೨. ವಣ್ಣಾರೋಹವಗ್ಗೋ

೩೬೧. ವಣ್ಣಾರೋಹಜಾತಕಂ (೫-೨-೧)

೬೦. ವಣ್ಣಾರೋಹೇನ ಜಾತಿಯಾ, ಬಲನಿಕ್ಕಮನೇನ ಚ;

ಸುಬಾಹು ನ ಮಯಾ ಸೇಯ್ಯೋ, ಸುದಾಠ ಇತಿ ಭಾಸಸಿ.

೬೧. ವಣ್ಣಾರೋಹೇನ ಜಾತಿಯಾ, ಬಲನಿಕ್ಕಮನೇನ ಚ;

ಸುದಾಠೋ ನ ಮಯಾ ಸೇಯ್ಯೋ, ಸುಬಾಹು ಇತಿ ಭಾಸಸಿ.

೬೨. ಏವಂ ಚೇ ಮಂ ವಿಹರನ್ತಂ, ಸುಬಾಹು ಸಮ್ಮ ದುಬ್ಭಸಿ;

ನ ದಾನಾಹಂ ತಯಾ ಸದ್ಧಿಂ, ಸಂವಾಸಮಭಿರೋಚಯೇ.

೬೩. ಯೋ ಪರೇಸಂ ವಚನಾನಿ, ಸದ್ದಹೇಯ್ಯ [ಸದ್ದಹೇಥ (ಸೀ. ಸ್ಯಾ. ಪೀ.)] ಯಥಾತಥಂ;

ಖಿಪ್ಪಂ ಭಿಜ್ಜೇಥ ಮಿತ್ತಸ್ಮಿಂ, ವೇರಞ್ಚ ಪಸವೇ ಬಹುಂ.

೬೪. ನ ಸೋ ಮಿತ್ತೋ ಯೋ ಸದಾ ಅಪ್ಪಮತ್ತೋ, ಭೇದಾಸಙ್ಕೀ ರನ್ಧಮೇವಾನುಪಸ್ಸೀ;

ಯಸ್ಮಿಞ್ಚ ಸೇತೀ ಉರಸೀವ ಪುತ್ತೋ, ಸ ವೇ ಮಿತ್ತೋ ಯೋ ಅಭೇಜ್ಜೋ ಪರೇಹೀತಿ.

ವಣ್ಣಾರೋಹಜಾತಕಂ ಪಠಮಂ.

೩೬೨. ಸೀಲವೀಮಂಸಜಾತಕಂ (೫-೨-೨)

೬೫. ಸೀಲಂ ಸೇಯ್ಯೋ ಸುತಂ ಸೇಯ್ಯೋ, ಇತಿ ಮೇ ಸಂಸಯೋ ಅಹು;

ಸೀಲಮೇವ ಸುತಾ ಸೇಯ್ಯೋ, ಇತಿ ಮೇ ನತ್ಥಿ ಸಂಸಯೋ.

೬೬. ಮೋಘಾ ಜಾತಿ ಚ ವಣ್ಣೋ ಚ, ಸೀಲಮೇವ ಕಿರುತ್ತಮಂ;

ಸೀಲೇನ ಅನುಪೇತಸ್ಸ, ಸುತೇನತ್ಥೋ ನ ವಿಜ್ಜತಿ.

೬೭. ಖತ್ತಿಯೋ ಚ ಅಧಮ್ಮಟ್ಠೋ, ವೇಸ್ಸೋ ಚಾಧಮ್ಮನಿಸ್ಸಿತೋ;

ತೇ ಪರಿಚ್ಚಜ್ಜುಭೋ ಲೋಕೇ, ಉಪಪಜ್ಜನ್ತಿ ದುಗ್ಗತಿಂ.

೬೮. ಖತ್ತಿಯಾ ಬ್ರಾಹ್ಮಣಾ ವೇಸ್ಸಾ, ಸುದ್ದಾ ಚಣ್ಡಾಲಪುಕ್ಕುಸಾ;

ಇಧ ಧಮ್ಮಂ ಚರಿತ್ವಾನ, ಭವನ್ತಿ ತಿದಿವೇ ಸಮಾ.

೬೯. ನ ವೇದಾ ಸಮ್ಪರಾಯಾಯ, ನ ಜಾತಿ ನಾಪಿ [ನೋಪಿ (ಪೀ.)] ಬನ್ಧವಾ;

ಸಕಞ್ಚ ಸೀಲಂ ಸಂಸುದ್ಧಂ, ಸಮ್ಪರಾಯಾಯ ಸುಖಾಯ ಚಾತಿ [ಸುಖಾವಹನ್ತಿ (ಸೀ. ಸ್ಯಾ.)].

ಸೀಲವೀಮಂಸಜಾತಕಂ ದುತಿಯಂ.

೩೬೩. ಹಿರಿಜಾತಕಂ (೫-೨-೩)

೭೦. ಹಿರಿಂ ತರನ್ತಂ ವಿಜಿಗುಚ್ಛಮಾನಂ, ತವಾಹಮಸ್ಮೀ ಇತಿ ಭಾಸಮಾನಂ;

ಸೇಯ್ಯಾನಿ ಕಮ್ಮಾನಿ ಅನಾದಿಯನ್ತಂ, ನೇಸೋ ಮಮನ್ತಿ ಇತಿ ನಂ ವಿಜಞ್ಞಾ.

೭೧. ಯಞ್ಹಿ ಕಯಿರಾ ತಞ್ಹಿ ವದೇ, ಯಂ ನ ಕಯಿರಾ ನ ತಂ ವದೇ;

ಅಕರೋನ್ತಂ ಭಾಸಮಾನಂ, ಪರಿಜಾನನ್ತಿ ಪಣ್ಡಿತಾ.

೭೨. ನ ಸೋ ಮಿತ್ತೋ ಯೋ ಸದಾ ಅಪ್ಪಮತ್ತೋ, ಭೇದಾಸಙ್ಕೀ ರನ್ಧಮೇವಾನುಪಸ್ಸೀ;

ಯಸ್ಮಿಞ್ಚ ಸೇತೀ ಉರಸೀವ ಪುತ್ತೋ, ಸ ವೇ ಮಿತ್ತೋ ಯೋ ಅಭೇಜ್ಜೋ ಪರೇಹಿ.

೭೩. ಪಾಮೋಜ್ಜಕರಣಂ ಠಾನಂ, ಪಸಂಸಾವಹನಂ ಸುಖಂ;

ಫಲಾನಿಸಂಸೋ ಭಾವೇತಿ, ವಹನ್ತೋ ಪೋರಿಸಂ ಧುರಂ.

೭೪. ಪವಿವೇಕರಸಂ ಪಿತ್ವಾ, ರಸಂ ಉಪಸಮಸ್ಸ ಚ;

ನಿದ್ದರೋ ಹೋತಿ ನಿಪ್ಪಾಪೋ, ಧಮ್ಮಪ್ಪೀತಿರಸಂ ಪಿವನ್ತಿ.

ಹಿರಿಜಾತಕಂ ತತಿಯಂ.

೩೬೪. ಖಜ್ಜೋಪನಕಜಾತಕಂ (೫-೨-೪)

೭೫. ಕೋ ನು ಸನ್ತಮ್ಹಿ ಪಜ್ಜೋತೇ, ಅಗ್ಗಿಪರಿಯೇಸನಂ ಚರಂ;

ಅದ್ದಕ್ಖಿ ರತ್ತಿ [ರತ್ತಿಂ (ಸ್ಯಾ.)] ಖಜ್ಜೋತಂ, ಜಾತವೇದಂ ಅಮಞ್ಞಥ.

೭೬. ಸ್ವಸ್ಸ ಗೋಮಯಚುಣ್ಣಾನಿ, ಅಭಿಮತ್ಥಂ ತಿಣಾನಿ ಚ;

ವಿಪರೀತಾಯ ಸಞ್ಞಾಯ, ನಾಸಕ್ಖಿ ಪಜ್ಜಲೇತವೇ.

೭೭. ಏವಮ್ಪಿ ಅನುಪಾಯೇನ, ಅತ್ಥಂ ನ ಲಭತೇ ಮಿಗೋ [ಮೂಗೋ (ಸ್ಯಾ.)];

ವಿಸಾಣತೋ ಗವಂ ದೋಹಂ, ಯತ್ಥ ಖೀರಂ ನ ವಿನ್ದತಿ.

೭೮. ವಿವಿಧೇಹಿ ಉಪಾಯೇಹಿ, ಅತ್ಥಂ ಪಪ್ಪೋನ್ತಿ ಮಾಣವಾ;

ನಿಗ್ಗಹೇನ ಅಮಿತ್ತಾನಂ, ಮಿತ್ತಾನಂ ಪಗ್ಗಹೇನ ಚ.

೭೯. ಸೇನಾಮೋಕ್ಖಪಲಾಭೇನ [ಸೇನೀ ಮೋಕ್ಖೂಪಲಾಭೇನ (ಸ್ಯಾ.)], ವಲ್ಲಭಾನಂ ನಯೇನ ಚ;

ಜಗತಿಂ ಜಗತಿಪಾಲಾ, ಆವಸನ್ತಿ ವಸುನ್ಧರನ್ತಿ.

ಖಜ್ಜೋಪನಕಜಾತಕಂ ಚತುತ್ಥಂ.

೩೬೫. ಅಹಿತುಣ್ಡಿಕಜಾತಕಂ (೫-೨-೫)

೮೦. ಧುತ್ತೋಮ್ಹಿ ಸಮ್ಮ ಸುಮುಖ, ಜೂತೇ ಅಕ್ಖಪರಾಜಿತೋ;

ಹರೇಹಿ [ಸೇವೇಹಿ (ಪೀ.)] ಅಮ್ಬಪಕ್ಕಾನಿ, ವೀರಿಯಂ ತೇ ಭಕ್ಖಯಾಮಸೇ.

೮೧. ಅಲಿಕಂ ವತ ಮಂ ಸಮ್ಮ, ಅಭೂತೇನ ಪಸಂಸಸಿ;

ಕೋ ತೇ ಸುತೋ ವಾ ದಿಟ್ಠೋ ವಾ, ಸುಮುಖೋ ನಾಮ ಮಕ್ಕಟೋ.

೮೨. ಅಜ್ಜಾಪಿ ಮೇ ತಂ ಮನಸಿ [ತೇ ಮಂ ಸರಸಿ (ಕ.)], ಯಂ ಮಂ ತ್ವಂ ಅಹಿತುಣ್ಡಿಕ;

ಧಞ್ಞಾಪಣಂ ಪವಿಸಿತ್ವಾ, ಮತ್ತೋ [ಮುತ್ತೋ (ಕ.)] ಛಾತಂ ಹನಾಸಿ ಮಂ.

೮೩. ತಾಹಂ ಸರಂ ದುಕ್ಖಸೇಯ್ಯಂ, ಅಪಿ ರಜ್ಜಮ್ಪಿ ಕಾರಯೇ;

ನೇವಾಹಂ ಯಾಚಿತೋ ದಜ್ಜಂ, ತಥಾ ಹಿ ಭಯತಜ್ಜಿತೋ.

೮೪. ಯಞ್ಚ ಜಞ್ಞಾ ಕುಲೇ ಜಾತಂ, ಗಬ್ಭೇ ತಿತ್ತಂ ಅಮಚ್ಛರಿಂ;

ತೇನ ಸಖಿಞ್ಚ ಮಿತ್ತಞ್ಚ, ಧೀರೋ ಸನ್ಧಾತುಮರಹತೀತಿ.

ಅಹಿತುಣ್ಡಿಕಜಾತಕಂ ಪಞ್ಚಮಂ.

೩೬೬. ಗುಮ್ಬಿಯಜಾತಕಂ (೫-೨-೬)

೮೫. ಮಧುವಣ್ಣಂ ಮಧುರಸಂ, ಮಧುಗನ್ಧಂ ವಿಸಂ ಅಹು;

ಗುಮ್ಬಿಯೋ ಘಾಸಮೇಸಾನೋ, ಅರಞ್ಞೇ ಓದಹೀ ವಿಸಂ.

೮೬. ಮಧು ಇತಿ ಮಞ್ಞಮಾನಾ [ಮಧೂತಿ ಮಞ್ಞಮಾನಾಯ (ಕ.)], ಯೇ ತಂ ವಿಸಮಖಾದಿಸುಂ [ವಿಸಮಸಾಯಿಸುಂ (ಸೀ. ಸ್ಯಾ.)];

ತೇಸಂ ತಂ ಕಟುಕಂ ಆಸಿ, ಮರಣಂ ತೇನುಪಾಗಮುಂ.

೮೭. ಯೇ ಚ ಖೋ ಪಟಿಸಙ್ಖಾಯ, ವಿಸಂ ತಂ ಪರಿವಜ್ಜಯುಂ;

ತೇ ಆತುರೇಸು ಸುಖಿತಾ, ಡಯ್ಹಮಾನೇಸು ನಿಬ್ಬುತಾ.

೮೮. ಏವಮೇವ ಮನುಸ್ಸೇಸು, ವಿಸಂ ಕಾಮಾ ಸಮೋಹಿತಾ;

ಆಮಿಸಂ ಬನ್ಧನಞ್ಚೇತಂ, ಮಚ್ಚುವೇಸೋ [ಪಚ್ಚುವಸೋ (ಸೀ. ಸ್ಯಾ.)] ಗುಹಾಸಯೋ.

೮೯. ಏವಮೇವ ಇಮೇ ಕಾಮೇ, ಆತುರಾ ಪರಿಚಾರಿಕೇ [ಪರಿಚಾರಕೇ (ಕ.)];

ಯೇ ಸದಾ ಪರಿವಜ್ಜೇನ್ತಿ, ಸಙ್ಗಂ ಲೋಕೇ ಉಪಚ್ಚಗುನ್ತಿ.

ಗುಮ್ಬಿಯಜಾತಕಂ ಛಟ್ಠಂ.

೩೬೭. ಸಾಳಿಯಜಾತಕಂ (೫-೨-೭)

೯೦. ಯ್ವಾಯಂ ಸಾಳಿಯ [ಸಾಲಿಯ (ಸೀ. ಸ್ಯಾ. ಪೀ.), ಸಾಳಿಕ (?)] ಛಾಪೋತಿ, ಕಣ್ಹಸಪ್ಪಂ ಅಗಾಹಯಿ;

ತೇನ ಸಪ್ಪೇನಯಂ ದಟ್ಠೋ, ಹತೋ ಪಾಪಾನುಸಾಸಕೋ.

೯೧. ಅಹನ್ತಾರ [ಅಹನನ್ತ (ಪೀ.), ಅಹರನ್ತ (?)] ಮಹನ್ತಾರಂ, ಯೋ ನರೋ ಹನ್ತುಮಿಚ್ಛತಿ;

ಏವಂ ಸೋ ನಿಹತೋ ಸೇತಿ, ಯಥಾಯಂ ಪುರಿಸೋ ಹತೋ.

೯೨. ಅಹನ್ತಾರ [ಅಹನನ್ತ (ಸೀ. ಸ್ಯಾ. ಪೀ.), ಅಹರನ್ತ (?)] ಮಘಾತೇನ್ತಂ, ಯೋ ನರೋ ಹನ್ತುಮಿಚ್ಛತಿ;

ಏವಂ ಸೋ ನಿಹತೋ ಸೇತಿ, ಯಥಾಯಂ ಪುರಿಸೋ ಹತೋ.

೯೩. ಯಥಾ ಪಂಸುಮುಟ್ಠಿಂ ಪುರಿಸೋ, ಪಟಿವಾತಂ ಪಟಿಕ್ಖಿಪೇ;

ತಮೇವ ಸೋ ರಜೋ ಹನ್ತಿ, ತಥಾಯಂ ಪುರಿಸೋ ಹತೋ.

೯೪. ಯೋ ಅಪ್ಪದುಟ್ಠಸ್ಸ ನರಸ್ಸ ದುಸ್ಸತಿ, ಸುದ್ಧಸ್ಸ ಪೋಸಸ್ಸ ಅನಙ್ಗಣಸ್ಸ;

ತಮೇವ ಬಾಲಂ ಪಚ್ಚೇತಿ ಪಾಪಂ, ಸುಖುಮೋ ರಜೋ ಪಟಿವಾತಂವ ಖಿತ್ತೋತಿ.

ಸಾಳಿಯಜಾತಕಂ ಸತ್ತಮಂ.

೩೬೮. ತಚಸಾರಜಾತಕಂ (೫-೨-೮)

೯೫. ಅಮಿತ್ತಹತ್ಥತ್ಥಗತಾ [ಹತ್ಥತ್ತಗತಾ (ಕತ್ಥಚಿ, ಸೀ. ನಿಯ್ಯ)], ತಚಸಾರಸಮಪ್ಪಿತಾ;

ಪಸನ್ನಮುಖವಣ್ಣಾತ್ಥ, ಕಸ್ಮಾ ತುಮ್ಹೇ ನ ಸೋಚಥ.

೯೬. ನ ಸೋಚನಾಯ ಪರಿದೇವನಾಯ, ಅತ್ಥೋವ ಲಬ್ಭೋ [ಅತ್ಥೋ ಚ ಲಬ್ಭಾ (ಸೀ. ಸ್ಯಾ.), ಅತ್ಥೋಧ ಲಬ್ಭಾ (ಅ. ನಿ. ೫.೪೮)] ಅಪಿ ಅಪ್ಪಕೋಪಿ;

ಸೋಚನ್ತಮೇನಂ ದುಖಿತಂ ವಿದಿತ್ವಾ, ಪಚ್ಚತ್ಥಿಕಾ ಅತ್ತಮನಾ ಭವನ್ತಿ.

೯೭. ಯತೋ ಚ ಖೋ ಪಣ್ಡಿತೋ ಆಪದಾಸು, ನ ವೇಧತೀ ಅತ್ಥವಿನಿಚ್ಛಯಞ್ಞೂ;

ಪಚ್ಚತ್ಥಿಕಾಸ್ಸ [ಪಚ್ಚತ್ಥಿಕಾ ತೇ (ಕ.)] ದುಖಿತಾ ಭವನ್ತಿ, ದಿಸ್ವಾ ಮುಖಂ ಅವಿಕಾರಂ ಪುರಾಣಂ.

೯೮. ಜಪ್ಪೇನ ಮನ್ತೇನ ಸುಭಾಸಿತೇನ, ಅನುಪ್ಪದಾನೇನ ಪವೇಣಿಯಾ ವಾ;

ಯಥಾ ಯಥಾ ಯತ್ಥ ಲಭೇಥ ಅತ್ಥಂ, ತಥಾ ತಥಾ ತತ್ಥ ಪರಕ್ಕಮೇಯ್ಯ.

೯೯. ಯತೋ ಚ ಜಾನೇಯ್ಯ ಅಲಬ್ಭನೇಯ್ಯೋ, ಮಯಾ ವ [ಮಯಾ ವಾ (ಸ್ಯಾ. ಕ.)] ಅಞ್ಞೇನ ವಾ ಏಸ ಅತ್ಥೋ;

ಅಸೋಚಮಾನೋ ಅಧಿವಾಸಯೇಯ್ಯ, ಕಮ್ಮಂ ದಳ್ಹಂ ಕಿನ್ತಿ ಕರೋಮಿ ದಾನೀತಿ.

ತಚಸಾರಜಾತಕಂ ಅಟ್ಠಮಂ.

೩೬೯. ಮಿತ್ತವಿನ್ದಕಜಾತಕಂ (೫-೨-೯)

೧೦೦. ಕ್ಯಾಹಂ ದೇವಾನಮಕರಂ, ಕಿಂ ಪಾಪಂ ಪಕತಂ ಮಯಾ;

ಯಂ ಮೇ ಸಿರಸ್ಮಿಂ ಓಹಚ್ಚ [ಉಹಚ್ಚ (ಕ.), ಉಹಚ್ಚ (ಪೀ.)], ಚಕ್ಕಂ ಭಮತಿ ಮತ್ಥಕೇ.

೧೦೧. ಅತಿಕ್ಕಮ್ಮ ರಮಣಕಂ, ಸದಾಮತ್ತಞ್ಚ ದೂಭಕಂ;

ಬ್ರಹ್ಮತ್ತರಞ್ಚ ಪಾಸಾದಂ, ಕೇನತ್ಥೇನ ಇಧಾಗತೋ.

೧೦೨. ಇತೋ ಬಹುತರಾ ಭೋಗಾ, ಅತ್ರ ಮಞ್ಞೇ ಭವಿಸ್ಸರೇ;

ಇತಿ ಏತಾಯ ಸಞ್ಞಾಯ, ಪಸ್ಸ ಮಂ ಬ್ಯಸನಂ ಗತಂ.

೧೦೩. ಚತುಬ್ಭಿ ಅಟ್ಠಜ್ಝಗಮಾ, ಅಟ್ಠಾಹಿಪಿ ಚ [ಅಟ್ಠಾಹಿ ಚಾಪಿ (ಸೀ. ಸ್ಯಾ.), ಅಟ್ಠಾಭಿ ಚಾಪಿ (ಕ.)] ಸೋಳಸ;

ಸೋಳಸಾಹಿ ಚ ಬಾತ್ತಿಂಸ, ಅತ್ರಿಚ್ಛಂ ಚಕ್ಕಮಾಸದೋ;

ಇಚ್ಛಾಹತಸ್ಸ ಪೋಸಸ್ಸ, ಚಕ್ಕಂ ಭಮತಿ ಮತ್ಥಕೇ.

೧೦೪. ಉಪರಿವಿಸಾಲಾ ದುಪ್ಪೂರಾ, ಇಚ್ಛಾ ವಿಸಟಗಾಮಿನೀ [ಉಪರಿ ವಿಸಾಲಂ ದುಪ್ಪೂರಂ, ಇಚ್ಛಾವಿಸದಗಾಮಿನೀ (ಸೀ.)];

ಯೇ ಚ ತಂ ಅನುಗಿಜ್ಝನ್ತಿ, ತೇ ಹೋನ್ತಿ ಚಕ್ಕಧಾರಿನೋತಿ.

ಮಿತ್ತವಿನ್ದಕಜಾತಕಂ ನವಮಂ.

೩೭೦. ಪಲಾಸಜಾತಕಂ (೫-೨-೧೦)

೧೦೫. ಹಂಸೋ ಪಲಾಸಮವಚ, ನಿಗ್ರೋಧೋ ಸಮ್ಮ ಜಾಯತಿ;

ಅಙ್ಕಸ್ಮಿಂ [ಅಙ್ಗಸ್ಮಿಂ (ಕ.)] ತೇ ನಿಸಿನ್ನೋವ, ಸೋ ತೇ ಮಮ್ಮಾನಿ ಛೇಚ್ಛತಿ [ಛಿಜ್ಜತಿ (ಕ.)].

೧೦೬. ವಡ್ಢತಾಮೇವ [ವದ್ಧಿತಮೇವ (ಕ.)] ನಿಗ್ರೋಧೋ, ಪತಿಟ್ಠಸ್ಸ ಭವಾಮಹಂ;

ಯಥಾ ಪಿತಾ ಚ ಮಾತಾ ಚ [ಪಿತಾ ವಾ ಮಾತಾ ವಾ (ಪೀ.), ಮಾತಾ ವಾ ಪಿತಾ ವಾ (ಕ.)], ಏವಂ ಮೇ ಸೋ ಭವಿಸ್ಸತಿ.

೧೦೭. ಯಂ ತ್ವಂ ಅಙ್ಕಸ್ಮಿಂ ವಡ್ಢೇಸಿ, ಖೀರರುಕ್ಖಂ ಭಯಾನಕಂ;

ಆಮನ್ತ ಖೋ ತಂ ಗಚ್ಛಾಮ, ವುಡ್ಢಿ ಮಸ್ಸ ನ ರುಚ್ಚತಿ.

೧೦೮. ಇದಾನಿ ಖೋ ಮಂ ಭಾಯೇತಿ, ಮಹಾನೇರುನಿದಸ್ಸನಂ;

ಹಂಸಸ್ಸ ಅನಭಿಞ್ಞಾಯ, ಮಹಾ ಮೇ ಭಯಮಾಗತಂ.

೧೦೯. ನ ತಸ್ಸ ವುಡ್ಢಿ ಕುಸಲಪ್ಪಸತ್ಥಾ, ಯೋ ವಡ್ಢಮಾನೋ ಘಸತೇ ಪತಿಟ್ಠಂ;

ತಸ್ಸೂಪರೋಧಂ ಪರಿಸಙ್ಕಮಾನೋ, ಪತಾರಯೀ ಮೂಲವಧಾಯ ಧೀರೋತಿ.

ಪಲಾಸಜಾತಕಂ ದಸಮಂ.

ವಣ್ಣಾರೋಹವಗ್ಗೋ ದುತಿಯೋ [ಇಮಸ್ಸುದ್ದಾನಂ ತತಿಯವಗ್ಗಪರಿಯೋಸಾನೇ ಭವಿಸ್ಸತಿ].