ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ

ಖುದ್ದಕನಿಕಾಯೇ

ಜಾತಕಪಾಳಿ

(ಪಠಮೋ ಭಾಗೋ)

೧. ಏಕಕನಿಪಾತೋ

೧. ಅಪಣ್ಣಕವಗ್ಗೋ

೧. ಅಪಣ್ಣಕಜಾತಕಂ

೧. ಅಪಣ್ಣಕಂ ಠಾನಮೇಕೇ, ದುತಿಯಂ ಆಹು ತಕ್ಕಿಕಾ;

ಏತದಞ್ಞಾಯ ಮೇಧಾವೀ, ತಂ ಗಣ್ಹೇ ಯದಪಣ್ಣಕನ್ತಿ [ತಂ ಗಣ್ಹೇಯ್ಯ ಅಪಣ್ಣಕಂ (ಕ.)].

ಅಪಣ್ಣಕಜಾತಕಂ ಪಠಮಂ.

೨. ವಣ್ಣುಪಥಜಾತಕಂ

೨. ಅಕಿಲಾಸುನೋ ವಣ್ಣುಪಥೇ [ವಣ್ಣಪಥೇ (ಕ.)] ಖಣನ್ತಾ, ಉದಙ್ಗಣೇ ತತ್ಥ ಪಪಂ ಅವಿನ್ದುಂ;

ಏವಂ ಮುನೀ ವೀರಿಯ [ಮುನಿ ವಿರಿಯ (ಪೀ.), ಮುನಿ ವೀರಿಯ (ಸ್ಯಾ. ಕ.)] ಬಲೂಪಪನ್ನೋ, ಅಕಿಲಾಸು ವಿನ್ದೇ ಹದಯಸ್ಸ ಸನ್ತಿನ್ತಿ.

ವಣ್ಣುಪಥಜಾತಕಂ ದುತಿಯಂ.

೩. ಸೇರಿವವಾಣಿಜಜಾತಕಂ

೩. ಇಧ ಚೇ ನಂ [ಇಧ ಚೇ ಹಿ ನಂ (ಸೀ. ಪೀ.)] ವಿರಾಧೇಸಿ, ಸದ್ಧಮ್ಮಸ್ಸ ನಿಯಾಮತಂ [ನಿಯಾಮಕಂ (ಸ್ಯಾ. ಕ.)];

ಚಿರಂ ತ್ವಂ ಅನುತಪ್ಪೇಸಿ [ಅನುತಪೇಸ್ಸಸಿ (ಸೀ. ಪೀ.), ಅನುತಪ್ಪಿಸ್ಸಸಿ (?)], ಸೇರಿವಾಯಂವ ವಾಣಿಜೋತಿ.

ಸೇರಿವವಾಣಿಜಜಾತಕಂ ತತಿಯಂ.

೪. ಚೂಳಸೇಟ್ಠಿಜಾತಕಂ

೪. ಅಪ್ಪಕೇನಪಿ ಮೇಧಾವೀ, ಪಾಭತೇನ ವಿಚಕ್ಖಣೋ;

ಸಮುಟ್ಠಾಪೇತಿ ಅತ್ತಾನಂ, ಅಣುಂ ಅಗ್ಗಿಂವ ಸನ್ಧಮನ್ತಿ.

ಚೂಳ [ಚುಲ್ಲ (ಸೀ.), ಚುಲ್ಲಕ (ಸ್ಯಾ. ಪೀ.)] ಸೇಟ್ಠಿಜಾತಕಂ ಚತುತ್ಥಂ.

೫. ತಣ್ಡುಲನಾಳಿಜಾತಕಂ

೫. [ಕಿಮಗ್ಘತೀ ತಣ್ಡುಲನಾಳಿಕಾ ಚ, ಬಾರಾಣಸೀ ಅನ್ತರಬಾಹಿರಾನಿ; ಅಸ್ಸಪಞ್ಚಸತೇ ತಾನಿ, ಏಕಾ ತಣ್ಡುಲನಾಳಿಕಾತಿ; (ಸ್ಯಾ.)] ಕಿಮಗ್ಘತಿ ತಣ್ಡುಲನಾಳಿಕಾಯ, ಅಸ್ಸಾನ ಮೂಲಾಯ ವದೇಹಿ ರಾಜ [ನಾಳಿಕಾ ಚ (ಸೀ.), ನಾಳಿಕಾಯ (ಕ. ಸೀ. ಅಟ್ಠ.)];

ಬಾರಾಣಸಿಂ ಸನ್ತರಬಾಹಿರತೋ [ಬಾಹಿರನ್ತಂ (ಸೀ.)], ಅಯಮಗ್ಘತಿ ತಣ್ಡುಲನಾಳಿಕಾತಿ [ಕಿಮಗ್ಘತೀ ವಣ್ಡುಲನಾಳಿಕಾ ಚ, ಬಾರಾಣಸೀ ಅನ್ತರಬಾಹಿರಾನಿ; ಅಸ್ಸಪಞ್ಚಸತೇ ತಾನಿ, ಏಕಾ ತಣ್ಡುಲನಾಳಿಕಾತಿ; (ಸ್ಯಾ.)].

ತಣ್ಡುಲನಾಳಿಜಾತಕಂ ಪಞ್ಚಮಂ.

೬. ದೇವಧಮ್ಮಜಾತಕಂ

೬. ಹಿರಿಓತ್ತಪ್ಪಸಮ್ಪನ್ನಾ, ಸುಕ್ಕಧಮ್ಮಸಮಾಹಿತಾ;

ಸನ್ತೋ ಸಪ್ಪುರಿಸಾ ಲೋಕೇ, ದೇವಧಮ್ಮಾತಿ ವುಚ್ಚರೇತಿ.

ದೇವಧಮ್ಮಜಾತಕಂ ಛಟ್ಠಂ.

೭. ಕಟ್ಠಹಾರಿಜಾತಕಂ

೭. ಪುತ್ತೋ ತ್ಯಾಹಂ ಮಹಾರಾಜ, ತ್ವಂ ಮಂ ಪೋಸ ಜನಾಧಿಪ;

ಅಞ್ಞೇಪಿ ದೇವೋ ಪೋಸೇತಿ, ಕಿಞ್ಚ [ಕಿಞ್ಚಿ (ಕ.)] ದೇವೋ ಸಕಂ ಪಜನ್ತಿ.

ಕಟ್ಠಹಾರಿ [ಕಟ್ಠವಾಹನ (ಕ.)] ಜಾತಕಂ ಸತ್ತಮಂ.

೮. ಗಾಮಣಿಜಾತಕಂ

೮. ಅಪಿ ಅತರಮಾನಾನಂ, ಫಲಾಸಾವ ಸಮಿಜ್ಝತಿ;

ವಿಪಕ್ಕಬ್ರಹ್ಮಚರಿಯೋಸ್ಮಿ, ಏವಂ ಜಾನಾಹಿ ಗಾಮಣೀತಿ.

ಗಾಮಣಿಜಾತಕಂ ಅಟ್ಠಮಂ.

೯. ಮಘದೇವಜಾತಕಂ

೯. ಉತ್ತಮಙ್ಗರುಹಾ ಮಯ್ಹಂ, ಇಮೇ ಜಾತಾ ವಯೋಹರಾ;

ಪಾತುಭೂತಾ ದೇವದೂತಾ, ಪಬ್ಬಜ್ಜಾಸಮಯೋ ಮಮಾತಿ.

ಮಘದೇವ [ಮಖಾದೇವ (ಸೀ. ಪೀ.), ದೇವದೂತ (ಕ.)] ಜಾತಕಂ ನವಮಂ.

೧೦. ಸುಖವಿಹಾರಿಜಾತಕಂ

೧೦. ಯಞ್ಚ ಅಞ್ಞೇ ನ ರಕ್ಖನ್ತಿ, ಯೋ ಚ ಅಞ್ಞೇ ನ ರಕ್ಖತಿ;

ಸ ವೇ ರಾಜ ಸುಖಂ ಸೇತಿ, ಕಾಮೇಸು ಅನಪೇಕ್ಖವಾತಿ.

ಸುಖವಿಹಾರಿಜಾತಕಂ ದಸಮಂ.

ಅಪಣ್ಣಕವಗ್ಗೋ ಪಠಮೋ.

ತಸ್ಸುದ್ದಾನಂ –

ವರಾಪಣ್ಣಕ ವಣ್ಣುಪಥ ಸೇರಿವರೋ, ಸುವಿಚಕ್ಖಣ ತಣ್ಡುಲನಾಳಿಕಸ್ಸಾ;

ಹಿರಿ ಪುತ್ತವರುತ್ತಗಾಮಣಿನಾ, ಯೋ ಚ ನ ರಕ್ಖತಿ ತೇನ ದಸಾತಿ.

೨. ಸೀಲವಗ್ಗೋ

೧೧. ಲಕ್ಖಣಮಿಗಜಾತಕಂ

೧೧. ಹೋತಿ ಸೀಲವತಂ ಅತ್ಥೋ, ಪಟಿಸನ್ಥಾರ [ಪಟಿಸನ್ಧಾರ (ಕ.)] ವುತ್ತಿನಂ;

ಲಕ್ಖಣಂ ಪಸ್ಸ ಆಯನ್ತಂ, ಞಾತಿಸಙ್ಘಪುರಕ್ಖತಂ [ಪುರಕ್ಖಿತಂ (ಸ್ಯಾ.), ಪುರೇಕ್ಖಿತಂ (ಕ.)];

ಅಥ ಪಸ್ಸಸಿಮಂ ಕಾಳಂ, ಸುವಿಹೀನಂವ ಞಾತಿಭೀತಿ.

ಲಕ್ಖಣಮಿಗಜಾತಕಂ ಪಠಮಂ.

೧೨. ನಿಗ್ರೋಧಮಿಗಜಾತಕಂ

೧೨. ನಿಗ್ರೋಧಮೇವ ಸೇವೇಯ್ಯ, ನ ಸಾಖಮುಪಸಂವಸೇ;

ನಿಗ್ರೋಧಸ್ಮಿಂ ಮತಂ ಸೇಯ್ಯೋ, ಯಞ್ಚೇ ಸಾಖಸ್ಮಿ [ಸಾಖಸ್ಮಿಂ (ಸೀ. ಪೀ.)] ಜೀವಿತನ್ತಿ.

ನಿಗ್ರೋಧಮಿಗಜಾತಕಂ ದುತಿಯಂ.

೧೩. ಕಣ್ಡಿಜಾತಕಂ

೧೩. ಧಿರತ್ಥು ಕಣ್ಡಿನಂ ಸಲ್ಲಂ, ಪುರಿಸಂ ಗಾಳ್ಹವೇಧಿನಂ;

ಧಿರತ್ಥು ತಂ ಜನಪದಂ, ಯತ್ಥಿತ್ಥೀ ಪರಿಣಾಯಿಕಾ;

ತೇ ಚಾಪಿ ಧಿಕ್ಕಿತಾ [ಧಿಕ್ಕತಾ (?)] ಸತ್ತಾ, ಯೇ ಇತ್ಥೀನಂ ವಸಂಗತಾತಿ.

ಕಣ್ಡಿಜಾತಕಂ ತತಿಯಂ.

೧೪. ವಾತಮಿಗಜಾತಕಂ

೧೪. ನ ಕಿರತ್ಥಿ ರಸೇಹಿ ಪಾಪಿಯೋ, ಆವಾಸೇಹಿ ವ [ವಾ (ಸಬ್ಬತ್ಥ)] ಸನ್ಥವೇಹಿ ವಾ;

ವಾತಮಿಗಂ ಗಹನನಿಸ್ಸಿತಂ [ಗೇಹನಿಸ್ಸಿತಂ (ಸೀ. ಪೀ.)], ವಸಮಾನೇಸಿ ರಸೇಹಿ ಸಞ್ಜಯೋತಿ.

ವಾತಮಿಗಜಾತಕಂ ಚತುತ್ಥಂ.

೧೫. ಖರಾದಿಯಜಾತಕಂ

೧೫. ಅಟ್ಠಕ್ಖುರಂ ಖರಾದಿಯೇ, ಮಿಗಂ ವಙ್ಕಾತಿವಙ್ಕಿನಂ;

ಸತ್ತಹಿ ಕಾಲಾತಿಕ್ಕನ್ತಂ [ಸತ್ತಹಿ ಕಲಾಹ’ತಿಕ್ಕನ್ತಂ (ಸೀ.), ಸತ್ತಕಾಲೇಹ’ತಿಕ್ಕನ್ತಂ (ಸ್ಯಾ.), ಸತ್ತಹಿ ಕಾಲಾಹ’ತಿಕ್ಕನ್ತಂ (ಪೀ.)], ನ ನಂ ಓವದಿತುಸ್ಸಹೇತಿ.

ಖರಾದಿಯಜಾತಕಂ ಪಞ್ಚಮಂ.

೧೬. ತಿಪಲ್ಲತ್ಥಮಿಗಜಾತಕಂ

೧೬. ಮಿಗಂ ತಿಪಲ್ಲತ್ಥ [ತಿಪಲ್ಲತ್ತ (ಕ.)] ಮನೇಕಮಾಯಂ, ಅಟ್ಠಕ್ಖುರಂ ಅಡ್ಢರತ್ತಾಪಪಾಯಿಂ [ಅಡ್ಢರತ್ತಾವಪಾಯಿಂ (ಸೀ. ಪೀ.)];

ಏಕೇನ ಸೋತೇನ ಛಮಾಸ್ಸಸನ್ತೋ, ಛಹಿ ಕಲಾಹಿತಿಭೋತಿ [ಕಲಾಹತಿಭೋತಿ (ಸೀ. ಸ್ಯಾ. ಪೀ.)] ಭಾಗಿನೇಯ್ಯೋತಿ.

ತಿಪಲ್ಲತ್ಥಮಿಗಜಾತಕಂ ಛಟ್ಠಂ.

೧೭. ಮಾಲುತಜಾತಕಂ

೧೭. ಕಾಳೇ ವಾ ಯದಿ ವಾ ಜುಣ್ಹೇ, ಯದಾ ವಾಯತಿ ಮಾಲುತೋ;

ವಾತಜಾನಿ ಹಿ ಸೀತಾನಿ, ಉಭೋತ್ಥಮಪರಾಜಿತಾತಿ.

ಮಾಲುತಜಾತಕಂ ಸತ್ತಮಂ.

೧೮. ಮತಕಭತ್ತಜಾತಕಂ

೧೮. ಏವಂ ಚೇ ಸತ್ತಾ ಜಾನೇಯ್ಯುಂ, ದುಕ್ಖಾಯಂ ಜಾತಿಸಮ್ಭವೋ;

ನ ಪಾಣೋ ಪಾಣಿನಂ ಹಞ್ಞೇ, ಪಾಣಘಾತೀ ಹಿ ಸೋಚತೀತಿ.

ಮತಕಭತ್ತಜಾತಕಂ ಅಟ್ಠಮಂ.

೧೯. ಆಯಾಚಿತಭತ್ತಜಾತಕಂ

೧೯. ಸಚೇ ಮುಚ್ಚೇ [ಮುಞ್ಚೇ (ಸೀ. ಸ್ಯಾ. ಪೀ.)] ಪೇಚ್ಚ ಮುಚ್ಚೇ [ಮುಞ್ಚೇ (ಸೀ. ಸ್ಯಾ. ಪೀ.)], ಮುಚ್ಚಮಾನೋ ಹಿ ಬಜ್ಝತಿ;

ನ ಹೇವಂ ಧೀರಾ ಮುಚ್ಚನ್ತಿ, ಮುತ್ತಿ ಬಾಲಸ್ಸ ಬನ್ಧನನ್ತಿ.

ಆಯಾಚಿತಭತ್ತಜಾತಕಂ ನವಮಂ.

೨೦. ನಳಪಾನಜಾತಕಂ

೨೦. ದಿಸ್ವಾ ಪದಮನುತ್ತಿಣ್ಣಂ, ದಿಸ್ವಾನೋತರಿತಂ ಪದಂ;

ನಳೇನ ವಾರಿಂ ಪಿಸ್ಸಾಮ [ಪಿವಿಸ್ಸಾಮ (ಸೀ. ಸ್ಯಾ. ಪೀ.)], ನೇವ [ನ ಚ (ಕ.)] ಮಂ ತ್ವಂ ವಧಿಸ್ಸಸೀತಿ.

ನಳಪಾನಜಾತಕಂ ದಸಮಂ.

ಸೀಲವಗ್ಗೋ ದುತಿಯೋ.

ತಸ್ಸುದ್ದಾನಂ –

ಅಥ ಲಕ್ಖಣ ಸಾಖ ಧಿರತ್ಥು ಪುನ, ನ ಕಿರತ್ಥಿ ರಸೇಹಿ ಖರಾದಿಯಾ;

ಅತಿಭೋತಿ ವರ [ರಸ (ಸಬ್ಬತ್ಥ)] ಮಾಲುತ ಪಾಣ, ಮುಚ್ಚೇನ ನಳಅವ್ಹಯನೇನ ಭವನ್ತಿ ದಸಾತಿ.

೩. ಕುರುಙ್ಗವಗ್ಗೋ

೨೧. ಕುರುಙ್ಗಮಿಗಜಾತಕಂ

೨೧. ಞಾತಮೇತಂ ಕುರುಙ್ಗಸ್ಸ, ಯಂ ತ್ವಂ ಸೇಪಣ್ಣಿ ಸಿಯ್ಯಸಿ [ಸೇಯ್ಯಸಿ (ಸೀ. ಸ್ಯಾ. ಪೀ.)];

ಅಞ್ಞಂ ಸೇಪಣ್ಣಿ ಗಚ್ಛಾಮಿ, ನ ಮೇ ತೇ ರುಚ್ಚತೇ ಫಲನ್ತಿ.

ಕುರುಙ್ಗಮಿಗಜಾತಕಂ ಪಠಮಂ.

೨೨. ಕುಕ್ಕುರಜಾತಕಂ

೨೨. ಯೇ ಕುಕ್ಕುರಾ ರಾಜಕುಲಮ್ಹಿ ವದ್ಧಾ, ಕೋಲೇಯ್ಯಕಾ ವಣ್ಣಬಲೂಪಪನ್ನಾ;

ತೇಮೇ ನ ವಜ್ಝಾ ಮಯಮಸ್ಮ ವಜ್ಝಾ, ನಾಯಂ ಸಘಚ್ಚಾ ದುಬ್ಬಲಘಾತಿಕಾಯನ್ತಿ.

ಕುಕ್ಕುರಜಾತಕಂ ದುತಿಯಂ.

೨೩. ಗೋಜಾನೀಯಜಾತಕಂ

೨೩. ಅಪಿ ಪಸ್ಸೇನ ಸೇಮಾನೋ, ಸಲ್ಲೇಭಿ ಸಲ್ಲಲೀಕತೋ;

ಸೇಯ್ಯೋವ ವಳವಾ ಗೋಜೋ [ಭೋಜ್ಜೋ (ಸೀ.), ಭೋಜ್ಝೋ (ಸ್ಯಾ. ಪೀ.)], ಯುಞ್ಜ ಮಞ್ಞೇವ ಸಾರಥೀತಿ.

ಗೋಜಾನೀಯ [ಭೋಜಾಜಾನೀಯ (ಸೀ. ಸ್ಯಾ. ಪೀ.)] ಜಾತಕಂ ತತಿಯಂ.

೨೪. ಆಜಞ್ಞಜಾತಕಂ

೨೪. ಯದಾ ಯದಾ ಯತ್ಥ ಯದಾ, ಯತ್ಥ ಯತ್ಥ ಯದಾ ಯದಾ;

ಆಜಞ್ಞೋ ಕುರುತೇ ವೇಗಂ, ಹಾಯನ್ತಿ ತತ್ಥ ವಾಳವಾತಿ.

ಆಜಞ್ಞಜಾತಕಂ ಚತುತ್ಥಂ.

೨೫. ತಿತ್ಥಜಾತಕಂ

೨೫. ಅಞ್ಞಮಞ್ಞೇಹಿ ತಿತ್ಥೇಹಿ, ಅಸ್ಸಂ ಪಾಯೇಹಿ ಸಾರಥಿ;

ಅಚ್ಚಾಸನಸ್ಸ ಪುರಿಸೋ, ಪಾಯಾಸಸ್ಸಪಿ ತಪ್ಪತೀತಿ.

ತಿತ್ಥಜಾತಕಂ ಪಞ್ಚಮಂ.

೨೬. ಮಹಿಳಾಮುಖಜಾತಕಂ

೨೬. ಪುರಾಣಚೋರಾನ ವಚೋ ನಿಸಮ್ಮ, ಮಹಿಳಾಮುಖೋ ಪೋಥಯಮನ್ವಚಾರೀ;

ಸುಸಞ್ಞತಾನಞ್ಹಿ ವಚೋ ನಿಸಮ್ಮ, ಗಜುತ್ತಮೋ ಸಬ್ಬಗುಣೇಸು ಅಟ್ಠಾತಿ.

ಮಹಿಳಾಮುಖಜಾತಕಂ ಛಟ್ಠಂ.

೨೭. ಅಭಿಣ್ಹಜಾತಕಂ

೨೭. ನಾಲಂ ಕಬಳಂ ಪದಾತವೇ, ನ ಚ ಪಿಣ್ಡಂ ನ ಕುಸೇ ನ ಘಂಸಿತುಂ;

ಮಞ್ಞಾಮಿ ಅಭಿಣ್ಹದಸ್ಸನಾ, ನಾಗೋ ಸ್ನೇಹಮಕಾಸಿ [ಸಿನೇಹಮಕಾಸಿ (ಸೀ. ಸ್ಯಾ. ಪೀ.)] ಕುಕ್ಕುರೇತಿ.

ಅಭಿಣ್ಹಜಾತಕಂ ಸತ್ತಮಂ.

೨೮. ನನ್ದಿವಿಸಾಲಜಾತಕಂ

೨೮. ಮನುಞ್ಞಮೇವ ಭಾಸೇಯ್ಯ, ನಾಮನುಞ್ಞಂ ಕುದಾಚನಂ;

ಮನುಞ್ಞಂ ಭಾಸಮಾನಸ್ಸ, ಗರುಂ ಭಾರಂ ಉದದ್ಧರಿ;

ಧನಞ್ಚ ನಂ ಅಲಾಭೇಸಿ, ತೇನ ಚತ್ತಮನೋ ಅಹೂತಿ.

ನನ್ದಿವಿಸಾಲಜಾತಕಂ ಅಟ್ಠಮಂ.

೨೯. ಕಣ್ಹಜಾತಕಂ

೨೯. ಯತೋ ಯತೋ ಗರು ಧುರಂ, ಯತೋ ಗಮ್ಭೀರವತ್ತನೀ;

ತದಾಸ್ಸು ಕಣ್ಹಂ ಯುಞ್ಜನ್ತಿ, ಸ್ವಾಸ್ಸು ತಂ ವಹತೇ ಧುರನ್ತಿ.

ಕಣ್ಹಜಾತಕಂ ನವಮಂ.

೩೦. ಮುನಿಕಜಾತಕಂ

೩೦. ಮಾ ಮುನಿಕಸ್ಸ ಪಿಹಯಿ, ಆತುರನ್ನಾನಿ ಭುಞ್ಜತಿ;

ಅಪ್ಪೋಸ್ಸುಕ್ಕೋ ಭುಸಂ ಖಾದ, ಏತಂ ದೀಘಾಯುಲಕ್ಖಣನ್ತಿ.

ಮುನಿಕಜಾತಕಂ ದಸಮಂ.

ಕುರುಙ್ಗವಗ್ಗೋ ತತಿಯೋ.

ತಸ್ಸುದ್ದಾನಂ –

ಕುರುಙ್ಗಸ್ಸ ಕುಕ್ಕುರಗೋಜವರೋ, ಪುನ ವಾಳವಸ್ಸಸಿರಿವ್ಹಯನೋ [ಸಿರಿವಯನೋ (ಸಬ್ಬತ್ಥ)];

ಮಹಿಳಾಮುಖನಾಮನುಞ್ಞವರೋ, ವಹತೇ ಧುರ ಮುನಿಕೇನ ದಸಾತಿ.

೪. ಕುಲಾವಕವಗ್ಗೋ

೩೧. ಕುಲಾವಕಜಾತಕಂ

೩೧. ಕುಲಾವಕಾ ಮಾತಲಿ ಸಿಮ್ಬಲಿಸ್ಮಿಂ, ಈಸಾಮುಖೇನ ಪರಿವಜ್ಜಯಸ್ಸು;

ಕಾಮಂ ಚಜಾಮ ಅಸುರೇಸು ಪಾಣಂ, ಮಾ ಮೇ ದಿಜಾ ವಿಕ್ಕುಲವಾ [ಮಾಯಿಮೇ ದಿಜಾ ವಿಕುಲಾವಾ (ಸೀ. ಸ್ಯಾ. ಪೀ.)] ಅಹೇಸುನ್ತಿ.

ಕುಲಾವಕಜಾತಕಂ ಪಠಮಂ.

೩೨. ನಚ್ಚಜಾತಕಂ

೩೨. ರುದಂ ಮನುಞ್ಞಂ ರುಚಿರಾ ಚ ಪಿಟ್ಠಿ, ವೇಳುರಿಯವಣ್ಣೂಪನಿಭಾ [ವಣ್ಣೂಪಟಿಭಾ (ಸ್ಯಾ.), ವಣ್ಣಸನ್ನಿಭಾ (ಕ.)] ಚ ಗೀವಾ;