೩. ಕುಟಿದೂಸಕವಗ್ಗೋ

೩೨೧. ಕುಟಿದೂಸಕಜಾತಕಂ (೪-೩-೧)

೮೧. ಮನುಸ್ಸಸ್ಸೇವ ತೇ ಸೀಸಂ, ಹತ್ಥಪಾದಾ ಚ ವಾನರ;

ಅಥ ಕೇನ ನು ವಣ್ಣೇನ, ಅಗಾರಂ ತೇ ನ ವಿಜ್ಜತಿ.

೮೨. ಮನುಸ್ಸಸ್ಸೇವ ಮೇ ಸೀಸಂ, ಹತ್ಥಪಾದಾ ಚ ಸಿಙ್ಗಿಲ [ಸಿಙ್ಗಾಲ (ಕ.), ಪಿಙ್ಗಲ (ಟೀಕಾ)];

ಯಾಹು ಸೇಟ್ಠಾ ಮನುಸ್ಸೇಸು, ಸಾ ಮೇ ಪಞ್ಞಾ ನ ವಿಜ್ಜತಿ.

೮೩. ಅನವಟ್ಠಿತಚಿತ್ತಸ್ಸ, ಲಹುಚಿತ್ತಸ್ಸ ದುಬ್ಭಿನೋ [ದೂಭಿನೋ (ಪೀ.)];

ನಿಚ್ಚಂ ಅದ್ಧುವಸೀಲಸ್ಸ, ಸುಖಭಾವೋ [ಸುಚಿಭಾವೋ (ಸೀ.), ಸುಖಭಾಗೋ (?)] ನ ವಿಜ್ಜತಿ.

೮೪. ಸೋ ಕರಸ್ಸು ಆನುಭಾವಂ, ವೀತಿವತ್ತಸ್ಸು ಸೀಲಿಯಂ;

ಸೀತವಾತಪರಿತ್ತಾಣಂ, ಕರಸ್ಸು ಕುಟವಂ [ಕುಟಿಕಂ (ಸೀ. ಸ್ಯಾ.)] ಕಪೀತಿ.

ಕುಟಿದೂಸಕ [ಸಿಙ್ಗಾಲಸಕುಣ (ಕ.)] ಜಾತಕಂ ಪಠಮಂ.

೩೨೨. ದುದ್ದುಭಜಾತಕಂ (೪-೩-೨)

೮೫. ದುದ್ದುಭಾಯತಿ [ದದ್ದಭಾಯತಿ (ಸೀ. ಪೀ.)] ಭದ್ದನ್ತೇ, ಯಸ್ಮಿಂ ದೇಸೇ ವಸಾಮಹಂ;

ಅಹಮ್ಪೇತಂ ನ ಜಾನಾಮಿ, ಕಿಮೇತಂ ದುದ್ದುಭಾಯತಿ.

೮೬. ಬೇಲುವಂ ಪತಿತಂ ಸುತ್ವಾ, ದುದ್ದುಭನ್ತಿ [ದದ್ದಭನ್ತಿ (ಸೀ.)] ಸಸೋ ಜವಿ;

ಸಸಸ್ಸ ವಚನಂ ಸುತ್ವಾ, ಸನ್ತತ್ತಾ ಮಿಗವಾಹಿನೀ.

೮೭. ಅಪ್ಪತ್ವಾ ಪದವಿಞ್ಞಾಣಂ, ಪರಘೋಸಾನುಸಾರಿನೋ;

ಪನಾದಪರಮಾ ಬಾಲಾ, ತೇ ಹೋನ್ತಿ ಪರಪತ್ತಿಯಾ.

೮೮. ಯೇ ಚ ಸೀಲೇನ ಸಮ್ಪನ್ನಾ, ಪಞ್ಞಾಯೂಪಸಮೇ ರತಾ;

ಆರಕಾ ವಿರತಾ ಧೀರಾ, ನ ಹೋನ್ತಿ ಪರಪತ್ತಿಯಾತಿ.

ದುದ್ದುಭಜಾತಕಂ [ದದ್ದಭಜಾತಕಂ (ಸೀ. ಪೀ.)] ದುತಿಯಂ.

೩೨೩. ಬ್ರಹ್ಮದತ್ತಜಾತಕಂ (೪-೩-೩)

೮೯. ದ್ವಯಂ ಯಾಚನಕೋ ರಾಜ, ಬ್ರಹ್ಮದತ್ತ ನಿಗಚ್ಛತಿ;

ಅಲಾಭಂ ಧನಲಾಭಂ ವಾ, ಏವಂ ಧಮ್ಮಾ ಹಿ ಯಾಚನಾ.

೯೦. ಯಾಚನಂ ರೋದನಂ ಆಹು, ಪಞ್ಚಾಲಾನಂ ರಥೇಸಭ;

ಯೋ ಯಾಚನಂ ಪಚ್ಚಕ್ಖಾತಿ, ತಮಾಹು ಪಟಿರೋದನಂ.

೯೧. ಮಾ ಮದ್ದಸಂಸು ರೋದನ್ತಂ, ಪಞ್ಚಾಲಾ ಸುಸಮಾಗತಾ;

ತುವಂ ವಾ ಪಟಿರೋದನ್ತಂ, ತಸ್ಮಾ ಇಚ್ಛಾಮಹಂ ರಹೋ.

೯೨. ದದಾಮಿ ತೇ ಬ್ರಾಹ್ಮಣ ರೋಹಿಣೀನಂ, ಗವಂ ಸಹಸ್ಸಂ ಸಹ ಪುಙ್ಗವೇನ;

ಅರಿಯೋ ಹಿ ಅರಿಯಸ್ಸ ಕಥಂ ನ ದಜ್ಜಾ [ದಜ್ಜೇ (ಸೀ.), ದಜ್ಜಂ (?)], ಸುತ್ವಾನ ಗಾಥಾ ತವ ಧಮ್ಮಯುತ್ತಾತಿ.

ಬ್ರಹ್ಮದತ್ತಜಾತಕಂ ತತಿಯಂ.

೩೨೪. ಚಮ್ಮಸಾಟಕಜಾತಕಂ (೪-೩-೪)

೯೩. ಕಲ್ಯಾಣರೂಪೋ ವತಯಂ ಚತುಪ್ಪದೋ, ಸುಭದ್ದಕೋ ಚೇವ ಸುಪೇಸಲೋ ಚ;

ಯೋ ಬ್ರಾಹ್ಮಣಂ ಜಾತಿಮನ್ತೂಪಪನ್ನಂ, ಅಪಚಾಯತಿ ಮೇಣ್ಡವರೋ ಯಸಸ್ಸೀ.

೯೪. ಮಾ ಬ್ರಾಹ್ಮಣ ಇತ್ತರದಸ್ಸನೇನ, ವಿಸ್ಸಾಸಮಾಪಜ್ಜಿ ಚತುಪ್ಪದಸ್ಸ;

ದಳ್ಹಪ್ಪಹಾರಂ ಅಭಿಕಙ್ಖಮಾನೋ [ಅಭಿಕತ್ತುಕಾಮೋ (ಸ್ಯಾ.)], ಅವಸಕ್ಕತೀ ದಸ್ಸತಿ ಸುಪ್ಪಹಾರಂ.

೯೫. ಊರುಟ್ಠಿ [ಊರಟ್ಠಿ (ಸೀ.)] ಭಗ್ಗಂ ಪವಟ್ಟಿತೋ [ಪತಿತೋ (ಸೀ. ಸ್ಯಾ.)] ಖಾರಿಭಾರೋ, ಸಬ್ಬಞ್ಚ ಭಣ್ಡಂ ಬ್ರಾಹ್ಮಣಸ್ಸ [ಬ್ರಾಹ್ಮಣಸ್ಸೀಧ (ಕ. ಸೀ. ಪೀ.), ಬ್ರಾಹ್ಮಣಸ್ಸೇವ (ಕ. ಸೀ. ಸ್ಯಾ. ಕ.)] ಭಿನ್ನಂ;

ಉಭೋಪಿ ಬಾಹಾ ಪಗ್ಗಯ್ಹ [ಪಗ್ಗಯ್ಯೇವ (ಸ್ಯಾ.), ಪಗ್ಗಹೀಯ (?)] ಕನ್ದತಿ [ಬಾಹಾ ಪಗ್ಗಯ್ಯ ಕನ್ದತಿ (ಪೀ. ಕ.)], ಅಭಿಧಾವಥ ಹಞ್ಞತೇ ಬ್ರಹ್ಮಚಾರೀ.

೯೬. ಏವಂ ಸೋ ನಿಹತೋ ಸೇತಿ, ಯೋ ಅಪೂಜಂ ಪಸಂಸತಿ [ನಮಸ್ಸತಿ (ಪೀ.)];

ಯಥಾಹಮಜ್ಜ ಪಹತೋ, ಹತೋ ಮೇಣ್ಡೇನ ದುಮ್ಮತೀತಿ.

ಚಮ್ಮಸಾಟಕಜಾತಕಂ ಚತುತ್ಥಂ.

೩೨೫. ಗೋಧರಾಜಜಾತಕಂ (೪-೩-೫)

೯೭. ಸಮಣಂ ತಂ ಮಞ್ಞಮಾನೋ, ಉಪಗಚ್ಛಿಮಸಞ್ಞತಂ;

ಸೋ ಮಂ ದಣ್ಡೇನ ಪಾಹಾಸಿ, ಯಥಾ ಅಸ್ಸಮಣೋ ತಥಾ.

೯೮. ಕಿಂ ತೇ ಜಟಾಹಿ ದುಮ್ಮೇಧ, ಕಿಂ ತೇ ಅಜಿನಸಾಟಿಯಾ;

ಅಬ್ಭನ್ತರಂ ತೇ ಗಹನಂ, ಬಾಹಿರಂ ಪರಿಮಜ್ಜಸಿ.

೯೯. ಏಹಿ ಗೋಧ ನಿವತ್ತಸ್ಸು, ಭುಞ್ಜ ಸಾಲೀನಮೋದನಂ;

ತೇಲಂ ಲೋಣಞ್ಚ ಮೇ ಅತ್ಥಿ, ಪಹೂತಂ ಮಯ್ಹ ಪಿಪ್ಫಲಿ.

೧೦೦. ಏಸ ಭಿಯ್ಯೋ ಪವೇಕ್ಖಾಮಿ, ವಮ್ಮಿಕಂ ಸತಪೋರಿಸಂ;

ತೇಲಂ ಲೋಣಞ್ಚ ಕಿತ್ತೇಸಿ [ಕಿನ್ತೇಸಿ (ಸ್ಯಾ. ಪೀ.)], ಅಹಿತಂ ಮಯ್ಹ ಪಿಪ್ಫಲೀತಿ.

ಗೋಧರಾಜಜಾತಕಂ ಪಞ್ಚಮಂ.

೩೨೬. ಕಕ್ಕಾರುಜಾತಕಂ (೪-೩-೬)

೧೦೧. ಕಾಯೇನ ಯೋ ನಾವಹರೇ, ವಾಚಾಯ ನ ಮುಸಾ ಭಣೇ;

ಯಸೋ ಲದ್ಧಾ ನ ಮಜ್ಜೇಯ್ಯ, ಸ ವೇ ಕಕ್ಕಾರುಮರಹತಿ.

೧೦೨. ಧಮ್ಮೇನ ವಿತ್ತಮೇಸೇಯ್ಯ, ನ ನಿಕತ್ಯಾ ಧನಂ ಹರೇ;

ಭೋಗೇ ಲದ್ಧಾ ನ ಮಜ್ಜೇಯ್ಯ, ಸ ವೇ ಕಕ್ಕಾರುಮರಹತಿ.

೧೦೩. ಯಸ್ಸ ಚಿತ್ತಂ ಅಹಾಲಿದ್ದಂ, ಸದ್ಧಾ ಚ ಅವಿರಾಗಿನೀ;

ಏಕೋ ಸಾದುಂ ನ ಭುಞ್ಜೇಯ್ಯ, ಸ ವೇ ಕಕ್ಕಾರುಮರಹತಿ.

೧೦೪. ಸಮ್ಮುಖಾ ವಾ ತಿರೋಕ್ಖಾ ವಾ [ಪರೋಕ್ಖಾ ವಾ (ಪೀ.), ಪರಮ್ಮುಖಾ (ಕ.)], ಯೋ ಸನ್ತೇ ನ ಪರಿಭಾಸತಿ;

ಯಥಾವಾದೀ ತಥಾಕಾರೀ, ಸ ವೇ ಕಕ್ಕಾರುಮರಹತೀತಿ.

ಕಕ್ಕಾರುಜಾತಕಂ ಛಟ್ಠಂ.

೩೨೭. ಕಾಕವತೀಜಾತಕಂ (೪-೩-೭)

೧೦೫. ವಾತಿ ಚಾಯಂ [ವಾಯಂ (ಕ.)] ತತೋ ಗನ್ಧೋ, ಯತ್ಥ ಮೇ ವಸತೀ ಪಿಯಾ;

ದೂರೇ ಇತೋ ಹಿ ಕಾಕವತೀ [ಕಾಕಾತೀ (ಸೀ.), ಕಾಕಾತಿ (ಸ್ಯಾ. ಪೀ.)], ಯತ್ಥ ಮೇ ನಿರತೋ ಮನೋ.

೧೦೬. ಕಥಂ ಸಮುದ್ದಮತರೀ, ಕಥಂ ಅತರಿ ಕೇಪುಕಂ [ಕೇಬುಕಂ (ಸೀ. ಪೀ.)];

ಕಥಂ ಸತ್ತ ಸಮುದ್ದಾನಿ, ಕಥಂ ಸಿಮ್ಬಲಿಮಾರುಹಿ.

೧೦೭. ತಯಾ ಸಮುದ್ದಮತರಿಂ, ತಯಾ ಅತರಿ ಕೇಪುಕಂ [ಕೇಬುಕಂ (ಸೀ. ಪೀ.)];

ತಯಾ ಸತ್ತ ಸಮುದ್ದಾನಿ, ತಯಾ ಸಿಮ್ಬಲಿಮಾರುಹಿಂ.

೧೦೮. ಧಿರತ್ಥುಮಂ ಮಹಾಕಾಯಂ, ಧಿರತ್ಥುಮಂ ಅಚೇತನಂ;

ಯತ್ಥ ಜಾಯಾಯಹಂ ಜಾರಂ, ಆವಹಾಮಿ ವಹಾಮಿ ಚಾತಿ.

ಕಾಕವತೀಜಾತಕಂ ಸತ್ತಮಂ.

೩೨೮. ಅನನುಸೋಚಿಯಜಾತಕಂ (೪-೩-೮)

೧೦೯. ಬಹೂನಂ ವಿಜ್ಜತೀ ಭೋತೀ, ತೇಹಿ ಮೇ ಕಿಂ ಭವಿಸ್ಸತಿ;

ತಸ್ಮಾ ಏತಂ ನ ಸೋಚಾಮಿ, ಪಿಯಂ ಸಮ್ಮಿಲ್ಲಹಾಸಿನಿಂ.

೧೧೦. ತಂ ತಂ ಚೇ ಅನುಸೋಚೇಯ್ಯ, ಯಂ ಯಂ ತಸ್ಸ ನ ವಿಜ್ಜತಿ;

ಅತ್ತಾನಮನುಸೋಚೇಯ್ಯ, ಸದಾ ಮಚ್ಚುವಸಂ ಪತಂ.

೧೧೧. ನ ಹೇವ ಠಿತಂ ನಾಸೀನಂ, ನ ಸಯಾನಂ ನ ಪದ್ಧಗುಂ [ಪತ್ಥಗುಂ (ಸ್ಯಾ.)];

ಯಾವ ಬ್ಯಾತಿ ನಿಮಿಸತಿ, ತತ್ರಾಪಿ ರಸತೀ [ಸರತೀ (ಸೀ. ಸ್ಯಾ. ಪೀ.)] ವಯೋ.

೧೧೨. ತತ್ಥತ್ತನಿ ವತಪ್ಪದ್ಧೇ [ವತ ಪನ್ಥೇ (ಸ್ಯಾ.), ವತ ಬನ್ಧೇ (ಕ.) ವತ + ಪ-ಅದ್ಧೇ = ವತಪ್ಪದ್ಧೇ], ವಿನಾಭಾವೇ ಅಸಂಸಯೇ;

ಭೂತಂ ಸೇಸಂ ದಯಿತಬ್ಬಂ, ವೀತಂ ಅನನುಸೋಚಿಯನ್ತಿ [ಚವಿತಂ ನಾನುಸೋಚಿಯನ್ತಿ (ಸ್ಯಾ.), ಮತನ್ತಂ ನಾನುಸೋಚಿಯಂ (ಕ.)].

ಅನನುಸೋಚಿಯಜಾತಕಂ ಅಟ್ಠಮಂ.

೩೨೯. ಕಾಳಬಾಹುಜಾತಕಂ (೪-೩-೯)

೧೧೩. ಯಂ ಅನ್ನಪಾನಸ್ಸ ಪುರೇ ಲಭಾಮ, ತಂ ದಾನಿ ಸಾಖಮಿಗಮೇವ ಗಚ್ಛತಿ;

ಗಚ್ಛಾಮ ದಾನಿ ವನಮೇವ ರಾಧ, ಅಸಕ್ಕತಾ ಚಸ್ಮ ಧನಞ್ಜಯಾಯ [ಧನಞ್ಚಯಾಯ (ಕ.)].

೧೧೪. ಲಾಭೋ ಅಲಾಭೋ ಯಸೋ ಅಯಸೋ ಚ, ನಿನ್ದಾ ಪಸಂಸಾ ಚ ಸುಖಞ್ಚ ದುಕ್ಖಂ;

ಏತೇ ಅನಿಚ್ಚಾ ಮನುಜೇಸು ಧಮ್ಮಾ, ಮಾ ಸೋಚಿ ಕಿಂ ಸೋಚಸಿ ಪೋಟ್ಠಪಾದ.

೧೧೫. ಅದ್ಧಾ ತುವಂ ಪಣ್ಡಿತಕೋಸಿ ರಾಧ, ಜಾನಾಸಿ ಅತ್ಥಾನಿ ಅನಾಗತಾನಿ;

ಕಥಂ ನು ಸಾಖಾಮಿಗಂ ದಕ್ಖಿಸಾಮ [ದಕ್ಖಿಯಾಮ (ಕ.), ದಕ್ಖಾಮ (ಸ್ಯಾ.)], ನಿದ್ಧಾವಿತಂ [ನಿದ್ಧಾಪಿತಂ (ಸೀ. ಸ್ಯಾ.), ನಿಬ್ಬಾಪಿತಂ (ಪೀ.), ನಿಚ್ಛದಂ (ಕ.)] ರಾಜಕುಲತೋವ ಜಮ್ಮಂ.

೧೧೬. ಚಾಲೇತಿ ಕಣ್ಣಂ ಭಕುಟಿಂ ಕರೋತಿ, ಮುಹುಂ ಮುಹುಂ ಭಾಯಯತೇ [ಭಾಯತೇ (ಸ್ಯಾ.), ಭಾಯಾಪತೇ (ಕ.)] ಕುಮಾರೇ;

ಸಯಮೇವ ತಂ ಕಾಹತಿ ಕಾಳಬಾಹು, ಯೇನಾರಕಾ ಠಸ್ಸತಿ ಅನ್ನಪಾನಾತಿ.

ಕಾಳಬಾಹುಜಾತಕಂ ನವಮಂ.

೩೩೦. ಸೀಲವೀಮಂಸಜಾತಕಂ (೪-೩-೧೦)

೧೧೭. ಸೀಲಂ ಕಿರೇವ ಕಲ್ಯಾಣಂ, ಸೀಲಂ ಲೋಕೇ ಅನುತ್ತರಂ;

ಪಸ್ಸ ಘೋರವಿಸೋ ನಾಗೋ, ಸೀಲವಾತಿ ನ ಹಞ್ಞತಿ.

೧೧೮. ಯಾವದೇವಸ್ಸಹೂ ಕಿಞ್ಚಿ, ತಾವದೇವ ಅಖಾದಿಸುಂ;

ಸಙ್ಗಮ್ಮ ಕುಲಲಾ ಲೋಕೇ, ನ ಹಿಂಸನ್ತಿ ಅಕಿಞ್ಚನಂ.

೧೧೯. ಸುಖಂ ನಿರಾಸಾ ಸುಪತಿ, ಆಸಾ ಫಲವತೀ ಸುಖಾ;

ಆಸಂ ನಿರಾಸಂ ಕತ್ವಾನ, ಸುಖಂ ಸುಪತಿ ಪಿಙ್ಗಲಾ.

೧೨೦. ನ ಸಮಾಧಿಪರೋ ಅತ್ಥಿ, ಅಸ್ಮಿಂ ಲೋಕೇ ಪರಮ್ಹಿ ಚ;

ನ ಪರಂ ನಾಪಿ ಅತ್ತಾನಂ, ವಿಹಿಂಸತಿ ಸಮಾಹಿತೋತಿ.

ಸೀಲವೀಮಂಸಜಾತಕಂ ದಸಮಂ.

ಕುಟಿದೂಸಕವಗ್ಗೋ ತತಿಯೋ.

ತಸ್ಸುದ್ದಾನಂ –

ಸಮನುಸ್ಸ -ಸದುದ್ದುಭ-ಯಾಚನಕೋ, ಅಥ ಮೇಣ್ಡವರುತ್ತಮ-ಗೋಧವರೋ;

ಅಥ ಕಾಯಸಕೇಪುಕ ಭೋತೀವರೋ, ಅಥ ರಾಧಸುಸೀಲವರೇನ ದಸಾತಿ.