೨. ಪುಚಿಮನ್ದವಗ್ಗೋ

೩೧೧. ಪುಚಿಮನ್ದಜಾತಕಂ (೪-೨-೧)

೪೧. ಉಟ್ಠೇಹಿ ಚೋರ ಕಿಂ ಸೇಸಿ, ಕೋ ಅತ್ಥೋ ಸುಪನೇನ [ಸುಪಿತೇನ (ಸೀ.), ಸುಪಿನೇನ (ಪೀ. ಕ.)] ತೇ;

ಮಾ ತಂ ಗಹೇಸುಂ [ಗಣ್ಹೇಯ್ಯುಂ (ಕ.)] ರಾಜಾನೋ, ಗಾಮೇ ಕಿಬ್ಬಿಸಕಾರಕಂ.

೪೨. ಯಂ ನು [ನೂನ (ಸ್ಯಾ.)] ಚೋರಂ ಗಹೇಸ್ಸನ್ತಿ, ಗಾಮೇ ಕಿಬ್ಬಿಸಕಾರಕಂ;

ಕಿಂ ತತ್ಥ ಪುಚಿಮನ್ದಸ್ಸ, ವನೇ ಜಾತಸ್ಸ ತಿಟ್ಠತೋ.

೪೩. ನ ತ್ವಂ ಅಸ್ಸತ್ಥ ಜಾನಾಸಿ, ಮಮ ಚೋರಸ್ಸ ಚನ್ತರಂ;

ಚೋರಂ ಗಹೇತ್ವಾ ರಾಜಾನೋ, ಗಾಮೇ ಕಿಬ್ಬಿಸಕಾರಕಂ;

ಅಪ್ಪೇನ್ತಿ [ಅಚ್ಚೇನ್ತಿ (ಸ್ಯಾ.)] ನಿಮ್ಬಸೂಲಸ್ಮಿಂ, ತಸ್ಮಿಂ ಮೇ ಸಙ್ಕತೇ ಮನೋ.

೪೪. ಸಙ್ಕೇಯ್ಯ ಸಙ್ಕಿತಬ್ಬಾನಿ, ರಕ್ಖೇಯ್ಯಾನಾಗತಂ ಭಯಂ;

ಅನಾಗತಭಯಾ ಧೀರೋ, ಉಭೋ ಲೋಕೇ ಅವೇಕ್ಖತೀತಿ.

ಪುಚಿಮನ್ದಜಾತಕಂ ಪಠಮಂ.

೩೧೨. ಕಸ್ಸಪಮನ್ದಿಯಜಾತಕಂ (೪-೨-೨)

೪೫. ಅಪಿ ಕಸ್ಸಪ ಮನ್ದಿಯಾ, ಯುವಾ ಸಪತಿ ಹನ್ತಿ [ಸಮ್ಪಟಿಹನ್ತಿ (ಕ.)] ವಾ;

ಸಬ್ಬಂ ತಂ ಖಮತೇ ಧೀರೋ, ಪಣ್ಡಿತೋ ತಂ ತಿತಿಕ್ಖತಿ.

೪೬. ಸಚೇಪಿ ಸನ್ತೋ ವಿವದನ್ತಿ, ಖಿಪ್ಪಂ ಸನ್ಧೀಯರೇ ಪುನ;

ಬಾಲಾ ಪತ್ತಾವ ಭಿಜ್ಜನ್ತಿ, ನ ತೇ ಸಮಥಮಜ್ಝಗೂ.

೪೭. ಏತೇ ಭಿಯ್ಯೋ ಸಮಾಯನ್ತಿ, ಸನ್ಧಿ ತೇಸಂ ನ ಜೀರತಿ;

ಯೋ ಚಾಧಿಪನ್ನಂ ಜಾನಾತಿ, ಯೋ ಚ ಜಾನಾತಿ ದೇಸನಂ.

೪೮. ಏಸೋ ಹಿ ಉತ್ತರಿತರೋ, ಭಾರವಹೋ ಧುರದ್ಧರೋ;

ಯೋ ಪರೇಸಾಧಿಪನ್ನಾನಂ, ಸಯಂ ಸನ್ಧಾತುಮರಹತೀತಿ.

ಕಸ್ಸಪಮನ್ದಿಯಜಾತಕಂ ದುತಿಯಂ.

೩೧೩. ಖನ್ತೀವಾದೀಜಾತಕಂ (೪-೨-೩)

೪೯. ಯೋ ತೇ ಹತ್ಥೇ ಚ ಪಾದೇ ಚ, ಕಣ್ಣನಾಸಞ್ಚ ಛೇದಯಿ;

ತಸ್ಸ ಕುಜ್ಝ ಮಹಾವೀರ, ಮಾ ರಟ್ಠಂ ವಿನಸಾ [ವಿನಸ್ಸ (ಕ. ಸೀ. ಸ್ಯಾ. ಕ.)] ಇದಂ.

೫೦. ಯೋ ಮೇ ಹತ್ಥೇ ಚ ಪಾದೇ ಚ, ಕಣ್ಣನಾಸಞ್ಚ ಛೇದಯಿ;

ಚಿರಂ ಜೀವತು ಸೋ ರಾಜಾ, ನ ಹಿ ಕುಜ್ಝನ್ತಿ ಮಾದಿಸಾ.

೫೧. ಅಹೂ ಅತೀತಮದ್ಧಾನಂ [ಅಹು ಅತೀತಮದ್ಧಾನೇ (ಸ್ಯಾ. ಪೀ. ಕ.)], ಸಮಣೋ ಖನ್ತಿದೀಪನೋ;

ತಂ ಖನ್ತಿಯಾಯೇವ ಠಿತಂ, ಕಾಸಿರಾಜಾ ಅಛೇದಯಿ.

೫೨. ತಸ್ಸ ಕಮ್ಮ [ಕಮ್ಮಸ್ಸ (ಸೀ. ಪೀ.)] ಫರುಸಸ್ಸ, ವಿಪಾಕೋ ಕಟುಕೋ ಅಹು;

ಯಂ ಕಾಸಿರಾಜಾ ವೇದೇಸಿ, ನಿರಯಮ್ಹಿ ಸಮಪ್ಪಿತೋತಿ.

ಖನ್ತೀವಾದೀಜಾತಕಂ ತತಿಯಂ.

೩೧೪. ಲೋಹಕುಮ್ಭಿಜಾತಕಂ (೪-೨-೪)

೫೩. ದುಜ್ಜೀವಿತಮಜೀವಿಮ್ಹ, ಯೇ ಸನ್ತೇ [ಯೇಸಂ ನೋ (ಸ್ಯಾ. ಕ.)] ನ ದದಮ್ಹಸೇ;

ವಿಜ್ಜಮಾನೇಸು ಭೋಗೇಸು, ದೀಪಂ ನಾಕಮ್ಹ ಅತ್ತನೋ.

೫೪. ಸಟ್ಠಿ [ಸಟ್ಠಿಂ (ಸ್ಯಾ.)] ವಸ್ಸಸಹಸ್ಸಾನಿ, ಪರಿಪುಣ್ಣಾನಿ ಸಬ್ಬಸೋ;

ನಿರಯೇ ಪಚ್ಚಮಾನಾನಂ, ಕದಾ ಅನ್ತೋ ಭವಿಸ್ಸತಿ.

೫೫. ನತ್ಥಿ ಅನ್ತೋ ಕುತೋ ಅನ್ತೋ, ನ ಅನ್ತೋ ಪಟಿದಿಸ್ಸತಿ;

ತದಾ ಹಿ ಪಕತಂ ಪಾಪಂ, ಮಮ ತುಯ್ಹಞ್ಚ ಮಾರಿಸಾ [ಮಾರಿಸ (ಸೀ. ಸ್ಯಾ. ಪೀ.)].

೫೬. ಸೋಹಂ ನೂನ ಇತೋ ಗನ್ತ್ವಾ, ಯೋನಿಂ ಲದ್ಧಾನ ಮಾನುಸಿಂ;

ವದಞ್ಞೂ ಸೀಲಸಮ್ಪನ್ನೋ, ಕಾಹಾಮಿ ಕುಸಲಂ ಬಹುನ್ತಿ.

ಲೋಹಕುಮ್ಭಿಜಾತಕಂ ಚತುತ್ಥಂ.

೩೧೫. ಸಬ್ಬಮಂಸಲಾಭಜಾತಕಂ (೪-೨-೫)

೫೭. ಫರುಸಾ ವತ ತೇ ವಾಚಾ, ಮಂಸಂ [ಸಮ್ಮ (ಪೀ. ಕ.)] ಯಾಚನಕೋ ಅಸಿ [ಚಸಿ (ಪೀ.)];

ಕಿಲೋಮಸದಿಸೀ [ಕಿಲೋಮಸ್ಸ ಸದಿಸಾ (ಪೀ.)] ವಾಚಾ, ಕಿಲೋಮಂ ಸಮ್ಮ ದಮ್ಮಿ ತೇ.

೫೮. ಅಙ್ಗಮೇತಂ ಮನುಸ್ಸಾನಂ, ಭಾತಾ ಲೋಕೇ ಪವುಚ್ಚತಿ;

ಅಙ್ಗಸ್ಸ ಸದಿಸೀ ವಾಚಾ [ಅಙ್ಗಸ್ಸದಿಸೀ ತೇ ವಾಚಾ (ಕ.)], ಅಙ್ಗಂ ಸಮ್ಮ ದದಾಮಿ ತೇ.

೫೯. ತಾತಾತಿ ಪುತ್ತೋ ವದಮಾನೋ, ಕಮ್ಪೇತಿ [ಸಮ್ಮೇತಿ (ಕ.)] ಹದಯಂ ಪಿತು;

ಹದಯಸ್ಸ ಸದಿಸೀ [ಹದಯಸ್ಸದಿಸೀ (ಕ.)] ವಾಚಾ, ಹದಯಂ ಸಮ್ಮ ದಮ್ಮಿ ತೇ.

೬೦. ಯಸ್ಸ ಗಾಮೇ ಸಖಾ ನತ್ಥಿ, ಯಥಾರಞ್ಞಂ ತಥೇವ ತಂ;

ಸಬ್ಬಸ್ಸ ಸದಿಸೀ ವಾಚಾ, ಸಬ್ಬಂ ಸಮ್ಮ ದದಾಮಿ ತೇತಿ.

ಸಬ್ಬಮಂಸಲಾಭಜಾತಕಂ [ಮಂಸಜಾತಕಂ (ಸೀ. ಸ್ಯಾ. ಪೀ.)] ಪಞ್ಚಮಂ.

೩೧೬. ಸಸಪಣ್ಡಿತಜಾತಕಂ (೪-೨-೬)

೬೧. ಸತ್ತ ಮೇ ರೋಹಿತಾ ಮಚ್ಛಾ, ಉದಕಾ ಥಲಮುಬ್ಭತಾ;

ಇದಂ ಬ್ರಾಹ್ಮಣ ಮೇ ಅತ್ಥಿ, ಏತಂ ಭುತ್ವಾ ವನೇ ವಸ.

೬೨. ದುಸ್ಸ ಮೇ ಖೇತ್ತಪಾಲಸ್ಸ, ರತ್ತಿಭತ್ತಂ ಅಪಾಭತಂ;

ಮಂಸಸೂಲಾ ಚ ದ್ವೇ ಗೋಧಾ, ಏಕಞ್ಚ ದಧಿವಾರಕಂ;

ಇದಂ ಬ್ರಾಹ್ಮಣ ಮೇ ಅತ್ಥಿ, ಏತಂ ಭುತ್ವಾ ವನೇ ವಸ.

೬೩. ಅಮ್ಬಪಕ್ಕಂ ದಕಂ [ಅಮ್ಬಪಕ್ಕೋದಕಂ (ಸೀ. ಪೀ.)] ಸೀತಂ, ಸೀತಚ್ಛಾಯಾ ಮನೋರಮಾ [ಸೀತಚ್ಛಾಯಂ ಮನೋರಮಂ (ಸೀ. ಸ್ಯಾ. ಪೀ.)];

ಇದಂ ಬ್ರಾಹ್ಮಣ ಮೇ ಅತ್ಥಿ, ಏತಂ ಭುತ್ವಾ ವನೇ ವಸ.

೬೪. ನ ಸಸಸ್ಸ ತಿಲಾ ಅತ್ಥಿ, ನ ಮುಗ್ಗಾ ನಪಿ ತಣ್ಡುಲಾ;

ಇಮಿನಾ ಅಗ್ಗಿನಾ ಪಕ್ಕಂ, ಮಮಂ [ಮಂಸಂ (ಕ.)] ಭುತ್ವಾ ವನೇ ವಸಾತಿ.

ಸಸಪಣ್ಡಿತಜಾತಕಂ ಛಟ್ಠಂ.

೩೧೭. ಮತರೋದನಜಾತಕಂ (೪-೨-೭)

೬೫. ಮತಂ ಮತಂ ಏವ [ಮತಮತಮೇವ (ಸೀ. ಸ್ಯಾ. ಪೀ.)] ರೋದಥ, ನ ಹಿ ತಂ ರೋದಥ ಯೋ ಮರಿಸ್ಸತಿ;

ಸಬ್ಬೇಪಿ [ಸಬ್ಬೇವ (ಸೀ. ಸ್ಯಾ. ಪೀ.)] ಸರೀರಧಾರಿನೋ, ಅನುಪುಬ್ಬೇನ ಜಹನ್ತಿ ಜೀವಿತಂ.

೬೬. ದೇವಮನುಸ್ಸಾ ಚತುಪ್ಪದಾ, ಪಕ್ಖಿಗಣಾ ಉರಗಾ ಚ ಭೋಗಿನೋ;

ಸಮ್ಹಿ [ಯಮ್ಹಿ (ಸ್ಯಾ.), ಅಸ್ಮಿಂ (ಪೀ. ಕ.)] ಸರೀರೇ ಅನಿಸ್ಸರಾ, ರಮಮಾನಾವ ಜಹನ್ತಿ ಜೀವಿತಂ.

೬೭. ಏವಂ ಚಲಿತಂ ಅಸಣ್ಠಿತಂ, ಸುಖದುಕ್ಖಂ ಮನುಜೇಸ್ವಪೇಕ್ಖಿಯ;

ಕನ್ದಿತರುದಿತಂ ನಿರತ್ಥಕಂ, ಕಿಂ ವೋ ಸೋಕಗಣಾಭಿಕೀರರೇ.

೬೮. ಧುತ್ತಾ ಚ ಸೋಣ್ಡಾ [ಧುತ್ತಾ ಸೋಣ್ಡಾ (ಸೀ.), ಧುತ್ತಾ ಸೋಣ್ಡಾ ಚ (ಸ್ಯಾ.)] ಅಕತಾ, ಬಾಲಾ ಸೂರಾ ಅಯೋಗಿನೋ [ಬಾಲಾ ಸೂರಾ ವೀರಾ ಅಯೋಗಿನೋ (ಪೀ.)];

ಧೀರಂ ಮಞ್ಞನ್ತಿ ಬಾಲೋತಿ, ಯೇ ಧಮ್ಮಸ್ಸ ಅಕೋವಿದಾತಿ.

ಮತರೋದನಜಾತಕಂ ಸತ್ತಮಂ.

೩೧೮. ಕಣವೇರಜಾತಕಂ (೪-೨-೮)

೬೯. ಯಂ ತಂ ವಸನ್ತಸಮಯೇ, ಕಣವೇರೇಸು ಭಾಣುಸು;

ಸಾಮಂ ಬಾಹಾಯ ಪೀಳೇಸಿ, ಸಾ ತಂ ಆರೋಗ್ಯಮಬ್ರವಿ.

೭೦. ಅಮ್ಭೋ ನ ಕಿರ ಸದ್ಧೇಯ್ಯಂ, ಯಂ ವಾತೋ ಪಬ್ಬತಂ ವಹೇ;

ಪಬ್ಬತಞ್ಚೇ ವಹೇ ವಾತೋ, ಸಬ್ಬಮ್ಪಿ ಪಥವಿಂ ವಹೇ;

ಯತ್ಥ ಸಾಮಾ ಕಾಲಕತಾ [ಕಾಲಙ್ಕತಾ (ಕ.)], ಸಾ ಮಂ ಆರೋಗ್ಯಮಬ್ರವಿ.

೭೧. ನ ಚೇವ ಸಾ ಕಾಲಕತಾ, ನ ಚ ಸಾ ಅಞ್ಞಮಿಚ್ಛತಿ;

ಏಕಭತ್ತಿಕಿನೀ [ಏಕಭತ್ತಾ ಕಿರ (ಸೀ. ಸ್ಯಾ.), ಏಕಭತ್ತಕಿನೀ (ಪೀ.)] ಸಾಮಾ, ತಮೇವ ಅಭಿಕಙ್ಖತಿ.

೭೨. ಅಸನ್ಥುತಂ ಮಂ ಚಿರಸನ್ಥುತೇನ [ಅಸನ್ಧತಂ ಮಂ ಚಿರಸನ್ಧತೇನ (ಕ.)], ನಿಮೀನಿ ಸಾಮಾ ಅಧುವಂ ಧುವೇನ;

ಮಯಾಪಿ ಸಾಮಾ ನಿಮಿನೇಯ್ಯ ಅಞ್ಞಂ, ಇತೋ ಅಹಂ ದೂರತರಂ ಗಮಿಸ್ಸನ್ತಿ.

ಕಣವೇರಜಾತಕಂ ಅಟ್ಠಮಂ.

೩೧೯. ತಿತ್ತಿರಜಾತಕಂ (೪-೨-೯)

೭೩. ಸುಸುಖಂ ವತ ಜೀವಾಮಿ, ಲಭಾಮಿ ಚೇವ ಭುಞ್ಜಿತುಂ;

ಪರಿಪನ್ಥೇವ ತಿಟ್ಠಾಮಿ, ಕಾ ನು ಭನ್ತೇ ಗತೀ ಮಮ.

೭೪. ಮನೋ ಚೇ ತೇ ನಪ್ಪಣಮತಿ, ಪಕ್ಖಿ ಪಾಪಸ್ಸ ಕಮ್ಮುನೋ;

ಅಬ್ಯಾವಟಸ್ಸ ಭದ್ರಸ್ಸ, ನ ಪಾಪಮುಪಲಿಮ್ಪತಿ.

೭೫. ಞಾತಕೋ ನೋ ನಿಸಿನ್ನೋತಿ, ಬಹು ಆಗಚ್ಛತೇ ಜನೋ;

ಪಟಿಚ್ಚ ಕಮ್ಮಂ ಫುಸತಿ, ತಸ್ಮಿಂ ಮೇ ಸಙ್ಕತೇ ಮನೋ.

೭೬. ನ ಪಟಿಚ್ಚ ಕಮ್ಮಂ ಫುಸತಿ, ಮನೋ ಚೇ ನಪ್ಪದುಸ್ಸತಿ;

ಅಪ್ಪೋಸ್ಸುಕ್ಕಸ್ಸ ಭದ್ರಸ್ಸ, ನ ಪಾಪಮುಪಲಿಮ್ಪತೀತಿ.

ತಿತ್ತಿರಜಾತಕಂ ನವಮಂ.

೩೨೦. ಸುಚ್ಚಜಜಾತಕಂ (೪-೨-೧೦)

೭೭. ಸುಚ್ಚಜಂ ವತ ನಚ್ಚಜಿ, ವಾಚಾಯ ಅದದಂ ಗಿರಿಂ;

ಕಿಂ ಹಿತಸ್ಸ ಚಜನ್ತಸ್ಸ, ವಾಚಾಯ ಅದದ ಪಬ್ಬತಂ.

೭೮. ಯಞ್ಹಿ ಕಯಿರಾ ತಞ್ಹಿ ವದೇ, ಯಂ ನ ಕಯಿರಾ ನ ತಂ ವದೇ;

ಅಕರೋನ್ತಂ ಭಾಸಮಾನಂ, ಪರಿಜಾನನ್ತಿ ಪಣ್ಡಿತಾ.

೭೯. ರಾಜಪುತ್ತ ನಮೋ ತ್ಯತ್ಥು, ಸಚ್ಚೇ ಧಮ್ಮೇ ಠಿತೋ ಚಸಿ;

ಯಸ್ಸ ತೇ ಬ್ಯಸನಂ ಪತ್ತೋ, ಸಚ್ಚಸ್ಮಿಂ ರಮತೇ ಮನೋ.

೮೦. ಯಾ ದಲಿದ್ದೀ ದಲಿದ್ದಸ್ಸ, ಅಡ್ಢಾ ಅಡ್ಢಸ್ಸ ಕಿತ್ತಿಮ [ಕಿತ್ತಿಮಾ (ಸೀ. ಸ್ಯಾ. ಪೀ.)];

ಸಾ ಹಿಸ್ಸ ಪರಮಾ ಭರಿಯಾ, ಸಹಿರಞ್ಞಸ್ಸ ಇತ್ಥಿಯೋತಿ.

ಸುಚ್ಚಜಜಾತಕಂ ದಸಮಂ.

ಪುಚಿಮನ್ದವಗ್ಗೋ ದುತಿಯೋ.

ತಸ್ಸುದ್ದಾನಂ –

ಅಥ ಚೋರ ಸಕಸ್ಸಪ ಖನ್ತೀವರೋ, ದುಜ್ಜೀವಿತತಾ ಚ ವರಾ ಫರುಸಾ;

ಅಥ ಸಸ ಮತಞ್ಚ ವಸನ್ತ ಸುಖಂ, ಸುಚ್ಚಜಂವತನಚ್ಚಜಿನಾ ಚ ದಸಾತಿ.