೪೦೮. ಕುಮ್ಭಕಾರಜಾತಕಂ (೭-೨-೩)

೯೦. ಅಮ್ಬಾಹಮದ್ದಂ ವನಮನ್ತರಸ್ಮಿಂ, ನೀಲೋಭಾಸಂ ಫಲಿತಂ [ಫಲಿನಂ (ಪೀ.)] ಸಂವಿರೂಳ್ಹಂ;

ತಮದ್ದಸಂ ಫಲಹೇತು ವಿಭಗ್ಗಂ, ತಂ ದಿಸ್ವಾ ಭಿಕ್ಖಾಚರಿಯಂ ಚರಾಮಿ.

೯೧. ಸೇಲಂ ಸುಮಟ್ಠಂ ನರವೀರನಿಟ್ಠಿತಂ [ನರವಿದ್ದುನಿಟ್ಠಿತಂ (ಕ.)], ನಾರೀ ಯುಗಂ ಧಾರಯಿ ಅಪ್ಪಸದ್ದಂ;

ದುತಿಯಞ್ಚ ಆಗಮ್ಮ ಅಹೋಸಿ ಸದ್ದೋ, ತಂ ದಿಸ್ವಾ ಭಿಕ್ಖಾಚರಿಯಂ ಚರಾಮಿ.

೯೨. ದಿಜಾ ದಿಜಂ ಕುಣಪಮಾಹರನ್ತಂ, ಏಕಂ ಸಮಾನಂ ಬಹುಕಾ ಸಮೇಚ್ಚ;

ಆಹಾರಹೇತೂ ಪರಿಪಾತಯಿಂಸು, ತಂ ದಿಸ್ವಾ ಭಿಕ್ಖಾಚರಿಯಂ ಚರಾಮಿ.

೯೩. ಉಸಭಾಹಮದ್ದಂ ಯೂಥಸ್ಸ ಮಜ್ಝೇ, ಚಲಕ್ಕಕುಂ ವಣ್ಣಬಲೂಪಪನ್ನಂ;

ತಮದ್ದಸಂ ಕಾಮಹೇತು ವಿತುನ್ನಂ, ತಂ ದಿಸ್ವಾ ಭಿಕ್ಖಾಚರಿಯಂ ಚರಾಮಿ.

೯೪. ಕರಣ್ಡಕೋ [ಕರಣ್ಡುನಾಮ (ಸೀ. ಪೀ.)] ಕಲಿಙ್ಗಾನಂ, ಗನ್ಧಾರಾನಞ್ಚ ನಗ್ಗಜಿ;

ನಿಮಿರಾಜಾ ವಿದೇಹಾನಂ, ಪಞ್ಚಾಲಾನಞ್ಚ ದುಮ್ಮುಖೋ;

ಏತೇ ರಟ್ಠಾನಿ ಹಿತ್ವಾನ, ಪಬ್ಬಜಿಂಸು ಅಕಿಞ್ಚನಾ.

೯೫. ಸಬ್ಬೇಪಿಮೇ ದೇವಸಮಾ ಸಮಾಗತಾ, ಅಗ್ಗೀ ಯಥಾ ಪಜ್ಜಲಿತೋ ತಥೇವಿಮೇ;

ಅಹಮ್ಪಿ ಏಕೋ ಚರಿಸ್ಸಾಮಿ ಭಗ್ಗವಿ, ಹಿತ್ವಾನ ಕಾಮಾನಿ ಯಥೋಧಿಕಾನಿ.

೯೬. ಅಯಮೇವ ಕಾಲೋ ನ ಹಿ ಅಞ್ಞೋ ಅತ್ಥಿ, ಅನುಸಾಸಿತಾ ಮೇ ನ ಭವೇಯ್ಯ ಪಚ್ಛಾ;

ಅಹಮ್ಪಿ ಏಕಾ ಚರಿಸ್ಸಾಮಿ ಭಗ್ಗವ, ಸಕುಣೀವ ಮುತ್ತಾ ಪುರಿಸಸ್ಸ ಹತ್ಥಾ.

೯೭. ಆಮಂ ಪಕ್ಕಞ್ಚ ಜಾನನ್ತಿ, ಅಥೋ ಲೋಣಂ ಅಲೋಣಕಂ;

ತಮಹಂ ದಿಸ್ವಾನ ಪಬ್ಬಜಿಂ, ಚರೇವ ತ್ವಂ ಚರಾಮಹನ್ತಿ.

ಕುಮ್ಭಕಾರಜಾತಕಂ ತತಿಯಂ.