಞ್ಞಸ್ಮಿಮ್ಪಿ ತಥಾರೂಪಪಚ್ಚಯೇ. ಆಪದಾಸೂತಿ ದುಟ್ಠವಾಳಮಿಗಅಮನುಸ್ಸೇಹಿ ಉಪದ್ದವೇಸು.

ಜೋತಿಸಿಕ್ಖಾಪದವಣ್ಣನಾ ನಿಟ್ಠಿತಾ.