೫. ಪಞ್ಚಕನಿಪಾತೋ

೧. ಮಣಿಕುಣ್ಡಲವಗ್ಗೋ

೩೫೧. ಮಣಿಕುಣ್ಡಲಜಾತಕಂ (೫-೧-೧)

೧. ಜೀನೋ ರಥಸ್ಸಂ ಮಣಿಕುಣ್ಡಲೇ ಚ, ಪುತ್ತೇ ಚ ದಾರೇ ಚ ತಥೇವ ಜೀನೋ;

ಸಬ್ಬೇಸು ಭೋಗೇಸು ಅಸೇಸಕೇಸು [ಅಸೇಸಿತೇಸು (ಸೀ. ಪೀ.), ಅಸೇಸಿಕೇಸು (ಕ.)], ಕಸ್ಮಾ ನ ಸನ್ತಪ್ಪಸಿ ಸೋಕಕಾಲೇ.

೨. ಪುಬ್ಬೇವ ಮಚ್ಚಂ ವಿಜಹನ್ತಿ ಭೋಗಾ, ಮಚ್ಚೋ ವಾ ತೇ [ಚ ನೇ (ಪೀ.), ಧನೇ (ಕ.)] ಪುಬ್ಬತರಂ ಜಹಾತಿ;

ಅಸಸ್ಸತಾ ಭೋಗಿನೋ ಕಾಮಕಾಮಿ, ತಸ್ಮಾ ನ ಸೋಚಾಮಹಂ ಸೋಕಕಾಲೇ.

೩. ಉದೇತಿ ಆಪೂರತಿ ವೇತಿ [ಪೂರೇತಿ ಖೀಯತಿ (ಸ್ಯಾ.)] ಚನ್ದೋ, ಅತ್ಥಂ ತಪೇತ್ವಾನ [ಅನ್ಧಂ ತಪೇತ್ವಾನ (ಕ.), ಅತ್ಥಙ್ಗಮೇತ್ವಾನ (ಸ್ಯಾ.), ಏತ್ಥ ‘‘ತಪೇತ್ವಾನ ಅತ್ಥಂ ಪಲೇತೀ’’ತಿ ಸಮ್ಬನ್ಧೋ] ಪಲೇತಿ ಸೂರಿಯೋ;

ವಿದಿತಾ [ವಿಜಿತಾ (ಸ್ಯಾ.)] ಮಯಾ ಸತ್ತುಕ ಲೋಕಧಮ್ಮಾ, ತಸ್ಮಾ ನ ಸೋಚಾಮಹಂ ಸೋಕಕಾಲೇ.

೪. ಅಲಸೋ ಗಿಹೀ ಕಾಮಭೋಗೀ ನ ಸಾಧು, ಅಸಞ್ಞತೋ ಪಬ್ಬಜಿತೋ ನ ಸಾಧು;

ರಾಜಾ ನ ಸಾಧು ಅನಿಸಮ್ಮಕಾರೀ, ಯೋ ಪಣ್ಡಿತೋ ಕೋಧನೋ ತಂ ನ ಸಾಧು.

೫. ನಿಸಮ್ಮ ಖತ್ತಿಯೋ ಕಯಿರಾ, ನಾನಿಸಮ್ಮ ದಿಸಮ್ಪತಿ;

ನಿಸಮ್ಮಕಾರಿನೋ ರಾಜ [ರಞ್ಞೋ (ಸೀ. ಸ್ಯಾ.)], ಯಸೋ ಕಿತ್ತಿ ಚ ವಡ್ಢತೀತಿ.

ಮಣಿಕುಣ್ಡಲಜಾತಕಂ ಪಠಮಂ.

೩೫೨. ಸುಜಾತಜಾತಕಂ (೫-೧-೨)

೬. ಕಿಂ ನು ಸನ್ತರಮಾನೋವ, ಲಾಯಿತ್ವಾ ಹರಿತಂ ತಿಣಂ;

ಖಾದ ಖಾದಾತಿ ಲಪಸಿ, ಗತಸತ್ತಂ ಜರಗ್ಗವಂ.

೭. ನ ಹಿ ಅನ್ನೇನ ಪಾನೇನ, ಮತೋ ಗೋಣೋ ಸಮುಟ್ಠಹೇ;

ತ್ವಞ್ಚ ತುಚ್ಛಂ ವಿಲಪಸಿ, ಯಥಾ ತಂ ದುಮ್ಮತೀ ತಥಾ.

೮. ತಥೇವ ತಿಟ್ಠತಿ ಸೀಸಂ, ಹತ್ಥಪಾದಾ ಚ ವಾಲಧಿ;

ಸೋತಾ ತಥೇವ ತಿಟ್ಠನ್ತಿ [ಸೋ ತಾತ ತಥೇವ ತಿಟ್ಠತಿ (ಕ.)], ಮಞ್ಞೇ ಗೋಣೋ ಸಮುಟ್ಠಹೇ.

೯. ನೇವಯ್ಯಕಸ್ಸ ಸೀಸಞ್ಚ [ಸೀಸಂ ವಾ (ಸೀ. ಸ್ಯಾ. ಪೀ.)], ಹತ್ಥಪಾದಾ ಚ ದಿಸ್ಸರೇ;

ರುದಂ ಮತ್ತಿಕಥೂಪಸ್ಮಿಂ, ನನು ತ್ವಞ್ಞೇವ ದುಮ್ಮತಿ.

೧೦. ಆದಿತ್ತಂ ವತ ಮಂ ಸನ್ತಂ, ಘತಸಿತ್ತಂವ ಪಾವಕಂ;

ವಾರಿನಾ ವಿಯ ಓಸಿಞ್ಚಂ [ಓಸಿಞ್ಚಿ (ಕ.)], ಸಬ್ಬಂ ನಿಬ್ಬಾಪಯೇ ದರಂ.

೧೧. ಅಬ್ಬಹೀ [ಅಬ್ಬೂಳ್ಹಂ (ಸೀ. ಸ್ಯಾ.), ಅಬ್ಭೂಳ್ಹಂ (ಕ.)] ವತ ಮೇ ಸಲ್ಲಂ, ಯಮಾಸಿ ಹದಯಸ್ಸಿತಂ [ಸೋಕಂ ಹದಯನಿಸ್ಸಿತಂ (ಸೀ. ಸ್ಯಾ.)];

ಯೋ ಮೇ ಸೋಕಪರೇತಸ್ಸ, ಪಿತು ಸೋಕಂ ಅಪಾನುದಿ.

೧೨. ಸೋಹಂ ಅಬ್ಬೂಳ್ಹಸಲ್ಲೋಸ್ಮಿ, ವೀತಸೋಕೋ ಅನಾವಿಲೋ;

ನ ಸೋಚಾಮಿ ನ ರೋದಾಮಿ, ತವ ಸುತ್ವಾನ ಮಾಣವ.

೧೩. ಏವಂ ಕರೋನ್ತಿ ಸಪ್ಪಞ್ಞಾ, ಯೇ ಹೋನ್ತಿ ಅನುಕಮ್ಪಕಾ;

ವಿನಿವತ್ತೇನ್ತಿ ಸೋಕಮ್ಹಾ, ಸುಜಾತೋ ಪಿತರಂ ಯಥಾತಿ.

ಸುಜಾತಜಾತಕಂ ದುತಿಯಂ.

೩೫೩. ವೇನಸಾಖಜಾತಕಂ (೫-೧-೩)

೧೪. ನಯಿದಂ ನಿಚ್ಚಂ ಭವಿತಬ್ಬಂ ಬ್ರಹ್ಮದತ್ತ, ಖೇಮಂ ಸುಭಿಕ್ಖಂ ಸುಖತಾ ಚ ಕಾಯೇ;

ಅತ್ಥಚ್ಚಯೇ ಮಾ ಅಹು ಸಮ್ಪಮೂಳ್ಹೋ, ಭಿನ್ನಪ್ಲವೋ ಸಾಗರಸ್ಸೇವ ಮಜ್ಝೇ.

೧೫. ಯಾನಿ ಕರೋತಿ ಪುರಿಸೋ, ತಾನಿ ಅತ್ತನಿ ಪಸ್ಸತಿ;

ಕಲ್ಯಾಣಕಾರೀ ಕಲ್ಯಾಣಂ, ಪಾಪಕಾರೀ ಚ ಪಾಪಕಂ;

ಯಾದಿಸಂ ವಪತೇ ಬೀಜಂ, ತಾದಿಸಂ ಹರತೇ ಫಲಂ.

೧೬. ಇದಂ ತದಾಚರಿಯವಚೋ, ಪಾರಾಸರಿಯೋ ಯದಬ್ರವಿ;

ಮಾ ಸು [ಮಾ ಸ್ಸು (ಸೀ. ಸ್ಯಾ. ಪೀ.)] ತ್ವಂ ಅಕರಿ ಪಾಪಂ, ಯಂ ತ್ವಂ ಪಚ್ಛಾ ಕತಂ ತಪೇ.

೧೭. ಅಯಮೇವ ಸೋ ಪಿಙ್ಗಿಯ [ಸೋ ಪಿಙ್ಗಿಯೋ (ಸ್ಯಾ.), ಸೋಪಿ ಭಿಯ್ಯೋ (ಕ.)] ವೇನಸಾಖೋ, [ಧೋನಸಾಖೋ (ಕ. ಸೀ. ಪೀ.)] ಯಮ್ಹಿ ಘಾತಯಿಂ ಖತ್ತಿಯಾನಂ ಸಹಸ್ಸಂ;

ಅಲಙ್ಕತೇ ಚನ್ದನಸಾರಾನುಲಿತ್ತೇ, ತಮೇವ ದುಕ್ಖಂ ಪಚ್ಚಾಗತಂ ಮಮಂ.

೧೮. ಸಾಮಾ ಚ [ಸಾಮಾಪಿ (ಸೀ. ಸ್ಯಾ.)] ಖೋ ಚನ್ದನಲಿತ್ತಗತ್ತಾ [ಗತ್ತೀ (ಕ. ಸೀ. ಸ್ಯಾ. ಪೀ.)], ಲಟ್ಠೀವ ಸೋಭಞ್ಜನಕಸ್ಸ ಉಗ್ಗತಾ;

ಅದಿಸ್ವಾ [ಅದಿಸ್ವಾವ (ಸೀ.)] ಕಾಲಂ ಕರಿಸ್ಸಾಮಿ ಉಬ್ಬರಿಂ, ತಂ ಮೇ ಇತೋ ದುಕ್ಖತರಂ ಭವಿಸ್ಸತೀತಿ.

ವೇನಸಾಖಜಾತಕಂ [ಧೋನಸಾಖಜಾತಕಂ (ಕ. ಸೀ. ಪೀ.)] ತತಿಯಂ.

೩೫೪. ಉರಗಜಾತಕಂ (೫-೧-೪)

೧೯. ಉರಗೋವ ತಚಂ ಜಿಣ್ಣಂ, ಹಿತ್ವಾ ಗಚ್ಛತಿ ಸಂ ತನುಂ;

ಏವಂ ಸರೀರೇ ನಿಬ್ಭೋಗೇ, ಪೇತೇ ಕಾಲಙ್ಕತೇ ಸತಿ.

೨೦. ಡಯ್ಹಮಾನೋ ನ ಜಾನಾತಿ, ಞಾತೀನಂ ಪರಿದೇವಿತಂ;

ತಸ್ಮಾ ಏತಂ ನ ಸೋಚಾಮಿ, ಗತೋ ಸೋ ತಸ್ಸ ಯಾ ಗತಿ.

೨೧. ಅನವ್ಹಿತೋ ತತೋ ಆಗಾ, ಅನನುಞ್ಞಾತೋ [ನಾನುಞ್ಞಾತೋ (ಕ.)] ಇತೋ ಗತೋ;

ಯಥಾಗತೋ ತಥಾ ಗತೋ, ತತ್ಥ ಕಾ ಪರಿದೇವನಾ.

೨೨. ಡಯ್ಹಮಾನೋ ನ ಜಾನಾತಿ, ಞಾತೀನಂ ಪರಿದೇವಿತಂ;

ತಸ್ಮಾ ಏತಂ ನ ಸೋಚಾಮಿ, ಗತೋ ಸೋ ತಸ್ಸ ಯಾ ಗತಿ.

೨೩. ಸಚೇ ರೋದೇ ಕಿಸಾ [ಕಿಸೀ (ಪೀ.)] ಅಸ್ಸಂ, ತಸ್ಸಾ ಮೇ ಕಿಂ ಫಲಂ ಸಿಯಾ;

ಞಾತಿಮಿತ್ತಸುಹಜ್ಜಾನಂ, ಭಿಯ್ಯೋ ನೋ ಅರತೀ ಸಿಯಾ.

೨೪. ಡಯ್ಹಮಾನೋ ನ ಜಾನಾತಿ, ಞಾತೀನಂ ಪರಿದೇವಿತಂ;

ತಸ್ಮಾ ಏತಂ ನ ಸೋಚಾಮಿ, ಗತೋ ಸೋ ತಸ್ಸ ಯಾ ಗತಿ.

೨೫. ಯಥಾಪಿ ದಾರಕೋ ಚನ್ದಂ, ಗಚ್ಛನ್ತಮನುರೋದತಿ;

ಏವಂ ಸಮ್ಪದಮೇವೇತಂ, ಯೋ ಪೇತಮನುಸೋಚತಿ.

೨೬. ಡಯ್ಹಮಾನೋ ನ ಜಾನಾತಿ, ಞಾತೀನಂ ಪರಿದೇವಿತಂ;

ತಸ್ಮಾ ಏತಂ ನ ಸೋಚಾಮಿ, ಗತೋ ಸೋ ತಸ್ಸ ಯಾ ಗತಿ.

೨೭. ಯಥಾಪಿ ಉದಕಕುಮ್ಭೋ, ಭಿನ್ನೋ ಅಪ್ಪಟಿಸನ್ಧಿಯೋ;

ಏವಂ ಸಮ್ಪದಮೇವೇತಂ, ಯೋ ಪೇತಮನುಸೋಚತಿ.

೨೮. ಡಯ್ಹಮಾನೋ ನ ಜಾನಾತಿ, ಞಾತೀನಂ ಪರಿದೇವಿತಂ;

ತಸ್ಮಾ ಏತಂ ನ ಸೋಚಾಮಿ, ಗತೋ ಸೋ ತಸ್ಸ ಯಾ ಗತೀತಿ.

ಉರಗಜಾತಕಂ ಚತುತ್ಥಂ.

೩೫೫. ಘಟಜಾತಕಂ (೫-೧-೫)

೨೯. ಅಞ್ಞೇ ಸೋಚನ್ತಿ ರೋದನ್ತಿ, ಅಞ್ಞೇ ಅಸ್ಸುಮುಖಾ ಜನಾ;

ಪಸನ್ನಮುಖವಣ್ಣೋಸಿ, ಕಸ್ಮಾ ಘಟ [ಘತ (ಸೀ. ಪೀ.)] ನ ಸೋಚಸಿ.

೩೦. ನಾಬ್ಭತೀತಹರೋ ಸೋಕೋ, ನಾನಾಗತಸುಖಾವಹೋ;

ತಸ್ಮಾ ಧಙ್ಕ [ವಂಕ (ಪೀ.)] ನ ಸೋಚಾಮಿ, ನತ್ಥಿ ಸೋಕೇ ದುತೀಯತಾ [ಸೋಕೋ ದುತೀಯಕಾ (ಕ.)].

೩೧. ಸೋಚಂ ಪಣ್ಡು ಕಿಸೋ ಹೋತಿ, ಭತ್ತಞ್ಚಸ್ಸ ನ ರುಚ್ಚತಿ;

ಅಮಿತ್ತಾ ಸುಮನಾ ಹೋನ್ತಿ, ಸಲ್ಲವಿದ್ಧಸ್ಸ ರುಪ್ಪತೋ.

೩೨. ಗಾಮೇ ವಾ ಯದಿ ವಾರಞ್ಞೇ, ನಿನ್ನೇ ವಾ ಯದಿ ವಾ ಥಲೇ;

ಠಿತಂ ಮಂ ನಾಗಮಿಸ್ಸತಿ, ಏವಂ ದಿಟ್ಠಪದೋ ಅಹಂ.

೩೩. ಯಸ್ಸತ್ತಾ ನಾಲಮೇಕೋವ, ಸಬ್ಬಕಾಮರಸಾಹರೋ;

ಸಬ್ಬಾಪಿ ಪಥವೀ ತಸ್ಸ, ನ ಸುಖಂ ಆವಹಿಸ್ಸತೀತಿ.

ಘಟಜಾತಕಂ ಪಞ್ಚಮಂ.

೩೫೬. ಕೋರಣ್ಡಿಯಜಾತಕಂ (೫-೧-೬)

೩೪. ಏಕೋ ಅರಞ್ಞೇ ಗಿರಿಕನ್ದರಾಯಂ, ಪಗ್ಗಯ್ಹ ಪಗ್ಗಯ್ಹ ಸಿಲಂ ಪವೇಚ್ಛಸಿ [ಪವೇಜ್ಝಸಿ (ಸ್ಯಾ. ಸೀ. ಅಟ್ಠ.)];

ಪುನಪ್ಪುನಂ ಸನ್ತರಮಾನರೂಪೋ, ಕೋರಣ್ಡಿಯ [ಕಾರಣ್ಡಿಯ (ಸೀ. ಸ್ಯಾ. ಪೀ.)] ಕೋ ನು ತವ ಯಿಧತ್ಥೋ.

೩೫. ಅಹಞ್ಹಿಮಂ ಸಾಗರ ಸೇವಿತನ್ತಂ, ಸಮಂ ಕರಿಸ್ಸಾಮಿ ಯಥಾಪಿ ಪಾಣಿ;

ವಿಕಿರಿಯ ಸಾನೂನಿ ಚ ಪಬ್ಬತಾನಿ ಚ, ತಸ್ಮಾ ಸಿಲಂ ದರಿಯಾ ಪಕ್ಖಿಪಾಮಿ.

೩೬. ನಯಿಮಂ ಮಹಿಂ ಅರಹತಿ ಪಾಣಿಕಪ್ಪಂ, ಸಮಂ ಮನುಸ್ಸೋ ಕರಣಾಯ ಮೇಕೋ;

ಮಞ್ಞಾಮಿಮಞ್ಞೇವ ದರಿಂ ಜಿಗೀಸಂ [ಜಿಗಿಂಸಂ (ಸೀ. ಸ್ಯಾ. ಪೀ.)], ಕೋರಣ್ಡಿಯ ಹಾಹಸಿ [ಹಾಯಸಿ (ಸ್ಯಾ. ಕ.)] ಜೀವಲೋಕಂ.

೩೭. ಸಚೇ ಅಹಂ [ಅಯಂ (ಸೀ. ಸ್ಯಾ. ಪೀ.)] ಭೂತಧರಂ ನ ಸಕ್ಕಾ [ಸಕ್ಕೋ (ಸ್ಯಾ. ಕ.)], ಸಮಂ ಮನುಸ್ಸೋ ಕರಣಾಯ ಮೇಕೋ;

ಏವಮೇವ ತ್ವಂ ಬ್ರಹ್ಮೇ ಇಮೇ ಮನುಸ್ಸೇ, ನಾನಾದಿಟ್ಠಿಕೇ ನಾನಯಿಸ್ಸಸಿ ತೇ [ನೇ (ಕ.)].

೩೮. ಸಙ್ಖಿತ್ತರೂಪೇನ ಭವಂ ಮಮತ್ಥಂ, ಅಕ್ಖಾಸಿ ಕೋರಣ್ಡಿಯ ಏವಮೇತಂ;

ಯಥಾ ನ ಸಕ್ಕಾ ಪಥವೀ ಸಮಾಯಂ, ಕತ್ತುಂ ಮನುಸ್ಸೇನ ತಥಾ ಮನುಸ್ಸಾತಿ.

ಕೋರಣ್ಡಿಯಜಾತಕಂ ಛಟ್ಠಂ.

೩೫೭. ಲಟುಕಿಕಜಾತಕಂ (೫-೧-೭)

೩೯. ವನ್ದಾಮಿ ತಂ ಕುಞ್ಜರ ಸಟ್ಠಿಹಾಯನಂ, ಆರಞ್ಞಕಂ ಯೂಥಪತಿಂ ಯಸಸ್ಸಿಂ;

ಪಕ್ಖೇಹಿ ತಂ ಪಞ್ಜಲಿಕಂ ಕರೋಮಿ, ಮಾ ಮೇ ವಧೀ ಪುತ್ತಕೇ ದುಬ್ಬಲಾಯ.

೪೦. ವನ್ದಾಮಿ ತಂ ಕುಞ್ಜರ ಏಕಚಾರಿಂ, ಆರಞ್ಞಕಂ ಪಬ್ಬತಸಾನುಗೋಚರಂ;

ಪಕ್ಖೇಹಿ ತಂ ಪಞ್ಜಲಿಕಂ ಕರೋಮಿ, ಮಾ ಮೇ ವಧೀ ಪುತ್ತಕೇ ದುಬ್ಬಲಾಯ;

೪೧. ವಮಿಸ್ಸಾಮಿ ತೇ ಲಟುಕಿಕೇ ಪುತ್ತಕಾನಿ, ಕಿಂ ಮೇ ತುವಂ ಕಾಹಸಿ ದುಬ್ಬಲಾಸಿ;

ಸತಂ ಸಹಸ್ಸಾನಿಪಿ ತಾದಿಸೀನಂ, ವಾಮೇನ ಪಾದೇನ ಪಪೋಥಯೇಯ್ಯಂ.

೪೨. ನ ಹೇವ ಸಬ್ಬತ್ಥ ಬಲೇನ ಕಿಚ್ಚಂ, ಬಲಞ್ಹಿ ಬಾಲಸ್ಸ ವಧಾಯ ಹೋತಿ;

ಕರಿಸ್ಸಾಮಿ ತೇ ನಾಗರಾಜಾ ಅನತ್ಥಂ, ಯೋ ಮೇ ವಧೀ ಪುತ್ತಕೇ ದುಬ್ಬಲಾಯ.

೪೩. ಕಾಕಞ್ಚ ಪಸ್ಸ ಲಟುಕಿಕಂ, ಮಣ್ಡೂಕಂ ನೀಲಮಕ್ಖಿಕಂ;

ಏತೇ ನಾಗಂ ಅಘಾತೇಸುಂ, ಪಸ್ಸ ವೇರಸ್ಸ ವೇರಿನಂ;

ತಸ್ಮಾ ಹಿ ವೇರಂ ನ ಕಯಿರಾಥ, ಅಪ್ಪಿಯೇನಪಿ ಕೇನಚೀತಿ.

ಲಟುಕಿಕಜಾತಕಂ ಸತ್ತಮಂ.

೩೫೮. ಚೂಳಧಮ್ಮಪಾಲಜಾತಕಂ (೫-೧-೮)

೪೪. ಅಹಮೇವ ದೂಸಿಯಾ ಭೂನಹತಾ, ರಞ್ಞೋ ಮಹಾಪತಾಪಸ್ಸ;

ಏತಂ ಮುಞ್ಚತು ಧಮ್ಮಪಾಲಂ, ಹತ್ಥೇ ಮೇ ದೇವ ಛೇದೇಹಿ.

೪೫. ಅಹಮೇವ ದೂಸಿಯಾ ಭೂನಹತಾ, ರಞ್ಞೋ ಮಹಾಪತಾಪಸ್ಸ;

ಏತಂ ಮುಞ್ಚತು ಧಮ್ಮಪಾಲಂ, ಪಾದೇ ಮೇ ದೇವ ಛೇದೇಹಿ.

೪೬. ಅಹಮೇವ ದೂಸಿಯಾ ಭೂನಹತಾ, ರಞ್ಞೋ ಮಹಾಪತಾಪಸ್ಸ;

ಏತಂ ಮುಞ್ಚತು ಧಮ್ಮಪಾಲಂ, ಸೀಸಂ ಮೇ ದೇವ ಛೇದೇಹಿ.

೪೭. ನ ಹಿ [ನಹ (ಸೀ. ಸ್ಯಾ. ಪೀ.) ಏತ್ಥ ಹ-ಕಾರೋ ಖೇದೇ] ನೂನಿಮಸ್ಸ ರಞ್ಞೋ, ಮಿತ್ತಾಮಚ್ಚಾ ಚ ವಿಜ್ಜರೇ ಸುಹದಾ;

ಯೇ ನ ವದನ್ತಿ ರಾಜಾನಂ, ಮಾ ಘಾತಯಿ ಓರಸಂ ಪುತ್ತಂ.

೪೮. ನ ಹಿ [ನಹ (ಸೀ. ಸ್ಯಾ. ಪೀ.) ಏತ್ಥ ಹ-ಕಾರೋ ಖೇದೇ] ನೂನಿಮಸ್ಸ ರಞ್ಞೋ, ಞಾತೀ ಮಿತ್ತಾ ಚ ವಿಜ್ಜರೇ ಸುಹದಾ;

ಯೇ ನ ವದನ್ತಿ ರಾಜಾನಂ, ಮಾ ಘಾತಯಿ ಅತ್ರಜಂ ಪುತ್ತಂ.

೪೯. ಚನ್ದನಸಾರಾನುಲಿತ್ತಾ, ಬಾಹಾ ಛಿಜ್ಜನ್ತಿ ಧಮ್ಮಪಾಲಸ್ಸ;

ದಾಯಾದಸ್ಸ ಪಥಬ್ಯಾ, ಪಾಣಾ ಮೇ ದೇವ ರುಜ್ಝನ್ತೀತಿ.

ಚೂಳಧಮ್ಮಪಾಲಜಾತಕಂ ಅಟ್ಠಮಂ.

೩೫೯. ಸುವಣ್ಣಮಿಗಜಾತಕಂ (೫-೧-೯)

೫೦. ವಿಕ್ಕಮ ರೇ ಹರಿಪಾದ [ಮಹಾಮಿಗ (ಸೀ. ಸ್ಯಾ. ಪೀ.)], ವಿಕ್ಕಮ ರೇ ಮಹಾಮಿಗ [ಹರೀಪದ (ಸೀ. ಸ್ಯಾ. ಪೀ.)];

ಛಿನ್ದ ವಾರತ್ತಿಕಂ ಪಾಸಂ, ನಾಹಂ ಏಕಾ ವನೇ ರಮೇ.

೫೧. ವಿಕ್ಕಮಾಮಿ ನ ಪಾರೇಮಿ, ಭೂಮಿಂ ಸುಮ್ಭಾಮಿ ವೇಗಸಾ;

ದಳ್ಹೋ ವಾರತ್ತಿಕೋ ಪಾಸೋ, ಪಾದಂ ಮೇ ಪರಿಕನ್ತತಿ.

೫೨. ಅತ್ಥರಸ್ಸು ಪಲಾಸಾನಿ, ಅಸಿಂ ನಿಬ್ಬಾಹ ಲುದ್ದಕ;

ಪಠಮಂ ಮಂ ವಧಿತ್ವಾನ, ಹನ ಪಚ್ಛಾ ಮಹಾಮಿಗಂ.

೫೩. ನ ಮೇ ಸುತಂ ವಾ ದಿಟ್ಠಂ ವಾ, ಭಾಸನ್ತಿಂ ಮಾನುಸಿಂ ಮಿಗಿಂ [ನ ಮೇ ಸುತಾ ವಾ ದಿಟ್ಠಾ ವಾ, ಭಾಸನ್ತೀ ಮಾನುಸಿಂ ಮಿಗೀ (ಟೀಕಾ)];

ತ್ವಞ್ಚ ಭದ್ದೇ ಸುಖೀ ಹೋಹಿ, ಏಸೋ ಚಾಪಿ ಮಹಾಮಿಗೋ.

೫೪. ಏವಂ ಲುದ್ದಕ ನನ್ದಸ್ಸು, ಸಹ ಸಬ್ಬೇಹಿ ಞಾತಿಭಿ;

ಯಥಾಹಮಜ್ಜ ನನ್ದಾಮಿ, ಮುತ್ತಂ ದಿಸ್ವಾ ಮಹಾಮಿಗನ್ತಿ.

ಸುವಣ್ಣಮಿಗಜಾತಕಂ ನವಮಂ.

೩೬೦. ಸುಯೋನನ್ದೀಜಾತಕಂ (೫-೧-೧೦)

೫೫. ವಾತಿ ಗನ್ಧೋ ತಿಮಿರಾನಂ, ಕುಸಮುದ್ದೋ ಚ [ವ (ಸ್ಯಾ. ಪೀ.)] ಘೋಸವಾ;

ದೂರೇ ಇತೋ ಸುಯೋನನ್ದೀ [ಇತೋ ಹಿ ಸುಸನ್ದೀ (ಸೀ. ಸ್ಯಾ.), ಇತೋಪಿ ಸುಸ್ಸೋನ್ದೀ (ಪೀ.)], ತಮ್ಬಕಾಮಾ ತುದನ್ತಿ ಮಂ.

೫೬. ಕಥಂ ಸಮುದ್ದಮತರಿ, ಕಥಂ ಅದ್ದಕ್ಖಿ ಸೇದುಮಂ [ಸೇರುಮಂ (ಸೀ. ಸ್ಯಾ. ಪೀ.)];

ಕಥಂ ತಸ್ಸಾ ಚ ತುಯ್ಹಞ್ಚ, ಅಹು ಸಗ್ಗ [ಅಗ್ಗ (ಸೀ. ಸ್ಯಾ.)] ಸಮಾಗಮೋ.

೫೭. ಕುರುಕಚ್ಛಾ [ಭರುಕಚ್ಛಾ (ಸೀ. ಸ್ಯಾ. ಪೀ.)] ಪಯಾತಾನಂ, ವಾಣಿಜಾನಂ ಧನೇಸಿನಂ;

ಮಕರೇಹಿ ಅಭಿದಾ [ಮಕರೇಹಿಬ್ಭಿದಾ (ಸೀ.), ಮಕರೇಹಿ’ಭಿದಾ (ಸ್ಯಾ.), ಮಕರೇಹಿ ಭಿನ್ನಾ (ಪೀ.)] ನಾವಾ, ಫಲಕೇನಾಹಮಪ್ಲವಿಂ.

೫೮. ಸಾ ಮಂ ಸಣ್ಹೇನ ಮುದುನಾ, ನಿಚ್ಚಂ ಚನ್ದನಗನ್ಧಿನೀ;

ಅಙ್ಗೇನ [ಅಙ್ಕೇನ (ಪೀ. ಕ.)] ಉದ್ಧರೀ ಭದ್ದಾ, ಮಾತಾ ಪುತ್ತಂವ ಓರಸಂ.

೫೯. ಸಾ ಮಂ ಅನ್ನೇನ ಪಾನೇನ, ವತ್ಥೇನ ಸಯನೇನ ಚ;

ಅತ್ತನಾಪಿ ಚ ಮನ್ದಕ್ಖೀ, ಏವಂ ತಮ್ಬ ವಿಜಾನಾಹೀತಿ.

ಸುಯೋನನ್ದೀಜಾತಕಂ ದಸಮಂ.

ಮಣಿಕುಣ್ಡಲವಗ್ಗೋ ಪಠಮೋ.

ತಸ್ಸುದ್ದಾನಂ –

ಅಥ ಜಿನವರೋ ಹರಿತಂ ತಿಣಕೋ, ಅಥ ಭಿನ್ನಪ್ಲವೋ ಉರಗೋವ ಘಟೋ;

ದರಿಯಾ ಪುನ ಕುಞ್ಜರ ಭೂನಹತಾ, ಮಿಗಮುತ್ತಮಸಗ್ಗವರೇನ ದಸಾತಿ.

೨. ವಣ್ಣಾರೋಹವಗ್ಗೋ

೩೬೧. ವಣ್ಣಾರೋಹಜಾತಕಂ (೫-೨-೧)

೬೦. ವಣ್ಣಾರೋಹೇನ ಜಾತಿಯಾ, ಬಲನಿಕ್ಕಮನೇನ ಚ;

ಸುಬಾಹು ನ ಮಯಾ ಸೇಯ್ಯೋ, ಸುದಾಠ ಇತಿ ಭಾಸಸಿ.