೪. ಕೋಕಿಲವಗ್ಗೋ

೩೩೧. ಕೋಕಿಲಜಾತಕಂ (೪-೪-೧)

೧೨೧. ಯೋ ವೇ ಕಾಲೇ ಅಸಮ್ಪತ್ತೇ, ಅತಿವೇಲಂ ಪಭಾಸತಿ;

ಏವಂ ಸೋ ನಿಹತೋ ಸೇತಿ, ಕೋಕಿಲಾಯಿವ ಅತ್ರಜೋ.

೧೨೨. ನ ಹಿ ಸತ್ಥಂ ಸುನಿಸಿತಂ, ವಿಸಂ ಹಲಾಹಲಾಮಿವ [ಹಲಾಹಲಂ ಇವ (ಪೀ.)];

ಏವಂ ನಿಕಟ್ಠೇ [ನಿಕ್ಕಡ್ಢೇ (ಸ್ಯಾ.), ನಿಕಡ್ಢೇ (ಕ.)] ಪಾತೇತಿ, ವಾಚಾ ದುಬ್ಭಾಸಿತಾ ಯಥಾ.

೧೨೩. ತಸ್ಮಾ ಕಾಲೇ ಅಕಾಲೇ ವಾ [ಅಕಾಲೇ ಚ (ಸೀ. ಸ್ಯಾ.)], ವಾಚಂ ರಕ್ಖೇಯ್ಯ ಪಣ್ಡಿತೋ;

ನಾತಿವೇಲಂ ಪಭಾಸೇಯ್ಯ, ಅಪಿ ಅತ್ತಸಮಮ್ಹಿ ವಾ.

೧೨೪. ಯೋ ಚ ಕಾಲೇ ಮಿತಂ ಭಾಸೇ, ಮತಿಪುಬ್ಬೋ ವಿಚಕ್ಖಣೋ;

ಸಬ್ಬೇ ಅಮಿತ್ತೇ ಆದೇತಿ, ಸುಪಣ್ಣೋ ಉರಗಾಮಿವಾತಿ.

ಕೋಕಿಲಜಾತಕಂ [ಕೋಕಾಲಿಕಜಾತಕಂ (ಸಬ್ಬತ್ಥ)] ಪಠಮಂ.

೩೩೨. ರಥಲಟ್ಠಿಜಾತಕಂ (೪-೪-೨)

೧೨೫. ಅಪಿ ಹನ್ತ್ವಾ ಹತೋ ಬ್ರೂತಿ, ಜೇತ್ವಾ ಜಿತೋತಿ ಭಾಸತಿ;

ಪುಬ್ಬವಕ್ಖಾಯಿನೋ [ಪುಬ್ಬಮಕ್ಖಾಯಿನೋ (ಸೀ. ಸ್ಯಾ.)] ರಾಜ, ಅಞ್ಞದತ್ಥು [ಏಕದತ್ಥು (ಸೀ. ಪೀ.)] ನ ಸದ್ದಹೇ.

೧೨೬. ತಸ್ಮಾ ಪಣ್ಡಿತಜಾತಿಯೋ, ಸುಣೇಯ್ಯ ಇತರಸ್ಸಪಿ;

ಉಭಿನ್ನಂ ವಚನಂ ಸುತ್ವಾ, ಯಥಾ ಧಮ್ಮೋ ತಥಾ ಕರೇ.

೧೨೭. ಅಲಸೋ ಗಿಹೀ ಕಾಮಭೋಗೀ ನ ಸಾಧು, ಅಸಞ್ಞತೋ ಪಬ್ಬಜಿತೋ ನ ಸಾಧು;

ರಾಜಾ ನ ಸಾಧು ಅನಿಸಮ್ಮಕಾರೀ, ಯೋ ಪಣ್ಡಿತೋ ಕೋಧನೋ ತಂ ನ ಸಾಧು.

೧೨೮. ನಿಸಮ್ಮ ಖತ್ತಿಯೋ ಕಯಿರಾ, ನಾನಿಸಮ್ಮ ದಿಸಮ್ಪತಿ;

ನಿಸಮ್ಮಕಾರಿನೋ ರಾಜ [ರಞ್ಞೋ (ಸೀ. ಸ್ಯಾ.)], ಯಸೋ ಕಿತ್ತಿ ಚ ವಡ್ಢತೀತಿ.

ರಥಲಟ್ಠಿಜಾತಕಂ ದುತಿಯಂ.

೩೩೩. ಪಕ್ಕಗೋಧಜಾತಕಂ (೪-೪-೩)

೧೨೯. ತದೇವ ಮೇ ತ್ವಂ ವಿದಿತೋ, ವನಮಜ್ಝೇ ರಥೇಸಭ;

ಯಸ್ಸ ತೇ ಖಗ್ಗಬದ್ಧಸ್ಸ, ಸನ್ನದ್ಧಸ್ಸ ತಿರೀಟಿನೋ;

ಅಸ್ಸತ್ಥದುಮಸಾಖಾಯ, ಪಕ್ಕಾ ಗೋಧಾ ಪಲಾಯಥ.

೧೩೦. ನಮೇ ನಮನ್ತಸ್ಸ ಭಜೇ ಭಜನ್ತಂ, ಕಿಚ್ಚಾನುಕುಬ್ಬಸ್ಸ ಕರೇಯ್ಯ ಕಿಚ್ಚಂ;

ನಾನತ್ಥಕಾಮಸ್ಸ ಕರೇಯ್ಯ ಅತ್ಥಂ, ಅಸಮ್ಭಜನ್ತಮ್ಪಿ ನ ಸಮ್ಭಜೇಯ್ಯ.

೧೩೧. ಚಜೇ ಚಜನ್ತಂ ವನಥಂ ನ ಕಯಿರಾ, ಅಪೇತಚಿತ್ತೇನ ನ ಸಮ್ಭಜೇಯ್ಯ;

ದಿಜೋ ದುಮಂ ಖೀಣಫಲನ್ತಿ [ಫಲಂವ (ಕ. ಸೀ. ಸ್ಯಾ. ಕ.), ದುಕನಿಪಾತೇ ಪುಟಭತ್ತಜಾತಕೇನ ಸಂಸನ್ದೇತಬ್ಬಂ] ಞತ್ವಾ, ಅಞ್ಞಂ ಸಮೇಕ್ಖೇಯ್ಯ ಮಹಾ ಹಿ ಲೋಕೋ.

೧೩೨. ಸೋ ತೇ ಕರಿಸ್ಸಾಮಿ ಯಥಾನುಭಾವಂ, ಕತಞ್ಞುತಂ ಖತ್ತಿಯೇ [ಖತ್ತಿಯೋ (ಸ್ಯಾ. ಕ.)] ಪೇಕ್ಖಮಾನೋ;

ಸಬ್ಬಞ್ಚ ತೇ ಇಸ್ಸರಿಯಂ ದದಾಮಿ, ಯಸ್ಸಿಚ್ಛಸೀ ತಸ್ಸ ತುವಂ ದದಾಮೀತಿ.

ಪಕ್ಕಗೋಧಜಾತಕಂ [ಗೋಧಜಾತಕಂ (ಸೀ. ಸ್ಯಾ. ಪೀ.)] ತತಿಯಂ.

೩೩೪. ರಾಜೋವಾದಜಾತಕಂ (೪-೪-೪)

೧೩೩. ಗವಂ ಚೇ ತರಮಾನಾನಂ, ಜಿಮ್ಹಂ ಗಚ್ಛತಿ ಪುಙ್ಗವೋ;

ಸಬ್ಬಾ ತಾ ಜಿಮ್ಹಂ ಗಚ್ಛನ್ತಿ [ಸಬ್ಬಾ ಗಾವೀ ಜಿಮ್ಹಂ ಯನ್ತಿ (ಸೀ. ಸ್ಯಾ.)], ನೇತ್ತೇ ಜಿಮ್ಹಂ ಗತೇ ಸತಿ.

೧೩೪. ಏವಮೇವ ಮನುಸ್ಸೇಸು, ಯೋ ಹೋತಿ ಸೇಟ್ಠಸಮ್ಮತೋ;

ಸೋ ಚೇ ಅಧಮ್ಮಂ ಚರತಿ, ಪಗೇವ ಇತರಾ ಪಜಾ;

ಸಬ್ಬಂ ರಟ್ಠಂ ದುಖಂ ಸೇತಿ, ರಾಜಾ ಚೇ ಹೋತಿ ಅಧಮ್ಮಿಕೋ.

೧೩೫. ಗವಂ ಚೇ ತರಮಾನಾನಂ, ಉಜುಂ ಗಚ್ಛತಿ ಪುಙ್ಗವೋ;

ಸಬ್ಬಾ ಗಾವೀ ಉಜುಂ ಯನ್ತಿ [ಸಬ್ಬಾ ತಾ ಉಜುಂ ಗಚ್ಛನ್ತಿ (ಪೀ. ಅ. ನಿ. ೪.೭೦)], ನೇತ್ತೇ ಉಜುಂ ಗತೇ ಸತಿ.

೧೩೬. ಏವಮೇವ ಮನುಸ್ಸೇಸು, ಯೋ ಹೋತಿ ಸೇಟ್ಠಸಮ್ಮತೋ;

ಸೋ ಸಚೇ ಧಮ್ಮಂ ಚರತಿ, ಪಗೇವ ಇತರಾ ಪಜಾ;

ಸಬ್ಬಂ ರಟ್ಠಂ ಸುಖಂ ಸೇತಿ, ರಾಜಾ ಚೇ ಹೋತಿ ಧಮ್ಮಿಕೋತಿ.

ರಾಜೋವಾದಜಾತಕಂ ಚತುತ್ಥಂ.

೩೩೫. ಜಮ್ಬುಕಜಾತಕಂ (೪-೪-೫)

೧೩೭. ಬ್ರಹಾ ಪವಡ್ಢಕಾಯೋ ಸೋ, ದೀಘದಾಠೋ ಚ ಜಮ್ಬುಕ;

ನ ತ್ವಂ ತತ್ಥ ಕುಲೇ ಜಾತೋ, ಯತ್ಥ ಗಣ್ಹನ್ತಿ ಕುಞ್ಜರಂ.

೧೩೮. ಅಸೀಹೋ ಸೀಹಮಾನೇನ, ಯೋ ಅತ್ತಾನಂ ವಿಕುಬ್ಬತಿ;

ಕೋತ್ಥೂವ [ಕುಟ್ಠೂವ (ಸೀ.), ಕುತ್ಥುವ (ಸ್ಯಾ. ಪೀ)] ಗಜಮಾಸಜ್ಜ, ಸೇತಿ ಭೂಮ್ಯಾ ಅನುತ್ಥುನಂ.

೧೩೯. ಯಸಸ್ಸಿನೋ ಉತ್ತಮಪುಗ್ಗಲಸ್ಸ, ಸಞ್ಜಾತಖನ್ಧಸ್ಸ ಮಹಬ್ಬಲಸ್ಸ;

ಅಸಮೇಕ್ಖಿಯ ಥಾಮಬಲೂಪಪತ್ತಿಂ, ಸ ಸೇತಿ ನಾಗೇನ ಹತೋಯಂ ಜಮ್ಬುಕೋ.

೧೪೦. ಯೋ ಚೀಧ ಕಮ್ಮಂ ಕುರುತೇ ಪಮಾಯ, ಥಾಮಬ್ಬಲಂ ಅತ್ತನಿ ಸಂವಿದಿತ್ವಾ;

ಜಪ್ಪೇನ ಮನ್ತೇನ ಸುಭಾಸಿತೇನ, ಪರಿಕ್ಖವಾ ಸೋ ವಿಪುಲಂ ಜಿನಾತೀತಿ.

ಜಮ್ಬುಕಜಾತಕಂ ಪಞ್ಚಮಂ.

೩೩೬. ಬ್ರಹಾಛತ್ತಜಾತಕಂ (೪-೪-೬)

೧೪೧. ತಿಣಂ ತಿಣನ್ತಿ ಲಪಸಿ, ಕೋ ನು ತೇ ತಿಣಮಾಹರಿ;

ಕಿಂ ನು ತೇ ತಿಣಕಿಚ್ಚತ್ಥಿ, ತಿಣಮೇವ ಪಭಾಸಸಿ.

೧೪೨. ಇಧಾಗಮಾ ಬ್ರಹ್ಮಚಾರೀ, ಬ್ರಹಾ ಛತ್ತೋ ಬಹುಸ್ಸುತೋ;

ಸೋ ಮೇ [ಸೋ ವೇ (ಕ.)] ಸಬ್ಬಂ ಸಮಾದಾಯ, ತಿಣಂ ನಿಕ್ಖಿಪ್ಪ ಗಚ್ಛತಿ.

೧೪೩. ಏವೇತಂ ಹೋತಿ ಕತ್ತಬ್ಬಂ, ಅಪ್ಪೇನ ಬಹುಮಿಚ್ಛತಾ;

ಸಬ್ಬಂ ಸಕಸ್ಸ ಆದಾನಂ, ಅನಾದಾನಂ ತಿಣಸ್ಸ ಚ. ( ) [(ತಿಣಸ್ಸ ಚಾಟೀಸು ಗತೋ, ತತ್ಥ ಕಾ ಪರಿದೇವನಾ) (ಸೀ. ಸ್ಯಾ.) (ಚಾಟೀಸು ಪಕ್ಖಿಪಿತ್ವಾನ, ತತ್ಥ ಕಾ ಪರಿದೇವನಾ) (ಕ.)]

೧೪೪. ಸೀಲವನ್ತೋ ನ ಕುಬ್ಬನ್ತಿ, ಬಾಲೋ ಸೀಲಾನಿ ಕುಬ್ಬತಿ;

ಅನಿಚ್ಚಸೀಲಂ ದುಸ್ಸೀಲ್ಯಂ [ದುಸ್ಸೀಲಂ (ಪೀ.)], ಕಿಂ ಪಣ್ಡಿಚ್ಚಂ ಕರಿಸ್ಸತೀತಿ.

ಬ್ರಹಾಛತ್ತಜಾತಕಂ ಛಟ್ಠಂ.

೩೩೭. ಪೀಠಜಾತಕಂ (೪-೪-೭)

೧೪೫. ನ ತೇ ಪೀಠಮದಾಯಿಮ್ಹಾ [ಮದಾಸಿಮ್ಹ (ಪೀ. ಕ.)], ನ ಪಾನಂ ನಪಿ ಭೋಜನಂ;

ಬ್ರಹ್ಮಚಾರಿ ಖಮಸ್ಸು ಮೇ, ಏತಂ ಪಸ್ಸಾಮಿ ಅಚ್ಚಯಂ.

೧೪೬. ನೇವಾಭಿಸಜ್ಜಾಮಿ ನ ಚಾಪಿ ಕುಪ್ಪೇ, ನ ಚಾಪಿ ಮೇ ಅಪ್ಪಿಯಮಾಸಿ ಕಿಞ್ಚಿ;

ಅಥೋಪಿ ಮೇ ಆಸಿ ಮನೋವಿತಕ್ಕೋ, ಏತಾದಿಸೋ ನೂನ ಕುಲಸ್ಸ ಧಮ್ಮೋ.

೧೪೭. ಏಸಸ್ಮಾಕಂ ಕುಲೇ ಧಮ್ಮೋ, ಪಿತುಪಿತಾಮಹೋ ಸದಾ;

ಆಸನಂ ಉದಕಂ ಪಜ್ಜಂ, ಸಬ್ಬೇತಂ ನಿಪದಾಮಸೇ.

೧೪೮. ಏಸಸ್ಮಾಕಂ ಕುಲೇ ಧಮ್ಮೋ, ಪಿತುಪಿತಾಮಹೋ ಸದಾ;

ಸಕ್ಕಚ್ಚಂ ಉಪತಿಟ್ಠಾಮ, ಉತ್ತಮಂ ವಿಯ ಞಾತಕನ್ತಿ.

ಪೀಠಜಾತಕಂ ಸತ್ತಮಂ.

೩೩೮. ಥುಸಜಾತಕಂ (೪-೪-೮)

೧೪೯. ವಿದಿತಂ ಥುಸಂ ಉನ್ದುರಾನಂ [ಉನ್ದೂರಾನಂ (ಕ.)], ವಿದಿತಂ ಪನ ತಣ್ಡುಲಂ;

ಥುಸಂ ಥುಸಂ [ಥುಸಂ ಥೂಲಂ (ಸೀ.)] ವಿವಜ್ಜೇತ್ವಾ, ತಣ್ಡುಲಂ ಪನ ಖಾದರೇ.

೧೫೦. ಯಾ ಮನ್ತನಾ ಅರಞ್ಞಸ್ಮಿಂ, ಯಾ ಚ ಗಾಮೇ ನಿಕಣ್ಣಿಕಾ;

ಯಞ್ಚೇತಂ ಇತಿ ಚೀತಿ ಚ, ಏತಮ್ಪಿ ವಿದಿತಂ ಮಯಾ.

೧೫೧. ಧಮ್ಮೇನ ಕಿರ ಜಾತಸ್ಸ, ಪಿತಾ ಪುತ್ತಸ್ಸ ಮಕ್ಕಟೋ;

ದಹರಸ್ಸೇವ ಸನ್ತಸ್ಸ, ದನ್ತೇಹಿ ಫಲಮಚ್ಛಿದಾ.

೧೫೨. ಯಮೇತಂ ಪರಿಸಪ್ಪಸಿ [ಪರಿಸಬ್ಬೇಸಿ (ಕ.)], ಅಜಕಾಣೋವ ಸಾಸಪೇ;

ಯೋಪಾಯಂ ಹೇಟ್ಠತೋ ಸೇತಿ [ಸೇಸಿ (ಸೀ.)], ಏತಮ್ಪಿ ವಿದಿತಂ ಮಯಾತಿ.

ಥುಸಜಾತಕಂ ಅಟ್ಠಮಂ.

೩೩೯. ಬಾವೇರುಜಾತಕಂ (೪-೪-೯)

೧೫೩. ಅದಸ್ಸನೇನ ಮೋರಸ್ಸ, ಸಿಖಿನೋ ಮಞ್ಜುಭಾಣಿನೋ;

ಕಾಕಂ ತತ್ಥ ಅಪೂಜೇಸುಂ, ಮಂಸೇನ ಚ ಫಲೇನ ಚ.

೧೫೪. ಯದಾ ಚ ಸರಸಮ್ಪನ್ನೋ, ಮೋರೋ ಬಾವೇರುಮಾಗಮಾ;

ಅಥ ಲಾಭೋ ಚ ಸಕ್ಕಾರೋ, ವಾಯಸಸ್ಸ ಅಹಾಯಥ.

೧೫೫. ಯಾವ ನುಪ್ಪಜ್ಜತೀ ಬುದ್ಧೋ, ಧಮ್ಮರಾಜಾ ಪಭಙ್ಕರೋ;

ತಾವ ಅಞ್ಞೇ ಅಪೂಜೇಸುಂ, ಪುಥೂ ಸಮಣಬ್ರಾಹ್ಮಣೇ.

೧೫೬. ಯದಾ ಚ ಸರಸಮ್ಪನ್ನೋ, ಬುದ್ಧೋ ಧಮ್ಮಂ ಅದೇಸಯಿ;

ಅಥ ಲಾಭೋ ಚ ಸಕ್ಕಾರೋ, ತಿತ್ಥಿಯಾನಂ ಅಹಾಯಥಾತಿ.

ಬಾವೇರುಜಾತಕಂ ನವಮಂ.

೩೪೦. ವಿಸಯ್ಹಜಾತಕಂ (೪-೪-೧೦)

೧೫೭. ಅದಾಸಿ ದಾನಾನಿ ಪುರೇ ವಿಸಯ್ಹ, ದದತೋ ಚ ತೇ ಖಯಧಮ್ಮೋ ಅಹೋಸಿ;

ಇತೋ ಪರಂ ಚೇ ನ ದದೇಯ್ಯ ದಾನಂ, ತಿಟ್ಠೇಯ್ಯುಂ ತೇ ಸಂಯಮನ್ತಸ್ಸ ಭೋಗಾ.

೧೫೮. ಅನರಿಯಮರಿಯೇನ ಸಹಸ್ಸನೇತ್ತ, ಸುದುಗ್ಗತೇನಾಪಿ ಅಕಿಚ್ಚಮಾಹು;

ಮಾ ವೋ ಧನಂ ತಂ ಅಹು ದೇವರಾಜ [ಅಹುವಾ ಜನಿನ್ದ (ಕ. ಸೀ. ಸ್ಯಾ. ಪೀ.)], ಯಂ ಭೋಗಹೇತು ವಿಜಹೇಮು ಸದ್ಧಂ.

೧೫೯. ಯೇನ ಏಕೋ ರಥೋ ಯಾತಿ, ಯಾತಿ ತೇನಾಪರೋ ರಥೋ;

ಪೋರಾಣಂ ನಿಹಿತಂ ವತ್ತಂ, ವತ್ತತಞ್ಞೇವ [ವದ್ಧಂ, ವದ್ಧತಞ್ಞೇವ (ಕ. ಸೀ. ಪೀ.)] ವಾಸವ.

೧೬೦. ಯದಿ ಹೇಸ್ಸತಿ ದಸ್ಸಾಮ, ಅಸನ್ತೇ ಕಿಂ ದದಾಮಸೇ;

ಏವಂಭೂತಾಪಿ ದಸ್ಸಾಮ, ಮಾ ದಾನಂ ಪಮದಮ್ಹಸೇತಿ.

ವಿಸಯ್ಹಜಾತಕಂ ದಸಮಂ.

ಕೋಕಿಲವಗ್ಗೋ [ಕೋಕಾಲಿಕವಗ್ಗೋ (ಕ.)] ಚತುತ್ಥೋ.

ತಸ್ಸುದ್ದಾನಂ –

ಅತಿವೇಲಪಭಾಸತಿ ಜೀತವರೋ, ವನಮಜ್ಝ ರಥೇಸಭ ಜಿಮ್ಹಗಮೋ;

ಅಥ ಜಮ್ಬು ತಿಣಾಸನಪೀಠವರಂ, ಅಥ ತಣ್ಡುಲ ಮೋರ ವಿಸಯ್ಹ ದಸಾತಿ.