೩೬೭. ಸಾಳಿಯಜಾತಕಂ (೫-೨-೭)

೯೦. ಯ್ವಾಯಂ ಸಾಳಿಯ [ಸಾಲಿಯ (ಸೀ. ಸ್ಯಾ. ಪೀ.), ಸಾಳಿಕ (?)] ಛಾಪೋತಿ, ಕಣ್ಹಸಪ್ಪಂ ಅಗಾಹಯಿ;

ತೇನ ಸಪ್ಪೇನಯಂ ದಟ್ಠೋ, ಹತೋ ಪಾಪಾನುಸಾಸಕೋ.

೯೧. ಅಹನ್ತಾರ [ಅಹನನ್ತ (ಪೀ.), ಅಹರನ್ತ (?)] ಮಹನ್ತಾರಂ, ಯೋ ನರೋ ಹನ್ತುಮಿಚ್ಛತಿ;

ಏವಂ ಸೋ ನಿಹತೋ ಸೇತಿ, ಯಥಾಯಂ ಪುರಿಸೋ ಹತೋ.

೯೨. ಅಹನ್ತಾರ [ಅಹನನ್ತ (ಸೀ. ಸ್ಯಾ. ಪೀ.), ಅಹರನ್ತ (?)] ಮಘಾತೇನ್ತಂ, ಯೋ ನರೋ ಹನ್ತುಮಿಚ್ಛತಿ;

ಏವಂ ಸೋ ನಿಹತೋ ಸೇತಿ, ಯಥಾಯಂ ಪುರಿಸೋ ಹತೋ.

೯೩. ಯಥಾ ಪಂಸುಮುಟ್ಠಿಂ ಪುರಿಸೋ, ಪಟಿವಾತಂ ಪಟಿಕ್ಖಿಪೇ;

ತಮೇವ ಸೋ ರಜೋ ಹನ್ತಿ, ತಥಾಯಂ ಪುರಿಸೋ ಹತೋ.

೯೪. ಯೋ ಅಪ್ಪದುಟ್ಠಸ್ಸ ನರಸ್ಸ ದುಸ್ಸತಿ, ಸುದ್ಧಸ್ಸ ಪೋಸಸ್ಸ ಅನಙ್ಗಣಸ್ಸ;

ತಮೇವ ಬಾಲಂ ಪಚ್ಚೇತಿ ಪಾಪಂ, ಸುಖುಮೋ ರಜೋ ಪಟಿವಾತಂವ ಖಿತ್ತೋತಿ.

ಸಾಳಿಯಜಾತಕಂ ಸತ್ತಮಂ.