೪೧೩. ಧೂಮಕಾರಿಜಾತಕಂ (೭-೨-೮)

೧೨೮. ರಾಜಾ ಅಪುಚ್ಛಿ ವಿಧುರಂ, ಧಮ್ಮಕಾಮೋ ಯುಧಿಟ್ಠಿಲೋ;

ಅಪಿ ಬ್ರಾಹ್ಮಣ ಜಾನಾಸಿ, ಕೋ ಏಕೋ ಬಹು ಸೋಚತಿ.

೧೨೯. ಬ್ರಾಹ್ಮಣೋ ಅಜಯೂಥೇನ, ಪಹೂತೇಧೋ [ಬಹೂತೇಜೋ (ಪೀ. ಕ.), ಬಹುತೇನ್ದೋ (ಸ್ಯಾ.)] ವನೇ ವಸಂ;

ಧೂಮಂ ಅಕಾಸಿ ವಾಸೇಟ್ಠೋ, ರತ್ತಿನ್ದಿವಮತನ್ದಿತೋ.

೧೩೦. ತಸ್ಸ ತಂ ಧೂಮಗನ್ಧೇನ, ಸರಭಾ ಮಕಸಡ್ಡಿತಾ [ಮಕಸದ್ದಿತಾ (ಸೀ. ಸ್ಯಾ.), ಮಕಸಟ್ಟಿತಾ (ಪೀ. ಕ.)];

ವಸ್ಸಾವಾಸಂ ಉಪಾಗಚ್ಛುಂ, ಧೂಮಕಾರಿಸ್ಸ ಸನ್ತಿಕೇ.

೧೩೧. ಸರಭೇಸು ಮನಂ ಕತ್ವಾ, ಅಜಾ ಸೋ ನಾವಬುಜ್ಝಥ;

ಆಗಚ್ಛನ್ತೀ ವಜನ್ತೀ ವಾ [ಆಗಚ್ಛನ್ತಿ ವಜನ್ತಿ ವಾ (ಸ್ಯಾ. ಪೀ.), ಆಗಚ್ಛನ್ತಿಂ ವಜನ್ತಿಂ ವಾ (ಕ.)], ತಸ್ಸ ತಾ ವಿನಸುಂ [ವಿನಸ್ಸುಂ (ಸೀ.)] ಅಜಾ.

೧೩೨. ಸರಭಾ ಸರದೇ ಕಾಲೇ, ಪಹೀನಮಕಸೇ ವನೇ;

ಪಾವಿಸುಂ ಗಿರಿದುಗ್ಗಾನಿ, ನದೀನಂ ಪಭವಾನಿ ಚ.

೧೩೩. ಸರಭೇ ಚ ಗತೇ ದಿಸ್ವಾ, ಅಜಾ ಚ ವಿಭವಂ ಗತಾ [ಅಜೇ ಚ ವಿಭವಂ ಗತೇ (ಕ.)];

ಕಿಸೋ ಚ ವಿವಣ್ಣೋ ಚಾಸಿ, ಪಣ್ಡುರೋಗೀ ಚ ಬ್ರಾಹ್ಮಣೋ.

೧೩೪. ಏವಂ ಯೋ ಸಂ ನಿರಂಕತ್ವಾ, ಆಗನ್ತುಂ ಕುರುತೇ ಪಿಯಂ;

ಸೋ ಏಕೋ ಬಹು ಸೋಚತಿ, ಧೂಮಕಾರೀವ ಬ್ರಾಹ್ಮಣೋತಿ.

ಧೂಮಕಾರಿಜಾತಕಂ ಅಟ್ಠಮಂ.