೫. ಚೂಳಕುಣಾಲವಗ್ಗೋ

೩೪೧. ಕಣ್ಡರೀಜಾತಕಂ (೪-೫-೧)

೧೬೧. ನರಾನಮಾರಾಮಕರಾಸು ನಾರಿಸು, ಅನೇಕಚಿತ್ತಾಸು ಅನಿಗ್ಗಹಾಸು ಚ;

ಸಬ್ಬತ್ಥ ನಾಪೀತಿಕರಾಪಿ [ಸಬ್ಬ’ತ್ತನಾ’ಪೀತಿಕರಾಪಿ (ಸೀ. ಸ್ಯಾ.)] ಚೇ ಸಿಯಾ [ಸಿಯುಂ (ಸ್ಯಾ.)], ನ ವಿಸ್ಸಸೇ ತಿತ್ಥಸಮಾ ಹಿ ನಾರಿಯೋ.

೧೬೨. ಯಂ ವೇ [ಯಞ್ಚ (ಸ್ಯಾ. ಕ.)] ದಿಸ್ವಾ ಕಣ್ಡರೀಕಿನ್ನರಾನಂ [ಕಿನ್ನರಕಿನ್ನರೀನಂ (ಸ್ಯಾ.), ಕಿನ್ನರೀಕಿನ್ನರಾನಂ (ಕ.)], ಸಬ್ಬಿತ್ಥಿಯೋ ನ ರಮನ್ತಿ ಅಗಾರೇ;

ತಂ ತಾದಿಸಂ ಮಚ್ಚಂ ಚಜಿತ್ವಾ ಭರಿಯಾ, ಅಞ್ಞಂ ದಿಸ್ವಾ ಪುರಿಸಂ ಪೀಠಸಪ್ಪಿಂ.

೧೬೩. ಬಕಸ್ಸ ಚ ಬಾವರಿಕಸ್ಸ [ಪಾವಾರಿಕಸ್ಸ (ಸೀ.)] ರಞ್ಞೋ, ಅಚ್ಚನ್ತಕಾಮಾನುಗತಸ್ಸ ಭರಿಯಾ;

ಅವಾಚರೀ [ಅಚ್ಚಾಚರಿ (ಸ್ಯಾ.), ಅನಾಚರಿ (ಕ.)] ಪಟ್ಠವಸಾನುಗಸ್ಸ [ಬದ್ಧವಸಾನುಗಸ್ಸ (ಸೀ. ಸ್ಯಾ.), ಪತ್ತವಸಾನುಗತಸ್ಸ (ಕ.)], ಕಂ ವಾಪಿ ಇತ್ಥೀ ನಾತಿಚರೇ ತದಞ್ಞಂ.

೧೬೪. ಪಿಙ್ಗಿಯಾನೀ ಸಬ್ಬಲೋಕಿಸ್ಸರಸ್ಸ, ರಞ್ಞೋ ಪಿಯಾ ಬ್ರಹ್ಮದತ್ತಸ್ಸ ಭರಿಯಾ;

ಅವಾಚರೀ ಪಟ್ಠವಸಾನುಗಸ್ಸ, ತಂ ವಾಪಿ ಸಾ ನಾಜ್ಝಗಾ ಕಾಮಕಾಮಿನೀತಿ.

ಕಣ್ಡರೀಜಾತಕಂ [ಕಿನ್ನರೀಜಾತಕಂ (ಕ. ಸೀ. ಕ.), ಕುಣ್ಡಲಿಕಜಾತಕಂ (ಸ್ಯಾ.)] ಪಠಮಂ.

೩೪೨. ವಾನರಜಾತಕಂ (೪-೫-೨)

೧೬೫. ಅಸಕ್ಖಿಂ ವತ ಅತ್ತಾನಂ, ಉದ್ಧಾತುಂ ಉದಕಾ ಥಲಂ;

ನ ದಾನಾಹಂ ಪುನ ತುಯ್ಹಂ, ವಸಂ ಗಚ್ಛಾಮಿ ವಾರಿಜ.

೧೬೬. ಅಲಮೇತೇಹಿ ಅಮ್ಬೇಹಿ, ಜಮ್ಬೂಹಿ ಪನಸೇಹಿ ಚ;

ಯಾನಿ ಪಾರಂ ಸಮುದ್ದಸ್ಸ, ವರಂ ಮಯ್ಹಂ ಉದುಮ್ಬರೋ.

೧೬೭. ಯೋ ಚ ಉಪ್ಪತಿತಂ ಅತ್ಥಂ, ನ ಖಿಪ್ಪಮನುಬುಜ್ಝತಿ;

ಅಮಿತ್ತವಸಮನ್ವೇತಿ, ಪಚ್ಛಾ ಚ ಅನುತಪ್ಪತಿ.

೧೬೮. ಯೋ ಚ ಉಪ್ಪತಿತಂ ಅತ್ಥಂ, ಖಿಪ್ಪಮೇವ ನಿಬೋಧತಿ;

ಮುಚ್ಚತೇ ಸತ್ತುಸಮ್ಬಾಧಾ, ನ ಚ ಪಚ್ಛಾನುತಪ್ಪತೀತಿ.

ವಾನರಜಾತಕಂ ದುತಿಯಂ.

೩೪೩. ಕುನ್ತಿನೀಜಾತಕಂ (೪-೫-೩)

೧೬೯. ಅವಸಿಮ್ಹ ತವಾಗಾರೇ, ನಿಚ್ಚಂ ಸಕ್ಕತಪೂಜಿತಾ;

ತ್ವಮೇವ ದಾನಿಮಕರಿ, ಹನ್ದ ರಾಜ ವಜಾಮಹಂ.

೧೭೦. ಯೋ ವೇ ಕತೇ ಪಟಿಕತೇ, ಕಿಬ್ಬಿಸೇ ಪಟಿಕಿಬ್ಬಿಸೇ;

ಏವಂ ತಂ ಸಮ್ಮತೀ ವೇರಂ, ವಸ ಕುನ್ತಿನಿ ಮಾಗಮಾ.

೧೭೧. ನ ಕತಸ್ಸ ಚ ಕತ್ತಾ ಚ, ಮೇತ್ತಿ [ಮೇತ್ತೀ (ಪೀ.), ಮಿತ್ತೀ (ಕ.)] ಸನ್ಧೀಯತೇ ಪುನ;

ಹದಯಂ ನಾನುಜಾನಾತಿ, ಗಚ್ಛಞ್ಞೇವ ರಥೇಸಭ.

೧೭೨. ಕತಸ್ಸ ಚೇವ ಕತ್ತಾ ಚ, ಮೇತ್ತಿ ಸನ್ಧೀಯತೇ ಪುನ;

ಧೀರಾನಂ ನೋ ಚ ಬಾಲಾನಂ, ವಸ ಕುನ್ತಿನಿ ಮಾಗಮಾತಿ.

ಕುನ್ತಿನೀಜಾತಕಂ ತತಿಯಂ.

೩೪೪. ಅಮ್ಬಜಾತಕಂ (೪-೫-೪)

೧೭೩. ಯೋ ನೀಲಿಯಂ ಮಣ್ಡಯತಿ, ಸಣ್ಡಾಸೇನ ವಿಹಞ್ಞತಿ;

ತಸ್ಸ ಸಾ ವಸಮನ್ವೇತು, ಯಾ ತೇ ಅಮ್ಬೇ ಅವಾಹರಿ.

೧೭೪. ವೀಸಂ ವಾ ಪಞ್ಚವೀಸಂ [ಪಣ್ಣುವೀಸಂ (ಕ. ಸೀ. ಪೀ.)] ವಾ, ಊನತಿಂಸಂ ವ ಜಾತಿಯಾ;

ತಾದಿಸಾ ಪತಿ ಮಾ ಲದ್ಧಾ [ಪತಿಂ ಮಾ ಲದ್ಧಾ (ಪೀ.), ಪತಿ ಮಾ’ಲತ್ಥ (?)], ಯಾ ತೇ ಅಮ್ಬೇ ಅವಾಹರಿ.

೧೭೫. ದೀಘಂ ಗಚ್ಛತು ಅದ್ಧಾನಂ, ಏಕಿಕಾ ಅಭಿಸಾರಿಕಾ;

ಸಙ್ಕೇತೇ ಪತಿ ಮಾ ಅದ್ದ [ಮಾ ಅದ್ದಸ (ಸೀ. ಪೀ.)], ಯಾ ತೇ ಅಮ್ಬೇ ಅವಾಹರಿ.

೧೭೬. ಅಲಙ್ಕತಾ ಸುವಸನಾ, ಮಾಲಿನೀ ಚನ್ದನುಸ್ಸದಾ;

ಏಕಿಕಾ ಸಯನೇ ಸೇತು, ಯಾ ತೇ ಅಮ್ಬೇ ಅವಾಹರೀತಿ.

ಅಮ್ಬಜಾತಕಂ [ಅಮ್ಬಚೋರಜಾತಕಂ (ಕ. ಸೀ. ಪೀ.)] ಚತುತ್ಥಂ.

೩೪೫. ಗಜಕುಮ್ಭಜಾತಕಂ (೪-೫-೫)

೧೭೭. ವನಂ ಯದಗ್ಗಿ ದಹತಿ, ಪಾವಕೋ ಕಣ್ಹವತ್ತನೀ;

ಕಥಂ ಕರೋಸಿ ಪಚಲಕ, ಏವಂ ದನ್ಧಪರಕ್ಕಮೋ.

೧೭೮. ಬಹೂನಿ ರುಕ್ಖಛಿದ್ದಾನಿ, ಪಥಬ್ಯಾ ವಿವರಾನಿ ಚ;

ತಾನಿ ಚೇ ನಾಭಿಸಮ್ಭೋಮ, ಹೋತಿ ನೋ ಕಾಲಪರಿಯಾಯೋ.

೧೭೯. ಯೋ ದನ್ಧಕಾಲೇ ತರತಿ, ತರಣೀಯೇ ಚ ದನ್ಧತಿ;

ಸುಕ್ಖಪಣ್ಣಂವ ಅಕ್ಕಮ್ಮ, ಅತ್ಥಂ ಭಞ್ಜತಿ ಅತ್ತನೋ.

೧೮೦. ಯೋ ದನ್ಧಕಾಲೇ ದನ್ಧೇತಿ, ತರಣೀಯೇ ಚ ತಾರಯಿ;

ಸಸೀವ ರತ್ತಿಂ ವಿಭಜಂ, ತಸ್ಸತ್ಥೋ ಪರಿಪೂರತೀತಿ.

ಗಜಕುಮ್ಭಜಾತಕಂ ಪಞ್ಚಮಂ.

೩೪೬. ಕೇಸವಜಾತಕಂ (೪-೫-೬)

೧೮೧. ಮನುಸ್ಸಿನ್ದಂ ಜಹಿತ್ವಾನ, ಸಬ್ಬಕಾಮಸಮಿದ್ಧಿನಂ;

ಕಥಂ ನು ಭಗವಾ ಕೇಸೀ, ಕಪ್ಪಸ್ಸ ರಮತಿ ಅಸ್ಸಮೇ [ರಮತಸ್ಸಮೇ (ಕ.)].

೧೮೨. ಸಾದೂನೀ [ಸಾಧೂನಿ (ಕ. ಸೀ. ಸ್ಯಾ. ಕ.)] ರಮಣೀಯಾನಿ, ಸನ್ತಿ ವಕ್ಖಾ ಮನೋರಮಾ;

ಸುಭಾಸಿತಾನಿ ಕಪ್ಪಸ್ಸ, ನಾರದ ರಮಯನ್ತಿ ಮಂ.

೧೮೩. ಸಾಲೀನಂ ಓದನಂ ಭುಞ್ಜೇ, ಸುಚಿಂ ಮಂಸೂಪಸೇಚನಂ;

ಕಥಂ ಸಾಮಾಕನೀವಾರಂ, ಅಲೋಣಂ ಛಾದಯನ್ತಿ ತಂ.

೧೮೪. ಸಾದುಂ ವಾ [ಅಸಾದುಂ (ಪೀ.)] ಯದಿ ವಾಸಾದುಂ, ಅಪ್ಪಂ ವಾ ಯದಿ ವಾ ಬಹುಂ;

ವಿಸ್ಸತ್ಥೋ ಯತ್ಥ ಭುಞ್ಜೇಯ್ಯ, ವಿಸ್ಸಾಸಪರಮಾ ರಸಾತಿ.

ಕೇಸವಜಾತಕಂ [ಕೇಸೀಜಾತಕಂ (ಕ.)] ಛಟ್ಠಂ.

೩೪೭. ಅಯಕೂಟಜಾತಕಂ (೪-೫-೭)

೧೮೫. ಸಬ್ಬಾಯಸಂ ಕೂಟಮತಿಪ್ಪಮಾಣಂ, ಪಗ್ಗಯ್ಹ ಯೋ [ಸೋ (ಪೀ.)] ತಿಟ್ಠಸಿ ಅನ್ತಲಿಕ್ಖೇ;

ರಕ್ಖಾಯ ಮೇ [ಮಂ (ಸೀ.)] ತ್ವಂ ವಿಹಿತೋ ನುಸಜ್ಜ, ಉದಾಹು ಮೇ ಚೇತಯಸೇ [ವಾಯಮಸೇ (ಸೀ. ಸ್ಯಾ.)] ವಧಾಯ.

೧೮೬. ದೂತೋ ಅಹಂ ರಾಜಿಧ ರಕ್ಖಸಾನಂ, ವಧಾಯ ತುಯ್ಹಂ ಪಹಿತೋಹಮಸ್ಮಿ;

ಇನ್ದೋ ಚ ತಂ ರಕ್ಖತಿ ದೇವರಾಜಾ, ತೇನುತ್ತಮಙ್ಗಂ ನ ತೇ [ನ ಹಿ (ಕ. ಸೀ. ಪೀ.), ತೇ ನ (ಕ.)] ಫಾಲಯಾಮಿ.

೧೮೭. ಸಚೇ ಚ ಮಂ ರಕ್ಖತಿ ದೇವರಾಜಾ, ದೇವಾನಮಿನ್ದೋ ಮಘವಾ ಸುಜಮ್ಪತಿ;

ಕಾಮಂ ಪಿಸಾಚಾ ವಿನದನ್ತು ಸಬ್ಬೇ, ನ ಸನ್ತಸೇ ರಕ್ಖಸಿಯಾ ಪಜಾಯ.

೧೮೮. ಕಾಮಂ ಕನ್ದನ್ತು [ಕನ್ತನ್ತು (ಕ.), ಕಣ್ಡನ್ತು (ಸ್ಯಾ.)] ಕುಮ್ಭಣ್ಡಾ, ಸಬ್ಬೇ ಪಂಸುಪಿಸಾಚಕಾ;

ನಾಲಂ ಪಿಸಾಚಾ ಯುದ್ಧಾಯ, ಮಹತೀ ಸಾ ವಿಭಿಂಸಿಕಾತಿ [ವಿಭೇಸಿಕಾತಿ (ಸ್ಯಾ.), ವಿಹೇಸಿಕಾತಿ (ಪೀ.)].

ಅಯಕೂಟಜಾತಕಂ ಸತ್ತಮಂ.

೩೪೮. ಅರಞ್ಞಜಾತಕಂ (೪-೫-೮)

೧೮೯. ಅರಞ್ಞಾ ಗಾಮಮಾಗಮ್ಮ, ಕಿಂಸೀಲಂ ಕಿಂವತಂ ಅಹಂ;

ಪುರಿಸಂ ತಾತ ಸೇವೇಯ್ಯಂ, ತಂ ಮೇ ಅಕ್ಖಾಹಿ ಪುಚ್ಛಿತೋ.

೧೯೦. ಯೋ ತಂ ವಿಸ್ಸಾಸಯೇ ತಾತ, ವಿಸ್ಸಾಸಞ್ಚ ಖಮೇಯ್ಯ ತೇ;

ಸುಸ್ಸೂಸೀ ಚ ತಿತಿಕ್ಖೀ ಚ, ತಂ ಭಜೇಹಿ ಇತೋ [ತಂ ಭಜೇಯ್ಯಾಸಿತೋ (ಕ.)] ಗತೋ.

೧೯೧. ಯಸ್ಸ ಕಾಯೇನ ವಾಚಾಯ, ಮನಸಾ ನತ್ಥಿ ದುಕ್ಕಟಂ;

ಉರಸೀವ ಪತಿಟ್ಠಾಯ, ತಂ ಭಜೇಹಿ ಇತೋ ಗತೋ.

೧೯೨. ಹಲಿದ್ದಿರಾಗಂ ಕಪಿಚಿತ್ತಂ, ಪುರಿಸಂ ರಾಗವಿರಾಗಿನಂ;

ತಾದಿಸಂ ತಾತ ಮಾ ಸೇವಿ, ನಿಮ್ಮನುಸ್ಸಮ್ಪಿ ಚೇ ಸಿಯಾತಿ.

ಅರಞ್ಞಜಾತಕಂ ಅಟ್ಠಮಂ.

೩೪೯. ಸನ್ಧಿಭೇದಜಾತಕಂ (೪-೫-೯)

೧೯೩. ನೇವ ಇತ್ಥೀಸು ಸಾಮಞ್ಞಂ, ನಾಪಿ ಭಕ್ಖೇಸು ಸಾರಥಿ;

ಅಥಸ್ಸ ಸನ್ಧಿಭೇದಸ್ಸ, ಪಸ್ಸ ಯಾವ ಸುಚಿನ್ತಿತಂ.

೧೯೪. ಅಸಿ ತಿಕ್ಖೋವ ಮಂಸಮ್ಹಿ, ಪೇಸುಞ್ಞಂ ಪರಿವತ್ತತಿ;

ಯತ್ಥೂಸಭಞ್ಚ ಸೀಹಞ್ಚ, ಭಕ್ಖಯನ್ತಿ ಮಿಗಾಧಮಾ.

೧೯೫. ಇಮಂ ಸೋ ಸಯನಂ ಸೇತಿ, ಯಮಿಮಂ [ಯಯಿಮಂ (ಸೀ. ಪೀ.), ಯಿಮಂ (ಕ.)] ಪಸ್ಸಸಿ ಸಾರಥಿ;

ಯೋ ವಾಚಂ ಸನ್ಧಿಭೇದಸ್ಸ, ಪಿಸುಣಸ್ಸ ನಿಬೋಧತಿ.

೧೯೬. ತೇ ಜನಾ ಸುಖಮೇಧನ್ತಿ, ನರಾ ಸಗ್ಗಗತಾರಿವ;

ಯೇ ವಾಚಂ ಸನ್ಧಿಭೇದಸ್ಸ, ನಾವಬೋಧನ್ತಿ ಸಾರಥೀತಿ.

ಸನ್ಧಿಭೇದಜಾತಕಂ ನವಮಂ.

೩೫೦. ದೇವತಾಪಞ್ಹಜಾತಕಂ (೪-೫-೧೦)

೧೯೭. ಹನ್ತಿ ಹತ್ಥೇಹಿ ಪಾದೇಹಿ, ಮುಖಞ್ಚ ಪರಿಸುಮ್ಭತಿ;

ಸ ವೇ ರಾಜ ಪಿಯೋ ಹೋತಿ, ಕಂ ತೇನ ತ್ವಾಭಿಪಸ್ಸಸಿ [ಮಭಿಪಸ್ಸಸಿ (ಸೀ.)].

೧೯೮. ಅಕ್ಕೋಸತಿ ಯಥಾಕಾಮಂ, ಆಗಮಞ್ಚಸ್ಸ ಇಚ್ಛತಿ;

ಸ ವೇ ರಾಜ ಪಿಯೋ ಹೋತಿ, ಕಂ ತೇನ ತ್ವಾಭಿಪಸ್ಸಸಿ.

೧೯೯. ಅಬ್ಭಕ್ಖಾತಿ ಅಭೂತೇನ, ಅಲಿಕೇನಾಭಿಸಾರಯೇ;

ಸ ವೇ ರಾಜ ಪಿಯೋ ಹೋತಿ, ಕಂ ತೇನ ತ್ವಾಭಿಪಸ್ಸಸಿ.

೨೦೦. ಹರಂ ಅನ್ನಞ್ಚ ಪಾನಞ್ಚ, ವತ್ಥಸೇನಾಸನಾನಿ ಚ;

ಅಞ್ಞದತ್ಥುಹರಾ ಸನ್ತಾ, ತೇ ವೇ ರಾಜ ಪಿಯಾ ಹೋನ್ತಿ;

ಕಂ ತೇನ ತ್ವಾಭಿಪಸ್ಸಸೀತಿ.

ದೇವತಾಪಞ್ಹಜಾತಕಂ ದಸಮಂ.

ಚೂಳಕುಣಾಲವಗ್ಗೋ ಪಞ್ಚಮೋ.

ತಸ್ಸುದ್ದಾನಂ –

ನರಾನಂ ಅಸಕ್ಖಿವಸಿಮ್ಹವರೋ, ನೀಲಿಯಮಗ್ಗಿವರಞ್ಚ ಪುನ;

ಪುನ ರಸಾಯಸಕೂಟವರೋ, ತಥಾರಞ್ಞ ಸಾರಥಿ ಹನ್ತಿ ದಸಾತಿ.

ಅಥ ವಗ್ಗುದ್ದಾನಂ –

ಕಾಲಿಙ್ಗಂ [ವಿವರಂ (ಬಹೂಸು)] ಪುಚಿಮನ್ದಞ್ಚ, ಕುಟಿದೂಸಕ ಕೋಕಿಲಾ [ಕುಟಿದೂಸಂ ಬಹುಭಾಣಕಂ (ಬಹೂಸು)];

ಚೂಳಕುಣಾಲವಗ್ಗೋ ಸೋ, ಪಞ್ಚಮೋ ಸುಪ್ಪಕಾಸಿತೋತಿ.

ಚತುಕ್ಕನಿಪಾತಂ ನಿಟ್ಠಿತಂ.