೯. ನವಕನಿಪಾತೋ

೪೨೭. ಗಿಜ್ಝಜಾತಕಂ (೧)

೧. ಪರಿಸಙ್ಕುಪಥೋ ನಾಮ, ಗಿಜ್ಝಪನ್ಥೋ ಸನನ್ತನೋ;

ತತ್ರಾಸಿ ಮಾತಾಪಿತರೋ, ಗಿಜ್ಝೋ ಪೋಸೇಸಿ ಜಿಣ್ಣಕೇ;

ತೇಸಂ ಅಜಗರಮೇದಂ, ಅಚ್ಚಹಾಸಿ ಬಹುತ್ತಸೋ [ಪಹುತ್ತತೋ (ಕ. ಸೀ.), ಪಹೂತಸೋ (ಸ್ಯಾ. ಪೀ.), ಬಹುಧಸೋ (ಕ.)].

೨. ಪಿತಾ ಚ ಪುತ್ತಂ ಅವಚ, ಜಾನಂ ಉಚ್ಚಂ ಪಪಾತಿನಂ;

ಸುಪತ್ತಂ ಥಾಮಸಮ್ಪನ್ನಂ [ಪಕ್ಖಸಮ್ಪನ್ನಂ (ಸೀ. ಸ್ಯಾ. ಪೀ.)], ತೇಜಸ್ಸಿಂ ದೂರಗಾಮಿನಂ.

೩. ಪರಿಪ್ಲವನ್ತಂ ಪಥವಿಂ, ಯದಾ ತಾತ ವಿಜಾನಹಿ;

ಸಾಗರೇನ ಪರಿಕ್ಖಿತ್ತಂ, ಚಕ್ಕಂವ ಪರಿಮಣ್ಡಲಂ;

ತತೋ ತಾತ ನಿವತ್ತಸ್ಸು, ಮಾಸ್ಸು ಏತ್ತೋ ಪರಂ ಗಮಿ.

೪. ಉದಪತ್ತೋಸಿ [ಉದ್ಧಂ ಪತ್ತೋಸಿ (ಕ. ಸೀ.)] ವೇಗೇನ, ಬಲೀ ಪಕ್ಖೀ ದಿಜುತ್ತಮೋ;

ಓಲೋಕಯನ್ತೋ ವಕ್ಕಙ್ಗೋ, ಪಬ್ಬತಾನಿ ವನಾನಿ ಚ.

೫. ಅದ್ದಸ್ಸ ಪಥವಿಂ ಗಿಜ್ಝೋ, ಯಥಾಸಾಸಿ [ಯಥಾಸ್ಸಾಸಿ (ಸ್ಯಾ. ಅಟ್ಠ. ಪಾಠನ್ತರಂ)] ಪಿತುಸ್ಸುತಂ;

ಸಾಗರೇನ ಪರಿಕ್ಖಿತ್ತಂ, ಚಕ್ಕಂವ ಪರಿಮಣ್ಡಲಂ.

೬. ತಞ್ಚ ಸೋ ಸಮತಿಕ್ಕಮ್ಮ, ಪರಮೇವಚ್ಚವತ್ತಥ [ಪರಮೇವ ಪವತ್ತಥ (ಸೀ. ಸ್ಯಾ.)];

ತಞ್ಚ ವಾತಸಿಖಾ ತಿಕ್ಖಾ, ಅಚ್ಚಹಾಸಿ ಬಲಿಂ ದಿಜಂ.

೭. ನಾಸಕ್ಖಾತಿಗತೋ ಪೋಸೋ, ಪುನದೇವ ನಿವತ್ತಿತುಂ;

ದಿಜೋ ಬ್ಯಸನಮಾಪಾದಿ, ವೇರಮ್ಭಾನಂ [ವೇರಮ್ಬಾನಂ (ಸೀ. ಪೀ.)] ವಸಂ ಗತೋ.

೮. ತಸ್ಸ ಪುತ್ತಾ ಚ ದಾರಾ ಚ, ಯೇ ಚಞ್ಞೇ ಅನುಜೀವಿನೋ;

ಸಬ್ಬೇ ಬ್ಯಸನಮಾಪಾದುಂ, ಅನೋವಾದಕರೇ ದಿಜೇ.

೯. ಏವಮ್ಪಿ ಇಧ ವುಡ್ಢಾನಂ, ಯೋ ವಾಕ್ಯಂ ನಾವಬುಜ್ಝತಿ;

ಅತಿಸೀಮಚರೋ ದಿತ್ತೋ, ಗಿಜ್ಝೋವಾತೀತಸಾಸನೋ;

ಸ ವೇ ಬ್ಯಸನಂ ಪಪ್ಪೋತಿ, ಅಕತ್ವಾ ವುಡ್ಢಸಾಸನನ್ತಿ.

ಗಿಜ್ಝಜಾತಕಂ ಪಠಮಂ.

೪೨೮. ಕೋಸಮ್ಬಿಯಜಾತಕಂ (೨)

೧೦. ಪುಥುಸದ್ದೋ ಸಮಜನೋ, ನ ಬಾಲೋ ಕೋಚಿ ಮಞ್ಞಥ;

ಸಙ್ಘಸ್ಮಿಂ ಭಿಜ್ಜಮಾನಸ್ಮಿಂ, ನಾಞ್ಞಂ ಭಿಯ್ಯೋ ಅಮಞ್ಞರುಂ.

೧೧. ಪರಿಮುಟ್ಠಾ ಪಣ್ಡಿತಾಭಾಸಾ, ವಾಚಾಗೋಚರಭಾಣಿನೋ;

ಯಾವಿಚ್ಛನ್ತಿ ಮುಖಾಯಾಮಂ, ಯೇನ ನೀತಾ ನ ತಂ ವಿದೂ.

೧೨. ಅಕ್ಕೋಚ್ಛಿ ಮಂ ಅವಧಿ ಮಂ, ಅಜಿನಿ ಮಂ ಅಹಾಸಿ ಮೇ;

ಯೇ ಚ ತಂ ಉಪನಯ್ಹನ್ತಿ, ವೇರಂ ತೇಸಂ ನ ಸಮ್ಮತಿ.

೧೩. ಅಕ್ಕೋಚ್ಛಿ ಮಂ ಅವಧಿ ಮಂ, ಅಜಿನಿ ಮಂ ಅಹಾಸಿ ಮೇ;

ಯೇ ಚ ತಂ ನುಪನಯ್ಹನ್ತಿ, ವೇರಂ ತೇಸೂಪಸಮ್ಮತಿ.

೧೪. ನ ಹಿ ವೇರೇನ ವೇರಾನಿ, ಸಮ್ಮನ್ತೀಧ ಕುದಾಚನಂ;

ಅವೇರೇನ ಚ ಸಮ್ಮನ್ತಿ, ಏಸ ಧಮ್ಮೋ ಸನನ್ತನೋ.

೧೫. ಪರೇ ಚ ನ ವಿಜಾನನ್ತಿ, ಮಯಮೇತ್ಥ ಯಮಾಮಸೇ;

ಯೇ ಚ ತತ್ಥ ವಿಜಾನನ್ತಿ, ತತೋ ಸಮ್ಮನ್ತಿ ಮೇಧಗಾ.

೧೬. ಅಟ್ಠಿಚ್ಛಿನ್ನಾ ಪಾಣಹರಾ, ಗವಸ್ಸ [ಗವಾಸ್ಸ (ಸೀ. ಸ್ಯಾ. ಪೀ.)] ಧನಹಾರಿನೋ;

ರಟ್ಠಂ ವಿಲುಮ್ಪಮಾನಾನಂ, ತೇಸಮ್ಪಿ ಹೋತಿ ಸಙ್ಗತಿ;

ಕಸ್ಮಾ ತುಮ್ಹಾಕ ನೋ ಸಿಯಾ.

೧೭. ಸಚೇ ಲಭೇಥ ನಿಪಕಂ ಸಹಾಯಂ, ಸದ್ಧಿಂಚರಂ ಸಾಧುವಿಹಾರಿಧೀರಂ;

ಅಭಿಭುಯ್ಯ ಸಬ್ಬಾನಿ ಪರಿಸ್ಸಯಾನಿ, ಚರೇಯ್ಯ ತೇನತ್ತಮನೋ ಸತೀಮಾ.

೧೮. ನೋ ಚೇ ಲಭೇಥ ನಿಪಕಂ ಸಹಾಯಂ, ಸದ್ಧಿಂಚರಂ ಸಾಧುವಿಹಾರಿಧೀರಂ;

ರಾಜಾವ ರಟ್ಠಂ ವಿಜಿತಂ ಪಹಾಯ, ಏಕೋ ಚರೇ ಮಾತಙ್ಗರಞ್ಞೇವ ನಾಗೋ.

೧೯. ಏಕಸ್ಸ ಚರಿತಂ ಸೇಯ್ಯೋ, ನತ್ಥಿ ಬಾಲೇ ಸಹಾಯತಾ;

ಏಕೋ ಚರೇ ನ ಪಾಪಾನಿ ಕಯಿರಾ, ಅಪ್ಪೋಸ್ಸುಕ್ಕೋ ಮಾತಙ್ಗರಞ್ಞೇವ ನಾಗೋತಿ.

ಕೋಸಮ್ಬಿಯಜಾತಕಂ ದುತಿಯಂ.

೪೨೯. ಮಹಾಸುವಜಾತಕಂ (೩)

೨೦. ದುಮೋ ಯದಾ ಹೋತಿ ಫಲೂಪಪನ್ನೋ, ಭುಞ್ಜನ್ತಿ ನಂ ವಿಹಙ್ಗಮಾ [ವಿಹಗಾ (ಸೀ. ಪೀ.)] ಸಮ್ಪತನ್ತಾ;

ಖೀಣನ್ತಿ ಞತ್ವಾನ ದುಮಂ ಫಲಚ್ಚಯೇ [ಞತ್ವಾ ದುಮಪ್ಫಲಚ್ಚಯೇನ (ಕ.)], ದಿಸೋದಿಸಂ ಯನ್ತಿ ತತೋ ವಿಹಙ್ಗಮಾ.

೨೧. ಚರ ಚಾರಿಕಂ ಲೋಹಿತತುಣ್ಡ ಮಾಮರಿ, ಕಿಂ ತ್ವಂ ಸುವ ಸುಕ್ಖದುಮಮ್ಹಿ ಝಾಯಸಿ;

ತದಿಙ್ಘ ಮಂ ಬ್ರೂಹಿ ವಸನ್ತಸನ್ನಿಭ, ಕಸ್ಮಾ ಸುವ ಸುಕ್ಖದುಮಂ ನ ರಿಞ್ಚಸಿ.

೨೨. ಯೇ ವೇ ಸಖೀನಂ ಸಖಾರೋ ಭವನ್ತಿ, ಪಾಣಚ್ಚಯೇ [ಪಾಣಂ ಚಜೇ (ಕ.), ಪಾಣಚ್ಚಯೇ ಮರಣಕಾಲೇ ಚ ಸುಖದುಕ್ಖೇಸು ಚ ನ ಜಹನ್ತೀತಿ ಸಮ್ಬನ್ಧೋ] ದುಕ್ಖಸುಖೇಸು ಹಂಸ;

ಖೀಣಂ ಅಖೀಣನ್ತಿ ನ ತಂ ಜಹನ್ತಿ, ಸನ್ತೋ ಸತಂ ಧಮ್ಮಮನುಸ್ಸರನ್ತಾ.

೨೩. ಸೋಹಂ ಸತಂ ಅಞ್ಞತರೋಸ್ಮಿ ಹಂಸ, ಞಾತೀ ಚ ಮೇ ಹೋತಿ ಸಖಾ ಚ ರುಕ್ಖೋ;

ತಂ ನುಸ್ಸಹೇ ಜೀವಿಕತ್ಥೋ ಪಹಾತುಂ, ಖೀಣನ್ತಿ ಞತ್ವಾನ ನ ಹೇಸ ಧಮ್ಮೋ [ನ ಸೋಸ (ಕ.), ನ ಏಸ (ಸ್ಯಾ.)].

೨೪. ಸಾಧು ಸಕ್ಖಿ ಕತಂ ಹೋತಿ, ಮೇತ್ತಿ ಸಂಸತಿ ಸನ್ಥವೋ [ಮಿತ್ತಂ ಸಙ್ಗತಿ ಸನ್ಧವೋ (ಕ.)];

ಸಚೇತಂ ಧಮ್ಮಂ ರೋಚೇಸಿ, ಪಾಸಂಸೋಸಿ ವಿಜಾನತಂ.

೨೫. ಸೋ ತೇ ಸುವ ವರಂ ದಮ್ಮಿ, ಪತ್ತಯಾನ ವಿಹಙ್ಗಮ;

ವರಂ ವರಸ್ಸು ವಕ್ಕಙ್ಗ, ಯಂ ಕಿಞ್ಚಿ ಮನಸಿಚ್ಛಸಿ.

೨೬. ವರಞ್ಚ ಮೇ ಹಂಸ ಭವಂ ದದೇಯ್ಯ, ಅಯಞ್ಚ ರುಕ್ಖೋ ಪುನರಾಯುಂ ಲಭೇಥ;

ಸೋ ಸಾಖವಾ ಫಲಿಮಾ ಸಂವಿರೂಳ್ಹೋ, ಮಧುತ್ಥಿಕೋ ತಿಟ್ಠತು ಸೋಭಮಾನೋ.

೨೭. ತಂ ಪಸ್ಸ ಸಮ್ಮ ಫಲಿಮಂ ಉಳಾರಂ, ಸಹಾವ ತೇ ಹೋತು ಉದುಮ್ಬರೇನ;

ಸೋ ಸಾಖವಾ ಫಲಿಮಾ ಸಂವಿರೂಳ್ಹೋ, ಮಧುತ್ಥಿಕೋ ತಿಟ್ಠತು ಸೋಭಮಾನೋ.

೨೮. ಏವಂ ಸಕ್ಕ ಸುಖೀ ಹೋಹಿ, ಸಹ ಸಬ್ಬೇಹಿ ಞಾತಿಭಿ;

ಯಥಾಹಮಜ್ಜ ಸುಖಿತೋ, ದಿಸ್ವಾನ ಸಫಲಂ ದುಮಂ.

೨೯. ಸುವಸ್ಸ ಚ ವರಂ ದತ್ವಾ, ಕತ್ವಾನ ಸಫಲಂ ದುಮಂ;

ಪಕ್ಕಾಮಿ ಸಹ ಭರಿಯಾಯ, ದೇವಾನಂ ನನ್ದನಂ ವನನ್ತಿ.

ಮಹಾಸುವಜಾತಕಂ ತತಿಯಂ.

೪೩೦. ಚೂಳಸುವಜಾತಕಂ (೪)

೩೦. ಸನ್ತಿ ರುಕ್ಖಾ ಹರಿಪತ್ತಾ [ಹರಿತಪತ್ತಾ (ಸೀ. ಸ್ಯಾ. ಪೀ.)], ದುಮಾ ನೇಕಫಲಾ ಬಹೂ;

ಕಸ್ಮಾ ನು ಸುಕ್ಖೇ [ಸುಕ್ಖ (ಕ.)] ಕೋಳಾಪೇ, ಸುವಸ್ಸ ನಿರತೋ ಮನೋ.

೩೧. ಫಲಸ್ಸ ಉಪಭುಞ್ಜಿಮ್ಹಾ, ನೇಕವಸ್ಸಗಣೇ ಬಹೂ;

ಅಫಲಮ್ಪಿ ವಿದಿತ್ವಾನ, ಸಾವ ಮೇತ್ತಿ ಯಥಾ ಪುರೇ.

೩೨. ಸುಖಞ್ಚ ರುಕ್ಖಂ ಕೋಳಾಪಂ, ಓಪತ್ತಮಫಲಂ ದುಮಂ;

ಓಹಾಯ ಸಕುಣಾ ಯನ್ತಿ, ಕಿಂ ದೋಸಂ ಪಸ್ಸಸೇ ದಿಜ.

೩೩. ಯೇ ಫಲತ್ಥಾ ಸಮ್ಭಜನ್ತಿ, ಅಫಲೋತಿ ಜಹನ್ತಿ ನಂ;

ಅತ್ತತ್ಥಪಞ್ಞಾ ದುಮ್ಮೇಧಾ, ತೇ ಹೋನ್ತಿ ಪಕ್ಖಪಾತಿನೋ.

೩೪. ಸಾಧು ಸಕ್ಖಿ ಕತಂ ಹೋತಿ, ಮೇತ್ತಿ ಸಂಸತಿ ಸನ್ಥವೋ;

ಸಚೇತಂ ಧಮ್ಮಂ ರೋಚೇಸಿ, ಪಾಸಂಸೋಸಿ ವಿಜಾನತಂ.

೩೫. ಸೋ ತೇ ಸುವ ವರಂ ದಮ್ಮಿ, ಪತ್ತಯಾನ ವಿಹಙ್ಗಮ;

ವರಂ ವರಸ್ಸು ವಕ್ಕಙ್ಗ, ಯಂ ಕಿಞ್ಚಿ ಮನಸಿಚ್ಛಸಿ.

೩೬. ಅಪಿ ನಾಮ ನಂ ಪಸ್ಸೇಯ್ಯಂ [ಅಪಿ ನಾಮ ನಂ ಪುನ ಪಸ್ಸೇ (ಸೀ. ಸ್ಯಾ.)], ಸಪತ್ತಂ ಸಫಲಂ ದುಮಂ;

ದಲಿದ್ದೋವ ನಿಧಿ ಲದ್ಧಾ, ನನ್ದೇಯ್ಯಾಹಂ ಪುನಪ್ಪುನಂ.

೩೭. ತತೋ ಅಮತಮಾದಾಯ, ಅಭಿಸಿಞ್ಚಿ ಮಹೀರುಹಂ;

ತಸ್ಸ ಸಾಖಾ ವಿರೂಹಿಂಸು [ವಿರೂಳ್ಹಸ್ಸ (ಕ.)], ಸೀತಚ್ಛಾಯಾ ಮನೋರಮಾ.

೩೮. ಏವಂ ಸಕ್ಕ ಸುಖೀ ಹೋಹಿ, ಸಹ ಸಬ್ಬೇಹಿ ಞಾತಿಭಿ;

ಯಥಾಹಮಜ್ಜ ಸುಖಿತೋ, ದಿಸ್ವಾನ ಸಫಲಂ ದುಮಂ.

೩೯. ಸುವಸ್ಸ ಚ ವರಂ ದತ್ವಾ, ಕತ್ವಾನ ಸಫಲಂ ದುಮಂ;

ಪಕ್ಕಾಮಿ ಸಹ ಭರಿಯಾಯ, ದೇವಾನಂ ನನ್ದನಂ ವನನ್ತಿ.

ಚೂಳಸುವಜಾತಕಂ ಚತುತ್ಥಂ.

೪೩೧. ಹರಿತಚಜಾತಕಂ (೫)

೪೦. ಸುತಂ ಮೇತಂ ಮಹಾಬ್ರಹ್ಮೇ, ಕಾಮೇ ಭುಞ್ಜತಿ ಹಾರಿತೋ;

ಕಚ್ಚೇತಂ ವಚನಂ ತುಚ್ಛಂ, ಕಚ್ಚಿ ಸುದ್ಧೋ ಇರಿಯ್ಯಸಿ.

೪೧. ಏವಮೇತಂ ಮಹಾರಾಜ, ಯಥಾ ತೇ ವಚನಂ ಸುತಂ;

ಕುಮ್ಮಗ್ಗಂ ಪಟಿಪನ್ನೋಸ್ಮಿ, ಮೋಹನೇಯ್ಯೇಸು ಮುಚ್ಛಿತೋ.

೪೨. ಅದು [ಆದು (ಸೀ. ಪೀ.)] ಪಞ್ಞಾ ಕಿಮತ್ಥಿಯಾ, ನಿಪುಣಾ ಸಾಧುಚಿನ್ತಿನೀ [ಚಿನ್ತನೀ (ಸೀ. ಪೀ.)];

ಯಾಯ ಉಪ್ಪತಿತಂ ರಾಗಂ, ಕಿಂ ಮನೋ ನ ವಿನೋದಯೇ.

೪೩. ಚತ್ತಾರೋಮೇ ಮಹಾರಾಜ, ಲೋಕೇ ಅತಿಬಲಾ ಭುಸಾ;

ರಾಗೋ ದೋಸೋ ಮದೋ ಮೋಹೋ, ಯತ್ಥ ಪಞ್ಞಾ ನ ಗಾಧತಿ.

೪೪. ಅರಹಾ ಸೀಲಸಮ್ಪನ್ನೋ, ಸುದ್ಧೋ ಚರತಿ ಹಾರಿತೋ;

ಮೇಧಾವೀ ಪಣ್ಡಿತೋ ಚೇವ, ಇತಿ ನೋ ಸಮ್ಮತೋ ಭವಂ.

೪೫. ಮೇಧಾವೀನಮ್ಪಿ ಹಿಂಸನ್ತಿ, ಇಸಿಂ ಧಮ್ಮಗುಣೇ ರತಂ;

ವಿತಕ್ಕಾ ಪಾಪಕಾ ರಾಜ, ಸುಭಾ ರಾಗೂಪಸಂಹಿತಾ.

೪೬. ಉಪ್ಪನ್ನಾಯಂ ಸರೀರಜೋ, ರಾಗೋ ವಣ್ಣವಿದೂಸನೋ ತವ;

ತಂ ಪಜಹ ಭದ್ದಮತ್ಥು ತೇ, ಬಹುನ್ನಾಸಿ ಮೇಧಾವಿಸಮ್ಮತೋ.

೪೭. ತೇ ಅನ್ಧಕಾರಕೇ [ಕರಣೇ (ಸೀ. ಸ್ಯಾ. ಪೀ.)] ಕಾಮೇ, ಬಹುದುಕ್ಖೇ ಮಹಾವಿಸೇ;

ತೇಸಂ ಮೂಲಂ ಗವೇಸಿಸ್ಸಂ, ಛೇಚ್ಛಂ ರಾಗಂ ಸಬನ್ಧನಂ.

೪೮. ಇದಂ ವತ್ವಾನ ಹಾರಿತೋ, ಇಸಿ ಸಚ್ಚಪರಕ್ಕಮೋ;

ಕಾಮರಾಗಂ ವಿರಾಜೇತ್ವಾ, ಬ್ರಹ್ಮಲೋಕೂಪಗೋ ಅಹೂತಿ.

ಹರಿತಚಜಾತಕಂ [ಹಾರಿತಜಾತಕಂ (ಸೀ. ಪೀ.)] ಪಞ್ಚಮಂ.

೪೩೨. ಪದಕುಸಲಮಾಣವಜಾತಕಂ (೬)

೪೯. ಬಹುಸ್ಸುತಂ ಚಿತ್ತಕಥಿಂ [ಚಿತ್ತಕಥಂ (ಸ್ಯಾ. ಕ.)], ಗಙ್ಗಾ ವಹತಿ ಪಾಟಲಿಂ [ಪಾಟಲಂ (ಸೀ. ಪೀ.)];

ವುಯ್ಹಮಾನಕ ಭದ್ದನ್ತೇ, ಏಕಂ ಮೇ ದೇಹಿ ಗಾಥಕಂ [ಗೀತಕಂ (ಕ. ಅಟ್ಠ.)].

೫೦. ಯೇನ ಸಿಞ್ಚನ್ತಿ ದುಕ್ಖಿತಂ, ಯೇನ ಸಿಞ್ಚನ್ತಿ ಆತುರಂ;

ತಸ್ಸ ಮಜ್ಝೇ ಮರಿಸ್ಸಾಮಿ, ಜಾತಂ ಸರಣತೋ ಭಯಂ.

೫೧. ಯತ್ಥ ಬೀಜಾನಿ ರೂಹನ್ತಿ, ಸತ್ತಾ ಯತ್ಥ ಪತಿಟ್ಠಿತಾ;

ಸಾ ಮೇ ಸೀಸಂ ನಿಪೀಳೇತಿ, ಜಾತಂ ಸರಣತೋ ಭಯಂ.

೫೨. ಯೇನ ಭತ್ತಾನಿ ಪಚ್ಚನ್ತಿ, ಸೀತಂ ಯೇನ ವಿಹಞ್ಞತಿ;

ಸೋ ಮಂ ಡಹತಿ [ದಯ್ಹತಿ (ಕ.)] ಗತ್ತಾನಿ, ಜಾತಂ ಸರಣತೋ ಭಯಂ.

೫೩. ಯೇನ ಭುತ್ತೇನ [ಭತ್ತೇನ (ಸ್ಯಾ. ಕ.)] ಯಾಪೇನ್ತಿ, ಪುಥೂ ಬ್ರಾಹ್ಮಣಖತ್ತಿಯಾ;

ಸೋ ಮಂ ಭುತ್ತೋ ಬ್ಯಾಪಾದೇತಿ, ಜಾತಂ ಸರಣತೋ ಭಯಂ.

೫೪. ಗಿಮ್ಹಾನಂ ಪಚ್ಛಿಮೇ ಮಾಸೇ, ವಾತಮಿಚ್ಛನ್ತಿ ಪಣ್ಡಿತಾ;

ಸೋ ಮಂ [ಸೋ ಮೇ (ಸೀ. ಪೀ.)] ಭಞ್ಜತಿ ಗತ್ತಾನಿ, ಜಾತಂ ಸರಣತೋ ಭಯಂ.

೫೫. ಯಂ ನಿಸ್ಸಿತಾ ಜಗತಿರುಹಂ, ಸ್ವಾಯಂ ಅಗ್ಗಿಂ ಪಮುಞ್ಚತಿ;

ದಿಸಾ ಭಜಥ ವಕ್ಕಙ್ಗಾ, ಜಾತಂ ಸರಣತೋ ಭಯಂ.

೫೬. ಯಮಾನಯಿಂ ಸೋಮನಸ್ಸಂ, ಮಾಲಿನಿಂ ಚನ್ದನುಸ್ಸದಂ;

ಸಾ ಮಂ ಘರಾ ನಿಚ್ಛುಭತಿ [ನೀಹರತಿ (ಸೀ. ಸ್ಯಾ.)], ಜಾತಂ ಸರಣತೋ ಭಯಂ.

೫೭. ಯೇನ ಜಾತೇನ ನನ್ದಿಸ್ಸಂ, ಯಸ್ಸ ಚ ಭವಮಿಚ್ಛಿಸಂ;

ಸೋ ಮಂ ಘರಾ ನಿಚ್ಛುಭತಿ [ನೀಹರತಿ (ಸೀ. ಸ್ಯಾ.)], ಜಾತಂ ಸರಣತೋ ಭಯಂ.

೫೮. ಸುಣನ್ತು ಮೇ ಜಾನಪದಾ, ನೇಗಮಾ ಚ ಸಮಾಗತಾ;

ಯತೋದಕಂ ತದಾದಿತ್ತಂ, ಯತೋ ಖೇಮಂ ತತೋ ಭಯಂ.

೫೯. ರಾಜಾ ವಿಲುಮ್ಪತೇ ರಟ್ಠಂ, ಬ್ರಾಹ್ಮಣೋ ಚ ಪುರೋಹಿತೋ;

ಅತ್ತಗುತ್ತಾ ವಿಹರಥ, ಜಾತಂ ಸರಣತೋ ಭಯನ್ತಿ.

ಪದಕುಸಲಮಾಣವಜಾತಕಂ ಛಟ್ಠಂ.

೪೩೩. ಲೋಮಸಕಸ್ಸಪಜಾತಕಂ (೭)

೬೦. ಅಸ್ಸ ಇನ್ದಸಮೋ ರಾಜ, ಅಚ್ಚನ್ತಂ ಅಜರಾಮರೋ;

ಸಚೇ ತ್ವಂ ಯಞ್ಞಂ ಯಾಜೇಯ್ಯ, ಇಸಿಂ ಲೋಮಸಕಸ್ಸಪಂ.

೬೧. ಸಸಮುದ್ದಪರಿಯಾಯಂ, ಮಹಿಂ ಸಾಗರಕುಣ್ಡಲಂ;

ನ ಇಚ್ಛೇ ಸಹ ನಿನ್ದಾಯ, ಏವಂ ಸೇಯ್ಯ [ಸಯ್ಹ (ಸೀ. ಸ್ಯಾ. ಪೀ.)] ವಿಜಾನಹಿ.

೬೨. ಧಿರತ್ಥು ತಂ ಯಸಲಾಭಂ, ಧನಲಾಭಞ್ಚ ಬ್ರಾಹ್ಮಣ;

ಯಾ ವುತ್ತಿ ವಿನಿಪಾತೇನ, ಅಧಮ್ಮಚರಣೇನ ವಾ.

೬೩. ಅಪಿ ಚೇ ಪತ್ತಮಾದಾಯ, ಅನಗಾರೋ ಪರಿಬ್ಬಜೇ;

ಸಾಯೇವ ಜೀವಿಕಾ ಸೇಯ್ಯೋ, ಯಾ ಚಾಧಮ್ಮೇನ ಏಸನಾ.

೬೪. ಅಪಿ ಚೇ ಪತ್ತಮಾದಾಯ, ಅನಗಾರೋ ಪರಿಬ್ಬಜೇ;

ಅಞ್ಞಂ ಅಹಿಂಸಯಂ ಲೋಕೇ, ಅಪಿ ರಜ್ಜೇನ ತಂ ವರಂ.

೬೫. ಬಲಂ ಚನ್ದೋ ಬಲಂ ಸುರಿಯೋ, ಬಲಂ ಸಮಣಬ್ರಾಹ್ಮಣಾ;

ಬಲಂ ವೇಲಾ ಸಮುದ್ದಸ್ಸ, ಬಲಾತಿಬಲಮಿತ್ಥಿಯೋ.

೬೬. ಯಥಾ ಉಗ್ಗತಪಂ ಸನ್ತಂ, ಇಸಿಂ ಲೋಮಸಕಸ್ಸಪಂ;

ಪಿತು ಅತ್ಥಾ ಚನ್ದವತೀ, ವಾಜಪೇಯ್ಯಂ [ವಾಚಪೇಯ್ಯಂ (ಪೀ. ಕ.)] ಅಯಾಜಯಿ.