೨. ಸಹಜಾತವಾರವಣ್ಣನಾ

೨೩೪-೨೪೨. ಕುಸಲಂ ಧಮ್ಮಂ ಸಹಜಾತೋ, ಕುಸಲಂ ಏಕಂ ಖನ್ಧಂ ಸಹಜಾತೋತಿಆದೀಸು ಸಹಜಾತಸದ್ದೇನ ಸಹಜಾತಪಚ್ಚಯಕರಣಂ ಸಹಜಾತಾಯತ್ತಭಾವಗಮನಂ ವಾ ವುತ್ತನ್ತಿ ತಸ್ಸ ಕರಣಸ್ಸ ಗಮನಸ್ಸ ವಾ ಕುಸಲಾದೀನಂ ಕಮ್ಮಭಾವತೋ ಉಪಯೋಗವಚನಂ ಕತನ್ತಿ ದಟ್ಠಬ್ಬಂ. ಏಸ ನಯೋ ಪಚ್ಚಯವಾರಾದೀಸುಪಿ. ತತ್ರಾಪಿ ಹಿ ಪಚ್ಚಯಸದ್ದೇನ ಚ ನಿಸ್ಸಯಪಚ್ಚಯಕರಣಂ ನಿಸ್ಸಯಾಯತ್ತಭಾವಗಮನಂ ವಾ ವುತ್ತಂ, ಸಂಸಟ್ಠಸದ್ದೇನ ಚ ಸಮ್ಪಯುತ್ತಪಚ್ಚಯಕರಣಂ ಸಮ್ಪಯುತ್ತಾಯತ್ತಭಾವಗಮನಂ ವಾತಿ ತಂಕಮ್ಮಭಾವತೋ ಉಪಯೋಗವಚನಂ ಕುಸಲಾದೀಸು ಕತನ್ತಿ. ಸಹಜಾತಮ್ಪಿ ಚ ಉಪಾದಾರೂಪಂ ಭೂತರೂಪಸ್ಸ ಪಚ್ಚಯೋ ನ ಹೋತೀತಿ ‘‘ಪಟಿಚ್ಚಾ’’ತಿ ಇಮಿನಾ ವಚನೇನ ದೀಪಿತೋ ಪಚ್ಚಯೋ ನ ಹೋತೀತಿ ಅತ್ಥೋ. ‘‘ಉಪಾದಾರೂಪಂ ಭೂತರೂಪಸ್ಸಾ’’ತಿ ಚ ನಿದಸ್ಸನವಸೇನ ವುತ್ತಂ. ಉಪಾದಾರೂಪಸ್ಸಪಿ ಹಿ ಉಪಾದಾರೂಪಂ ಯಥಾವುತ್ತೋ ಪಚ್ಚಯೋ ನ ಹೋತಿ, ವತ್ಥುವಜ್ಜಾನಿ ರೂಪಾನಿ ಚ ಅರೂಪಾನನ್ತಿ.

ಸಹಜಾತವಾರವಣ್ಣನಾ ನಿಟ್ಠಿತಾ.