೨. ಗನ್ಧಾರವಗ್ಗೋ

೪೦೬. ಗನ್ಧಾರಜಾತಕಂ (೭-೨-೧)

೭೬. ಹಿತ್ವಾ ಗಾಮಸಹಸ್ಸಾನಿ, ಪರಿಪುಣ್ಣಾನಿ ಸೋಳಸ;

ಕೋಟ್ಠಾಗಾರಾನಿ ಫೀತಾನಿ, ಸನ್ನಿಧಿಂ ದಾನಿ ಕುಬ್ಬಸಿ.

೭೭. ಹಿತ್ವಾ ಗನ್ಧಾರವಿಸಯಂ, ಪಹೂತಧನಧಾರಿಯಂ [ಧಾನಿಯಂ (ಸೀ. ಪೀ.), ಧಞ್ಞನ್ತಿ ಅತ್ಥೋ];

ಪಸಾಸನತೋ [ಪಸಾಸನಿತೋ (ಸೀ. ಸ್ಯಾ.), ಪಸಾಸನಾತೋ (ಪೀ.)] ನಿಕ್ಖನ್ತೋ, ಇಧ ದಾನಿ ಪಸಾಸಸಿ.

೭೮. ಧಮ್ಮಂ ಭಣಾಮಿ ವೇದೇಹ, ಅಧಮ್ಮೋ ಮೇ ನ ರುಚ್ಚತಿ;

ಧಮ್ಮಂ ಮೇ ಭಣಮಾನಸ್ಸ, ನ ಪಾಪಮುಪಲಿಮ್ಪತಿ.

೭೯. ಯೇನ ಕೇನಚಿ ವಣ್ಣೇನ, ಪರೋ ಲಭತಿ ರುಪ್ಪನಂ;

ಮಹತ್ಥಿಯಮ್ಪಿ ಚೇ ವಾಚಂ, ನ ತಂ ಭಾಸೇಯ್ಯ ಪಣ್ಡಿತೋ.

೮೦. ಕಾಮಂ ರುಪ್ಪತು ವಾ ಮಾ ವಾ, ಭುಸಂವ ವಿಕಿರೀಯತು;

ಧಮ್ಮಂ ಮೇ ಭಣಮಾನಸ್ಸ, ನ ಪಾಪಮುಪಲಿಮ್ಪತಿ.

೮೧. ನೋ ಚೇ ಅಸ್ಸ ಸಕಾ ಬುದ್ಧಿ, ವಿನಯೋ ವಾ ಸುಸಿಕ್ಖಿತೋ;

ವನೇ ಅನ್ಧಮಹಿಂಸೋವ [ಅನ್ಧಮಹಿಸೋವ (ಸೀ. ಪೀ.)] ಚರೇಯ್ಯ ಬಹುಕೋ ಜನೋ.

೮೨. ಯಸ್ಮಾ ಚ ಪನಿಧೇಕಚ್ಚೇ, ಆಚೇರಮ್ಹಿ [ಆಚಾರಮ್ಹಿ (ಸೀ. ಪೀ.)] ಸುಸಿಕ್ಖಿತಾ;

ತಸ್ಮಾ ವಿನೀತವಿನಯಾ, ಚರನ್ತಿ ಸುಸಮಾಹಿತಾತಿ.

ಗನ್ಧಾರಜಾತಕಂ ಪಠಮಂ.

೪೦೭. ಮಹಾಕಪಿಜಾತಕಂ (೭-೨-೨)

೮೩. ಅತ್ತಾನಂ ಸಙ್ಕಮಂ ಕತ್ವಾ, ಯೋ ಸೋತ್ಥಿಂ ಸಮತಾರಯಿ;

ಕಿಂ ತ್ವಂ ತೇಸಂ ಕಿಮೇ [ಕಿಮೋ (ಸೀ. ಪೀ.), ಕಿಂ ಮೇ (ಸ್ಯಾ.)] ತುಯ್ಹಂ, ಹೋನ್ತಿ ಏತೇ [ಹೇತೇ (ಸ್ಯಾ.), ಸೋ ತೇ (ಕ.)] ಮಹಾಕಪಿ.

೮೪. ರಾಜಾಹಂ ಇಸ್ಸರೋ ತೇಸಂ, ಯೂಥಸ್ಸ ಪರಿಹಾರಕೋ;

ತೇಸಂ ಸೋಕಪರೇತಾನಂ, ಭೀತಾನಂ ತೇ ಅರಿನ್ದಮ.

೮೫. ಉಲ್ಲಙ್ಘಯಿತ್ವಾ [ಸ ಲಙ್ಘಯಿತ್ವಾ (ಪೀ.), ಸುಲಙ್ಘಯಿತ್ವಾ (ಕ.)] ಅತ್ತಾನಂ, ವಿಸ್ಸಟ್ಠಧನುನೋ ಸತಂ;

ತತೋ ಅಪರಪಾದೇಸು, ದಳ್ಹಂ ಬನ್ಧಂ ಲತಾಗುಣಂ.

೮೬. ಛಿನ್ನಬ್ಭಮಿವ ವಾತೇನ, ನುಣ್ಣೋ [ನುನ್ನೋ (ಸೀ.)] ರುಕ್ಖಂ ಉಪಾಗಮಿಂ;

ಸೋಹಂ ಅಪ್ಪಭವಂ ತತ್ಥ, ಸಾಖಂ ಹತ್ಥೇಹಿ ಅಗ್ಗಹಿಂ.

೮೭. ತಂ ಮಂ ವಿಯಾಯತಂ ಸನ್ತಂ, ಸಾಖಾಯ ಚ ಲತಾಯ ಚ;

ಸಮನುಕ್ಕಮನ್ತಾ ಪಾದೇಹಿ, ಸೋತ್ಥಿಂ ಸಾಖಾಮಿಗಾ ಗತಾ.

೮೮. ತಂ ಮಂ ನ ತಪತೇ ಬನ್ಧೋ, ಮತೋ [ವಧೋ (ಸೀ. ಸ್ಯಾ. ಪೀ.)] ಮೇ ನ ತಪೇಸ್ಸತಿ;

ಸುಖಮಾಹರಿತಂ ತೇಸಂ, ಯೇಸಂ ರಜ್ಜಮಕಾರಯಿಂ.

೮೯. ಏಸಾ ತೇ ಉಪಮಾ ರಾಜ, ತಂ ಸುಣೋಹಿ ಅರಿನ್ದಮ [ಅತ್ಥಸನ್ದಸ್ಸನೀ ಕತಾ (ಪೀ.)];

ರಞ್ಞಾ ರಟ್ಠಸ್ಸ ಯೋಗ್ಗಸ್ಸ, ಬಲಸ್ಸ ನಿಗಮಸ್ಸ ಚ;

ಸಬ್ಬೇಸಂ ಸುಖಮೇಟ್ಠಬ್ಬಂ, ಖತ್ತಿಯೇನ ಪಜಾನತಾತಿ.

ಮಹಾಕಪಿಜಾತಕಂ ದುತಿಯಂ.

೪೦೮. ಕುಮ್ಭಕಾರಜಾತಕಂ (೭-೨-೩)

೯೦. ಅಮ್ಬಾಹಮದ್ದಂ ವನಮನ್ತರಸ್ಮಿಂ, ನೀಲೋಭಾಸಂ ಫಲಿತಂ [ಫಲಿನಂ (ಪೀ.)] ಸಂವಿರೂಳ್ಹಂ;

ತಮದ್ದಸಂ ಫಲಹೇತು ವಿಭಗ್ಗಂ, ತಂ ದಿಸ್ವಾ ಭಿಕ್ಖಾಚರಿಯಂ ಚರಾಮಿ.

೯೧. ಸೇಲಂ ಸುಮಟ್ಠಂ ನರವೀರನಿಟ್ಠಿತಂ [ನರವಿದ್ದುನಿಟ್ಠಿತಂ (ಕ.)], ನಾರೀ ಯುಗಂ ಧಾರಯಿ ಅಪ್ಪಸದ್ದಂ;

ದುತಿಯಞ್ಚ ಆಗಮ್ಮ ಅಹೋಸಿ ಸದ್ದೋ, ತಂ ದಿಸ್ವಾ ಭಿಕ್ಖಾಚರಿಯಂ ಚರಾಮಿ.

೯೨. ದಿಜಾ ದಿಜಂ ಕುಣಪಮಾಹರನ್ತಂ, ಏಕಂ ಸಮಾನಂ ಬಹುಕಾ ಸಮೇಚ್ಚ;

ಆಹಾರಹೇತೂ ಪರಿಪಾತಯಿಂಸು, ತಂ ದಿಸ್ವಾ ಭಿಕ್ಖಾಚರಿಯಂ ಚರಾಮಿ.

೯೩. ಉಸಭಾಹಮದ್ದಂ ಯೂಥಸ್ಸ ಮಜ್ಝೇ, ಚಲಕ್ಕಕುಂ ವಣ್ಣಬಲೂಪಪನ್ನಂ;

ತಮದ್ದಸಂ ಕಾಮಹೇತು ವಿತುನ್ನಂ, ತಂ ದಿಸ್ವಾ ಭಿಕ್ಖಾಚರಿಯಂ ಚರಾಮಿ.

೯೪. ಕರಣ್ಡಕೋ [ಕರಣ್ಡುನಾಮ (ಸೀ. ಪೀ.)] ಕಲಿಙ್ಗಾನಂ, ಗನ್ಧಾರಾನಞ್ಚ ನಗ್ಗಜಿ;

ನಿಮಿರಾಜಾ ವಿದೇಹಾನಂ, ಪಞ್ಚಾಲಾನಞ್ಚ ದುಮ್ಮುಖೋ;

ಏತೇ ರಟ್ಠಾನಿ ಹಿತ್ವಾನ, ಪಬ್ಬಜಿಂಸು ಅಕಿಞ್ಚನಾ.

೯೫. ಸಬ್ಬೇಪಿಮೇ ದೇವಸಮಾ ಸಮಾಗತಾ, ಅಗ್ಗೀ ಯಥಾ ಪಜ್ಜಲಿತೋ ತಥೇವಿಮೇ;

ಅಹಮ್ಪಿ ಏಕೋ ಚರಿಸ್ಸಾಮಿ ಭಗ್ಗವಿ, ಹಿತ್ವಾನ ಕಾಮಾನಿ ಯಥೋಧಿಕಾನಿ.

೯೬. ಅಯಮೇವ ಕಾಲೋ ನ ಹಿ ಅಞ್ಞೋ ಅತ್ಥಿ, ಅನುಸಾಸಿತಾ ಮೇ ನ ಭವೇಯ್ಯ ಪಚ್ಛಾ;

ಅಹಮ್ಪಿ ಏಕಾ ಚರಿಸ್ಸಾಮಿ ಭಗ್ಗವ, ಸಕುಣೀವ ಮುತ್ತಾ ಪುರಿಸಸ್ಸ ಹತ್ಥಾ.

೯೭. ಆಮಂ ಪಕ್ಕಞ್ಚ ಜಾನನ್ತಿ, ಅಥೋ ಲೋಣಂ ಅಲೋಣಕಂ;

ತಮಹಂ ದಿಸ್ವಾನ ಪಬ್ಬಜಿಂ, ಚರೇವ ತ್ವಂ ಚರಾಮಹನ್ತಿ.

ಕುಮ್ಭಕಾರಜಾತಕಂ ತತಿಯಂ.

೪೦೯. ದಳ್ಹಧಮ್ಮಜಾತಕಂ (೭-೨-೪)

೯೮. ಅಹಂ ಚೇ ದಳ್ಹಧಮ್ಮಸ್ಸ [ದಳ್ಹಧಮ್ಮಾಯ (ಪೀ.)], ವಹನ್ತಿ ನಾಭಿರಾಧಯಿಂ;

ಧರನ್ತೀ ಉರಸಿ ಸಲ್ಲಂ, ಯುದ್ಧೇ ವಿಕ್ಕನ್ತಚಾರಿನೀ.

೯೯. ನೂನ ರಾಜಾ ನ ಜಾನಾತಿ [ನ ಹ ನೂನ ರಾಜಾ ಜಾನಾತಿ (ಸೀ. ಪೀ.)], ಮಮ ವಿಕ್ಕಮಪೋರಿಸಂ;

ಸಙ್ಗಾಮೇ ಸುಕತನ್ತಾನಿ, ದೂತವಿಪ್ಪಹಿತಾನಿ ಚ.

೧೦೦. ಸಾ ನೂನಾಹಂ ಮರಿಸ್ಸಾಮಿ, ಅಬನ್ಧು ಅಪರಾಯಿನೀ [ಅಪರಾಯಿಣೀ (ಸೀ.), ಅಪರಾಯಣೀ (?)];

ತದಾ ಹಿ [ತಥಾ ಹಿ (ಪೀ.)] ಕುಮ್ಭಕಾರಸ್ಸ, ದಿನ್ನಾ ಛಕಣಹಾರಿಕಾ.

೧೦೧. ಯಾವತಾಸೀಸತೀ ಪೋಸೋ, ತಾವದೇವ ಪವೀಣತಿ;

ಅತ್ಥಾಪಾಯೇ ಜಹನ್ತಿ ನಂ, ಓಟ್ಠಿಬ್ಯಾಧಿಂವ ಖತ್ತಿಯೋ.

೧೦೨. ಯೋ ಪುಬ್ಬೇ ಕತಕಲ್ಯಾಣೋ, ಕತತ್ಥೋ ನಾವಬುಜ್ಝತಿ;

ಅತ್ಥಾ ತಸ್ಸ ಪಲುಜ್ಜನ್ತಿ, ಯೇ ಹೋನ್ತಿ ಅಭಿಪತ್ಥಿತಾ.

೧೦೩. ಯೋ ಪುಬ್ಬೇ ಕತಕಲ್ಯಾಣೋ, ಕತತ್ಥೋ ಮನುಬುಜ್ಝತಿ;

ಅತ್ಥಾ ತಸ್ಸ ಪವಡ್ಢನ್ತಿ, ಯೇ ಹೋನ್ತಿ ಅಭಿಪತ್ಥಿತಾ.

೧೦೪. ತಂ ವೋ ವದಾಮಿ ಭದ್ದನ್ತೇ [ಭದ್ದಂ ವೋ (ಸೀ. ಸ್ಯಾ. ಪೀ.)], ಯಾವನ್ತೇತ್ಥ ಸಮಾಗತಾ;

ಸಬ್ಬೇ ಕತಞ್ಞುನೋ ಹೋಥ, ಚಿರಂ ಸಗ್ಗಮ್ಹಿ ಠಸ್ಸಥಾತಿ.

ದಳ್ಹಧಮ್ಮಜಾತಕಂ ಚತುತ್ಥಂ.

೪೧೦. ಸೋಮದತ್ತಜಾತಕಂ (೭-೨-೫)

೧೦೫. ಯೋ ಮಂ ಪುರೇ ಪಚ್ಚುಡ್ಡೇತಿ [ಪಚ್ಚುದೇತಿ (ಸೀ. ಸ್ಯಾ. ಪೀ.), ಪಚ್ಚುಟ್ಠೇತಿ (ಕ.)], ಅರಞ್ಞೇ ದೂರಮಾಯತೋ;

ಸೋ ನ ದಿಸ್ಸತಿ ಮಾತಙ್ಗೋ, ಸೋಮದತ್ತೋ ಕುಹಿಂ ಗತೋ.

೧೦೬. ಅಯಂ ವಾ ಸೋ ಮತೋ ಸೇತಿ, ಅಲ್ಲಸಿಙ್ಗಂವ ವಚ್ಛಿತೋ [ಅಲ್ಲಪಿಙ್ಕವ ಛಿಜ್ಜಿತೋ (ಸೀ. ಪೀ.), ಅಲ್ಲಪೀತಂವ ವಿಚ್ಛಿತೋ (ಸ್ಯಾ.)];

ಭುಮ್ಯಾ ನಿಪತಿತೋ ಸೇತಿ, ಅಮರಾ ವತ ಕುಞ್ಜರೋ.

೧೦೭. ಅನಗಾರಿಯುಪೇತಸ್ಸ, ವಿಪ್ಪಮುತ್ತಸ್ಸ ತೇ ಸತೋ;

ಸಮಣಸ್ಸ ನ ತಂ ಸಾಧು, ಯಂ ಪೇತಮನುಸೋಚಸಿ.

೧೦೮. ಸಂವಾಸೇನ ಹವೇ ಸಕ್ಕ, ಮನುಸ್ಸಸ್ಸ ಮಿಗಸ್ಸ ವಾ;

ಹದಯೇ ಜಾಯತೇ ಪೇಮಂ, ತಂ ನ ಸಕ್ಕಾ ಅಸೋಚಿತುಂ.

೧೦೯. ಮತಂ ಮರಿಸ್ಸಂ ರೋದನ್ತಿ, ಯೇ ರುದನ್ತಿ ಲಪನ್ತಿ ಚ;

ತಸ್ಮಾ ತ್ವಂ ಇಸಿ ಮಾ ರೋದಿ, ರೋದಿತಂ ಮೋಘಮಾಹು ಸನ್ತೋ.

೧೧೦. ಕನ್ದಿತೇನ ಹವೇ ಬ್ರಹ್ಮೇ, ಮತೋ ಪೇತೋ ಸಮುಟ್ಠಹೇ;

ಸಬ್ಬೇ ಸಙ್ಗಮ್ಮ ರೋದಾಮ, ಅಞ್ಞಮಞ್ಞಸ್ಸ ಞಾತಕೇ.

೧೧೧. ಆದಿತ್ತಂ ವತ ಮಂ ಸನ್ತಂ, ಘತಸಿತ್ತಂವ ಪಾವಕಂ;

ವಾರಿನಾ ವಿಯ ಓಸಿಞ್ಚಂ, ಸಬ್ಬಂ ನಿಬ್ಬಾಪಯೇ ದರಂ.

೧೧೨. ಅಬ್ಬಹೀ ವತ ಮೇ ಸಲ್ಲಂ, ಯಮಾಸಿ ಹದಯಸ್ಸಿತಂ;

ಯೋ ಮೇ ಸೋಕಪರೇತಸ್ಸ, ಪುತ್ತಸೋಕಂ ಅಪಾನುದಿ.

೧೧೩. ಸೋಹಂ ಅಬ್ಬೂಳ್ಹಸಲ್ಲೋಸ್ಮಿ, ವೀತಸೋಕೋ ಅನಾವಿಲೋ;

ನ ಸೋಚಾಮಿ ನ ರೋದಾಮಿ, ತವ ಸುತ್ವಾನ ವಾಸವಾತಿ.

ಸೋಮದತ್ತಜಾತಕಂ ಪಞ್ಚಮಂ.

೪೧೧. ಸುಸೀಮಜಾತಕಂ (೭-೨-೬)

೧೧೪. ಕಾಳಾನಿ ಕೇಸಾನಿ ಪುರೇ ಅಹೇಸುಂ, ಜಾತಾನಿ ಸೀಸಮ್ಹಿ ಯಥಾಪದೇಸೇ;

ತಾನಜ್ಜ ಸೇತಾನಿ ಸುಸೀಮ [ಸುಸಿಮ (ಕ.)] ದಿಸ್ವಾ, ಧಮ್ಮಂ ಚರ ಬ್ರಹ್ಮಚರಿಯಸ್ಸ ಕಾಲೋ.

೧೧೫. ಮಮೇವ ದೇವ ಪಲಿತಂ ನ ತುಯ್ಹಂ, ಮಮೇವ ಸೀಸಂ ಮಮ ಉತ್ತಮಙ್ಗಂ;

‘‘ಅತ್ಥಂ ಕರಿಸ್ಸ’’ನ್ತಿ ಮುಸಾ ಅಭಾಣಿಂ [ಅಭಾಸಿಂ (ಕ.)], ಏಕಾಪರಾಧಂ ಖಮ ರಾಜಸೇಟ್ಠ.

೧೧೬. ದಹರೋ ತುವಂ ದಸ್ಸನಿಯೋಸಿ ರಾಜ, ಪಠಮುಗ್ಗತೋ ಹೋಸಿ [ಹೋಹಿ (ಸೀ.), ಹೋತಿ (ಕ.)] ಯಥಾ ಕಳೀರೋ;

ರಜ್ಜಞ್ಚ ಕಾರೇಹಿ ಮಮಞ್ಚ ಪಸ್ಸ, ಮಾ ಕಾಲಿಕಂ ಅನುಧಾವೀ ಜನಿನ್ದ.

೧೧೭. ಪಸ್ಸಾಮಿ ವೋಹಂ ದಹರಿಂ ಕುಮಾರಿಂ, ಸಾಮಟ್ಠಪಸ್ಸಂ ಸುತನುಂ ಸುಮಜ್ಝಂ;

ಕಾಳಪ್ಪವಾಳಾವ ಪವೇಲ್ಲಮಾನಾ, ಪಲೋಭಯನ್ತೀವ [ಸಾ ಲೋಭಯನ್ತೀವ (ಪೀ.)] ನರೇಸು ಗಚ್ಛತಿ.

೧೧೮. ತಮೇನ ಪಸ್ಸಾಮಿಪರೇನ ನಾರಿಂ, ಆಸೀತಿಕಂ ನಾವುತಿಕಂ ವ ಜಚ್ಚಾ;

ದಣ್ಡಂ ಗಹೇತ್ವಾನ ಪವೇಧಮಾನಂ, ಗೋಪಾನಸೀಭೋಗ್ಗಸಮಂ ಚರನ್ತಿಂ.

೧೧೯. ಸೋಹಂ ತಮೇವಾನುವಿಚಿನ್ತಯನ್ತೋ, ಏಕೋ ಸಯಾಮಿ [ಪಸ್ಸಾಮಿ (ಕ.)] ಸಯನಸ್ಸ ಮಜ್ಝೇ;

‘‘ಅಹಮ್ಪಿ ಏವಂ’’ ಇತಿ ಪೇಕ್ಖಮಾನೋ, ನ ಗಹೇ ರಮೇ [ನ ಗೇಹೇ ರಮೇ (ಸೀ.), ಗೇಹೇ ನ ರಮೇ (ಸ್ಯಾ. ಕ.)] ಬ್ರಹ್ಮಚರಿಯಸ್ಸ ಕಾಲೋ.

೧೨೦. ರಜ್ಜುವಾಲಮ್ಬನೀ ಚೇಸಾ, ಯಾ ಗೇಹೇ ವಸತೋ ರತಿ;

ಏವಮ್ಪಿ ಛೇತ್ವಾನ ವಜನ್ತಿ ಧೀರಾ, ಅನಪೇಕ್ಖಿನೋ ಕಾಮಸುಖಂ ಪಹಾಯಾತಿ.

ಸುಸೀಮಜಾತಕಂ ಛಟ್ಠಂ.

೪೧೨. ಕೋಟಸಿಮ್ಬಲಿಜಾತಕಂ (೭-೨-೭)

೧೨೧. ಅಹಂ ದಸಸತಂಬ್ಯಾಮಂ, ಉರಗಮಾದಾಯ ಆಗತೋ;

ತಞ್ಚ ಮಞ್ಚ ಮಹಾಕಾಯಂ, ಧಾರಯಂ ನಪ್ಪವೇಧಸಿ [ನ ಪವೇಧಯಿ (ಕ.)].

೧೨೨. ಅಥಿಮಂ ಖುದ್ದಕಂ ಪಕ್ಖಿಂ, ಅಪ್ಪಮಂಸತರಂ ಮಯಾ;

ಧಾರಯಂ ಬ್ಯಥಸಿ [ಬ್ಯಾಧಸೇ (ಸೀ.), ಬ್ಯಧಸೇ (ಪೀ.), ಬ್ಯಾಧಸಿ (ಕ.)] ಭೀತಾ [ಭೀತೋ (ಸೀ. ಸ್ಯಾ. ಪೀ.)], ಕಮತ್ಥಂ ಕೋಟಸಿಮ್ಬಲಿ [ಕೋಟಿಸಿಮ್ಬಲಿ (ಸೀ. ಪೀ.)].

೧೨೩. ಮಂಸಭಕ್ಖೋ ತುವಂ ರಾಜ, ಫಲಭಕ್ಖೋ ಅಯಂ ದಿಜೋ;

ಅಯಂ ನಿಗ್ರೋಧಬೀಜಾನಿ, ಪಿಲಕ್ಖುದುಮ್ಬರಾನಿ ಚ;

ಅಸ್ಸತ್ಥಾನಿ ಚ ಭಕ್ಖಿತ್ವಾ, ಖನ್ಧೇ ಮೇ ಓಹದಿಸ್ಸತಿ.

೧೨೪. ತೇ ರುಕ್ಖಾ ಸಂವಿರೂಹನ್ತಿ, ಮಮ ಪಸ್ಸೇ ನಿವಾತಜಾ;

ತೇ ಮಂ ಪರಿಯೋನನ್ಧಿಸ್ಸನ್ತಿ, ಅರುಕ್ಖಂ ಮಂ ಕರಿಸ್ಸರೇ.

೧೨೫. ಸನ್ತಿ ಅಞ್ಞೇಪಿ ರುಕ್ಖಾ ಸೇ, ಮೂಲಿನೋ ಖನ್ಧಿನೋ ದುಮಾ;

ಇಮಿನಾ ಸಕುಣಜಾತೇನ, ಬೀಜಮಾಹರಿತಾ ಹತಾ.

೧೨೬. ಅಜ್ಝಾರೂಹಾಭಿವಡ್ಢನ್ತಿ [ಅಜ್ಝಾರೂಳ್ಹಾಭಿವಡ್ಢನ್ತಿ (ಸೀ. ಪೀ.)], ಬ್ರಹನ್ತಮ್ಪಿ ವನಪ್ಪತಿಂ;

ತಸ್ಮಾ ರಾಜ ಪವೇಧಾಮಿ, ಸಮ್ಪಸ್ಸಂನಾಗತಂ ಭಯಂ.

೧೨೭. ಸಙ್ಕೇಯ್ಯ ಸಙ್ಕಿತಬ್ಬಾನಿ, ರಕ್ಖೇಯ್ಯಾನಾಗತಂ ಭಯಂ;

ಅನಾಗತಭಯಾ ಧೀರೋ, ಉಭೋ ಲೋಕೇ ಅವೇಕ್ಖತೀತಿ.

ಕೋಟಸಿಮ್ಬಲಿಜಾತಕಂ ಸತ್ತಮಂ.

೪೧೩. ಧೂಮಕಾರಿಜಾತಕಂ (೭-೨-೮)

೧೨೮. ರಾಜಾ ಅಪುಚ್ಛಿ ವಿಧುರಂ, ಧಮ್ಮಕಾಮೋ ಯುಧಿಟ್ಠಿಲೋ;

ಅಪಿ ಬ್ರಾಹ್ಮಣ ಜಾನಾಸಿ, ಕೋ ಏಕೋ ಬಹು ಸೋಚತಿ.

೧೨೯. ಬ್ರಾಹ್ಮಣೋ ಅಜಯೂಥೇನ, ಪಹೂತೇಧೋ [ಬಹೂತೇಜೋ (ಪೀ. ಕ.), ಬಹುತೇನ್ದೋ (ಸ್ಯಾ.)] ವನೇ ವಸಂ;

ಧೂಮಂ ಅಕಾಸಿ ವಾಸೇಟ್ಠೋ, ರತ್ತಿನ್ದಿವಮತನ್ದಿತೋ.

೧೩೦. ತಸ್ಸ ತಂ ಧೂಮಗನ್ಧೇನ, ಸರಭಾ ಮಕಸಡ್ಡಿತಾ [ಮಕಸದ್ದಿತಾ (ಸೀ. ಸ್ಯಾ.), ಮಕಸಟ್ಟಿತಾ (ಪೀ. ಕ.)];

ವಸ್ಸಾವಾಸಂ ಉಪಾಗಚ್ಛುಂ, ಧೂಮಕಾರಿಸ್ಸ ಸನ್ತಿಕೇ.

೧೩೧. ಸರಭೇಸು ಮನಂ ಕತ್ವಾ, ಅಜಾ ಸೋ ನಾವಬುಜ್ಝಥ;

ಆಗಚ್ಛನ್ತೀ ವಜನ್ತೀ ವಾ [ಆಗಚ್ಛನ್ತಿ ವಜನ್ತಿ ವಾ (ಸ್ಯಾ. ಪೀ.), ಆಗಚ್ಛನ್ತಿಂ ವಜನ್ತಿಂ ವಾ (ಕ.)], ತಸ್ಸ ತಾ ವಿನಸುಂ [ವಿನಸ್ಸುಂ (ಸೀ.)] ಅಜಾ.

೧೩೨. ಸರಭಾ ಸರದೇ ಕಾಲೇ, ಪಹೀನಮಕಸೇ ವನೇ;

ಪಾವಿಸುಂ ಗಿರಿದುಗ್ಗಾನಿ, ನದೀನಂ ಪಭವಾನಿ ಚ.

೧೩೩. ಸರಭೇ ಚ ಗತೇ ದಿಸ್ವಾ, ಅಜಾ ಚ ವಿಭವಂ ಗತಾ [ಅಜೇ ಚ ವಿಭವಂ ಗತೇ (ಕ.)];

ಕಿಸೋ ಚ ವಿವಣ್ಣೋ ಚಾಸಿ, ಪಣ್ಡುರೋಗೀ ಚ ಬ್ರಾಹ್ಮಣೋ.

೧೩೪. ಏವಂ ಯೋ ಸಂ ನಿರಂಕತ್ವಾ, ಆಗನ್ತುಂ ಕುರುತೇ ಪಿಯಂ;

ಸೋ ಏಕೋ ಬಹು ಸೋಚತಿ, ಧೂಮಕಾರೀವ ಬ್ರಾಹ್ಮಣೋತಿ.

ಧೂಮಕಾರಿಜಾತಕಂ ಅಟ್ಠಮಂ.

೪೧೪. ಜಾಗರಜಾತಕಂ (೭-೨-೯)

೧೩೫. ಕೋಧ ಜಾಗರತಂ ಸುತ್ತೋ, ಕೋಧ ಸುತ್ತೇಸು ಜಾಗರೋ;

ಕೋ ಮಮೇತಂ ವಿಜಾನಾತಿ, ಕೋ ತಂ ಪಟಿಭಣಾತಿ ಮೇ.

೧೩೬. ಅಹಂ ಜಾಗರತಂ ಸುತ್ತೋ, ಅಹಂ ಸುತ್ತೇಸು ಜಾಗರೋ;

ಅಹಮೇತಂ ವಿಜಾನಾಮಿ, ಅಹಂ ಪಟಿಭಣಾಮಿ ತೇ.

೧೩೭. ಕಥಂ ಜಾಗರತಂ ಸುತ್ತೋ, ಕಥಂ ಸುತ್ತೇಸು ಜಾಗರೋ;

ಕಥಂ ಏತಂ ವಿಜಾನಾಸಿ, ಕಥಂ ಪಟಿಭಣಾಸಿ ಮೇ.

೧೩೮. ಯೇ ಧಮ್ಮಂ ನಪ್ಪಜಾನನ್ತಿ, ಸಂಯಮೋತಿ ದಮೋತಿ ಚ;

ತೇಸು ಸುಪ್ಪಮಾನೇಸು, ಅಹಂ ಜಗ್ಗಾಮಿ ದೇವತೇ.

೧೩೯. ಯೇಸಂ ರಾಗೋ ಚ ದೋಸೋ ಚ, ಅವಿಜ್ಜಾ ಚ ವಿರಾಜಿತಾ;

ತೇಸು ಜಾಗರಮಾನೇಸು, ಅಹಂ ಸುತ್ತೋಸ್ಮಿ ದೇವತೇ.

೧೪೦. ಏವಂ ಜಾಗರತಂ ಸುತ್ತೋ, ಏವಂ ಸುತ್ತೇಸು ಜಾಗರೋ;