೩. ಅಡ್ಢವಗ್ಗೋ

೩೭೧. ದೀಘೀತಿಕೋಸಲಜಾತಕಂ (೫-೩-೧)

೧೧೦. ಏವಂಭೂತಸ್ಸ ತೇ ರಾಜ, ಆಗತಸ್ಸ ವಸೇ [ವಸೋ (ಪೀ. ಕ.)] ಮಮ;

ಅತ್ಥಿ ನು ಕೋಚಿ ಪರಿಯಾಯೋ, ಯೋ ತಂ ದುಕ್ಖಾ ಪಮೋಚಯೇ.

೧೧೧. ಏವಂಭೂತಸ್ಸ ಮೇ ತಾತ, ಆಗತಸ್ಸ ವಸೇ ತವ;

ನತ್ಥಿ ನೋ ಕೋಚಿ ಪರಿಯಾಯೋ, ಯೋ ಮಂ ದುಕ್ಖಾ ಪಮೋಚಯೇ.

೧೧೨. ನಾಞ್ಞಂ ಸುಚರಿತಂ ರಾಜ, ನಾಞ್ಞಂ ರಾಜ ಸುಭಾಸಿತಂ;

ತಾಯತೇ ಮರಣಕಾಲೇ, ಏವಮೇವಿತರಂ ಧನಂ.

೧೧೩. ಅಕ್ಕೋಚ್ಛಿ ಮಂ ಅವಧಿ ಮಂ, ಅಜಿನಿ ಮಂ ಅಹಾಸಿ ಮೇ;

ಯೇ ಚ ತಂ ಉಪನಯ್ಹನ್ತಿ, ವೇರಂ ತೇಸಂ ನ ಸಮ್ಮತಿ.

೧೧೪. ಅಕ್ಕೋಚ್ಛಿ ಮಂ ಅವಧಿ ಮಂ, ಅಜಿನಿ ಮಂ ಅಹಾಸಿ ಮೇ;

ಯೇ ಚ ತಂ ನುಪನಯ್ಹನ್ತಿ, ವೇರಂ ತೇಸೂಪಸಮ್ಮತಿ.

೧೧೫. ನ ಹಿ ವೇರೇನ ವೇರಾನಿ, ಸಮ್ಮನ್ತೀಧ ಕುದಾಚನಂ;

ಅವೇರೇನ ಚ ಸಮ್ಮನ್ತಿ, ಏಸ ಧಮ್ಮೋ ಸನನ್ತನೋತಿ.

ದೀಘೀತಿಕೋಸಲಜಾತಕಂ ಪಠಮಂ.

೩೭೨. ಮಿಗಪೋತಕಜಾತಕಂ (೫-೩-೨)

೧೧೬. ಅಗಾರಾ ಪಚ್ಚುಪೇತಸ್ಸ, ಅನಗಾರಸ್ಸ ತೇ ಸತೋ;

ಸಮಣಸ್ಸ ನ ತಂ ಸಾಧು, ಯಂ ಪೇತಮನುಸೋಚಸಿ.

೧೧೭. ಸಂವಾಸೇನ ಹವೇ ಸಕ್ಕ, ಮನುಸ್ಸಸ್ಸ ಮಿಗಸ್ಸ ವಾ;

ಹದಯೇ ಜಾಯತೇ ಪೇಮಂ, ನ ತಂ ಸಕ್ಕಾ ಅಸೋಚಿತುಂ.

೧೧೮. ಮತಂ ಮರಿಸ್ಸಂ ರೋದನ್ತಿ, ಯೇ ರುದನ್ತಿ ಲಪನ್ತಿ ಚ;

ತಸ್ಮಾ ತ್ವಂ ಇಸಿ ಮಾ ರೋದಿ, ರೋದಿತಂ ಮೋಘಮಾಹು ಸನ್ತೋ.

೧೧೯. ರೋದಿತೇನ ಹವೇ ಬ್ರಹ್ಮೇ, ಮತೋ ಪೇತೋ ಸಮುಟ್ಠಹೇ;

ಸಬ್ಬೇ ಸಙ್ಗಮ್ಮ ರೋದಾಮ, ಅಞ್ಞಮಞ್ಞಸ್ಸ ಞಾತಕೇ.

೧೨೦. ಆದಿತ್ತಂ ವತ ಮಂ ಸನ್ತಂ, ಘತಸಿತ್ತಂವ ಪಾವಕಂ;

ವಾರಿನಾ ವಿಯ ಓಸಿಞ್ಚಂ, ಸಬ್ಬಂ ನಿಬ್ಬಾಪಯೇ ದರಂ.

೧೨೧. ಅಬ್ಬಹಿ ವತ ಮೇ ಸಲ್ಲಂ, ಯಮಾಸಿ ಹದಯಸ್ಸಿತಂ;

ಯೋ ಮೇ ಸೋಕಪರೇತಸ್ಸ, ಪುತ್ತಸೋಕಂ ಅಪಾನುದಿ.

೧೨೨. ಸೋಹಂ ಅಬ್ಬೂಳ್ಹಸಲ್ಲೋಸ್ಮಿ, ವೀತಸೋಕೋ ಅನಾವಿಲೋ;

ನ ಸೋಚಾಮಿ ನ ರೋದಾಮಿ, ತವ ಸುತ್ವಾನ ವಾಸವಾತಿ.

ಮಿಗಪೋತಕಜಾತಕಂ ದುತಿಯಂ.

೩೭೩. ಮೂಸಿಕಜಾತಕಂ (೫-೩-೩)

೧೨೩. ಕುಹಿಂ ಗತಾ ಕತ್ಥ ಗತಾ, ಇತಿ ಲಾಲಪ್ಪತೀ ಜನೋ;

ಅಹಮೇವೇಕೋ ಜಾನಾಮಿ, ಉದಪಾನೇ ಮೂಸಿಕಾ ಹತಾ.

೧೨೪. ಯಞ್ಚೇತಂ [ಯಥೇತಂ (ಪೀ.), ಯವೇತಂ (ಕ.), ಯಮೇತಂ (ಕತ್ಥಚಿ)] ಇತಿ ಚೀತಿ ಚ, ಗದ್ರಭೋವ ನಿವತ್ತಸಿ;

ಉದಪಾನೇ ಮೂಸಿಕಂ ಹನ್ತ್ವಾ, ಯವಂ ಭಕ್ಖೇತುಮಿಚ್ಛಸಿ.

೧೨೫. ದಹರೋ ಚಾಸಿ ದುಮ್ಮೇಧ, ಪಠಮುಪ್ಪತ್ತಿಕೋ [ಪಠಮುಪ್ಪತ್ತಿತೋ (ಸೀ. ಪೀ.)] ಸುಸು;

ದೀಘಞ್ಚೇತಂ [ದೀಘಮೇತಂ (ಪೀ.)] ಸಮಾಸಜ್ಜ [ಸಮಾಪಜ್ಜ (ಸ್ಯಾ. ಕ.)], ನ ತೇ ದಸ್ಸಾಮಿ ಜೀವಿತಂ.

೧೨೬. ನಾನ್ತಲಿಕ್ಖಭವನೇನ, ನಾಙ್ಗಪುತ್ತಪಿನೇನ [ನಾಙ್ಗಪುತ್ತಸಿರೇನ (ಸೀ. ಸ್ಯಾ. ಪೀ.)] ವಾ;

ಪುತ್ತೇನ ಹಿ ಪತ್ಥಯಿತೋ, ಸಿಲೋಕೇಹಿ ಪಮೋಚಿತೋ.

೧೨೭. ಸಬ್ಬಂ ಸುತಮಧೀಯೇಥ, ಹೀನಮುಕ್ಕಟ್ಠಮಜ್ಝಿಮಂ;

ಸಬ್ಬಸ್ಸ ಅತ್ಥಂ ಜಾನೇಯ್ಯ, ನ ಚ ಸಬ್ಬಂ ಪಯೋಜಯೇ;

ಹೋತಿ ತಾದಿಸಕೋ ಕಾಲೋ, ಯತ್ಥ ಅತ್ಥಾವಹಂ ಸುತನ್ತಿ.

ಮೂಸಿಕಜಾತಕಂ ತತಿಯಂ.

೩೭೪. ಚೂಳಧನುಗ್ಗಹಜಾತಕಂ (೫-೩-೪)

೧೨೮. ಸಬ್ಬಂ ಭಣ್ಡಂ ಸಮಾದಾಯ, ಪಾರಂ ತಿಣ್ಣೋಸಿ ಬ್ರಾಹ್ಮಣ;

ಪಚ್ಚಾಗಚ್ಛ ಲಹುಂ ಖಿಪ್ಪಂ, ಮಮ್ಪಿ ತಾರೇಹಿ ದಾನಿತೋ [ದಾನಿಭೋ (ಸ್ಯಾ.)].

೧೨೯. ಅಸನ್ಥುತಂ ಮಂ ಚಿರಸನ್ಥುತೇನ, ನಿಮೀನಿ ಭೋತೀ ಅದ್ಧುವಂ ಧುವೇನ;

ಮಯಾಪಿ ಭೋತೀ ನಿಮಿನೇಯ್ಯ ಅಞ್ಞಂ, ಇತೋ ಅಹಂ ದೂರತರಂ ಗಮಿಸ್ಸಂ.

೧೩೦. ಕಾಯಂ ಏಳಗಲಾಗುಮ್ಬೇ [ಏಳಗಣಗುಮ್ಬೇ (ಕ.)], ಕರೋತಿ ಅಹುಹಾಸಿಯಂ;

ನಯೀಧ ನಚ್ಚಗೀತಂ ವಾ [ನಯಿಧ ನಚ್ಚಂ ವಾ ಗೀತಂ ವಾ (ಸೀ. ಸ್ಯಾ. ಪೀ.)], ತಾಳಂ ವಾ ಸುಸಮಾಹಿತಂ;

ಅನಮ್ಹಿಕಾಲೇ [ಅನಮ್ಹಕಾಲೇ (ಪೀ.)] ಸುಸೋಣಿ [ಸುಸ್ಸೋಣಿ (ಸೀ. ಸ್ಯಾ. ಪೀ.)], ಕಿಂ ನು ಜಗ್ಘಸಿ ಸೋಭನೇ [ಸೋಭಣೇ (ಪೀ. ಕ.)].

೧೩೧. ಸಿಙ್ಗಾಲ ಬಾಲ ದುಮ್ಮೇಧ, ಅಪ್ಪಪಞ್ಞೋಸಿ ಜಮ್ಬುಕ;

ಜೀನೋ ಮಚ್ಛಞ್ಚ ಪೇಸಿಞ್ಚ, ಕಪಣೋ ವಿಯ ಝಾಯಸಿ.

೧೩೨. ಸುದಸ್ಸಂ ವಜ್ಜಮಞ್ಞೇಸಂ, ಅತ್ತನೋ ಪನ ದುದ್ದಸಂ;

ಜೀನಾ ಪತಿಞ್ಚ ಜಾರಞ್ಚ, ಮಞ್ಞೇ ತ್ವಞ್ಞೇವ [ಮಮ್ಪಿ ತ್ವಞ್ಞೇವ (ಸೀ. ಸ್ಯಾ.), ತ್ವಮ್ಪಿ ಮಞ್ಞೇವ (ಪೀ.)] ಝಾಯಸಿ.

೧೩೩. ಏವಮೇತಂ ಮಿಗರಾಜ, ಯಥಾ ಭಾಸಸಿ ಜಮ್ಬುಕ;

ಸಾ ನೂನಾಹಂ ಇತೋ ಗನ್ತ್ವಾ, ಭತ್ತು ಹೇಸ್ಸಂ ವಸಾನುಗಾ.

೧೩೪. ಯೋ ಹರೇ ಮತ್ತಿಕಂ ಥಾಲಂ, ಕಂಸಥಾಲಮ್ಪಿ ಸೋ ಹರೇ;

ಕತಞ್ಚೇವ [ಕತಂಯೇವ (ಸೀ. ಸ್ಯಾ. ಪೀ.)] ತಯಾ ಪಾಪಂ, ಪುನಪೇವಂ ಕರಿಸ್ಸಸೀತಿ.

ಚೂಳಧನುಗ್ಗಹಜಾತಕಂ ಚತುತ್ಥಂ.

೩೭೫. ಕಪೋತಜಾತಕಂ (೫-೩-೫)

೧೩೫. ಇದಾನಿ ಖೋಮ್ಹಿ ಸುಖಿತೋ ಅರೋಗೋ, ನಿಕ್ಕಣ್ಟಕೋ ನಿಪ್ಪತಿತೋ ಕಪೋತೋ;

ಕಾಹಾಮಿ ದಾನೀ ಹದಯಸ್ಸ ತುಟ್ಠಿಂ, ತಥಾಹಿಮಂ ಮಂಸಸಾಕಂ ಬಲೇತಿ.

೧೩೬. ಕಾಯಂ ಬಲಾಕಾ ಸಿಖಿನೋ, ಚೋರೀ ಲಙ್ಘಿಪಿತಾಮಹಾ;

ಓರಂ ಬಲಾಕೇ ಆಗಚ್ಛ, ಚಣ್ಡೋ ಮೇ ವಾಯಸೋ ಸಖಾ.

೧೩೭. ಅಲಞ್ಹಿ ತೇ ಜಗ್ಘಿತಾಯೇ, ಮಮಂ ದಿಸ್ವಾನ ಏದಿಸಂ;

ವಿಲೂನಂ ಸೂದಪುತ್ತೇನ, ಪಿಟ್ಠಮಣ್ಡೇನ [ಪಿಟ್ಠಮದ್ದೇನ (ಸೀ. ಸ್ಯಾ. ಪೀ.)] ಮಕ್ಖಿತಂ.

೧೩೮. ಸುನ್ಹಾತೋ ಸುವಿಲಿತ್ತೋಸಿ, ಅನ್ನಪಾನೇನ ತಪ್ಪಿತೋ;

ಕಣ್ಠೇ ಚ ತೇ ವೇಳುರಿಯೋ, ಅಗಮಾ ನು ಕಜಙ್ಗಲಂ.

೧೩೯. ಮಾ ತೇ ಮಿತ್ತೋ ಅಮಿತ್ತೋ ವಾ, ಅಗಮಾಸಿ ಕಜಙ್ಗಲಂ;

ಪಿಞ್ಛಾನಿ ತತ್ಥ ಲಾಯಿತ್ವಾ, ಕಣ್ಠೇ ಬನ್ಧನ್ತಿ ವಟ್ಟನಂ.

೧೪೦. ಪುನಪಾಪಜ್ಜಸೀ ಸಮ್ಮ, ಸೀಲಞ್ಹಿ ತವ ತಾದಿಸಂ;

ನ ಹಿ ಮಾನುಸಕಾ ಭೋಗಾ, ಸುಭುಞ್ಜಾ ಹೋನ್ತಿ ಪಕ್ಖಿನಾತಿ.

ಕಪೋತಜಾತಕಂ ಪಞ್ಚಮಂ.

ಅಡ್ಢವಗ್ಗೋ ತತಿಯೋ.

ತಸ್ಸುದ್ದಾನಂ –

ಅಥ ವಣ್ಣ ಸಸೀಲ ಹಿರಿ ಲಭತೇ, ಸುಮುಖಾ ವಿಸ ಸಾಳಿಯಮಿತ್ತವರೋ;

ಅಥ ಚಕ್ಕ ಪಲಾಸ ಸರಾಜ ಸತೋ, ಯವ ಬಾಲ ಕಪೋತಕ ಪನ್ನರಸಾತಿ.

ಅಥ ವಗ್ಗುದ್ದಾನಂ –

ಜೀನಞ್ಚ ವಣ್ಣಂ ಅಸಮಂವಗುಪ್ಪರಿ, ಸುದೇಸಿತಾ ಜಾತಕನ್ತಿ ಸನ್ತಿ ವೀಸತಿ [ಜಾತಕ ಪಞ್ಚವೀಸತಿ (?)];

ಮಹೇಸಿನೋ ಬ್ರಹ್ಮಚರಿತ್ತಮುತ್ತ-ಮವೋಚ ಗಾಥಾ ಅತ್ಥವತೀ ಸುಬ್ಯಞ್ಜನಾತಿ.

ಪಞ್ಚಕನಿಪಾತಂ ನಿಟ್ಠಿತಂ.