೪೦೯. ದಳ್ಹಧಮ್ಮಜಾತಕಂ (೭-೨-೪)

೯೮. ಅಹಂ ಚೇ ದಳ್ಹಧಮ್ಮಸ್ಸ [ದಳ್ಹಧಮ್ಮಾಯ (ಪೀ.)], ವಹನ್ತಿ ನಾಭಿರಾಧಯಿಂ;

ಧರನ್ತೀ ಉರಸಿ ಸಲ್ಲಂ, ಯುದ್ಧೇ ವಿಕ್ಕನ್ತಚಾರಿನೀ.

೯೯. ನೂನ ರಾಜಾ ನ ಜಾನಾತಿ [ನ ಹ ನೂನ ರಾಜಾ ಜಾನಾತಿ (ಸೀ. ಪೀ.)], ಮಮ ವಿಕ್ಕಮಪೋರಿಸಂ;

ಸಙ್ಗಾಮೇ ಸುಕತನ್ತಾನಿ, ದೂತವಿಪ್ಪಹಿತಾನಿ ಚ.

೧೦೦. ಸಾ ನೂನಾಹಂ ಮರಿಸ್ಸಾಮಿ, ಅಬನ್ಧು ಅಪರಾಯಿನೀ [ಅಪರಾಯಿಣೀ (ಸೀ.), ಅಪರಾಯಣೀ (?)];

ತದಾ ಹಿ [ತಥಾ ಹಿ (ಪೀ.)] ಕುಮ್ಭಕಾರಸ್ಸ, ದಿನ್ನಾ ಛಕಣಹಾರಿಕಾ.

೧೦೧. ಯಾವತಾಸೀಸತೀ ಪೋಸೋ, ತಾವದೇವ ಪವೀಣತಿ;

ಅತ್ಥಾಪಾಯೇ ಜಹನ್ತಿ ನಂ, ಓಟ್ಠಿಬ್ಯಾಧಿಂವ ಖತ್ತಿಯೋ.

೧೦೨. ಯೋ ಪುಬ್ಬೇ ಕತಕಲ್ಯಾಣೋ, ಕತತ್ಥೋ ನಾವಬುಜ್ಝತಿ;

ಅತ್ಥಾ ತಸ್ಸ ಪಲುಜ್ಜನ್ತಿ, ಯೇ ಹೋನ್ತಿ ಅಭಿಪತ್ಥಿತಾ.

೧೦೩. ಯೋ ಪುಬ್ಬೇ ಕತಕಲ್ಯಾಣೋ, ಕತತ್ಥೋ ಮನುಬುಜ್ಝತಿ;

ಅತ್ಥಾ ತಸ್ಸ ಪವಡ್ಢನ್ತಿ, ಯೇ ಹೋನ್ತಿ ಅಭಿಪತ್ಥಿತಾ.

೧೦೪. ತಂ ವೋ ವದಾಮಿ ಭದ್ದನ್ತೇ [ಭದ್ದಂ ವೋ (ಸೀ. ಸ್ಯಾ. ಪೀ.)], ಯಾವನ್ತೇತ್ಥ ಸಮಾಗತಾ;

ಸಬ್ಬೇ ಕತಞ್ಞುನೋ ಹೋಥ, ಚಿರಂ ಸಗ್ಗಮ್ಹಿ ಠಸ್ಸಥಾತಿ.

ದಳ್ಹಧಮ್ಮಜಾತಕಂ ಚತುತ್ಥಂ.