೧೦. ದಸಕನಿಪಾತೋ

೪೩೯. ಚತುದ್ವಾರಜಾತಕಂ (೧)

೧. ಚತುದ್ವಾರಮಿದಂ ನಗರಂ, ಆಯಸಂ ದಳ್ಹಪಾಕಾರಂ;

ಓರುದ್ಧಪಟಿರುದ್ಧೋಸ್ಮಿ, ಕಿಂ ಪಾಪಂ ಪಕತಂ ಮಯಾ.

೨. ಸಬ್ಬೇ ಅಪಿಹಿತಾ ದ್ವಾರಾ, ಓರುದ್ಧೋಸ್ಮಿ ಯಥಾ ದಿಜೋ;

ಕಿಮಾಧಿಕರಣಂ ಯಕ್ಖ, ಚಕ್ಕಾಭಿನಿಹತೋ ಅಹಂ.

೩. ಲದ್ಧಾ ಸತಸಹಸ್ಸಾನಿ, ಅತಿರೇಕಾನಿ ವೀಸತಿ;

ಅನುಕಮ್ಪಕಾನಂ ಞಾತೀನಂ, ವಚನಂ ಸಮ್ಮ ನಾಕರಿ.

೪. ಲಙ್ಘಿಂ ಸಮುದ್ದಂ ಪಕ್ಖನ್ದಿ, ಸಾಗರಂ ಅಪ್ಪಸಿದ್ಧಿಕಂ;

ಚತುಬ್ಭಿ ಅಟ್ಠಜ್ಝಗಮಾ, ಅಟ್ಠಾಹಿಪಿ ಚ ಸೋಳಸ.

೫. ಸೋಳಸಾಹಿ ಚ ಬಾತ್ತಿಂಸ, ಅತ್ರಿಚ್ಛಂ ಚಕ್ಕಮಾಸದೋ;

ಇಚ್ಛಾಹತಸ್ಸ ಪೋಸಸ್ಸ, ಚಕ್ಕಂ ಭಮತಿ ಮತ್ಥಕೇ.

೬. ಉಪರಿವಿಸಾಲಾ ದುಪ್ಪೂರಾ, ಇಚ್ಛಾ ವಿಸಟಗಾಮಿನೀ [ವಿಸಟಗಾಮಿನಿಂ (ಪೀ. ಕ.)];

ಯೇ ಚ ತಂ ಅನುಗಿಜ್ಝನ್ತಿ, ತೇ ಹೋನ್ತಿ ಚಕ್ಕಧಾರಿನೋ.

೭. ಬಹುಭಣ್ಡಂ [ಬಹುಂ ಭಣ್ಡಂ (ಸೀ. ಪೀ.)] ಅವಹಾಯ, ಮಗ್ಗಂ ಅಪ್ಪಟಿವೇಕ್ಖಿಯ;

ಯೇಸಞ್ಚೇತಂ ಅಸಙ್ಖಾತಂ, ತೇ ಹೋನ್ತಿ ಚಕ್ಕಧಾರಿನೋ.

೮. ಕಮ್ಮಂ ಸಮೇಕ್ಖೇ ವಿಪುಲಞ್ಚ ಭೋಗಂ, ಇಚ್ಛಂ ನ ಸೇವೇಯ್ಯ ಅನತ್ಥಸಂಹಿತಂ;

ಕರೇಯ್ಯ ವಾಕ್ಯಂ ಅನುಕಮ್ಪಕಾನಂ, ತಂ ತಾದಿಸಂ ನಾತಿವತ್ತೇಯ್ಯ ಚಕ್ಕಂ.

೯. ಕೀವಚಿರಂ ನು ಮೇ ಯಕ್ಖ, ಚಕ್ಕಂ ಸಿರಸಿ ಠಸ್ಸತಿ;

ಕತಿ ವಸ್ಸಸಹಸ್ಸಾನಿ, ತಂ ಮೇ ಅಕ್ಖಾಹಿ ಪುಚ್ಛಿತೋ.

೧೦. ಅತಿಸರೋ ಪಚ್ಚಸರೋ [ಅಚ್ಚಸರೋ (ಸೀ. ಸ್ಯಾ. ಪೀ.)], ಮಿತ್ತವಿನ್ದ ಸುಣೋಹಿ ಮೇ;

ಚಕ್ಕಂ ತೇ ಸಿರಸಿ [ಸಿರಸ್ಮಿ (ಸ್ಯಾ.)] ಮಾವಿದ್ಧಂ, ನ ತಂ ಜೀವಂ ಪಮೋಕ್ಖಸೀತಿ.

ಚತುದ್ವಾರಜಾತಕಂ ಪಠಮಂ.

೪೪೦. ಕಣ್ಹಜಾತಕಂ (೨)

೧೧. ಕಣ್ಹೋ ವತಾಯಂ ಪುರಿಸೋ, ಕಣ್ಹಂ ಭುಞ್ಜತಿ ಭೋಜನಂ;

ಕಣ್ಹೇ ಭೂಮಿಪದೇಸಸ್ಮಿಂ, ನ ಮಯ್ಹಂ ಮನಸೋ ಪಿಯೋ.

೧೨. ನ ಕಣ್ಹೋ ತಚಸಾ ಹೋತಿ, ಅನ್ತೋಸಾರೋ ಹಿ ಬ್ರಾಹ್ಮಣೋ;

ಯಸ್ಮಿಂ ಪಾಪಾನಿ ಕಮ್ಮಾನಿ, ಸ ವೇ ಕಣ್ಹೋ ಸುಜಮ್ಪತಿ.

೧೩. ಏತಸ್ಮಿಂ ತೇ ಸುಲಪಿತೇ, ಪತಿರೂಪೇ ಸುಭಾಸಿತೇ;

ವರಂ ಬ್ರಾಹ್ಮಣ ತೇ ದಮ್ಮಿ, ಯಂ ಕಿಞ್ಚಿ ಮನಸಿಚ್ಛಸಿ.

೧೪. ವರಞ್ಚೇ ಮೇ ಅದೋ ಸಕ್ಕ, ಸಬ್ಬಭೂತಾನಮಿಸ್ಸರ;

ಸುನಿಕ್ಕೋಧಂ ಸುನಿದ್ದೋಸಂ, ನಿಲ್ಲೋಭಂ ವುತ್ತಿಮತ್ತನೋ;

ನಿಸ್ನೇಹಮಭಿಕಙ್ಖಾಮಿ, ಏತೇ ಮೇ ಚತುರೋ ವರೇ.

೧೫. ಕಿಂ ನು ಕೋಧೇ ವಾ [ಕೋಧೇವ (ಸೀ. ಪೀ.)] ದೋಸೇ ವಾ, ಲೋಭೇ ಸ್ನೇಹೇ ಚ ಬ್ರಾಹ್ಮಣ;

ಆದೀನವಂ ತ್ವಂ ಪಸ್ಸಸಿ [ಸಮ್ಪಸ್ಸಸಿ (ಸೀ. ಪೀ.)], ತಂ ಮೇ ಅಕ್ಖಾಹಿ ಪುಚ್ಛಿತೋ.

೧೬. ಅಪ್ಪೋ ಹುತ್ವಾ ಬಹು ಹೋತಿ, ವಡ್ಢತೇ ಸೋ ಅಖನ್ತಿಜೋ;

ಆಸಙ್ಗೀ ಬಹುಪಾಯಾಸೋ, ತಸ್ಮಾ ಕೋಧಂ ನ ರೋಚಯೇ.

೧೭. ದುಟ್ಠಸ್ಸ ಫರುಸಾ [ಪಠಮಾ (ಪೀ. ಸೀ. ನಿಯ್ಯ)] ವಾಚಾ, ಪರಾಮಾಸೋ ಅನನ್ತರಾ;

ತತೋ ಪಾಣಿ ತತೋ ದಣ್ಡೋ, ಸತ್ಥಸ್ಸ ಪರಮಾ ಗತಿ [ಪರಾಮಸತಿ (ಕ.)];

ದೋಸೋ ಕೋಧಸಮುಟ್ಠಾನೋ, ತಸ್ಮಾ ದೋಸಂ ನ ರೋಚಯೇ.

೧೮. ಆಲೋಪಸಾಹಸಾಕಾರಾ [ಸಹಸಾಕಾರಾ (ಸೀ. ಸ್ಯಾ. ಪೀ.)], ನಿಕತೀ ವಞ್ಚನಾನಿ ಚ;

ದಿಸ್ಸನ್ತಿ ಲೋಭಧಮ್ಮೇಸು, ತಸ್ಮಾ ಲೋಭಂ ನ ರೋಚಯೇ.

೧೯. ಸ್ನೇಹಸಙ್ಗಥಿತಾ [ಸಙ್ಗಧಿತಾ (ಕ.), ಸಙ್ಗನ್ತಿತಾ (ಸ್ಯಾ.)] ಗನ್ಥಾ, ಸೇನ್ತಿ ಮನೋಮಯಾ ಪುಥೂ;

ತೇ ಭುಸಂ ಉಪತಾಪೇನ್ತಿ, ತಸ್ಮಾ ಸ್ನೇಹಂ ನ ರೋಚಯೇ.

೨೦. ಏತಸ್ಮಿಂ ತೇ ಸುಲಪಿತೇ, ಪತಿರೂಪೇ ಸುಭಾಸಿತೇ;

ವರಂ ಬ್ರಾಹ್ಮಣ ತೇ ದಮ್ಮಿ, ಯಂ ಕಿಞ್ಚಿ ಮನಸಿಚ್ಛಸಿ.

೨೧. ವರಞ್ಚೇ ಮೇ ಅದೋ ಸಕ್ಕ, ಸಬ್ಬಭೂತಾನಮಿಸ್ಸರ;

ಅರಞ್ಞೇ ಮೇ ವಿಹರತೋ, ನಿಚ್ಚಂ ಏಕವಿಹಾರಿನೋ;

ಆಬಾಧಾ ಮಾ [ನ (ಸ್ಯಾ. ಪೀ.)] ಉಪ್ಪಜ್ಜೇಯ್ಯುಂ, ಅನ್ತರಾಯಕರಾ ಭುಸಾ.

೨೨. ಏತಸ್ಮಿಂ ತೇ ಸುಲಪಿತೇ, ಪತಿರೂಪೇ ಸುಭಾಸಿತೇ;

ವರಂ ಬ್ರಾಹ್ಮಣ ತೇ ದಮ್ಮಿ, ಯಂ ಕಿಞ್ಚಿ ಮನಸಿಚ್ಛಸಿ.

೨೩. ವರಞ್ಚೇ ಮೇ ಅದೋ ಸಕ್ಕ, ಸಬ್ಬಭೂತಾನಮಿಸ್ಸರ;

ನ ಮನೋ ವಾ ಸರೀರಂ ವಾ, ಮಂ-ಕತೇ ಸಕ್ಕ ಕಸ್ಸಚಿ;

ಕದಾಚಿ ಉಪಹಞ್ಞೇಥ, ಏತಂ ಸಕ್ಕ ವರಂ ವರೇತಿ.

ಕಣ್ಹಜಾತಕಂ ದುತಿಯಂ.

೪೪೧. ಚತುಪೋಸಥಿಯಜಾತಕಂ (೩)

೨೪. ಯೋ ಕೋಪನೇಯ್ಯೇ ನ ಕರೋತಿ ಕೋಪಂ, ನ ಕುಜ್ಝತಿ ಸಪ್ಪುರಿಸೋ ಕದಾಚಿ;

ಕುದ್ಧೋಪಿ ಸೋ ನಾವಿಕರೋತಿ ಕೋಪಂ, ತಂ ವೇ ನರಂ ಸಮಣಮಾಹು [ಸಮಣಂ ಆಹು (ಸೀ.)] ಲೋಕೇ.

೨೫. ಊನೂದರೋ ಯೋ ಸಹತೇ ಜಿಘಚ್ಛಂ, ದನ್ತೋ ತಪಸ್ಸೀ ಮಿತಪಾನಭೋಜನೋ;

ಆಹಾರಹೇತು ನ ಕರೋತಿ ಪಾಪಂ, ತಂ ವೇ ನರಂ ಸಮಣಮಾಹು ಲೋಕೇ.

೨೬. ಖಿಡ್ಡಂ ರತಿಂ ವಿಪ್ಪಜಹಿತ್ವಾನ ಸಬ್ಬಂ, ನ ಚಾಲಿಕಂ ಭಾಸಸಿ ಕಿಞ್ಚಿ ಲೋಕೇ;

ವಿಭೂಸಟ್ಠಾನಾ ವಿರತೋ ಮೇಥುನಸ್ಮಾ, ತಂ ವೇ ನರಂ ಸಮಣಮಾಹು ಲೋಕೇ.

೨೭. ಪರಿಗ್ಗಹಂ ಲೋಭಧಮ್ಮಞ್ಚ ಸಬ್ಬಂ, ಯೋ ವೇ ಪರಿಞ್ಞಾಯ ಪರಿಚ್ಚಜೇತಿ;

ದನ್ತಂ ಠಿತತ್ತಂ ಅಮಮಂ ನಿರಾಸಂ, ತಂ ವೇ ನರಂ ಸಮಣಮಾಹು ಲೋಕೇ.

೨೮. ಪುಚ್ಛಾಮ ಕತ್ತಾರಮನೋಮಪಞ್ಞಂ [ಮನೋಮಪಞ್ಞ (ಸ್ಯಾ. ಕ.)], ಕಥಾಸು ನೋ ವಿಗ್ಗಹೋ ಅತ್ಥಿ ಜಾತೋ;

ಛಿನ್ದಜ್ಜ ಕಙ್ಖಂ ವಿಚಿಕಿಚ್ಛಿತಾನಿ, ತದಜ್ಜ [ತಯಾಜ್ಜ (ಸೀ.)] ಕಙ್ಖಂ ವಿತರೇಮು ಸಬ್ಬೇ.

೨೯. ಯೇ ಪಣ್ಡಿತಾ ಅತ್ಥದಸಾ ಭವನ್ತಿ, ಭಾಸನ್ತಿ ತೇ ಯೋನಿಸೋ ತತ್ಥ ಕಾಲೇ;

ಕಥಂ ನು ಕಥಾನಂ ಅಭಾಸಿತಾನಂ, ಅತ್ಥಂ ನಯೇಯ್ಯುಂ ಕುಸಲಾ ಜನಿನ್ದಾ.

೩೦. ಕಥಂ ಹವೇ ಭಾಸತಿ ನಾಗರಾಜಾ, ಗರುಳೋ ಪನ ವೇನತೇಯ್ಯೋ ಕಿಮಾಹ;

ಗನ್ಧಬ್ಬರಾಜಾ ಪನ ಕಿಂ ವದೇಸಿ, ಕಥಂ ಪನ ಕುರೂನಂ ರಾಜಸೇಟ್ಠೋ.

೩೧. ಖನ್ತಿಂ ಹವೇ ಭಾಸತಿ ನಾಗರಾಜಾ, ಅಪ್ಪಾಹಾರಂ ಗರುಳೋ ವೇನತೇಯ್ಯೋ;

ಗನ್ಧಬ್ಬರಾಜಾ ರತಿವಿಪ್ಪಹಾನಂ, ಅಕಿಞ್ಚನಂ ಕುರೂನಂ ರಾಜಸೇಟ್ಠೋ.

೩೨. ಸಬ್ಬಾನಿ ಏತಾನಿ ಸುಭಾಸಿತಾನಿ, ನ ಹೇತ್ಥ ದುಬ್ಭಾಸಿತಮತ್ಥಿ ಕಿಞ್ಚಿ;

ಯಸ್ಮಿಞ್ಚ ಏತಾನಿ ಪತಿಟ್ಠಿತಾನಿ, ಅರಾವ ನಾಭ್ಯಾ ಸುಸಮೋಹಿತಾನಿ;

ಚತುಬ್ಭಿ ಧಮ್ಮೇಹಿ ಸಮಙ್ಗಿಭೂತಂ, ತಂ ವೇ ನರಂ ಸಮಣಮಾಹು ಲೋಕೇ.

೩೩. ತುವಞ್ಹಿ [ತುವಂ ನು (ಸೀ. ಪೀ.)] ಸೇಟ್ಠೋ ತ್ವಮನುತ್ತರೋಸಿ, ತ್ವಂ ಧಮ್ಮಗೂ ಧಮ್ಮವಿದೂ ಸುಮೇಧೋ;

ಪಞ್ಞಾಯ ಪಞ್ಹಂ ಸಮಧಿಗ್ಗಹೇತ್ವಾ, ಅಚ್ಛೇಚ್ಛಿ ಧೀರೋ ವಿಚಿಕಿಚ್ಛಿತಾನಿ;

ಅಚ್ಛೇಚ್ಛಿ ಕಙ್ಖಂ ವಿಚಿಕಿಚ್ಛಿತಾನಿ, ಚುನ್ದೋ ಯಥಾ ನಾಗದನ್ತಂ ಖರೇನ.

೩೪. ನೀಲುಪ್ಪಲಾಭಂ ವಿಮಲಂ ಅನಗ್ಘಂ, ವತ್ಥಂ ಇದಂ ಧೂಮಸಮಾನವಣ್ಣಂ;

ಪಞ್ಹಸ್ಸ ವೇಯ್ಯಾಕರಣೇನ ತುಟ್ಠೋ, ದದಾಮಿ ತೇ ಧಮ್ಮಪೂಜಾಯ ಧೀರ.

೩೫. ಸುವಣ್ಣಮಾಲಂ ಸತಪತ್ತಫುಲ್ಲಿತಂ, ಸಕೇಸರಂ ರತ್ನಸಹಸ್ಸಮಣ್ಡಿತಂ;

ಪಞ್ಹಸ್ಸ ವೇಯ್ಯಾಕರಣೇನ ತುಟ್ಠೋ, ದದಾಮಿ ತೇ ಧಮ್ಮಪೂಜಾಯ ಧೀರ.

೩೬. ಮಣಿಂ ಅನಗ್ಘಂ ರುಚಿರಂ ಪಭಸ್ಸರಂ, ಕಣ್ಠಾವಸತ್ತಂ [ವಸಿತಂ (ಕ.)] ಮಣಿಭೂಸಿತಂ ಮೇ;

ಪಞ್ಹಸ್ಸ ವೇಯ್ಯಾಕರಣೇನ ತುಟ್ಠೋ, ದದಾಮಿ ತೇ ಧಮ್ಮಪೂಜಾಯ ಧೀರ.

೩೭. ಗವಂ ಸಹಸ್ಸಂ ಉಸಭಞ್ಚ ನಾಗಂ, ಆಜಞ್ಞಯುತ್ತೇ ಚ ರಥೇ ದಸ ಇಮೇ;

ಪಞ್ಹಸ್ಸ ವೇಯ್ಯಾಕರಣೇನ ತುಟ್ಠೋ, ದದಾಮಿ ತೇ ಗಾಮವರಾನಿ ಸೋಳಸ.

೩೮. ಸಾರಿಪುತ್ತೋ ತದಾ ನಾಗೋ, ಸುಪಣ್ಣೋ ಪನ ಕೋಲಿತೋ;

ಗನ್ಧಬ್ಬರಾಜಾ ಅನುರುದ್ಧೋ, ರಾಜಾ ಆನನ್ದ ಪಣ್ಡಿತೋ;

ವಿಧುರೋ ಬೋಧಿಸತ್ತೋ ಚ, ಏವಂ ಧಾರೇಥ ಜಾತಕನ್ತಿ.

ಚತುಪೋಸಥಿಯಜಾತಕಂ ತತಿಯಂ.

೪೪೨. ಸಙ್ಖಜಾತಕಂ (೪)

೩೯. ಬಹುಸ್ಸುತೋ ಸುತಧಮ್ಮೋಸಿ ಸಙ್ಖ, ದಿಟ್ಠಾ ತಯಾ ಸಮಣಬ್ರಾಹ್ಮಣಾ ಚ;

ಅಥಕ್ಖಣೇ ದಸ್ಸಯಸೇ ವಿಲಾಪಂ, ಅಞ್ಞೋ ನು ಕೋ ತೇ ಪಟಿಮನ್ತಕೋ ಮಯಾ.

೪೦. ಸುಬ್ಭೂ [ಸುಬ್ಭಾ (ಸ್ಯಾ.), ಸುಮ್ಭಾ, ಸುಭ್ಮಾ (ಕ.)] ಸುಭಾ ಸುಪ್ಪಟಿಮುಕ್ಕಕಮ್ಬು, ಪಗ್ಗಯ್ಹ ಸೋವಣ್ಣಮಯಾಯ ಪಾತಿಯಾ;

‘‘ಭುಞ್ಜಸ್ಸು ಭತ್ತಂ’’ ಇತಿ ಮಂ ವದೇತಿ, ಸದ್ಧಾವಿತ್ತಾ [ಸದ್ಧಾಚಿತ್ತಾ (ಸೀ. ಪೀ. ಕ.)], ತಮಹಂ ನೋತಿ ಬ್ರೂಮಿ.

೪೧. ಏತಾದಿಸಂ ಬ್ರಾಹ್ಮಣ ದಿಸ್ವಾನ [ದಿಸ್ವ (ಸೀ. ಪೀ.)] ಯಕ್ಖಂ, ಪುಚ್ಛೇಯ್ಯ ಪೋಸೋ ಸುಖಮಾಸಿಸಾನೋ [ಸುಖಮಾಸಸಾನೋ (ಸ್ಯಾ.), ಸುಖಮಾಸಿಸಮಾನೋ (ಕ.)];

ಉಟ್ಠೇಹಿ ನಂ ಪಞ್ಜಲಿಕಾಭಿಪುಚ್ಛ, ದೇವೀ ನುಸಿ ತ್ವಂ ಉದ ಮಾನುಸೀ ನು.

೪೨. ಯಂ ತ್ವಂ ಸುಖೇನಾಭಿಸಮೇಕ್ಖಸೇ ಮಂ, ಭುಞ್ಜಸ್ಸು ಭತ್ತಂ ಇತಿ ಮಂ ವದೇಸಿ;

ಪುಚ್ಛಾಮಿ ತಂ ನಾರಿ ಮಹಾನುಭಾವೇ, ದೇವೀ ನುಸಿ ತ್ವಂ ಉದ ಮಾನುಸೀ ನು.

೪೩. ದೇವೀ ಅಹಂ ಸಙ್ಖ ಮಹಾನುಭಾವಾ, ಇಧಾಗತಾ ಸಾಗರವಾರಿಮಜ್ಝೇ;

ಅನುಕಮ್ಪಿಕಾ ನೋ ಚ ಪದುಟ್ಠಚಿತ್ತಾ, ತವೇವ ಅತ್ಥಾಯ ಇಧಾಗತಾಸ್ಮಿ.

೪೪. ಇಧನ್ನಪಾನಂ ಸಯನಾಸನಞ್ಚ, ಯಾನಾನಿ ನಾನಾವಿವಿಧಾನಿ ಸಙ್ಖ;

ಸಬ್ಬಸ್ಸ ತ್ಯಾಹಂ ಪಟಿಪಾದಯಾಮಿ, ಯಂ ಕಿಞ್ಚಿ ತುಯ್ಹಂ ಮನಸಾಭಿಪತ್ಥಿತಂ.

೪೫. ಯಂ ಕಿಞ್ಚಿ ಯಿಟ್ಠಞ್ಚ ಹುತಞ್ಚ [ಯಿಟ್ಠಂವ ಹುತಂವ (ಸೀ. ಪೀ.)] ಮಯ್ಹಂ, ಸಬ್ಬಸ್ಸ ನೋ ಇಸ್ಸರಾ ತ್ವಂ ಸುಗತ್ತೇ;

ಸುಸೋಣಿ ಸುಬ್ಭಮು [ಸುಬ್ಭು (ಸೀ.), ಸುಬ್ಭಾ (ಸ್ಯಾ.)] ಸುವಿಲಗ್ಗಮಜ್ಝೇ [ಸುವಿಲಾಕಮಜ್ಝೇ (ಸ್ಯಾ. ಪೀ. ಸೀ. ಅಟ್ಠ.), ಸುವಿಲಾತಮಜ್ಝೇ (ಕ.)], ಕಿಸ್ಸ ಮೇ ಕಮ್ಮಸ್ಸ ಅಯಂ ವಿಪಾಕೋ.

೪೬. ಘಮ್ಮೇ ಪಥೇ ಬ್ರಾಹ್ಮಣ ಏಕಭಿಕ್ಖುಂ, ಉಗ್ಘಟ್ಟಪಾದಂ ತಸಿತಂ ಕಿಲನ್ತಂ;

ಪಟಿಪಾದಯೀ ಸಙ್ಖ ಉಪಾಹನಾನಿ [ಉಪಾಹನಾಹಿ (ಸೀ. ಪೀ.)], ಸಾ ದಕ್ಖಿಣಾ ಕಾಮದುಹಾ ತವಜ್ಜ.

೪೭. ಸಾ ಹೋತು ನಾವಾ ಫಲಕೂಪಪನ್ನಾ, ಅನವಸ್ಸುತಾ ಏರಕವಾತಯುತ್ತಾ;

ಅಞ್ಞಸ್ಸ ಯಾನಸ್ಸ ನ ಹೇತ್ಥ [ನ ಹತ್ಥಿ (ಪೀ.)] ಭೂಮಿ, ಅಜ್ಜೇವ ಮಂ ಮೋಳಿನಿಂ ಪಾಪಯಸ್ಸು.

೪೮. ಸಾ ತತ್ಥ ವಿತ್ತಾ ಸುಮನಾ ಪತೀತಾ, ನಾವಂ ಸುಚಿತ್ತಂ ಅಭಿನಿಮ್ಮಿನಿತ್ವಾ;

ಆದಾಯ ಸಙ್ಖಂ ಪುರಿಸೇನ ಸದ್ಧಿಂ, ಉಪಾನಯೀ ನಗರಂ ಸಾಧುರಮ್ಮನ್ತಿ.

ಸಙ್ಖಜಾತಕಂ ಚತುತ್ಥಂ.

೪೪೩. ಚೂಳಬೋಧಿಜಾತಕಂ (೫)

೪೯. ಯೋ ತೇ ಇಮಂ ವಿಸಾಲಕ್ಖಿಂ, ಪಿಯಂ ಸಮ್ಹಿತಭಾಸಿನಿಂ [ಸಮ್ಮಿಲ್ಲಭಾಸಿನಿಂ (ಸೀ. ಪೀ.), ಸಮ್ಮಿಲ್ಲಹಾಸಿನಿಂ (ಸ್ಯಾ.)];

ಆದಾಯ ಬಲಾ ಗಚ್ಛೇಯ್ಯ, ಕಿಂ ನು ಕಯಿರಾಸಿ ಬ್ರಾಹ್ಮಣ.

೫೦. ಉಪ್ಪಜ್ಜೇ [ಉಪ್ಪಜ್ಜ (ಸೀ. ಪೀ.)] ಮೇ ನ ಮುಚ್ಚೇಯ್ಯ, ನ ಮೇ ಮುಚ್ಚೇಯ್ಯ ಜೀವತೋ;

ರಜಂವ ವಿಪುಲಾ ವುಟ್ಠಿ, ಖಿಪ್ಪಮೇವ ನಿವಾರಯೇ [ನಿವಾರಯಿಂ (ಕ.)].

೫೧. ಯಂ ನು ಪುಬ್ಬೇ ವಿಕತ್ಥಿತ್ಥೋ [ವಿಕತ್ಥಿತೋ (ಕ. ಸೀ. ಸ್ಯಾ. ಕ.)], ಬಲಮ್ಹಿವ ಅಪಸ್ಸಿತೋ;

ಸ್ವಜ್ಜ ತುಣ್ಹಿಕತೋ [ತುಣ್ಹಿಕತೋ (ಸೀ.), ತುಣ್ಹಿಕ್ಖಕೋ (ಪೀ.)] ದಾನಿ, ಸಙ್ಘಾಟಿಂ ಸಿಬ್ಬಮಚ್ಛಸಿ.

೫೨. ಉಪ್ಪಜ್ಜಿ ಮೇ ನ ಮುಚ್ಚಿತ್ಥ, ನ ಮೇ ಮುಚ್ಚಿತ್ಥ ಜೀವತೋ;

ರಜಂವ ವಿಪುಲಾ ವುಟ್ಠಿ, ಖಿಪ್ಪಮೇವ ನಿವಾರಯಿಂ.

೫೩. ಕಿಂ ತೇ ಉಪ್ಪಜ್ಜಿ ನೋ ಮುಚ್ಚಿ, ಕಿಂ ತೇ ನ ಮುಚ್ಚಿ ಜೀವತೋ;

ರಜಂವ ವಿಪುಲಾ ವುಟ್ಠಿ, ಕತಮಂ ತ್ವಂ ನಿವಾರಯಿ.

೫೪. ಯಮ್ಹಿ ಜಾತೇ ನ ಪಸ್ಸತಿ, ಅಜಾತೇ ಸಾಧು ಪಸ್ಸತಿ;

ಸೋ ಮೇ ಉಪ್ಪಜ್ಜಿ ನೋ ಮುಚ್ಚಿ, ಕೋಧೋ ದುಮ್ಮೇಧಗೋಚರೋ.

೫೫. ಯೇನ ಜಾತೇನ ನನ್ದನ್ತಿ, ಅಮಿತ್ತಾ ದುಕ್ಖಮೇಸಿನೋ;

ಸೋ ಮೇ ಉಪ್ಪಜ್ಜಿ ನೋ ಮುಚ್ಚಿ, ಕೋಧೋ ದುಮ್ಮೇಧಗೋಚರೋ.

೫೬. ಯಸ್ಮಿಞ್ಚ ಜಾಯಮಾನಮ್ಹಿ, ಸದತ್ಥಂ ನಾವಬುಜ್ಝತಿ;

ಸೋ ಮೇ ಉಪ್ಪಜ್ಜಿ ನೋ ಮುಚ್ಚಿ, ಕೋಧೋ ದುಮ್ಮೇಧಗೋಚರೋ.

೫೭. ಯೇನಾಭಿಭೂತೋ ಕುಸಲಂ ಜಹಾತಿ, ಪರಕ್ಕರೇ ವಿಪುಲಞ್ಚಾಪಿ ಅತ್ಥಂ;

ಸ ಭೀಮಸೇನೋ ಬಲವಾ ಪಮದ್ದೀ, ಕೋಧೋ ಮಹಾರಾಜ ನ ಮೇ ಅಮುಚ್ಚಥ.

೫೮. ಕಟ್ಠಸ್ಮಿಂ ಮತ್ಥಮಾನಸ್ಮಿಂ [ಮನ್ಥಮಾನಸ್ಮಿಂ (ಪೀ.), ಮದ್ದಮಾನಸ್ಮಿಂ (ಕ.)], ಪಾವಕೋ ನಾಮ ಜಾಯತಿ;

ತಮೇವ ಕಟ್ಠಂ ಡಹತಿ, ಯಸ್ಮಾ ಸೋ ಜಾಯತೇ ಗಿನಿ.

೫೯. ಏವಂ ಮನ್ದಸ್ಸ ಪೋಸಸ್ಸ, ಬಾಲಸ್ಸ ಅವಿಜಾನತೋ;

ಸಾರಮ್ಭಾ [ಸಾರಬ್ಭಾ (ಕ.)] ಜಾಯತೇ ಕೋಧೋ, ಸೋಪಿ ತೇನೇವ ಡಯ್ಹತಿ.

೬೦. ಅಗ್ಗೀವ ತಿಣಕಟ್ಠಸ್ಮಿಂ, ಕೋಧೋ ಯಸ್ಸ ಪವಡ್ಢತಿ;

ನಿಹೀಯತಿ ತಸ್ಸ ಯಸೋ, ಕಾಳಪಕ್ಖೇವ ಚನ್ದಿಮಾ.

೬೧. ಅನೇಧೋ [ಅನಿನ್ಧೋ (ಸೀ. ಕ.), ಅನಿನ್ದೋ (ಸ್ಯಾ.)] ಧೂಮಕೇತೂವ, ಕೋಧೋ ಯಸ್ಸೂಪಸಮ್ಮತಿ;

ಆಪೂರತಿ ತಸ್ಸ ಯಸೋ, ಸುಕ್ಕಪಕ್ಖೇವ ಚನ್ದಿಮಾತಿ.

ಚೂಳಬೋಧಿಜಾತಕಂ ಪಞ್ಚಮಂ.

೪೪೪. ಕಣ್ಹದೀಪಾಯನಜಾತಕಂ (೬)

೬೨. ಸತ್ತಾಹಮೇವಾಹಂ ಪಸನ್ನಚಿತ್ತೋ, ಪುಞ್ಞತ್ಥಿಕೋ ಆಚರಿಂ [ಅಚರಿಂ (ಸೀ. ಸ್ಯಾ. ಪೀ.)] ಬ್ರಹ್ಮಚರಿಯಂ;

ಅಥಾಪರಂ ಯಂ ಚರಿತಂ ಮಮೇದಂ [ಮಮ ಯಿದಂ (ಸ್ಯಾ.), ಮಮಾಯಿದಂ (ಪೀ.)], ವಸ್ಸಾನಿ ಪಞ್ಞಾಸ ಸಮಾಧಿಕಾನಿ;

ಅಕಾಮಕೋ ವಾಪಿ [ವಾಹಿ (ಪೀ. ಕ.)] ಅಹಂ ಚರಾಮಿ, ಏತೇನ ಸಚ್ಚೇನ ಸುವತ್ಥಿ ಹೋತು;

ಹತಂ ವಿಸಂ ಜೀವತು ಯಞ್ಞದತ್ತೋ.

೬೩. ಯಸ್ಮಾ ದಾನಂ ನಾಭಿನನ್ದಿಂ ಕದಾಚಿ, ದಿಸ್ವಾನಹಂ ಅತಿಥಿಂ ವಾಸಕಾಲೇ;

ನ ಚಾಪಿ ಮೇ ಅಪ್ಪಿಯತಂ ಅವೇದುಂ, ಬಹುಸ್ಸುತಾ ಸಮಣಬ್ರಾಹ್ಮಣಾ ಚ.

ಅಕಾಮಕೋ ವಾಪಿ ಅಹಂ ದದಾಮಿ, ಏತೇನ ಸಚ್ಚೇನ ಸುವತ್ಥಿ ಹೋತು;

ಹತಂ ವಿಸಂ ಜೀವತು ಯಞ್ಞದತ್ತೋ.

೬೪. ಆಸೀವಿಸೋ ತಾತ ಪಹೂತತೇಜೋ, ಯೋ ತಂ ಅದಂಸೀ [ಅಡಂಸೀ (ಸ್ಯಾ.)] ಸಚರಾ [ಬಿಲರಾ (ಸೀ.), ಪಿಳಾರಾ (ಸ್ಯಾ.), ಪತರಾ (ಪೀ.)] ಉದಿಚ್ಚ;