೭. ಸತ್ತಕನಿಪಾತೋ

೧. ಕುಕ್ಕುವಗ್ಗೋ

೩೯೬. ಕುಕ್ಕುಜಾತಕಂ (೭-೧-೧)

೧. ದಿಯಡ್ಢಕುಕ್ಕೂ ಉದಯೇನ ಕಣ್ಣಿಕಾ, ವಿದತ್ಥಿಯೋ ಅಟ್ಠ ಪರಿಕ್ಖಿಪನ್ತಿ ನಂ;

ಸಾ ಸಿಂಸಪಾ [ಸಸಿಂಸಪಾ (ಸೀ. ಪೀ.), ಸಾ ಸೀಸಪಾ (ಸ್ಯಾ.), ಯಾ ಸಿಂಸಪಾ (ಕ. ಸೀ. ನಿಯ್ಯ)] ಸಾರಮಯಾ ಅಫೇಗ್ಗುಕಾ, ಕುಹಿಂ ಠಿತಾ ಉಪ್ಪರಿತೋ [ಉಪರಿತೋ (ಸೀ. ಸ್ಯಾ. ಪೀ.)] ನ ಧಂಸತಿ.

೨. ಯಾ ತಿಂಸತಿ ಸಾರಮಯಾ ಅನುಜ್ಜುಕಾ, ಪರಿಕಿರಿಯ [ಪಕಿರಿಯಾ (ಕ.)] ಗೋಪಾಣಸಿಯೋ ಸಮಂ ಠಿತಾ [ಸಮಟ್ಠಿತಾ (ಸೀ. ಸ್ಯಾ.)];

ತಾಹಿ ಸುಸಙ್ಗಹಿತಾ ಬಲಸಾ ಪೀಳಿತಾ [ತಾ ಸಙ್ಗಹಿತಾ ಬಲಸಾ ಚ ಪೀಳಿತಾ (ಸೀ.), ತಾಹಿ ಸುಸಙ್ಗಹಿತಾ ಬಲಸಾ ಚ ಪೀಳಿತಾ (ಸ್ಯಾ.), ತಾಹಿ ಸಙ್ಗಹೀತಾ ಬಲಸಾ ಚ ಪೀಳಿತಾ (ಪೀ.)], ಸಮಂ ಠಿತಾ ಉಪ್ಪರಿತೋ ನ ಧಂಸತಿ.

೩. ಏವಮ್ಪಿ ಮಿತ್ತೇಹಿ ದಳ್ಹೇಹಿ ಪಣ್ಡಿತೋ, ಅಭೇಜ್ಜರೂಪೇಹಿ ಸುಚೀಹಿ ಮನ್ತಿಭಿ;

ಸುಸಙ್ಗಹೀತೋ ಸಿರಿಯಾ ನ ಧಂಸತಿ, ಗೋಪಾಣಸೀ ಭಾರವಹಾವ ಕಣ್ಣಿಕಾ.

೪. ಖರತ್ತಚಂ ಬೇಲ್ಲಂ ಯಥಾಪಿ ಸತ್ಥವಾ, ಅನಾಮಸನ್ತೋಪಿ ಕರೋತಿ ತಿತ್ತಕಂ;

ಸಮಾಹರಂ ಸಾದುಂ ಕರೋತಿ ಪತ್ಥಿವ, ಅಸಾದುಂ ಕಯಿರಾ ತನುಬನ್ಧಮುದ್ಧರಂ [ತನುವಟ್ಟಮುದ್ಧರಂ (ಸೀ. ಪೀ.)].

೫. ಏವಮ್ಪಿ ಗಾಮನಿಗಮೇಸು ಪಣ್ಡಿತೋ, ಅಸಾಹಸಂ ರಾಜಧನಾನಿ ಸಙ್ಘರಂ;

ಧಮ್ಮಾನುವತ್ತೀ ಪಟಿಪಜ್ಜಮಾನೋ, ಸ ಫಾತಿ ಕಯಿರಾ ಅವಿಹೇಠಯಂ ಪರಂ.

೬. ಓದಾತಮೂಲಂ ಸುಚಿವಾರಿಸಮ್ಭವಂ, ಜಾತಂ ಯಥಾ ಪೋಕ್ಖರಣೀಸು ಅಮ್ಬುಜಂ;

ಪದುಮಂ ಯಥಾ ಅಗ್ಗಿನಿಕಾಸಿಫಾಲಿಮಂ, ನ ಕದ್ದಮೋ ನ ರಜೋ ನ ವಾರಿ ಲಿಮ್ಪತಿ.

೭. ಏವಮ್ಪಿ ವೋಹಾರಸುಚಿಂ ಅಸಾಹಸಂ, ವಿಸುದ್ಧಕಮ್ಮನ್ತಮಪೇತಪಾಪಕಂ;

ನ ಲಿಮ್ಪತಿ ಕಮ್ಮಕಿಲೇಸ ತಾದಿಸೋ, ಜಾತಂ ಯಥಾ ಪೋಕ್ಖರಣೀಸು ಅಮ್ಬುಜನ್ತಿ.

ಕುಕ್ಕುಜಾತಕಂ ಪಠಮಂ.

೩೯೭. ಮನೋಜಜಾತಕಂ (೭-೧-೨)

೮. ಯಥಾ ಚಾಪೋ ನಿನ್ನಮತಿ, ಜಿಯಾ ಚಾಪಿ ನಿಕೂಜತಿ;

ಹಞ್ಞತೇ ನೂನ ಮನೋಜೋ, ಮಿಗರಾಜಾ ಸಖಾ ಮಮ.

೯. ಹನ್ದ ದಾನಿ ವನನ್ತಾನಿ, ಪಕ್ಕಮಾಮಿ ಯಥಾಸುಖಂ;

ನೇತಾದಿಸಾ ಸಖಾ ಹೋನ್ತಿ, ಲಬ್ಭಾ ಮೇ ಜೀವತೋ ಸಖಾ.

೧೦. ನ ಪಾಪಜನಸಂಸೇವೀ, ಅಚ್ಚನ್ತಂ ಸುಖಮೇಧತಿ;

ಮನೋಜಂ ಪಸ್ಸ ಸೇಮಾನಂ, ಗಿರಿಯಸ್ಸಾನುಸಾಸನೀ [ಅರಿಯಸ್ಸಾನುಸಾಸನೀ (ಸೀ. ಸ್ಯಾ. ಪೀ.)].

೧೧. ನ ಪಾಪಸಮ್ಪವಙ್ಕೇನ, ಮಾತಾ ಪುತ್ತೇನ ನನ್ದತಿ;

ಮನೋಜಂ ಪಸ್ಸ ಸೇಮಾನಂ, ಅಚ್ಛನ್ನಂ [ಸಚ್ಛನ್ನಂ (ಕ.)] ಸಮ್ಹಿ ಲೋಹಿತೇ.

೧೨. ಏವಮಾಪಜ್ಜತೇ ಪೋಸೋ, ಪಾಪಿಯೋ ಚ ನಿಗಚ್ಛತಿ;

ಯೋ ವೇ ಹಿತಾನಂ ವಚನಂ, ನ ಕರೋತಿ ಅತ್ಥದಸ್ಸಿನಂ.

೧೩. ಏವಞ್ಚ ಸೋ ಹೋತಿ ತತೋ ಚ ಪಾಪಿಯೋ, ಯೋ ಉತ್ತಮೋ ಅಧಮಜನೂಪಸೇವೀ;

ಪಸ್ಸುತ್ತಮಂ ಅಧಮಜನೂಪಸೇವಿತಂ [ಸೇವಿಂ (ಸ್ಯಾ.)], ಮಿಗಾಧಿಪಂ ಸರವರವೇಗನಿದ್ಧುತಂ.

೧೪. ನಿಹೀಯತಿ ಪುರಿಸೋ ನಿಹೀನಸೇವೀ, ನ ಚ ಹಾಯೇಥ ಕದಾಚಿ ತುಲ್ಯಸೇವೀ;

ಸೇಟ್ಠಮುಪಗಮಂ [ಮುಪನಮಂ (ಸೀ. ಪೀ. ಅ. ನಿ. ೩.೨೬)] ಉದೇತಿ ಖಿಪ್ಪಂ, ತಸ್ಮಾತ್ತನಾ ಉತ್ತರಿತರಂ [ತಸ್ಮಾ ಅತ್ತನೋ ಉತ್ತರಿಂ (ಸೀ. ಪೀ.), ತಸ್ಮಾ ಅತ್ತನೋ ಉತ್ತರಂ (ಸ್ಯಾ.)] ಭಜೇಥಾತಿ.

ಮನೋಜಜಾತಕಂ ದುತಿಯಂ.

೩೯೮. ಸುತನುಜಾತಕಂ (೭-೧-೩)

೧೫. ರಾಜಾ ತೇ ಭತ್ತಂ ಪಾಹೇಸಿ, ಸುಚಿಂ ಮಂಸೂಪಸೇಚನಂ;

ಮಘದೇವಸ್ಮಿಂ [ಮಖಾದೇವಸ್ಮಿಂ (ಸೀ. ಪೀ.), ಮಾಘದೇವಸ್ಮಿಂ (ಕ.)] ಅಧಿವತ್ಥೇ, ಏಹಿ ನಿಕ್ಖಮ್ಮ ಭುಞ್ಜಸ್ಸು.

೧೬. ಏಹಿ ಮಾಣವ ಓರೇನ, ಭಿಕ್ಖಮಾದಾಯ ಸೂಪಿತಂ;

ತ್ವಞ್ಚ ಮಾಣವ ಭಿಕ್ಖಾ ಚ [ಭಕ್ಖೋಸಿ (ಸ್ಯಾ.), ಭಕ್ಖಾವ (ಕ.)], ಉಭೋ ಭಕ್ಖಾ ಭವಿಸ್ಸಥ.

೧೭. ಅಪ್ಪಕೇನ ತುವಂ ಯಕ್ಖ, ಥುಲ್ಲಮತ್ಥಂ ಜಹಿಸ್ಸಸಿ;

ಭಿಕ್ಖಂ ತೇ ನಾಹರಿಸ್ಸನ್ತಿ, ಜನಾ ಮರಣಸಞ್ಞಿನೋ.

೧೮. ಲದ್ಧಾಯ ಯಕ್ಖಾ [ಲದ್ಧಾಯಂ ಯಕ್ಖ (ಸೀ. ಸ್ಯಾ. ಪೀ.)] ತವ ನಿಚ್ಚಭಿಕ್ಖಂ, ಸುಚಿಂ ಪಣೀತಂ ರಸಸಾ ಉಪೇತಂ;

ಭಿಕ್ಖಞ್ಚ ತೇ ಆಹರಿಯೋ ನರೋ ಇಧ, ಸುದುಲ್ಲಭೋ ಹೇಹಿತಿ ಭಕ್ಖಿತೇ [ಖಾದಿತೇ (ಸೀ. ಸ್ಯಾ. ಪೀ.)] ಮಯಿ.

೧೯. ಮಮೇವ [ಮಮೇಸ (ಸೀ. ಪೀ.)] ಸುತನೋ ಅತ್ಥೋ, ಯಥಾ ಭಾಸಸಿ ಮಾಣವ;

ಮಯಾ ತ್ವಂ ಸಮನುಞ್ಞಾತೋ, ಸೋತ್ಥಿಂ ಪಸ್ಸಾಹಿ ಮಾತರಂ.

೨೦. ಖಗ್ಗಂ ಛತ್ತಞ್ಚ ಪಾತಿಞ್ಚ, ಗಚ್ಛಮಾದಾಯ [ಗಚ್ಛೇವಾದಾಯ (ಸೀ. ಸ್ಯಾ. ಪೀ.)] ಮಾಣವ;

ಸೋತ್ಥಿಂ ಪಸ್ಸತು ತೇ ಮಾತಾ, ತ್ವಞ್ಚ ಪಸ್ಸಾಹಿ ಮಾತರಂ.

೨೧. ಏವಂ ಯಕ್ಖ ಸುಖೀ ಹೋಹಿ, ಸಹ ಸಬ್ಬೇಹಿ ಞಾತಿಭಿ;

ಧನಞ್ಚ ಮೇ ಅಧಿಗತಂ, ರಞ್ಞೋ ಚ ವಚನಂ ಕತನ್ತಿ.

ಸುತನುಜಾತಕಂ ತತಿಯಂ.

೩೯೯. ಮಾತುಪೋಸಕಗಿಜ್ಝಜಾತಕಂ (೭-೧-೪)

೨೨. ತೇ ಕಥಂ ನು ಕರಿಸ್ಸನ್ತಿ, ವುದ್ಧಾ ಗಿರಿದರೀಸಯಾ;

ಅಹಂ ಬದ್ಧೋಸ್ಮಿ ಪಾಸೇನ, ನಿಲೀಯಸ್ಸ ವಸಂ ಗತೋ.

೨೩. ಕಿಂ ಗಿಜ್ಝ ಪರಿದೇವಸಿ, ಕಾ ನು ತೇ ಪರಿದೇವನಾ;

ನ ಮೇ ಸುತೋ ವಾ ದಿಟ್ಠೋ ವಾ, ಭಾಸನ್ತೋ ಮಾನುಸಿಂ ದಿಜೋ.

೨೪. ಭರಾಮಿ ಮಾತಾಪಿತರೋ, ವುದ್ಧೇ ಗಿರಿದರೀಸಯೇ;

ತೇ ಕಥಂ ನು ಕರಿಸ್ಸನ್ತಿ, ಅಹಂ ವಸಂ ಗತೋ ತವ.

೨೫. ಯಂ ನು ಗಿಜ್ಝೋ ಯೋಜನಸತಂ, ಕುಣಪಾನಿ ಅವೇಕ್ಖತಿ;

ಕಸ್ಮಾ ಜಾಲಞ್ಚ ಪಾಸಞ್ಚ, ಆಸಜ್ಜಾಪಿ ನ ಬುಜ್ಝಸಿ.

೨೬. ಯದಾ ಪರಾಭವೋ ಹೋತಿ, ಪೋಸೋ ಜೀವಿತಸಙ್ಖಯೇ;

ಅಥ ಜಾಲಞ್ಚ ಪಾಸಞ್ಚ, ಆಸಜ್ಜಾಪಿ ನ ಬುಜ್ಝತಿ.

೨೭. ಭರಸ್ಸು ಮಾತಾಪಿತರೋ, ವುದ್ಧೇ ಗಿರಿದರೀಸಯೇ;

ಮಯಾ ತ್ವಂ ಸಮನುಞ್ಞಾತೋ, ಸೋತ್ಥಿಂ ಪಸ್ಸಾಹಿ ಞಾತಕೇ.

೨೮. ಏವಂ ಲುದ್ದಕ ನನ್ದಸ್ಸು, ಸಹ ಸಬ್ಬೇಹಿ ಞಾತಿಭಿ;

ಭರಿಸ್ಸಂ ಮಾತಾಪಿತರೋ, ವುದ್ಧೇ ಗಿರಿದರೀಸಯೇತಿ.

ಮಾತುಪೋಸಕಗಿಜ್ಝಜಾತಕಂ ಚತುತ್ಥಂ.

೪೦೦. ದಬ್ಭಪುಪ್ಫಜಾತಕಂ (೭-೧-೫)

೨೯. ಅನುತೀರಚಾರೀ ಭದ್ದನ್ತೇ, ಸಹಾಯಮನುಧಾವ ಮಂ;

ಮಹಾ ಮೇ ಗಹಿತೋ [ರೋಹಿತೋ (ಕ.)] ಮಚ್ಛೋ, ಸೋ ಮಂ ಹರತಿ ವೇಗಸಾ.

೩೦. ಗಮ್ಭೀರಚಾರೀ ಭದ್ದನ್ತೇ, ದಳ್ಹಂ ಗಣ್ಹಾಹಿ ಥಾಮಸಾ;

ಅಹಂ ತಂ ಉದ್ಧರಿಸ್ಸಾಮಿ, ಸುಪಣ್ಣೋ ಉರಗಾಮಿವ [ಉರಗಮ್ಮಿವ (ಸೀ. ಸ್ಯಾ. ಪೀ.)].

೩೧. ವಿವಾದೋ ನೋ ಸಮುಪ್ಪನ್ನೋ, ದಬ್ಭಪುಪ್ಫ ಸುಣೋಹಿ ಮೇ;

ಸಮೇಹಿ ಮೇಧಗಂ [ಮೇಧಕಂ (ಪೀ.)] ಸಮ್ಮ, ವಿವಾದೋ ವೂಪಸಮ್ಮತಂ.

೩೨. ಧಮ್ಮಟ್ಠೋಹಂ ಪುರೇ ಆಸಿಂ, ಬಹೂ ಅಡ್ಡಾ ಮೇ ತೀರಿತಾ [ಬಹುಅಟ್ಟಂ ಮೇ ತೀರಿತಂ (ಸೀ.), ಬಹುಅಟ್ಟಂವ ತೀರಿತಂ (ಸ್ಯಾ.), ಬಹು ಅತ್ಥಂ ಮೇ ತೀರಿತಂ (ಪೀ.)];

ಸಮೇಮಿ ಮೇಧಗಂ ಸಮ್ಮ, ವಿವಾದೋ ವೂಪಸಮ್ಮತಂ.

೩೩. ಅನುತೀರಚಾರಿ ನಙ್ಗುಟ್ಠಂ, ಸೀಸಂ ಗಮ್ಭೀರಚಾರಿನೋ;

ಅಚ್ಚಾಯಂ [ಅಥಾಯಂ (ಸೀ. ಪೀ.)] ಮಜ್ಝಿಮೋ ಖಣ್ಡೋ, ಧಮ್ಮಟ್ಠಸ್ಸ ಭವಿಸ್ಸತಿ.

೩೪. ಚಿರಮ್ಪಿ ಭಕ್ಖೋ ಅಭವಿಸ್ಸ, ಸಚೇ ನ ವಿವದೇಮಸೇ;

ಅಸೀಸಕಂ ಅನಙ್ಗುಟ್ಠಂ, ಸಿಙ್ಗಾಲೋ ಹರತಿ ರೋಹಿತಂ.

೩೫. ಯಥಾಪಿ ರಾಜಾ ನನ್ದೇಯ್ಯ, ರಜ್ಜಂ ಲದ್ಧಾನ ಖತ್ತಿಯೋ;

ಏವಾಹಮಜ್ಜ ನನ್ದಾಮಿ, ದಿಸ್ವಾ ಪುಣ್ಣಮುಖಂ ಪತಿಂ.

೩೬. ಕಥಂ ನು ಥಲಜೋ ಸನ್ತೋ, ಉದಕೇ ಮಚ್ಛಂ ಪರಾಮಸಿ;

ಪುಟ್ಠೋ ಮೇ ಸಮ್ಮ ಅಕ್ಖಾಹಿ, ಕಥಂ ಅಧಿಗತಂ ತಯಾ.

೩೭. ವಿವಾದೇನ ಕಿಸಾ ಹೋನ್ತಿ, ವಿವಾದೇನ ಧನಕ್ಖಯಾ;

ಜೀನಾ ಉದ್ದಾ ವಿವಾದೇನ, ಭುಞ್ಜ ಮಾಯಾವಿ ರೋಹಿತಂ.

೩೮. ಏವಮೇವ ಮನುಸ್ಸೇಸು, ವಿವಾದೋ ಯತ್ಥ ಜಾಯತಿ;

ಧಮ್ಮಟ್ಠಂ ಪಟಿಧಾವನ್ತಿ, ಸೋ ಹಿ ನೇಸಂ ವಿನಾಯಕೋ;

ಧನಾಪಿ ತತ್ಥ ಜೀಯನ್ತಿ, ರಾಜಕೋಸೋ ಪವಡ್ಢತೀತಿ [ಚ ವಡ್ಢತಿ (ಪೀ.)].

ದಬ್ಭಪುಪ್ಫಜಾತಕಂ ಪಞ್ಚಮಂ.

೪೦೧. ಪಣ್ಣಕಜಾತಕಂ (೭-೧-೬)

೩೯. ಪಣ್ಣಕಂ [ದಸಣ್ಣಕಂ (ಸೀ. ಸ್ಯಾ. ಪೀ.)] ತಿಖಿಣಧಾರಂ, ಅಸಿಂ ಸಮ್ಪನ್ನಪಾಯಿನಂ;

ಪರಿಸಾಯಂ ಪುರಿಸೋ ಗಿಲತಿ, ಕಿಂ ದುಕ್ಕರತರಂ ತತೋ;

ಯದಞ್ಞಂ ದುಕ್ಕರಂ ಠಾನಂ, ತಂ ಮೇ ಅಕ್ಖಾಹಿ ಪುಚ್ಛಿತೋ.

೪೦. ಗಿಲೇಯ್ಯ ಪುರಿಸೋ ಲೋಭಾ, ಅಸಿಂ ಸಮ್ಪನ್ನಪಾಯಿನಂ;

ಯೋ ಚ ವಜ್ಜಾ ದದಾಮೀತಿ, ತಂ ದುಕ್ಕರತರಂ ತತೋ;

ಸಬ್ಬಞ್ಞಂ ಸುಕರಂ ಠಾನಂ, ಏವಂ ಜಾನಾಹಿ ಮದ್ದವ [ಮಾಗಧ (ಸೀ. ಸ್ಯಾ. ಪೀ.)].

೪೧. ಬ್ಯಾಕಾಸಿ ಆಯುರೋ ಪಞ್ಹಂ, ಅತ್ಥಂ [ಅತ್ಥ (ಪೀ. ಸೀ. ನಿಯ್ಯ)] ಧಮ್ಮಸ್ಸ ಕೋವಿದೋ;

ಪುಕ್ಕುಸಂ ದಾನಿ ಪುಚ್ಛಾಮಿ, ಕಿಂ ದುಕ್ಕರತರಂ ತತೋ;

ಯದಞ್ಞಂ ದುಕ್ಕರಂ ಠಾನಂ, ತಂ ಮೇ ಅಕ್ಖಾಹಿ ಪುಚ್ಛಿತೋ.

೪೨. ನ ವಾಚಮುಪಜೀವನ್ತಿ, ಅಫಲಂ ಗಿರಮುದೀರಿತಂ;

ಯೋ ಚ ದತ್ವಾ ಅವಾಕಯಿರಾ, ತಂ ದುಕ್ಕರತರಂ ತತೋ;

ಸಬ್ಬಞ್ಞಂ ಸುಕರಂ ಠಾನಂ, ಏವಂ ಜಾನಾಹಿ ಮದ್ದವ.

೪೩. ಬ್ಯಾಕಾಸಿ ಪುಕ್ಕುಸೋ ಪಞ್ಹಂ, ಅತ್ಥಂ ಧಮ್ಮಸ್ಸ ಕೋವಿದೋ;

ಸೇನಕಂ ದಾನಿ ಪುಚ್ಛಾಮಿ, ಕಿಂ ದುಕ್ಕರತರಂ ತತೋ;

ಯದಞ್ಞಂ ದುಕ್ಕರಂ ಠಾನಂ, ತಂ ಮೇ ಅಕ್ಖಾಹಿ ಪುಚ್ಛಿತೋ.

೪೪. ದದೇಯ್ಯ ಪುರಿಸೋ ದಾನಂ, ಅಪ್ಪಂ ವಾ ಯದಿ ವಾ ಬಹುಂ;

ಯೋ ಚ ದತ್ವಾ ನಾನುತಪ್ಪೇ [ತಪೇ (ಸೀ. ಪೀ.)], ತಂ ದುಕ್ಕರತರಂ ತತೋ;

ಸಬ್ಬಞ್ಞಂ ಸುಕರಂ ಠಾನಂ, ಏವಂ ಜಾನಾಹಿ ಮದ್ದವ.

೪೫. ಬ್ಯಾಕಾಸಿ ಆಯುರೋ ಪಞ್ಹಂ, ಅಥೋ ಪುಕ್ಕುಸಪೋರಿಸೋ;

ಸಬ್ಬೇ ಪಞ್ಹೇ ಅತಿಭೋತಿ, ಯಥಾ ಭಾಸತಿ ಸೇನಕೋತಿ.

ಪಣ್ಣಕ [ದಸಣ್ಣಕ (ಸೀ. ಸ್ಯಾ. ಪೀ.)] ಜಾತಕಂ ಛಟ್ಠಂ.

೪೦೨. ಸತ್ತುಭಸ್ತಜಾತಕಂ (೭-೧-೭)

೪೬. ವಿಬ್ಭನ್ತಚಿತ್ತೋ ಕುಪಿತಿನ್ದ್ರಿಯೋಸಿ, ನೇತ್ತೇಹಿ ತೇ ವಾರಿಗಣಾ ಸವನ್ತಿ;

ಕಿಂ ತೇ ನಟ್ಠಂ ಕಿಂ ಪನ ಪತ್ಥಯಾನೋ, ಇಧಾಗಮಾ ಬ್ರಹ್ಮೇ ತದಿಙ್ಘ [ಬ್ರಾಹ್ಮಣ ಇಙ್ಘ (ಸೀ. ಸ್ಯಾ.)] ಬ್ರೂಹಿ.

೪೭. ಮಿಯ್ಯೇಥ ಭರಿಯಾ ವಜತೋ ಮಮಜ್ಜ, ಅಗಚ್ಛತೋ ಮರಣಮಾಹ ಯಕ್ಖೋ;

ಏತೇನ ದುಕ್ಖೇನ ಪವೇಧಿತೋಸ್ಮಿ, ಅಕ್ಖಾಹಿ ಮೇ ಸೇನಕ ಏತಮತ್ಥಂ.

೪೮. ಬಹೂನಿ ಠಾನಾನಿ ವಿಚಿನ್ತಯಿತ್ವಾ, ಯಮೇತ್ಥ ವಕ್ಖಾಮಿ ತದೇವ ಸಚ್ಚಂ;

ಮಞ್ಞಾಮಿ ತೇ ಬ್ರಾಹ್ಮಣ ಸತ್ತುಭಸ್ತಂ, ಅಜಾನತೋ ಕಣ್ಹಸಪ್ಪೋ ಪವಿಟ್ಠೋ.

೪೯. ಆದಾಯ ದಣ್ಡಂ ಪರಿಸುಮ್ಭ ಭಸ್ತಂ, ಪಸ್ಸೇಳಮೂಗಂ ಉರಗಂ ದುಜಿವ್ಹಂ [ದಿಜಿವ್ಹಂ (ಸೀ. ಪೀ.)];

ಛಿನ್ದಜ್ಜ ಕಙ್ಖಂ ವಿಚಿಕಿಚ್ಛಿತಾನಿ, ಭುಜಙ್ಗಮಂ ಪಸ್ಸ ಪಮುಞ್ಚ ಭಸ್ತಂ.

೫೦. ಸಂವಿಗ್ಗರೂಪೋ ಪರಿಸಾಯ ಮಜ್ಝೇ, ಸೋ ಬ್ರಾಹ್ಮಣೋ ಸತ್ತುಭಸ್ತಂ ಪಮುಞ್ಚಿ;

ಅಥ ನಿಕ್ಖಮಿ ಉರಗೋ ಉಗ್ಗತೇಜೋ, ಆಸೀವಿಸೋ ಸಪ್ಪೋ ಫಣಂ ಕರಿತ್ವಾ.

೫೧. ಸುಲದ್ಧಲಾಭಾ ಜನಕಸ್ಸ ರಞ್ಞೋ, ಯೋ ಪಸ್ಸತೀ ಸೇನಕಂ ಸಾಧುಪಞ್ಞಂ;

ವಿವಟ್ಟಛದ್ದೋ [ವಿವತ್ತಚ್ಛದ್ದೋ (ಸೀ.), ವಿವಟ್ಟಚ್ಛದೋ (ಸ್ಯಾ.), ವಿವಟ್ಟಚ್ಛದ್ದಾ (ಪೀ.)] ನುಸಿ ಸಬ್ಬದಸ್ಸೀ, ಞಾಣಂ ನು ತೇ ಬ್ರಾಹ್ಮಣ ಭಿಂಸರೂಪಂ.

೫೨. ಇಮಾನಿ ಮೇ ಸತ್ತಸತಾನಿ ಅತ್ಥಿ, ಗಣ್ಹಾಹಿ ಸಬ್ಬಾನಿ ದದಾಮಿ ತುಯ್ಹಂ;

ತಯಾ ಹಿ ಮೇ ಜೀವಿತಮಜ್ಜ ಲದ್ಧಂ, ಅಥೋಪಿ ಭರಿಯಾಯ ಮಕಾಸಿ ಸೋತ್ಥಿಂ.

೫೩. ನ ಪಣ್ಡಿತಾ ವೇತನಮಾದಿಯನ್ತಿ, ಚಿತ್ರಾಹಿ ಗಾಥಾಹಿ ಸುಭಾಸಿತಾಹಿ;

ಇತೋಪಿ ತೇ ಬ್ರಹ್ಮೇ ದದನ್ತು ವಿತ್ತಂ, ಆದಾಯ ತ್ವಂ ಗಚ್ಛ ಸಕಂ ನಿಕೇತನ್ತಿ.

ಸತ್ತುಭಸ್ತಜಾತಕಂ [ಸೇನಕಜಾತಕಂ (ಸ್ಯಾ.)] ಸತ್ತಮಂ.

೪೦೩. ಅಟ್ಠಿಸೇನಕಜಾತಕಂ (೭-೧-೮)

೫೪. ಯೇಮೇ ಅಹಂ ನ ಜಾನಾಮಿ, ಅಟ್ಠಿಸೇನ ವನಿಬ್ಬಕೇ;

ತೇ ಮಂ ಸಙ್ಗಮ್ಮ ಯಾಚನ್ತಿ, ಕಸ್ಮಾ ಮಂ ತ್ವಂ ನ ಯಾಚಸಿ.

೫೫. ಯಾಚಕೋ ಅಪ್ಪಿಯೋ ಹೋತಿ, ಯಾಚಂ ಅದದಮಪ್ಪಿಯೋ;

ತಸ್ಮಾಹಂ ತಂ ನ ಯಾಚಾಮಿ, ಮಾ ಮೇ ವಿದೇಸ್ಸನಾ [ವಿದ್ದೇಸನಾ (ಸೀ. ಪೀ.)] ಅಹು.

೫೬. ಯೋ ವೇ ಯಾಚನಜೀವಾನೋ, ಕಾಲೇ ಯಾಚಂ ನ ಯಾಚತಿ;

ಪರಞ್ಚ ಪುಞ್ಞಾ [ಪುಞ್ಞಂ (ಸ್ಯಾ. ಕ.)] ಧಂಸೇತಿ, ಅತ್ತನಾಪಿ ನ ಜೀವತಿ.

೫೭. ಯೋ ಚ [ಯೋ ವೇ (ಕ.)] ಯಾಚನಜೀವಾನೋ, ಕಾಲೇ ಯಾಚಞ್ಹಿ ಯಾಚತಿ [ಯಾಚಂಪಿ ಯಾಚತಿ (ಸ್ಯಾ.), ಯಾಚಾನಿ ಯಾಚತಿ (ಪೀ.), ಯಾಚತಿ ಯಾಚನಂ (ಸೀ. ನಿಯ್ಯ), ಯಾಚನಂ ಯಾಚತಿ (ಕ.)];

ಪರಞ್ಚ ಪುಞ್ಞಂ ಲಬ್ಭೇತಿ, ಅತ್ತನಾಪಿ ಚ ಜೀವತಿ.

೫೮. ನ ವೇ ದೇಸ್ಸನ್ತಿ [ನ ವೇ ದುಸ್ಸನ್ತಿ (ಸ್ಯಾ.), ನ ವೇ ದಿಸ್ಸನ್ತಿ (ಪೀ.), ನ ವಿದೇಸ್ಸನ್ತಿ (ಕ. ಅಟ್ಠ.)] ಸಪ್ಪಞ್ಞಾ, ದಿಸ್ವಾ ಯಾಚಕಮಾಗತೇ;

ಬ್ರಹ್ಮಚಾರಿ ಪಿಯೋ ಮೇಸಿ, ವದ ತ್ವಂ [ವರ ತಂ (ಸೀ.), ವರ ತ್ವಂ (ಪೀ.)] ಭಞ್ಞಮಿಚ್ಛಸಿ [ಯಞ್ಞಮಿಚ್ಛಸಿ (?)].

೫೯. ನ ವೇ ಯಾಚನ್ತಿ ಸಪ್ಪಞ್ಞಾ, ಧೀರೋ ಚ ವೇದಿತುಮರಹತಿ;

ಉದ್ದಿಸ್ಸ ಅರಿಯಾ ತಿಟ್ಠನ್ತಿ, ಏಸಾ ಅರಿಯಾನ ಯಾಚನಾ.

೬೦. ದದಾಮಿ ತೇ ಬ್ರಾಹ್ಮಣ ರೋಹಿಣೀನಂ, ಗವಂ ಸಹಸ್ಸಂ ಸಹ ಪುಙ್ಗವೇನ;

ಅರಿಯೋ ಹಿ ಅರಿಯಸ್ಸ ಕಥಂ ನ ದಜ್ಜಾ, ಸುತ್ವಾನ ಗಾಥಾ ತವ ಧಮ್ಮಯುತ್ತಾತಿ.

ಅಟ್ಠಿಸೇನಕಜಾತಕಂ ಅಟ್ಠಮಂ.

೪೦೪. ಕಪಿಜಾತಕಂ (೭-೧-೯)

೬೧. ಯತ್ಥ ವೇರೀ ನಿವಸತಿ, ನ ವಸೇ ತತ್ಥ ಪಣ್ಡಿತೋ;

ಏಕರತ್ತಂ ದಿರತ್ತಂ ವಾ, ದುಕ್ಖಂ ವಸತಿ ವೇರಿಸು.

೬೨. ದಿಸೋ ವೇ ಲಹುಚಿತ್ತಸ್ಸ, ಪೋಸಸ್ಸಾನುವಿಧೀಯತೋ;

ಏಕಸ್ಸ ಕಪಿನೋ ಹೇತು, ಯೂಥಸ್ಸ ಅನಯೋ ಕತೋ.