೪೧೪. ಜಾಗರಜಾತಕಂ (೭-೨-೯)

೧೩೫. ಕೋಧ ಜಾಗರತಂ ಸುತ್ತೋ, ಕೋಧ ಸುತ್ತೇಸು ಜಾಗರೋ;

ಕೋ ಮಮೇತಂ ವಿಜಾನಾತಿ, ಕೋ ತಂ ಪಟಿಭಣಾತಿ ಮೇ.

೧೩೬. ಅಹಂ ಜಾಗರತಂ ಸುತ್ತೋ, ಅಹಂ ಸುತ್ತೇಸು ಜಾಗರೋ;

ಅಹಮೇತಂ ವಿಜಾನಾಮಿ, ಅಹಂ ಪಟಿಭಣಾಮಿ ತೇ.

೧೩೭. ಕಥಂ ಜಾಗರತಂ ಸುತ್ತೋ, ಕಥಂ ಸುತ್ತೇಸು ಜಾಗರೋ;

ಕಥಂ ಏತಂ ವಿಜಾನಾಸಿ, ಕಥಂ ಪಟಿಭಣಾಸಿ ಮೇ.

೧೩೮. ಯೇ ಧಮ್ಮಂ ನಪ್ಪಜಾನನ್ತಿ, ಸಂಯಮೋತಿ ದಮೋತಿ ಚ;

ತೇಸು ಸುಪ್ಪಮಾನೇಸು, ಅಹಂ ಜಗ್ಗಾಮಿ ದೇವತೇ.

೧೩೯. ಯೇಸಂ ರಾಗೋ ಚ ದೋಸೋ ಚ, ಅವಿಜ್ಜಾ ಚ ವಿರಾಜಿತಾ;

ತೇಸು ಜಾಗರಮಾನೇಸು, ಅಹಂ ಸುತ್ತೋಸ್ಮಿ ದೇವತೇ.

೧೪೦. ಏವಂ ಜಾಗರತಂ ಸುತ್ತೋ, ಏವಂ ಸುತ್ತೇಸು ಜಾಗರೋ;

ಏವಮೇತಂ ವಿಜಾನಾಮಿ, ಏವಂ ಪಟಿಭಣಾಮಿ ತೇ.

೧೪೧. ಸಾಧು ಜಾಗರತಂ ಸುತ್ತೋ, ಸಾಧು ಸುತ್ತೇಸು ಜಾಗರೋ;

ಸಾಧುಮೇತಂ ವಿಜಾನಾಸಿ, ಸಾಧು ಪಟಿಭಣಾಸಿ ಮೇತಿ.

ಜಾಗರಜಾತಕಂ ನವಮಂ.