೮. ಅಟ್ಠಕನಿಪಾತೋ

೪೧೭. ಕಚ್ಚಾನಿಜಾತಕಂ (೧)

೧. ಓದಾತವತ್ಥಾ ಸುಚಿ ಅಲ್ಲಕೇಸಾ, ಕಚ್ಚಾನಿ ಕಿಂ ಕುಮ್ಭಿಮಧಿಸ್ಸಯಿತ್ವಾ [ಕುಮ್ಭಿಮಪಸ್ಸಯಿತ್ವಾ (ಪೀ.)];

ಪಿಟ್ಠಾ ತಿಲಾ ಧೋವಸಿ ತಣ್ಡುಲಾನಿ, ತಿಲೋದನೋ ಹೇಹಿತಿ ಕಿಸ್ಸ ಹೇತು.

೨. ನ ಖೋ ಅಯಂ ಬ್ರಾಹ್ಮಣ ಭೋಜನತ್ಥಾ [ಭೋಜನತ್ಥಂ (ಸ್ಯಾ.)], ತಿಲೋದನೋ ಹೇಹಿತಿ ಸಾಧುಪಕ್ಕೋ;

ಧಮ್ಮೋ ಮತೋ ತಸ್ಸ ಪಹುತ್ತಮಜ್ಜ [ಪಹೂನಮಜ್ಜ (ಸ್ಯಾ.), ಪಹೂತಮಜ್ಜ (ಸೀ.), ಬಹೂತಮಜ್ಜಾ (ಪೀ.)], ಅಹಂ ಕರಿಸ್ಸಾಮಿ ಸುಸಾನಮಜ್ಝೇ.

೩. ಅನುವಿಚ್ಚ ಕಚ್ಚಾನಿ ಕರೋಹಿ ಕಿಚ್ಚಂ, ಧಮ್ಮೋ ಮತೋ ಕೋ ನು ತವೇವ [ತವೇತ (ಸೀ. ಸ್ಯಾ. ಪೀ.)] ಸಂಸಿ;

ಸಹಸ್ಸನೇತ್ತೋ ಅತುಲಾನುಭಾವೋ, ನ ಮಿಯ್ಯತೀ ಧಮ್ಮವರೋ ಕದಾಚಿ.

೪. ದಳ್ಹಪ್ಪಮಾಣಂ ಮಮ ಏತ್ಥ ಬ್ರಹ್ಮೇ, ಧಮ್ಮೋ ಮತೋ ನತ್ಥಿ ಮಮೇತ್ಥ ಕಙ್ಖಾ;

ಯೇ ಯೇವ ದಾನಿ ಪಾಪಾ ಭವನ್ತಿ, ತೇ ತೇವ ದಾನಿ ಸುಖಿತಾ ಭವನ್ತಿ.

೫. ಸುಣಿಸಾ ಹಿ ಮಯ್ಹಂ ವಞ್ಝಾ ಅಹೋಸಿ, ಸಾ ಮಂ ವಧಿತ್ವಾನ ವಿಜಾಯಿ ಪುತ್ತಂ;

ಸಾ ದಾನಿ ಸಬ್ಬಸ್ಸ ಕುಲಸ್ಸ ಇಸ್ಸರಾ, ಅಹಂ ಪನಮ್ಹಿ [ವಸಾಮಿ (ಸ್ಯಾ.)] ಅಪವಿದ್ಧಾ ಏಕಿಕಾ.

೬. ಜೀವಾಮಿ ವೋಹಂ ನ ಮತೋಹಮಸ್ಮಿ [ನಾಹಂ ಮತೋಸ್ಮಿ (ಸೀ. ಪೀ.)], ತವೇವ ಅತ್ಥಾಯ ಇಧಾಗತೋಸ್ಮಿ;

ಯಾ ತಂ ವಧಿತ್ವಾನ ವಿಜಾಯಿ ಪುತ್ತಂ, ಸಹಾವ ಪುತ್ತೇನ ಕರೋಮಿ ಭಸ್ಮಂ.

೭. ಏವಞ್ಚ [ಏತಞ್ಚ (ಸೀ. ಪೀ.)] ತೇ ರುಚ್ಚತಿ ದೇವರಾಜ, ಮಮೇವ ಅತ್ಥಾಯ ಇಧಾಗತೋಸಿ;

ಅಹಞ್ಚ ಪುತ್ತೋ ಸುಣಿಸಾ ಚ ನತ್ತಾ, ಸಮ್ಮೋದಮಾನಾ ಘರಮಾವಸೇಮ.

೮. ಏವಞ್ಚ ತೇ ರುಚ್ಚತಿ ಕಾತಿಯಾನಿ, ಹತಾಪಿ ಸನ್ತಾ ನ ಜಹಾಸಿ ಧಮ್ಮಂ;

ತುವಞ್ಚ [ತ್ವಞ್ಚ (ಪೀ. ಕ.)] ಪುತ್ತೋ ಸುಣಿಸಾ ಚ ನತ್ತಾ, ಸಮ್ಮೋದಮಾನಾ ಘರಮಾವಸೇಥ.

೯. ಸಾ ಕಾತಿಯಾನೀ ಸುಣಿಸಾಯ ಸದ್ಧಿಂ, ಸಮ್ಮೋದಮಾನಾ ಘರಮಾವಸಿತ್ಥ;

ಪುತ್ತೋ ಚ ನತ್ತಾ ಚ ಉಪಟ್ಠಹಿಂಸು, ದೇವಾನಮಿನ್ದೇನ ಅಧಿಗ್ಗಹೀತಾತಿ.

ಕಚ್ಚಾನಿಜಾತಕಂ ಪಠಮಂ.

೪೧೮. ಅಟ್ಠಸದ್ದಜಾತಕಂ (೨)

೧೦. ಇದಂ ಪುರೇ ನಿನ್ನಮಾಹು, ಬಹುಮಚ್ಛಂ ಮಹೋದಕಂ;

ಆವಾಸೋ ಬಕರಾಜಸ್ಸ, ಪೇತ್ತಿಕಂ ಭವನಂ ಮಮ;

ತ್ಯಜ್ಜ ಭೇಕೇನ [ಭಿಙ್ಗೇನ (ಕ.)] ಯಾಪೇಮ, ಓಕಂ ನ ವಜಹಾಮಸೇ [ಓಕನ್ತಂ ನ ಜಹಾಮಸೇ (ಕ.)].

೧೧. ಕೋ ದುತಿಯಂ ಅಸೀಲಿಸ್ಸ, ಬನ್ಧರಸ್ಸಕ್ಖಿ ಭೇಚ್ಛತಿ [ಭೇಜ್ಜತಿ (ಸೀ. ಸ್ಯಾ. ಪೀ.), ಭಿನ್ದತಿ (ಕ.)];

ಕೋ ಮೇ ಪುತ್ತೇ ಕುಲಾವಕಂ, ಮಞ್ಚ ಸೋತ್ಥಿಂ ಕರಿಸ್ಸತಿ.

೧೨. ಸಬ್ಬಾ ಪರಿಕ್ಖಯಾ ಫೇಗ್ಗು, ಯಾವ ತಸ್ಸಾ ಗತೀ ಅಹು;

ಖೀಣಭಕ್ಖೋ ಮಹಾರಾಜ, ಸಾರೇ ನ ರಮತೀ ಘುಣೋ.

೧೩. ಸಾ ನೂನಾಹಂ ಇತೋ ಗನ್ತ್ವಾ, ರಞ್ಞೋ ಮುತ್ತಾ ನಿವೇಸನಾ;

ಅತ್ತಾನಂ ರಮಯಿಸ್ಸಾಮಿ, ದುಮಸಾಖನಿಕೇತಿನೀ.

೧೪. ಸೋ ನೂನಾಹಂ ಇತೋ ಗನ್ತ್ವಾ, ರಞ್ಞೋ ಮುತ್ತೋ ನಿವೇಸನಾ;

ಅಗ್ಗೋದಕಾನಿ ಪಿಸ್ಸಾಮಿ, ಯೂಥಸ್ಸ ಪುರತೋ ವಜಂ.

೧೫. ತಂ ಮಂ ಕಾಮೇಹಿ ಸಮ್ಮತ್ತಂ, ರತ್ತಂ ಕಾಮೇಸು ಮುಚ್ಛಿತಂ;

ಆನಯೀ ಭರತೋ [ವನತೋ (ಕ.)] ಲುದ್ದೋ, ಬಾಹಿಕೋ ಭದ್ದಮತ್ಥು ತೇ.

೧೬. ಅನ್ಧಕಾರತಿಮಿಸಾಯಂ, ತುಙ್ಗೇ ಉಪರಿಪಬ್ಬತೇ;

ಸಾ ಮಂ ಸಣ್ಹೇನ ಮುದುನಾ, ಮಾ ಪಾದಂ ಖಲಿ [ಖಣಿ (ಸೀ. ಸ್ಯಾ. ಪೀ.)] ಯಸ್ಮನಿ.

೧೭. ಅಸಂಸಯಂ ಜಾತಿಖಯನ್ತದಸ್ಸೀ, ನ ಗಬ್ಭಸೇಯ್ಯಂ ಪುನರಾವಜಿಸ್ಸಂ;

ಅಯಮನ್ತಿಮಾ ಪಚ್ಛಿಮಾ ಗಬ್ಭಸೇಯ್ಯಾ [ಅಯಂ ಹಿ ಮೇ ಅನ್ತಿಮಾ ಗಬ್ಭಸೇಯ್ಯಾ (ಸೀ. ಪೀ.)], ಖೀಣೋ ಮೇ ಸಂಸಾರೋ ಪುನಬ್ಭವಾಯಾತಿ.

ಅಟ್ಠಸದ್ದಜಾತಕಂ ದುತಿಯಂ.

೪೧೯. ಸುಲಸಾಜಾತಕಂ (೩)

೧೮. ಇದಂ ಸುವಣ್ಣಕಾಯೂರಂ, ಮುತ್ತಾ ವೇಳುರಿಯಾ ಬಹೂ;

ಸಬ್ಬಂ ಹರಸ್ಸು ಭದ್ದನ್ತೇ, ಮಞ್ಚ ದಾಸೀತಿ ಸಾವಯ.

೧೯. ಓರೋಪಯಸ್ಸು ಕಲ್ಯಾಣಿ, ಮಾ ಬಾಳ್ಹಂ [ಬಹುಂ (ಸೀ. ಸ್ಯಾ. ಪೀ.)] ಪರಿದೇವಸಿ;

ನ ಚಾಹಂ ಅಭಿಜಾನಾಮಿ, ಅಹನ್ತ್ವಾ ಧನಮಾಭತಂ.

೨೦. ಯತೋ ಸರಾಮಿ ಅತ್ತಾನಂ, ಯತೋ ಪತ್ತಾಸ್ಮಿ ವಿಞ್ಞುತಂ;

ನ ಚಾಹಂ ಅಭಿಜಾನಾಮಿ, ಅಞ್ಞಂ ಪಿಯತರಂ ತಯಾ.

೨೧. ಏಹಿ ತಂ ಉಪಗೂಹಿಸ್ಸಂ [ಉಪಗುಯ್ಹಿಸ್ಸಂ (ಕ.)], ಕರಿಸ್ಸಞ್ಚ ಪದಕ್ಖಿಣಂ;

ನ ಹಿ ದಾನಿ ಪುನ ಅತ್ಥಿ, ಮಮ ತುಯ್ಹಞ್ಚ ಸಙ್ಗಮೋ.

೨೨. ನ ಹಿ ಸಬ್ಬೇಸು ಠಾನೇಸು, ಪುರಿಸೋ ಹೋತಿ ಪಣ್ಡಿತೋ;

ಇತ್ಥೀಪಿ ಪಣ್ಡಿತಾ ಹೋತಿ, ತತ್ಥ ತತ್ಥ ವಿಚಕ್ಖಣಾ.

೨೩. ನ ಹಿ ಸಬ್ಬೇಸು ಠಾನೇಸು, ಪುರಿಸೋ ಹೋತಿ ಪಣ್ಡಿತೋ;

ಇತ್ಥೀಪಿ ಪಣ್ಡಿತಾ ಹೋತಿ, ಲಹುಂ ಅತ್ಥಂ ವಿಚಿನ್ತಿಕಾ [ಲಹುಮತ್ಥವಿಚಿನ್ತಿಕಾ (ಸೀ. ಪೀ.)].

೨೪. ಲಹುಞ್ಚ ವತ ಖಿಪ್ಪಞ್ಚ, ನಿಕಟ್ಠೇ ಸಮಚೇತಯಿ;

ಮಿಗಂ ಪುಣ್ಣಾಯತೇನೇವ [ಪುಣ್ಣಾಯತನೇವ (ಸ್ಯಾ.)], ಸುಲಸಾ ಸತ್ತುಕಂ ವಧಿ.

೨೫. ಯೋಧ ಉಪ್ಪತಿತಂ ಅತ್ಥಂ, ನ ಖಿಪ್ಪಮನುಬುಜ್ಝತಿ;

ಸೋ ಹಞ್ಞತಿ ಮನ್ದಮತಿ, ಚೋರೋವ ಗಿರಿಗಬ್ಭರೇ.

೨೬. ಯೋ ಚ ಉಪ್ಪತಿತಂ ಅತ್ಥಂ, ಖಿಪ್ಪಮೇವ ನಿಬೋಧತಿ;

ಮುಚ್ಚತೇ ಸತ್ತುಸಮ್ಬಾಧಾ, ಸುಲಸಾ ಸತ್ತುಕಾಮಿವಾತಿ.

ಸುಲಸಾಜಾತಕಂ ತತಿಯಂ.

೪೨೦. ಸುಮಙ್ಗಲಜಾತಕಂ (೪)

೨೭. ಭುಸಮ್ಹಿ [ಭುಸಮ್ಪಿ (ಕ.), ಭುಸಂ ಹಿ (ಸೀ. ನಿಯ್ಯ)] ಕುದ್ಧೋತಿ ಅವೇಕ್ಖಿಯಾನ, ನ ತಾವ ದಣ್ಡಂ ಪಣಯೇಯ್ಯ ಇಸ್ಸರೋ;

ಅಟ್ಠಾನಸೋ ಅಪ್ಪತಿರೂಪಮತ್ತನೋ, ಪರಸ್ಸ ದುಕ್ಖಾನಿ ಭುಸಂ ಉದೀರಯೇ.

೨೮. ಯತೋ ಚ ಜಾನೇಯ್ಯ ಪಸಾದಮತ್ತನೋ, ಅತ್ಥಂ ನಿಯುಞ್ಜೇಯ್ಯ ಪರಸ್ಸ ದುಕ್ಕಟಂ;

ತದಾಯಮತ್ಥೋತಿ ಸಯಂ ಅವೇಕ್ಖಿಯ, ಅಥಸ್ಸ ದಣ್ಡಂ ಸದಿಸಂ ನಿವೇಸಯೇ.

೨೯. ನ ಚಾಪಿ ಝಾಪೇತಿ ಪರಂ ನ ಅತ್ತನಂ, ಅಮುಚ್ಛಿತೋ ಯೋ ನಯತೇ ನಯಾನಯಂ;

ಯೋ ದಣ್ಡಧಾರೋ ಭವತೀಧ ಇಸ್ಸರೋ, ಸ ವಣ್ಣಗುತ್ತೋ ಸಿರಿಯಾ ನ ಧಂಸತಿ.

೩೦. ಯೇ ಖತ್ತಿಯಾ ಸೇ ಅನಿಸಮ್ಮಕಾರಿನೋ, ಪಣೇನ್ತಿ ದಣ್ಡಂ ಸಹಸಾ ಪಮುಚ್ಛಿತಾ;

ಅವಣ್ಣಸಂಯುತಾ [ಯುತ್ತಾವ (ಕ.)] ಜಹನ್ತಿ ಜೀವಿತಂ, ಇತೋ ವಿಮುತ್ತಾಪಿ ಚ ಯನ್ತಿ ದುಗ್ಗತಿಂ.

೩೧. ಧಮ್ಮೇ ಚ ಯೇ ಅರಿಯಪ್ಪವೇದಿತೇ ರತಾ, ಅನುತ್ತರಾ ತೇ ವಚಸಾ ಮನಸಾ ಕಮ್ಮುನಾ ಚ;

ತೇ ಸನ್ತಿಸೋರಚ್ಚಸಮಾಧಿಸಣ್ಠಿತಾ, ವಜನ್ತಿ ಲೋಕಂ ದುಭಯಂ ತಥಾವಿಧಾ.

೩೨. ರಾಜಾಹಮಸ್ಮಿ ನರಪಮದಾನಮಿಸ್ಸರೋ, ಸಚೇಪಿ ಕುಜ್ಝಾಮಿ ಠಪೇಮಿ ಅತ್ತನಂ;

ನಿಸೇಧಯನ್ತೋ ಜನತಂ ತಥಾವಿಧಂ, ಪಣೇಮಿ ದಣ್ಡಂ ಅನುಕಮ್ಪ ಯೋನಿಸೋ.

೩೩. ಸಿರೀ ಚ ಲಕ್ಖೀ ಚ ತವೇವ ಖತ್ತಿಯ, ಜನಾಧಿಪ ಮಾ ವಿಜಹಿ ಕುದಾಚನಂ;

ಅಕ್ಕೋಧನೋ ನಿಚ್ಚಪಸನ್ನಚಿತ್ತೋ, ಅನೀಘೋ ತುವಂ ವಸ್ಸಸತಾನಿ ಪಾಲಯ.

೩೪. ಗುಣೇಹಿ ಏತೇಹಿ ಉಪೇತ ಖತ್ತಿಯ, ಠಿತಮರಿಯವತ್ತೀ [ವತ್ತಿ (ಸೀ.), ವುತ್ತಿ (ಕ.)] ಸುವಚೋ ಅಕೋಧನೋ;

ಸುಖೀ ಅನುಪ್ಪೀಳ ಪಸಾಸಮೇದಿನಿಂ [ಅನುಪ್ಪೀಳಂ ಸಹಸಮೇದನಿಂ (ಕ.)], ಇತೋ ವಿಮುತ್ತೋಪಿ ಚ ಯಾಹಿ ಸುಗ್ಗತಿಂ.

೩೫. ಏವಂ ಸುನೀತೇನ [ಸುವಿನೀತೇನ (ಪೀ.)] ಸುಭಾಸಿತೇನ, ಧಮ್ಮೇನ ಞಾಯೇನ ಉಪಾಯಸೋ ನಯಂ;

ನಿಬ್ಬಾಪಯೇ ಸಙ್ಖುಭಿತಂ ಮಹಾಜನಂ, ಮಹಾವ ಮೇಘೋ ಸಲಿಲೇನ ಮೇದಿನಿನ್ತಿ [ಮೇದನಿನ್ತಿ (ಸ್ಯಾ. ಕ.)].

ಸುಮಙ್ಗಲಜಾತಕಂ ಚತುತ್ಥಂ.

೪೨೧. ಗಙ್ಗಮಾಲಜಾತಕಂ (೫)

೩೬. ಅಙ್ಗಾರಜಾತಾ ಪಥವೀ, ಕುಕ್ಕುಳಾನುಗತಾ ಮಹೀ;

ಅಥ ಗಾಯಸಿ ವತ್ತಾನಿ [ವತ್ಥಾನಿ (ಕ.)], ನ ತಂ ತಪತಿ ಆತಪೋ.

೩೭. ಉದ್ಧಂ ತಪತಿ ಆದಿಚ್ಚೋ, ಅಧೋ ತಪತಿ ವಾಲುಕಾ;

ಅಥ ಗಾಯಸಿ ವತ್ತಾನಿ [ವತ್ಥಾನಿ (ಕ.)], ನ ತಂ ತಪತಿ ಆತಪೋ.

೩೮. ನ ಮಂ ತಪತಿ ಆತಪೋ, ಆತಪಾ [ಆತಪ್ಪಾ (ಸೀ. ಸ್ಯಾ. ಪೀ.)] ತಪಯನ್ತಿ ಮಂ;

ಅತ್ಥಾ ಹಿ ವಿವಿಧಾ ರಾಜ, ತೇ ತಪನ್ತಿ ನ ಆತಪೋ.

೩೯. ಅದ್ದಸಂ ಕಾಮ ತೇ ಮೂಲಂ, ಸಙ್ಕಪ್ಪಾ ಕಾಮ ಜಾಯಸಿ;

ನ ತಂ ಸಙ್ಕಪ್ಪಯಿಸ್ಸಾಮಿ, ಏವಂ ಕಾಮ ನ ಹೇಹಿಸಿ.

೪೦. ಅಪ್ಪಾಪಿ ಕಾಮಾ ನ ಅಲಂ, ಬಹೂಹಿಪಿ ನ ತಪ್ಪತಿ;

ಅಹಹಾ ಬಾಲಲಪನಾ, ಪರಿವಜ್ಜೇಥ [ಪಟಿವಿಜ್ಝೇಥ (ಪೀ. ಸೀ. ಅಟ್ಠ.)] ಜಗ್ಗತೋ.

೪೧. ಅಪ್ಪಸ್ಸ ಕಮ್ಮಸ್ಸ ಫಲಂ ಮಮೇದಂ, ಉದಯೋ ಅಜ್ಝಾಗಮಾ ಮಹತ್ತಪತ್ತಂ;

ಸುಲದ್ಧಲಾಭೋ ವತ ಮಾಣವಸ್ಸ, ಯೋ ಪಬ್ಬಜೀ ಕಾಮರಾಗಂ ಪಹಾಯ.

೪೨. ತಪಸಾ ಪಜಹನ್ತಿ ಪಾಪಕಮ್ಮಂ, ತಪಸಾ ನ್ಹಾಪಿತಕುಮ್ಭಕಾರಭಾವಂ;

ತಪಸಾ ಅಭಿಭುಯ್ಯ ಗಙ್ಗಮಾಲ, ನಾಮೇನಾಲಪಸಜ್ಜ ಬ್ರಹ್ಮದತ್ತಂ.

೪೩. ಸನ್ದಿಟ್ಠಿಕಮೇವ ‘‘ಅಮ್ಮ’’ ಪಸ್ಸಥ, ಖನ್ತೀಸೋರಚ್ಚಸ್ಸ ಅಯಂ [ಯೋ (ಸ್ಯಾ. ಪೀ. ಕ.)] ವಿಪಾಕೋ;

ಯೋ [ಸೋ (ಸ್ಯಾ. ಕ.)] ಸಬ್ಬಜನಸ್ಸ ವನ್ದಿತೋಹು, ತಂ ವನ್ದಾಮ ಸರಾಜಿಕಾ ಸಮಚ್ಚಾ.

೪೪. ಮಾ ಕಿಞ್ಚಿ ಅವಚುತ್ಥ ಗಙ್ಗಮಾಲಂ, ಮುನಿನಂ ಮೋನಪಥೇಸು ಸಿಕ್ಖಮಾನಂ;

ಏಸೋ ಹಿ ಅತರಿ ಅಣ್ಣವಂ, ಯಂ ತರಿತ್ವಾ ಚರನ್ತಿ ವೀತಸೋಕಾತಿ.

ಗಙ್ಗಮಾಲಜಾತಕಂ ಪಞ್ಚಮಂ.

೪೨೨. ಚೇತಿಯಜಾತಕಂ (೬)

೪೫. ಧಮ್ಮೋ ಹವೇ ಹತೋ ಹನ್ತಿ, ನಾಹತೋ ಹನ್ತಿ ಕಿಞ್ಚನಂ [ಕಞ್ಚಿನಂ (ಪೀ.)];

ತಸ್ಮಾ ಹಿ ಧಮ್ಮಂ ನ ಹನೇ, ಮಾ ತ್ವಂ [ತಂ (ಸ್ಯಾ. ಪೀ.)] ಧಮ್ಮೋ ಹತೋ ಹನಿ.

೪೬. ಅಲಿಕಂ ಭಾಸಮಾನಸ್ಸ, ಅಪಕ್ಕಮನ್ತಿ ದೇವತಾ;

ಪೂತಿಕಞ್ಚ ಮುಖಂ ವಾತಿ, ಸಕಟ್ಠಾನಾ ಚ ಧಂಸತಿ;