೩೨೦. ಸುಚ್ಚಜಜಾತಕಂ (೪-೨-೧೦)

೭೭. ಸುಚ್ಚಜಂ ವತ ನಚ್ಚಜಿ, ವಾಚಾಯ ಅದದಂ ಗಿರಿಂ;

ಕಿಂ ಹಿತಸ್ಸ ಚಜನ್ತಸ್ಸ, ವಾಚಾಯ ಅದದ ಪಬ್ಬತಂ.

೭೮. ಯಞ್ಹಿ ಕಯಿರಾ ತಞ್ಹಿ ವದೇ, ಯಂ ನ ಕಯಿರಾ ನ ತಂ ವದೇ;

ಅಕರೋನ್ತಂ ಭಾಸಮಾನಂ, ಪರಿಜಾನನ್ತಿ ಪಣ್ಡಿತಾ.

೭೯. ರಾಜಪುತ್ತ ನಮೋ ತ್ಯತ್ಥು, ಸಚ್ಚೇ ಧಮ್ಮೇ ಠಿತೋ ಚಸಿ;

ಯಸ್ಸ ತೇ ಬ್ಯಸನಂ ಪತ್ತೋ, ಸಚ್ಚಸ್ಮಿಂ ರಮತೇ ಮನೋ.

೮೦. ಯಾ ದಲಿದ್ದೀ ದಲಿದ್ದಸ್ಸ, ಅಡ್ಢಾ ಅಡ್ಢಸ್ಸ ಕಿತ್ತಿಮ [ಕಿತ್ತಿಮಾ (ಸೀ. ಸ್ಯಾ. ಪೀ.)];

ಸಾ ಹಿಸ್ಸ ಪರಮಾ ಭರಿಯಾ, ಸಹಿರಞ್ಞಸ್ಸ ಇತ್ಥಿಯೋತಿ.

ಸುಚ್ಚಜಜಾತಕಂ ದಸಮಂ.

ಪುಚಿಮನ್ದವಗ್ಗೋ ದುತಿಯೋ.

ತಸ್ಸುದ್ದಾನಂ –

ಅಥ ಚೋರ ಸಕಸ್ಸಪ ಖನ್ತೀವರೋ, ದುಜ್ಜೀವಿತತಾ ಚ ವರಾ ಫರುಸಾ;

ಅಥ ಸಸ ಮತಞ್ಚ ವಸನ್ತ ಸುಖಂ, ಸುಚ್ಚಜಂವತನಚ್ಚಜಿನಾ ಚ ದಸಾತಿ.