೩೭೦. ಪಲಾಸಜಾತಕಂ (೫-೨-೧೦)

೧೦೫. ಹಂಸೋ ಪಲಾಸಮವಚ, ನಿಗ್ರೋಧೋ ಸಮ್ಮ ಜಾಯತಿ;

ಅಙ್ಕಸ್ಮಿಂ [ಅಙ್ಗಸ್ಮಿಂ (ಕ.)] ತೇ ನಿಸಿನ್ನೋವ, ಸೋ ತೇ ಮಮ್ಮಾನಿ ಛೇಚ್ಛತಿ [ಛಿಜ್ಜತಿ (ಕ.)].

೧೦೬. ವಡ್ಢತಾಮೇವ [ವದ್ಧಿತಮೇವ (ಕ.)] ನಿಗ್ರೋಧೋ, ಪತಿಟ್ಠಸ್ಸ ಭವಾಮಹಂ;

ಯಥಾ ಪಿತಾ ಚ ಮಾತಾ ಚ [ಪಿತಾ ವಾ ಮಾತಾ ವಾ (ಪೀ.), ಮಾತಾ ವಾ ಪಿತಾ ವಾ (ಕ.)], ಏವಂ ಮೇ ಸೋ ಭವಿಸ್ಸತಿ.

೧೦೭. ಯಂ ತ್ವಂ ಅಙ್ಕಸ್ಮಿಂ ವಡ್ಢೇಸಿ, ಖೀರರುಕ್ಖಂ ಭಯಾನಕಂ;

ಆಮನ್ತ ಖೋ ತಂ ಗಚ್ಛಾಮ, ವುಡ್ಢಿ ಮಸ್ಸ ನ ರುಚ್ಚತಿ.

೧೦೮. ಇದಾನಿ ಖೋ ಮಂ ಭಾಯೇತಿ, ಮಹಾನೇರುನಿದಸ್ಸನಂ;

ಹಂಸಸ್ಸ ಅನಭಿಞ್ಞಾಯ, ಮಹಾ ಮೇ ಭಯಮಾಗತಂ.

೧೦೯. ನ ತಸ್ಸ ವುಡ್ಢಿ ಕುಸಲಪ್ಪಸತ್ಥಾ, ಯೋ ವಡ್ಢಮಾನೋ ಘಸತೇ ಪತಿಟ್ಠಂ;

ತಸ್ಸೂಪರೋಧಂ ಪರಿಸಙ್ಕಮಾನೋ, ಪತಾರಯೀ ಮೂಲವಧಾಯ ಧೀರೋತಿ.

ಪಲಾಸಜಾತಕಂ ದಸಮಂ.

ವಣ್ಣಾರೋಹವಗ್ಗೋ ದುತಿಯೋ [ಇಮಸ್ಸುದ್ದಾನಂ ತತಿಯವಗ್ಗಪರಿಯೋಸಾನೇ ಭವಿಸ್ಸತಿ].