೩೬೮. ತಚಸಾರಜಾತಕಂ (೫-೨-೮)

೯೫. ಅಮಿತ್ತಹತ್ಥತ್ಥಗತಾ [ಹತ್ಥತ್ತಗತಾ (ಕತ್ಥಚಿ, ಸೀ. ನಿಯ್ಯ)], ತಚಸಾರಸಮಪ್ಪಿತಾ;

ಪಸನ್ನಮುಖವಣ್ಣಾತ್ಥ, ಕಸ್ಮಾ ತುಮ್ಹೇ ನ ಸೋಚಥ.

೯೬. ನ ಸೋಚನಾಯ ಪರಿದೇವನಾಯ, ಅತ್ಥೋವ ಲಬ್ಭೋ [ಅತ್ಥೋ ಚ ಲಬ್ಭಾ (ಸೀ. ಸ್ಯಾ.), ಅತ್ಥೋಧ ಲಬ್ಭಾ (ಅ. ನಿ. ೫.೪೮)] ಅಪಿ ಅಪ್ಪಕೋಪಿ;

ಸೋಚನ್ತಮೇನಂ ದುಖಿತಂ ವಿದಿತ್ವಾ, ಪಚ್ಚತ್ಥಿಕಾ ಅತ್ತಮನಾ ಭವನ್ತಿ.

೯೭. ಯತೋ ಚ ಖೋ ಪಣ್ಡಿತೋ ಆಪದಾಸು, ನ ವೇಧತೀ ಅತ್ಥವಿನಿಚ್ಛಯಞ್ಞೂ;

ಪಚ್ಚತ್ಥಿಕಾಸ್ಸ [ಪಚ್ಚತ್ಥಿಕಾ ತೇ (ಕ.)] ದುಖಿತಾ ಭವನ್ತಿ, ದಿಸ್ವಾ ಮುಖಂ ಅವಿಕಾರಂ ಪುರಾಣಂ.

೯೮. ಜಪ್ಪೇನ ಮನ್ತೇನ ಸುಭಾಸಿತೇನ, ಅನುಪ್ಪದಾನೇನ ಪವೇಣಿಯಾ ವಾ;

ಯಥಾ ಯಥಾ ಯತ್ಥ ಲಭೇಥ ಅತ್ಥಂ, ತಥಾ ತಥಾ ತತ್ಥ ಪರಕ್ಕಮೇಯ್ಯ.

೯೯. ಯತೋ ಚ ಜಾನೇಯ್ಯ ಅಲಬ್ಭನೇಯ್ಯೋ, ಮಯಾ ವ [ಮಯಾ ವಾ (ಸ್ಯಾ. ಕ.)] ಅಞ್ಞೇನ ವಾ ಏಸ ಅತ್ಥೋ;

ಅಸೋಚಮಾನೋ ಅಧಿವಾಸಯೇಯ್ಯ, ಕಮ್ಮಂ ದಳ್ಹಂ ಕಿನ್ತಿ ಕರೋಮಿ ದಾನೀತಿ.

ತಚಸಾರಜಾತಕಂ ಅಟ್ಠಮಂ.