೪. ಚತುಕ್ಕನಿಪಾತೋ

೧. ಕಾಲಿಙ್ಗವಗ್ಗೋ

೩೦೧. ಚೂಳಕಾಲಿಙ್ಗಜಾತಕಂ (೪-೧-೧)

೧. ವಿವರಥಿಮಾಸಂ [ವಿವರಥ ಇಮಾಸಂ (ಸೀ. ಸ್ಯಾ. ಪೀ.)] ದ್ವಾರಂ, ನಗರಂ ಪವಿಸನ್ತು [ಪವಿಸಿತುಂ ಮಯಾ; (ಕ.)] ಅರುಣರಾಜಸ್ಸ;

ಸೀಹೇನ ಸುಸಿಟ್ಠೇನ, ಸುರಕ್ಖಿತಂ [ಸುಸತ್ಥೇನ, ಸುರಕ್ಖಿತಂ (ಸೀ. ಪೀ.), ಸುಸಿಟ್ಠೇನ (ಕ.)] ನನ್ದಿಸೇನೇನ.

೨. ಜಯೋ ಕಲಿಙ್ಗಾನಮಸಯ್ಹಸಾಹಿನಂ, ಪರಾಜಯೋ ಅನಯೋ [ಅಜಯೋ (ಸ್ಯಾ.), ಅನ್ವಿತೋ (ಕ.)] ಅಸ್ಸಕಾನಂ;

ಇಚ್ಚೇವ ತೇ ಭಾಸಿತಂ ಬ್ರಹ್ಮಚಾರಿ, ನ ಉಜ್ಜುಭೂತಾ ವಿತಥಂ ಭಣನ್ತಿ.

೩. ದೇವಾ ಮುಸಾವಾದಮುಪಾತಿವತ್ತಾ, ಸಚ್ಚಂ ಧನಂ ಪರಮಂ ತೇಸು [ತಥಂ ಪೇಮಕರಂ ನು (ಕ.), ತಥಂ ಪರಮಂ ಕರಂ ನು (ಸ್ಯಾ.)] ಸಕ್ಕ;

ತಂ ತೇ ಮುಸಾ ಭಾಸಿತಂ ದೇವರಾಜ, ಕಿಂ ವಾ ಪಟಿಚ್ಚ ಮಘವಾ ಮಹಿನ್ದ.

೪. ನನು ತೇ ಸುತಂ ಬ್ರಾಹ್ಮಣ ಭಞ್ಞಮಾನೇ, ದೇವಾ ನ ಇಸ್ಸನ್ತಿ ಪುರಿಸಪರಕ್ಕಮಸ್ಸ;

ದಮೋ ಸಮಾಧಿ ಮನಸೋ ಅಭೇಜ್ಜೋ [ಅದೇಜ್ಜೋ (ಸೀ. ಪೀ.), ಅಭಿಜ್ಜೋ (ಕ.)], ಅಬ್ಯಗ್ಗತಾ ನಿಕ್ಕಮನಞ್ಚ [ನಿಕ್ಖಮನಞ್ಚ (ಸೀ.)] ಕಾಲೇ;

ದಳ್ಹಞ್ಚ ವಿರಿಯಂ ಪುರಿಸಪರಕ್ಕಮೋ ಚ, ತೇನೇವ ಆಸಿ ವಿಜಯೋ ಅಸ್ಸಕಾನನ್ತಿ.

ಚೂಳಕಾಲಿಙ್ಗಜಾತಕಂ ಪಠಮಂ.

೩೦೨. ಮಹಾಅಸ್ಸಾರೋಹಜಾತಕಂ (೪-೧-೨)

೫. ಅದೇಯ್ಯೇಸು ದದಂ ದಾನಂ, ದೇಯ್ಯೇಸು ನಪ್ಪವೇಚ್ಛತಿ;

ಆಪಾಸು ಬ್ಯಸನಂ ಪತ್ತೋ, ಸಹಾಯಂ ನಾಧಿಗಚ್ಛತಿ.

೬. ನಾದೇಯ್ಯೇಸು ದದಂ ದಾನಂ, ದೇಯ್ಯೇಸು ಯೋ ಪವೇಚ್ಛತಿ;

ಆಪಾಸು ಬ್ಯಸನಂ ಪತ್ತೋ, ಸಹಾಯಮಧಿಗಚ್ಛತಿ.

೭. ಸಞ್ಞೋಗಸಮ್ಭೋಗವಿಸೇಸದಸ್ಸನಂ, ಅನರಿಯಧಮ್ಮೇಸು ಸಠೇಸು ನಸ್ಸತಿ;

ಕತಞ್ಚ ಅರಿಯೇಸು ಚ ಅಜ್ಜವೇಸು, ಮಹಪ್ಫಲಂ ಹೋತಿ ಅಣುಮ್ಪಿ ತಾದಿಸು.

೮. ಯೋ ಪುಬ್ಬೇ ಕತಕಲ್ಯಾಣೋ, ಅಕಾ ಲೋಕೇ ಸುದುಕ್ಕರಂ;

ಪಚ್ಛಾ ಕಯಿರಾ ನ ವಾ ಕಯಿರಾ, ಅಚ್ಚನ್ತಂ ಪೂಜನಾರಹೋತಿ.

ಮಹಾಅಸ್ಸಾರೋಹಜಾತಕಂ ದುತಿಯಂ.

೩೦೩. ಏಕರಾಜಜಾತಕಂ (೪-೧-೩)

೯. ಅನುತ್ತರೇ ಕಾಮಗುಣೇ ಸಮಿದ್ಧೇ, ಭುತ್ವಾನ ಪುಬ್ಬೇ ವಸೀ ಏಕರಾಜ;

ಸೋ ದಾನಿ ದುಗ್ಗೇ ನರಕಮ್ಹಿ ಖಿತ್ತೋ, ನಪ್ಪಜ್ಜಹೇ ವಣ್ಣಬಲಂ ಪುರಾಣಂ.

೧೦. ಪುಬ್ಬೇವ ಖನ್ತೀ ಚ ತಪೋ ಚ ಮಯ್ಹಂ, ಸಮ್ಪತ್ಥಿತಾ ದುಬ್ಭಿಸೇನ [ದಬ್ಬಸೇನಾ (ಸೀ. ಪೀ.)] ಅಹೋಸಿ;

ತಂ ದಾನಿ ಲದ್ಧಾನ ಕಥಂ ನು ರಾಜ, ಜಹೇ ಅಹಂ ವಣ್ಣಬಲಂ ಪುರಾಣಂ.

೧೧. ಸಬ್ಬಾ ಕಿರೇವಂ ಪರಿನಿಟ್ಠಿತಾನಿ, ಯಸಸ್ಸಿನಂ ಪಞ್ಞವನ್ತಂ ವಿಸಯ್ಹ;

ಯಸೋ ಚ ಲದ್ಧಾ ಪುರಿಮಂ ಉಳಾರಂ, ನಪ್ಪಜ್ಜಹೇ ವಣ್ಣಬಲಂ ಪುರಾಣಂ.

೧೨. ಪನುಜ್ಜ ದುಕ್ಖೇನ ಸುಖಂ ಜನಿನ್ದ, ಸುಖೇನ ವಾ ದುಕ್ಖಮಸಯ್ಹಸಾಹಿ;

ಉಭಯತ್ಥ ಸನ್ತೋ ಅಭಿನಿಬ್ಬುತತ್ತಾ, ಸುಖೇ ಚ ದುಕ್ಖೇ ಚ ಭವನ್ತಿ ತುಲ್ಯಾತಿ.

ಏಕರಾಜಜಾತಕಂ ತತಿಯಂ.

೩೦೪. ದದ್ದರಜಾತಕಂ (೪-೧-೪)

೧೩. ಇಮಾನಿ ಮಂ ದದ್ದರ ತಾಪಯನ್ತಿ, ವಾಚಾದುರುತ್ತಾನಿ ಮನುಸ್ಸಲೋಕೇ;

ಮಣ್ಡೂಕಭಕ್ಖಾ ಉದಕನ್ತಸೇವೀ, ಆಸೀವಿಸಂ ಮಂ ಅವಿಸಾ ಸಪನ್ತಿ.

೧೪. ಸಕಾ ರಟ್ಠಾ ಪಬ್ಬಾಜಿತೋ, ಅಞ್ಞಂ ಜನಪದಂ ಗತೋ;

ಮಹನ್ತಂ ಕೋಟ್ಠಂ ಕಯಿರಾಥ, ದುರುತ್ತಾನಂ [ದುರುತ್ತಾನಿ (ಕ.)] ನಿಧೇತವೇ.

೧೫. ಯತ್ಥ ಪೋಸಂ ನ ಜಾನನ್ತಿ, ಜಾತಿಯಾ ವಿನಯೇನ ವಾ;

ನ ತತ್ಥ ಮಾನಂ ಕಯಿರಾಥ, ವಸಮಞ್ಞಾತಕೇ ಜನೇ.

೧೬. ವಿದೇಸವಾಸಂ ವಸತೋ, ಜಾತವೇದಸಮೇನಪಿ [ಜಾತವೇದಭಯೇನಪಿ (ಕ.)];

ಖಮಿತಬ್ಬಂ ಸಪಞ್ಞೇನ, ಅಪಿ ದಾಸಸ್ಸ ತಜ್ಜಿತನ್ತಿ.

ದದ್ದರಜಾತಕಂ ಚತುತ್ಥಂ.

೩೦೫. ಸೀಲವೀಮಂಸನಜಾತಕಂ (೪-೧-೫)

೧೭. ನತ್ಥಿ ಲೋಕೇ ರಹೋ ನಾಮ, ಪಾಪಕಮ್ಮಂ ಪಕುಬ್ಬತೋ;

ಪಸ್ಸನ್ತಿ ವನಭೂತಾನಿ, ತಂ ಬಾಲೋ ಮಞ್ಞತೀ ರಹೋ.

೧೮. ಅಹಂ ರಹೋ ನ ಪಸ್ಸಾಮಿ, ಸುಞ್ಞಂ ವಾಪಿ ನ ವಿಜ್ಜತಿ;

ಯತ್ಥ ಅಞ್ಞಂ [ಸುಞ್ಞಂ (ಸ್ಯಾ. ಕ.)] ನ ಪಸ್ಸಾಮಿ, ಅಸುಞ್ಞಂ ಹೋತಿ ತಂ ಮಯಾ.

೧೯. ದುಜ್ಜಚ್ಚೋ ಚ ಸುಜಚ್ಚೋ [ಅಜಚ್ಚೋ (ಪೀ.)] ಚ, ನನ್ದೋ ಚ ಸುಖವಡ್ಢಿತೋ [ಸುಖವಚ್ಛಕೋ (ಸೀ.), ಸುಖವಚ್ಛನೋ (ಸ್ಯಾ. ಪೀ.)];

ವೇಜ್ಜೋ ಚ ಅದ್ಧುವಸೀಲೋ [ಅಥ ಸೀಲೋ (ಕ.)] ಚ, ತೇ ಧಮ್ಮಂ ಜಹು ಮತ್ಥಿಕಾ.

೨೦. ಬ್ರಾಹ್ಮಣೋ ಚ ಕಥಂ ಜಹೇ, ಸಬ್ಬಧಮ್ಮಾನ ಪಾರಗೂ;

ಯೋ ಧಮ್ಮಮನುಪಾಲೇತಿ, ಧಿತಿಮಾ ಸಚ್ಚನಿಕ್ಕಮೋತಿ.

ಸೀಲವೀಮಂಸನಜಾತಕಂ ಪಞ್ಚಮಂ.

೩೦೬. ಸುಜಾತಜಾತಕಂ (೪-೧-೬)

೨೧. ಕಿಮಣ್ಡಕಾ ಇಮೇ ದೇವ, ನಿಕ್ಖಿತ್ತಾ ಕಂಸಮಲ್ಲಕೇ;

ಉಪಲೋಹಿತಕಾ ವಗ್ಗೂ, ತಂ [ತೇ (ಪೀ.)] ಮೇ ಅಕ್ಖಾಹಿ ಪುಚ್ಛಿತೋ.

೨೨. ಯಾನಿ ಪುರೇ ತುವಂ ದೇವಿ, ಭಣ್ಡು ನನ್ತಕವಾಸಿನೀ;

ಉಚ್ಛಙ್ಗಹತ್ಥಾ ಪಚಿನಾಸಿ, ತಸ್ಸಾ ತೇ ಕೋಲಿಯಂ ಫಲಂ.

೨೩. ಉಡ್ಡಯ್ಹತೇ ನ ರಮತಿ, ಭೋಗಾ ವಿಪ್ಪಜಹನ್ತಿ ತಂ [ವಿಪ್ಪಜಹನ್ತಿ’ಮಂ (?)];

ತತ್ಥೇವಿಮಂ ಪಟಿನೇಥ, ಯತ್ಥ ಕೋಲಂ ಪಚಿಸ್ಸತಿ.

೨೪. ಹೋನ್ತಿ ಹೇತೇ ಮಹಾರಾಜ, ಇದ್ಧಿಪ್ಪತ್ತಾಯ [ಇದ್ಧಿಮತ್ತಾಯ (ಕ.)] ನಾರಿಯಾ;

ಖಮ ದೇವ ಸುಜಾತಾಯ, ಮಾಸ್ಸಾ [ಮಾಸು (ಕ.)] ಕುಜ್ಝ ರಥೇಸಭಾತಿ.

ಸುಜಾತಜಾತಕಂ ಛಟ್ಠಂ.

೩೦೭. ಪಲಾಸಜಾತಕಂ (೪-೧-೭)

೨೫. ಅಚೇತನಂ ಬ್ರಾಹ್ಮಣ ಅಸ್ಸುಣನ್ತಂ, ಜಾನೋ ಅಜಾನನ್ತಮಿಮಂ ಪಲಾಸಂ;

ಆರದ್ಧವಿರಿಯೋ ಧುವಂ ಅಪ್ಪಮತ್ತೋ, ಸುಖಸೇಯ್ಯಂ ಪುಚ್ಛಸಿ ಕಿಸ್ಸ ಹೇತು.

೨೬. ದೂರೇ ಸುತೋ ಚೇವ ಬ್ರಹಾ ಚ ರುಕ್ಖೋ, ದೇಸೇ ಠಿತೋ ಭೂತನಿವಾಸರೂಪೋ;

ತಸ್ಮಾ ನಮಸ್ಸಾಮಿ ಇಮಂ ಪಲಾಸಂ, ಯೇ ಚೇತ್ಥ ಭೂತಾ ತೇ [ತೇ ಚ (ಸೀ. ಪೀ.)] ಧನಸ್ಸ ಹೇತು.

೨೭. ಸೋ ತೇ ಕರಿಸ್ಸಾಮಿ ಯಥಾನುಭಾವಂ, ಕತಞ್ಞುತಂ ಬ್ರಾಹ್ಮಣ ಪೇಕ್ಖಮಾನೋ;

ಕಥಞ್ಹಿ ಆಗಮ್ಮ ಸತಂ ಸಕಾಸೇ, ಮೋಘಾನಿ ತೇ ಅಸ್ಸು ಪರಿಫನ್ದಿತಾನಿ.

೨೮. ಯೋ ತಿನ್ದುಕರುಕ್ಖಸ್ಸ ಪರೋ [ಪುರೋ (ಕ.)] ಪಿಲಕ್ಖೋ [ಪಿಲಕ್ಖು (ಸೀ. ಪೀ.), ಮಿಲಕ್ಖು (ಕ.)], ಪರಿವಾರಿತೋ ಪುಬ್ಬಯಞ್ಞೋ ಉಳಾರೋ;

ತಸ್ಸೇಸ ಮೂಲಸ್ಮಿಂ ನಿಧಿ ನಿಖಾತೋ, ಅದಾಯಾದೋ ಗಚ್ಛ ತಂ ಉದ್ಧರಾಹೀತಿ.

ಪಲಾಸಜಾತಕಂ ಸತ್ತಮಂ.

೩೦೮. ಸಕುಣಜಾತಕಂ (೪-೧-೮)

೨೯. ಅಕರಮ್ಹಸ ತೇ ಕಿಚ್ಚಂ, ಯಂ ಬಲಂ ಅಹುವಮ್ಹಸೇ;

ಮಿಗರಾಜ ನಮೋ ತ್ಯತ್ಥು, ಅಪಿ ಕಿಞ್ಚಿ ಲಭಾಮಸೇ.

೩೦. ಮಮ ಲೋಹಿತಭಕ್ಖಸ್ಸ, ನಿಚ್ಚಂ ಲುದ್ದಾನಿ ಕುಬ್ಬತೋ;

ದನ್ತನ್ತರಗತೋ ಸನ್ತೋ, ತಂ ಬಹುಂ ಯಮ್ಪಿ ಜೀವಸಿ.

೩೧. ಅಕತಞ್ಞುಮಕತ್ತಾರಂ, ಕತಸ್ಸ ಅಪ್ಪಟಿಕಾರಕಂ;

ಯಸ್ಮಿಂ ಕತಞ್ಞುತಾ ನತ್ಥಿ, ನಿರತ್ಥಾ ತಸ್ಸ ಸೇವನಾ.

೩೨. ಯಸ್ಸ ಸಮ್ಮುಖಚಿಣ್ಣೇನ, ಮಿತ್ತಧಮ್ಮೋ ನ ಲಬ್ಭತಿ;

ಅನುಸೂಯ [ಅನುಸುಯ್ಯ (ಸೀ. ಪೀ.)] ಮನಕ್ಕೋಸಂ, ಸಣಿಕಂ ತಮ್ಹಾ ಅಪಕ್ಕಮೇತಿ.

ಸಕುಣಜಾತಕಂ ಅಟ್ಠಮಂ.

೩೦೯. ಛವಕಜಾತಕಂ (೪-೧-೯)

೩೩. ಸಬ್ಬಮಿದಂ ಚರಿಮಂ ಕತಂ [ಚರಿಮವತಂ (ಸೀ. ಪೀ.)], ಉಭೋ ಧಮ್ಮಂ ನ ಪಸ್ಸರೇ;

ಉಭೋ ಪಕತಿಯಾ ಚುತಾ, ಯೋ ಚಾಯಂ ಮನ್ತೇಜ್ಝಾಪೇತಿ [ಮನ್ತಜ್ಝಾಯತಿ (ಸೀ.), ಸಜ್ಝಾಪಯತಿ (ಪೀ.)];

ಯೋ ಚ ಮನ್ತಂ ಅಧೀಯತಿ.

೩೪. ಸಾಲೀನಂ ಓದನಂ ಭುಞ್ಜೇ, ಸುಚಿಂ ಮಂಸೂಪಸೇಚನಂ;

ತಸ್ಮಾ ಏತಂ ನ ಸೇವಾಮಿ, ಧಮ್ಮಂ ಇಸೀಹಿ ಸೇವಿತಂ.

೩೫. ಪರಿಬ್ಬಜ ಮಹಾ ಲೋಕೋ [ಮಹಾಬ್ರಹ್ಮೇ (ಕ.)], ಪಚನ್ತಞ್ಞೇಪಿ ಪಾಣಿನೋ;

ಮಾ ತಂ ಅಧಮ್ಮೋ ಆಚರಿತೋ, ಅಸ್ಮಾ ಕುಮ್ಭಮಿವಾಭಿದಾ.

೩೬. ಧಿರತ್ಥು ತಂ ಯಸಲಾಭಂ, ಧನಲಾಭಞ್ಚ ಬ್ರಾಹ್ಮಣ;

ಯಾ ವುತ್ತಿ ವಿನಿಪಾತೇನ, ಅಧಮ್ಮಚರಣೇನ ವಾತಿ.

ಛವಕಜಾತಕಂ ನವಮಂ.

೩೧೦. ಸೇಯ್ಯಜಾತಕಂ (೪-೧-೧೦)

೩೭. ಸಸಮುದ್ದಪರಿಯಾಯಂ, ಮಹಿಂ ಸಾಗರಕುಣ್ಡಲಂ;

ನ ಇಚ್ಛೇ ಸಹ ನಿನ್ದಾಯ, ಏವಂ ಸೇಯ್ಯ [ಸಯ್ಹ (ಸೀ. ಸ್ಯಾ. ಪೀ.)] ವಿಜಾನಹಿ.

೩೮. ಧಿರತ್ಥು ತಂ ಯಸಲಾಭಂ, ಧನಲಾಭಞ್ಚ ಬ್ರಾಹ್ಮಣ;

ಯಾ ವುತ್ತಿ ವಿನಿಪಾತೇನ, ಅಧಮ್ಮಚರಣೇನ ವಾ.

೩೯. ಅಪಿ ಚೇ ಪತ್ತಮಾದಾಯ, ಅನಗಾರೋ ಪರಿಬ್ಬಜೇ;

ಸಾಯೇವ ಜೀವಿಕಾ ಸೇಯ್ಯೋ, ಯಾ ಚಾಧಮ್ಮೇನ ಏಸನಾ.

೪೦. ಅಪಿ ಚೇ ಪತ್ತಮಾದಾಯ, ಅನಗಾರೋ ಪರಿಬ್ಬಜೇ;

ಅಞ್ಞಂ ಅಹಿಂಸಯಂ ಲೋಕೇ, ಅಪಿ ರಜ್ಜೇನ ತಂ ವರನ್ತಿ.

ಸೇಯ್ಯಜಾತಕಂ [ಸಯ್ಹಜಾತಕಂ (ಸೀ. ಸ್ಯಾ. ಪೀ.)] ದಸಮಂ.

ಕಾಲಿಙ್ಗವಗ್ಗೋ [ವಿವರವಗ್ಗೋ (ಸೀ. ಪೀ.)] ಪಠಮೋ.

ತಸ್ಸುದ್ದಾನಂ –

ವಿವರಞ್ಚ ಅದೇಯ್ಯ ಸಮಿದ್ಧವರಂ, ಅಥ ದದ್ದರ ಪಾಪಮಹಾತಿರಹೋ;

ಅಥ ಕೋಲಿ ಪಲಾಸವರಞ್ಚ ಕರ, ಚರಿಮಂ ಸಸಮುದ್ದವರೇನ ದಸಾತಿ.

೨. ಪುಚಿಮನ್ದವಗ್ಗೋ

೩೧೧. ಪುಚಿಮನ್ದಜಾತಕಂ (೪-೨-೧)

೪೧. ಉಟ್ಠೇಹಿ ಚೋರ ಕಿಂ ಸೇಸಿ, ಕೋ ಅತ್ಥೋ ಸುಪನೇನ [ಸುಪಿತೇನ (ಸೀ.), ಸುಪಿನೇನ (ಪೀ. ಕ.)] ತೇ;

ಮಾ ತಂ ಗಹೇಸುಂ [ಗಣ್ಹೇಯ್ಯುಂ (ಕ.)] ರಾಜಾನೋ, ಗಾಮೇ ಕಿಬ್ಬಿಸಕಾರಕಂ.

೪೨. ಯಂ ನು [ನೂನ (ಸ್ಯಾ.)] ಚೋರಂ ಗಹೇಸ್ಸನ್ತಿ, ಗಾಮೇ ಕಿಬ್ಬಿಸಕಾರಕಂ;

ಕಿಂ ತತ್ಥ ಪುಚಿಮನ್ದಸ್ಸ, ವನೇ ಜಾತಸ್ಸ ತಿಟ್ಠತೋ.

೪೩. ನ ತ್ವಂ ಅಸ್ಸತ್ಥ ಜಾನಾಸಿ, ಮಮ ಚೋರಸ್ಸ ಚನ್ತರಂ;

ಚೋರಂ ಗಹೇತ್ವಾ ರಾಜಾನೋ, ಗಾಮೇ ಕಿಬ್ಬಿಸಕಾರಕಂ;

ಅಪ್ಪೇನ್ತಿ [ಅಚ್ಚೇನ್ತಿ (ಸ್ಯಾ.)] ನಿಮ್ಬಸೂಲಸ್ಮಿಂ, ತಸ್ಮಿಂ ಮೇ ಸಙ್ಕತೇ ಮನೋ.

೪೪. ಸಙ್ಕೇಯ್ಯ ಸಙ್ಕಿತಬ್ಬಾನಿ, ರಕ್ಖೇಯ್ಯಾನಾಗತಂ ಭಯಂ;

ಅನಾಗತಭಯಾ ಧೀರೋ, ಉಭೋ ಲೋಕೇ ಅವೇಕ್ಖತೀತಿ.

ಪುಚಿಮನ್ದಜಾತಕಂ ಪಠಮಂ.

೩೧೨. ಕಸ್ಸಪಮನ್ದಿಯಜಾತಕಂ (೪-೨-೨)

೪೫. ಅಪಿ ಕಸ್ಸಪ ಮನ್ದಿಯಾ, ಯುವಾ ಸಪತಿ ಹನ್ತಿ [ಸಮ್ಪಟಿಹನ್ತಿ (ಕ.)] ವಾ;

ಸಬ್ಬಂ ತಂ ಖಮತೇ ಧೀರೋ, ಪಣ್ಡಿತೋ ತಂ ತಿತಿಕ್ಖತಿ.

೪೬. ಸಚೇಪಿ ಸನ್ತೋ ವಿವದನ್ತಿ, ಖಿಪ್ಪಂ ಸನ್ಧೀಯರೇ ಪುನ;

ಬಾಲಾ ಪತ್ತಾವ ಭಿಜ್ಜನ್ತಿ, ನ ತೇ ಸಮಥಮಜ್ಝಗೂ.

೪೭. ಏತೇ ಭಿಯ್ಯೋ ಸಮಾಯನ್ತಿ, ಸನ್ಧಿ ತೇಸಂ ನ ಜೀರತಿ;

ಯೋ ಚಾಧಿಪನ್ನಂ ಜಾನಾತಿ, ಯೋ ಚ ಜಾನಾತಿ ದೇಸನಂ.

೪೮. ಏಸೋ ಹಿ ಉತ್ತರಿತರೋ, ಭಾರವಹೋ ಧುರದ್ಧರೋ;

ಯೋ ಪರೇಸಾಧಿಪನ್ನಾನಂ, ಸಯಂ ಸನ್ಧಾತುಮರಹತೀತಿ.

ಕಸ್ಸಪಮನ್ದಿಯಜಾತಕಂ ದುತಿಯಂ.

೩೧೩. ಖನ್ತೀವಾದೀಜಾತಕಂ (೪-೨-೩)

೪೯. ಯೋ ತೇ ಹತ್ಥೇ ಚ ಪಾದೇ ಚ, ಕಣ್ಣನಾಸಞ್ಚ ಛೇದಯಿ;

ತಸ್ಸ ಕುಜ್ಝ ಮಹಾವೀರ, ಮಾ ರಟ್ಠಂ ವಿನಸಾ [ವಿನಸ್ಸ (ಕ. ಸೀ. ಸ್ಯಾ. ಕ.)] ಇದಂ.

೫೦. ಯೋ ಮೇ ಹತ್ಥೇ ಚ ಪಾದೇ ಚ, ಕಣ್ಣನಾಸಞ್ಚ ಛೇದಯಿ;

ಚಿರಂ ಜೀವತು ಸೋ ರಾಜಾ, ನ ಹಿ ಕುಜ್ಝನ್ತಿ ಮಾದಿಸಾ.

೫೧. ಅಹೂ ಅತೀತಮದ್ಧಾನಂ [ಅಹು ಅತೀತಮದ್ಧಾನೇ (ಸ್ಯಾ. ಪೀ. ಕ.)], ಸಮಣೋ ಖನ್ತಿದೀಪನೋ;

ತಂ ಖನ್ತಿಯಾಯೇವ ಠಿತಂ, ಕಾಸಿರಾಜಾ ಅಛೇದಯಿ.

೫೨. ತಸ್ಸ ಕಮ್ಮ [ಕಮ್ಮಸ್ಸ (ಸೀ. ಪೀ.)] ಫರುಸಸ್ಸ, ವಿಪಾಕೋ ಕಟುಕೋ ಅಹು;

ಯಂ ಕಾಸಿರಾಜಾ ವೇದೇಸಿ, ನಿರಯಮ್ಹಿ ಸಮಪ್ಪಿತೋತಿ.

ಖನ್ತೀವಾದೀಜಾತಕಂ ತತಿಯಂ.

೩೧೪. ಲೋಹಕುಮ್ಭಿಜಾತಕಂ (೪-೨-೪)

೫೩. ದುಜ್ಜೀವಿತಮಜೀವಿಮ್ಹ, ಯೇ ಸನ್ತೇ [ಯೇಸಂ ನೋ (ಸ್ಯಾ. ಕ.)] ನ ದದಮ್ಹಸೇ;

ವಿಜ್ಜಮಾನೇಸು ಭೋಗೇಸು, ದೀಪಂ ನಾಕಮ್ಹ ಅತ್ತನೋ.

೫೪. ಸಟ್ಠಿ [ಸಟ್ಠಿಂ (ಸ್ಯಾ.)] ವಸ್ಸಸಹಸ್ಸಾನಿ, ಪರಿಪುಣ್ಣಾನಿ ಸಬ್ಬಸೋ;

ನಿರಯೇ ಪಚ್ಚಮಾನಾನಂ, ಕದಾ ಅನ್ತೋ ಭವಿಸ್ಸತಿ.

೫೫. ನತ್ಥಿ ಅನ್ತೋ ಕುತೋ ಅನ್ತೋ, ನ ಅನ್ತೋ ಪಟಿದಿಸ್ಸತಿ;

ತದಾ ಹಿ ಪಕತಂ ಪಾಪಂ, ಮಮ ತುಯ್ಹಞ್ಚ ಮಾರಿಸಾ [ಮಾರಿಸ (ಸೀ. ಸ್ಯಾ. ಪೀ.)].

೫೬. ಸೋಹಂ ನೂನ ಇತೋ ಗನ್ತ್ವಾ, ಯೋನಿಂ ಲದ್ಧಾನ ಮಾನುಸಿಂ;

ವದಞ್ಞೂ ಸೀಲಸಮ್ಪನ್ನೋ, ಕಾಹಾಮಿ ಕುಸಲಂ ಬಹುನ್ತಿ.

ಲೋಹಕುಮ್ಭಿಜಾತಕಂ ಚತುತ್ಥಂ.