೨೫೦. ಕಪಿಜಾತಕಂ (೨-೧೦-೧೦)

೨೦೦. ಅಯಂ ಇಸೀ ಉಪಸಮಸಂಯಮೇ ರತೋ, ಸ ತಿಟ್ಠತಿ [ಸನ್ತಿಟ್ಠತಿ (ಸೀ. ಪೀ.)] ಸಿಸಿರಭಯೇನ ಅಟ್ಟಿತೋ;

ಹನ್ದ ಅಯಂ ಪವಿಸತುಮಂ ಅಗಾರಕಂ, ವಿನೇತು ಸೀತಂ ದರಥಞ್ಚ ಕೇವಲಂ.

೨೦೧. ನಾಯಂ ಇಸೀ ಉಪಸಮಸಂಯಮೇ ರತೋ, ಕಪೀ ಅಯಂ ದುಮವರಸಾಖಗೋಚರೋ;

ಸೋ ದೂಸಕೋ ರೋಸಕೋ ಚಾಪಿ ಜಮ್ಮೋ, ಸಚೇವಜೇಮಮ್ಪಿ [ಸಚೇ + ಆವಜೇ + ಇಮಮ್ಪಿ] ದೂಸೇಯ್ಯಗಾರನ್ತಿ [ದೂಸಯೇ ಘರನ್ತಿ (ಸೀ. ಸ್ಯಾ. ಪೀ.)].

ಕಪಿಜಾತಕಂ ದಸಮಂ.

ಸಿಙ್ಗಾಲವಗ್ಗೋ ದಸಮೋ.

ತಸ್ಸುದ್ದಾನಂ –

ಅಥ ರಾಜಾ ಸಿಙ್ಗಾಲವರೋ ಸುನಖೋ, ತಥಾ ಕೋಸಿಯ ಇಚ್ಛತಿ ಕಾಲಘಸೋ;

ಅಥ ದಾನವರೋಟ್ಠಪಿ ಸಾರಥಿನಾ, ಪುನಮ್ಬವನಞ್ಚ ಸಿಸಿರಕಪಿ ದಸಾತಿ.

ಅಥ ವಗ್ಗುದ್ದಾನಂ –

ದಳ್ಹಞ್ಚ ವಗ್ಗಂ ಅಪರೇನ ಸನ್ಥವಂ, ಕಲ್ಯಾಣವಗ್ಗಾಸದಿಸೋ ಚ ರೂಹಕಂ;

ನತಂದಳ್ಹ ಬೀರಣಥಮ್ಭಕಂ ಪುನ, ಕಾಸಾವುಪಾಹನ ಸಿಙ್ಗಾಲಕೇನ ದಸಾತಿ.

ದುಕನಿಪಾತಂ ನಿಟ್ಠಿತಂ.