೪೧೬. ಪರನ್ತಪಜಾತಕಂ (೭-೨-೧೧)

೧೫೪. ಆಗಮಿಸ್ಸತಿ ಮೇ ಪಾಪಂ, ಆಗಮಿಸ್ಸತಿ ಮೇ ಭಯಂ;

ತದಾ ಹಿ ಚಲಿತಾ ಸಾಖಾ, ಮನುಸ್ಸೇನ ಮಿಗೇನ ವಾ.

೧೫೫. ಭೀರುಯಾ ನೂನ ಮೇ ಕಾಮೋ, ಅವಿದೂರೇ ವಸನ್ತಿಯಾ;

ಕರಿಸ್ಸತಿ ಕಿಸಂ ಪಣ್ಡುಂ, ಸಾವ ಸಾಖಾ ಪರನ್ತಪಂ.

೧೫೬. ಸೋಚಯಿಸ್ಸತಿ ಮಂ ಕನ್ತಾ, ಗಾಮೇ ವಸಮನಿನ್ದಿತಾ;

ಕರಿಸ್ಸತಿ ಕಿಸಂ ಪಣ್ಡುಂ, ಸಾವ ಸಾಖಾ ಪರನ್ತಪಂ.

೧೫೭. ತಯಾ ಮಂ ಅಸಿತಾಪಙ್ಗಿ [ಹಸಿತಾಪಙ್ಗಿ (ಸೀ. ಸ್ಯಾ. ಪೀ.)], ಸಿತಾನಿ [ಮಿಹಿತಾನಿ (ಸೀ. ಸ್ಯಾ. ಪೀ.)] ಭಣಿತಾನಿ ಚ;

ಕಿಸಂ ಪಣ್ಡುಂ ಕರಿಸ್ಸನ್ತಿ, ಸಾವ ಸಾಖಾ ಪರನ್ತಪಂ.

೧೫೮. ಅಗಮಾ ನೂನ ಸೋ ಸದ್ದೋ, ಅಸಂಸಿ ನೂನ ಸೋ ತವ;

ಅಕ್ಖಾತಂ ನೂನ ತಂ ತೇನ, ಯೋ ತಂ ಸಾಖಮಕಮ್ಪಯಿ.

೧೫೯. ಇದಂ ಖೋ ತಂ ಸಮಾಗಮ್ಮ, ಮಮ ಬಾಲಸ್ಸ ಚಿನ್ತಿತಂ;

ತದಾ ಹಿ ಚಲಿತಾ ಸಾಖಾ, ಮನುಸ್ಸೇನ ಮಿಗೇನ ವಾ.

೧೬೦. ತಥೇವ ತ್ವಂ ಅವೇದೇಸಿ, ಅವಞ್ಚಿ [ಅವಜ್ಝಿ (ಕ.)] ಪಿತರಂ ಮಮ;

ಹನ್ತ್ವಾ ಸಾಖಾಹಿ ಛಾದೇನ್ತೋ, ಆಗಮಿಸ್ಸತಿ ಮೇ [ತೇ (ಸ್ಯಾ. ಕ.)] ಭಯನ್ತಿ.

ಪರನ್ತಪಜಾತಕಂ ಏಕಾದಸಮಂ.

ಗನ್ಧಾರವಗ್ಗೋ ದುತಿಯೋ.

ತಸ್ಸುದ್ದಾನಂ –

ವರಗಾಮ ಮಹಾಕಪಿ ಭಗ್ಗವ ಚ, ದಳ್ಹಧಮ್ಮ ಸಕುಞ್ಜರ ಕೇಸವರೋ;

ಉರಗೋ ವಿಧುರೋ ಪುನ ಜಾಗರತಂ, ಅಥ ಕೋಸಲಾಧಿಪ ಪರನ್ತಪ ಚಾತಿ.

ಅಥ ವಗ್ಗುದ್ದಾನಂ –

ಅಥ ಸತ್ತನಿಪಾತಮ್ಹಿ, ವಗ್ಗಂ ಮೇ ಭಣತೋ ಸುಣ;

ಕುಕ್ಕು ಚ ಪುನ ಗನ್ಧಾರೋ, ದ್ವೇವ ಗುತ್ತಾ ಮಹೇಸಿನಾತಿ.

ಸತ್ತಕನಿಪಾತಂ ನಿಟ್ಠಿತಂ.