೯. ಪರಿಪಾಚಿತಸಿಕ್ಖಾಪದವಣ್ಣನಾ

ಪರಿಪಾಚಿತನ್ತಿ ಪರಿಪಾಕಮಾಪಾದಿತಂ, ಯಥಾ ಲಭತಿ, ತಥಾ ಕತ್ವಾ ಠಪಿತನ್ತಿ ವುತ್ತಂ ಹೋತಿ. ತೇನಾಹ ‘‘ನೇವ ತಸ್ಸಾ’’ತಿಆದಿ ತಸ್ಸಾತಿ ಯೋ ಪರಿಭುಞ್ಜೇಯ್ಯ, ತಸ್ಸ ಭಿಕ್ಖುನೋ. ಭಿಕ್ಖುಸ್ಸ ಗುಣಂ ಪಕಾಸೇತ್ವಾತಿ ‘‘ಅಯ್ಯೋ ಭಾಣಕೋ, ಅಯ್ಯೋ ಬಹುಸ್ಸುತೋ’’ತಿಆದಿನಾ (ಪಾಚಿ. ೧೯೫) ಗುಣಂ ಪಕಾಸೇತ್ವಾ. ಪಿಣ್ಡಪಾತನ್ತಿ ಪಞ್ಚನ್ನಂ ಭೋಜನಾನಂ ಅಞ್ಞತರಂ. ಕಮ್ಮಸಾಧನೋಯಂ ಸಮಾರಮ್ಭಸದ್ದೋತಿ ಆಹ ‘‘ಸಮಾರದ್ಧ’’ನ್ತಿ. ಪಟಿಯಾದಿತಸ್ಸಾತಿ ಸಮ್ಪಾದಿತಸ್ಸ. ಯಸ್ಮಾ ಞಾತಕಪ್ಪವಾರಿತೇಹಿ ಭಿಕ್ಖುಸ್ಸ ಅತ್ಥಾಯ ಅಸಮಾರದ್ಧೋಪಿ ಪಿಣ್ಡಪಾತೋ ಅತ್ಥತೋ ಸಮಾರದ್ಧೋವ ಹೋತಿ ಯಥಾಸುಖಂ ಹರಾಪೇತಬ್ಬತೋ, ತಸ್ಮಾ ‘‘ಞಾತಕಪ್ಪವಾರಿತಾನಂ ವಾ ಸನ್ತಕ’’ನ್ತಿ ವುತ್ತಂ.

ಉಭಯತ್ಥಾತಿ ಪರಿಪಾಚಿತಾಪರಿಪಾಚಿತೇಸು. ಅವಸೇಸೇತಿ ಭಿಕ್ಖುನಿಪರಿಪಾಚಿತೇಪಿ ಯಾಗುಖಜ್ಜಕಫಲಾಫಲಾದಿಕೇ ಸಬ್ಬತ್ಥ. ನಿಮಿತ್ತೋಭಾಸಪರಿಕಥಾವಿಞ್ಞತ್ತಿವಸೇನ ಪನ ಅವಸೇಸೇಪಿ ದುಕ್ಕಟತೋ ನ ಮುಚ್ಚತಿ.

ಪರಿಪಾಚಿತಸಿಕ್ಖಾಪದವಣ್ಣನಾ ನಿಟ್ಠಿತಾ.