೩. ತಿಕನಿಪಾತೋ

೧. ಸಙ್ಕಪ್ಪವಗ್ಗೋ

೨೫೧. ಸಙ್ಕಪ್ಪರಾಗಜಾತಕಂ (೩-೧-೧)

೧. ಸಙ್ಕಪ್ಪರಾಗಧೋತೇನ, ವಿತಕ್ಕನಿಸಿತೇನ ಚ;

ನಾಲಙ್ಕತೇನ ಭದ್ರೇನ [ನೇವಾಲಙ್ಕತಭದ್ರೇನ (ಸ್ಯಾ.)], ಉಸುಕಾರಾಕತೇನ ಚ [ನ ಉಸುಕಾರಕತೇನ ಚ (ಸೀ. ಸ್ಯಾ. ಪೀ.)].

೨. ನ ಕಣ್ಣಾಯತಮುತ್ತೇನ, ನಾಪಿ ಮೋರೂಪಸೇವಿನಾ;

ತೇನಮ್ಹಿ ಹದಯೇ ವಿದ್ಧೋ, ಸಬ್ಬಙ್ಗಪರಿದಾಹಿನಾ.

೩. ಆವೇಧಞ್ಚ ನ ಪಸ್ಸಾಮಿ, ಯತೋ ರುಹಿರಮಸ್ಸವೇ;

ಯಾವ ಅಯೋನಿಸೋ ಚಿತ್ತಂ, ಸಯಂ ಮೇ ದುಕ್ಖಮಾಭತನ್ತಿ.

ಸಙ್ಕಪ್ಪರಾಗಜಾತಕಂ ಪಠಮಂ.

೨೫೨. ತಿಲಮುಟ್ಠಿಜಾತಕಂ (೩-೧-೨)

೪. ಅಜ್ಜಾಪಿ ಮೇ ತಂ ಮನಸಿ [ಸರಸಿ (ಕ.)], ಯಂ ಮಂ ತ್ವಂ ತಿಲಮುಟ್ಠಿಯಾ;

ಬಾಹಾಯ ಮಂ ಗಹೇತ್ವಾನ, ಲಟ್ಠಿಯಾ ಅನುತಾಳಯಿ.

೫. ನನು ಜೀವಿತೇ ನ ರಮಸಿ, ಯೇನಾಸಿ ಬ್ರಾಹ್ಮಣಾಗತೋ;

ಯಂ ಮಂ ಬಾಹಾ ಗಹೇತ್ವಾನ, ತಿಕ್ಖತ್ತುಂ ಅನುತಾಳಯಿ.

೬. ಅರಿಯೋ ಅನರಿಯಂ ಕುಬ್ಬನ್ತಂ [ಕುಬ್ಬಾನಂ (ಸೀ. ಪೀ.), ಕುಬ್ಬಂ (ಸ್ಯಾ.)], ಯೋ ದಣ್ಡೇನ ನಿಸೇಧತಿ;

ಸಾಸನಂ ತಂ ನ ತಂ ವೇರಂ, ಇತಿ ನಂ ಪಣ್ಡಿತಾ ವಿದೂತಿ.

ತಿಲಮುಟ್ಠಿಜಾತಕಂ ದುತಿಯಂ.

೨೫೩. ಮಣಿಕಣ್ಠಜಾತಕಂ (೩-೧-೩)

೭. ಮಮನ್ನಪಾನಂ ವಿಪುಲಂ ಉಳಾರಂ, ಉಪ್ಪಜ್ಜತೀಮಸ್ಸ ಮಣಿಸ್ಸ ಹೇತು;

ತಂ ತೇ ನ ದಸ್ಸಂ ಅತಿಯಾಚಕೋಸಿ, ನ ಚಾಪಿ ತೇ ಅಸ್ಸಮಮಾಗಮಿಸ್ಸಂ.

೮. ಸುಸೂ ಯಥಾ ಸಕ್ಖರಧೋತಪಾಣೀ, ತಾಸೇಸಿ ಮಂ ಸೇಲಂ ಯಾಚಮಾನೋ;

ತಂ ತೇ ನ ದಸ್ಸಂ ಅತಿಯಾಚಕೋಸಿ, ನ ಚಾಪಿ ತೇ ಅಸ್ಸಮಮಾಗಮಿಸ್ಸಂ.

೯. ನ ತಂ ಯಾಚೇ ಯಸ್ಸ ಪಿಯಂ ಜಿಗೀಸೇ [ಜಿಗಿಂಸೇ (ಸೀ. ಸ್ಯಾ. ಪೀ.)], ದೇಸ್ಸೋ ಹೋತಿ ಅತಿಯಾಚನಾಯ;

ನಾಗೋ ಮಣಿಂ ಯಾಚಿತೋ ಬ್ರಾಹ್ಮಣೇನ, ಅದಸ್ಸನಂಯೇವ ತದಜ್ಝಗಮಾತಿ.

ಮಣಿಕಣ್ಠಜಾತಕಂ ತತಿಯಂ.

೨೫೪. ಕುಣ್ಡಕಕುಚ್ಛಿಸಿನ್ಧವಜಾತಕಂ (೩-೧-೪)

೧೦. ಭುತ್ವಾ ತಿಣಪರಿಘಾಸಂ, ಭುತ್ವಾ ಆಚಾಮಕುಣ್ಡಕಂ;

ಏತಂ ತೇ ಭೋಜನಂ ಆಸಿ, ಕಸ್ಮಾ ದಾನಿ ನ ಭುಞ್ಜಸಿ.

೧೧. ಯತ್ಥ ಪೋಸಂ ನ ಜಾನನ್ತಿ, ಜಾತಿಯಾ ವಿನಯೇನ ವಾ;

ಬಹುಂ [ಪಹೂ (ಸೀ. ಪೀ.), ಪಹುಂ (ಸ್ಯಾ. ಕ.)] ತತ್ಥ ಮಹಾಬ್ರಮ್ಹೇ, ಅಪಿ ಆಚಾಮಕುಣ್ಡಕಂ.

೧೨. ತ್ವಞ್ಚ ಖೋ ಮಂ ಪಜಾನಾಸಿ, ಯಾದಿಸಾಯಂ ಹಯುತ್ತಮೋ;

ಜಾನನ್ತೋ ಜಾನಮಾಗಮ್ಮ, ನ ತೇ ಭಕ್ಖಾಮಿ ಕುಣ್ಡಕನ್ತಿ.

ಕುಣ್ಡಕಕುಚ್ಛಿಸಿನ್ಧವಜಾತಕಂ ಚತುತ್ಥಂ.

೨೫೫. ಸುಕಜಾತಕಂ (೩-೧-೫)

೧೩. ಯಾವ ಸೋ ಮತ್ತಮಞ್ಞಾಸಿ, ಭೋಜನಸ್ಮಿಂ ವಿಹಙ್ಗಮೋ;

ತಾವ ಅದ್ಧಾನಮಾಪಾದಿ, ಮಾತರಞ್ಚ ಅಪೋಸಯಿ.

೧೪. ಯತೋ ಚ ಖೋ ಬಹುತರಂ, ಭೋಜನಂ ಅಜ್ಝವಾಹರಿ [ಅಜ್ಝುಪಾಹರಿ (ಸೀ. ಪೀ.)];

ತತೋ ತತ್ಥೇವ ಸಂಸೀದಿ, ಅಮತ್ತಞ್ಞೂ ಹಿ ಸೋ ಅಹು.

೧೫. ತಸ್ಮಾ ಮತ್ತಞ್ಞುತಾ ಸಾಧು, ಭೋಜನಸ್ಮಿಂ ಅಗಿದ್ಧತಾ [ಅಗಿದ್ಧಿತಾ (ಸ್ಯಾ. ಕ.)];

ಅಮತ್ತಞ್ಞೂ ಹಿ ಸೀದನ್ತಿ, ಮತ್ತಞ್ಞೂ ಚ ನ ಸೀದರೇತಿ.

ಸುಕಜಾತಕಂ ಪಞ್ಚಮಂ.

೨೫೬. ಜರೂದಪಾನಜಾತಕಂ (೩-೧-೬)

೧೬. ಜರೂದಪಾನಂ ಖಣಮಾನಾ, ವಾಣಿಜಾ ಉದಕತ್ಥಿಕಾ;

ಅಜ್ಝಗಮುಂ ಅಯಸಂ ಲೋಹಂ [ಅಜ್ಝಗಂಸು ಅಯೋಲೋಹಂ (ಸೀ. ಸ್ಯಾ. ಪೀ.)], ತಿಪುಸೀಸಞ್ಚ ವಾಣಿಜಾ;

ರಜತಂ ಜಾತರೂಪಞ್ಚ, ಮುತ್ತಾ ವೇಳೂರಿಯಾ ಬಹೂ.

೧೭. ತೇ ಚ ತೇನ ಅಸನ್ತುಟ್ಠಾ, ಭಿಯ್ಯೋ ಭಿಯ್ಯೋ ಅಖಾಣಿಸುಂ;

ತೇ ತತ್ಥಾಸೀವಿಸೋ [ತತ್ಥ ಆಸೀವಿಸೋ (ಕ.), ತತ್ಥಪಾಸೀವಿಸೋ (ಸ್ಯಾ.)] ಘೋರೋ, ತೇಜಸ್ಸೀ ತೇಜಸಾ ಹನಿ.

೧೮. ತಸ್ಮಾ ಖಣೇ ನಾತಿಖಣೇ, ಅತಿಖಾತಂ [ಅತಿಖಣಂ (ಕ.)] ಹಿ ಪಾಪಕಂ;

ಖಾತೇನ ಚ [ಖಣೇನ ಚ (ಕ.), ಖಣನೇನ (ಸ್ಯಾ.)] ಧನಂ ಲದ್ಧಂ, ಅತಿಖಾತೇನ [ಅತಿಖಣೇನ (ಕ.)] ನಾಸಿತನ್ತಿ.

ಜರೂದಪಾನಜಾತಕಂ ಛಟ್ಠಂ.

೨೫೭. ಗಾಮಣಿಚನ್ದಜಾತಕಂ (೩-೧-೭)

೧೯. ನಾಯಂ ಘರಾನಂ ಕುಸಲೋ, ಲೋಲೋ ಅಯಂ ವಲೀಮುಖೋ;

ಕತಂ ಕತಂ ಖೋ ದೂಸೇಯ್ಯ, ಏವಂಧಮ್ಮಮಿದಂ ಕುಲಂ.

೨೦. ನಯಿದಂ ಚಿತ್ತವತೋ ಲೋಮಂ, ನಾಯಂ ಅಸ್ಸಾಸಿಕೋ ಮಿಗೋ;

ಸಿಟ್ಠಂ [ಸತ್ಥಂ (ಸೀ. ಸ್ಯಾ. ಪೀ.)] ಮೇ ಜನಸನ್ಧೇನ, ನಾಯಂ ಕಿಞ್ಚಿ ವಿಜಾನತಿ.

೨೧. ನ ಮಾತರಂ ಪಿತರಂ ವಾ, ಭಾತರಂ ಭಗಿನಿಂ ಸಕಂ;

ಭರೇಯ್ಯ ತಾದಿಸೋ ಪೋಸೋ, ಸಿಟ್ಠಂ ದಸರಥೇನ ಮೇತಿ.

ಗಾಮಣಿಚನ್ದ [ಗಾಮಣಿಚಣ್ಡ (ಸೀ. ಪೀ.)] ಜಾತಕಂ ಸತ್ತಮಂ.

೨೫೮. ಮನ್ಧಾತುಜಾತಕಂ (೩-೧-೮)

೨೨. ಯಾವತಾ ಚನ್ದಿಮಸೂರಿಯಾ, ಪರಿಹರನ್ತಿ ದಿಸಾ ಭನ್ತಿ ವಿರೋಚನಾ [ವಿರೋಚಮಾನಾ (ಕ.)];

ಸಬ್ಬೇವ ದಾಸಾ ಮನ್ಧಾತು, ಯೇ ಪಾಣಾ ಪಥವಿಸ್ಸಿತಾ [ಪಠವಿನಿಸ್ಸಿತಾ (ಸೀ. ಪೀ.), ಪಠವಿಸ್ಸಿತಾ (ಸ್ಯಾ.)].

೨೩. ನ ಕಹಾಪಣವಸ್ಸೇನ, ತಿತ್ತಿ ಕಾಮೇಸು ವಿಜ್ಜತಿ;

ಅಪ್ಪಸ್ಸಾದಾ ದುಖಾ ಕಾಮಾ, ಇತಿ ವಿಞ್ಞಾಯ ಪಣ್ಡಿತೋ.

೨೪. ಅಪಿ ದಿಬ್ಬೇಸು ಕಾಮೇಸು, ರತಿಂ ಸೋ ನಾಧಿಗಚ್ಛತಿ;

ತಣ್ಹಕ್ಖಯರತೋ ಹೋತಿ, ಸಮ್ಮಾಸಮ್ಬುದ್ಧಸಾವಕೋತಿ.

ಮನ್ಧಾತುಜಾತಕಂ ಅಟ್ಠಮಂ.

೨೫೯. ತಿರೀಟವಚ್ಛಜಾತಕಂ (೩-೧-೯)

೨೫. ನಯಿಮಸ್ಸ ವಿಜ್ಜಾಮಯಮತ್ಥಿ ಕಿಞ್ಚಿ, ನ ಬನ್ಧವೋ ನೋ ಪನ ತೇ ಸಹಾಯೋ;

ಅಥ ಕೇನ ವಣ್ಣೇನ ತಿರೀಟವಚ್ಛೋ [ತಿರೀಟಿವಚ್ಛೋ (ಸ್ಯಾ. ಕ.)], ತೇದಣ್ಡಿಕೋ ಭುಞ್ಜತಿ ಅಗ್ಗಪಿಣ್ಡಂ.

೨೬. ಆಪಾಸು [ಆವಾಸು (ಕ.)] ಮೇ ಯುದ್ಧಪರಾಜಿತಸ್ಸ, ಏಕಸ್ಸ ಕತ್ವಾ ವಿವನಸ್ಮಿ ಘೋರೇ;

ಪಸಾರಯೀ ಕಿಚ್ಛಗತಸ್ಸ ಪಾಣಿಂ, ತೇನೂದತಾರಿಂ ದುಖಸಂಪರೇತೋ.

೨೭. ಏತಸ್ಸ ಕಿಚ್ಚೇನ ಇಧಾನುಪತ್ತೋ, ವೇಸಾಯಿನೋ ವಿಸಯಾ ಜೀವಲೋಕೇ;

ಲಾಭಾರಹೋ ತಾತ ತಿರೀಟವಚ್ಛೋ, ದೇಥಸ್ಸ ಭೋಗಂ ಯಜಥಞ್ಚ [ಯಜತಞ್ಚ (ಸೀ. ಪೀ.), ಯಜಿತಞ್ಚ (ಸ್ಯಾ.)] ಯಞ್ಞನ್ತಿ.

ತಿರೀಟವಚ್ಛಜಾತಕಂ ನವಮಂ.

೨೬೦. ದೂತಜಾತಕಂ (೩-೧-೧೦)

೨೮. ಯಸ್ಸತ್ಥಾ ದೂರಮಾಯನ್ತಿ, ಅಮಿತ್ತಮಪಿ ಯಾಚಿತುಂ;

ತಸ್ಸೂದರಸ್ಸಹಂ ದೂತೋ, ಮಾ ಮೇ ಕುಜ್ಝ [ಕುಜ್ಝಿ (ಸೀ. ಪೀ.)] ರಥೇಸಭ.

೨೯. ಯಸ್ಸ ದಿವಾ ಚ ರತ್ತೋ ಚ, ವಸಮಾಯನ್ತಿ ಮಾಣವಾ;

ತಸ್ಸೂದರಸ್ಸಹಂ ದೂತೋ, ಮಾ ಮೇ ಕುಜ್ಝ [ಕುಜ್ಝಿ (ಸೀ. ಪೀ.)] ರಥೇಸಭ.

೩೦. ದದಾಮಿ ತೇ ಬ್ರಾಹ್ಮಣ ರೋಹಿಣೀನಂ, ಗವಂ ಸಹಸ್ಸಂ ಸಹ ಪುಙ್ಗವೇನ;

ದೂತೋ ಹಿ ದೂತಸ್ಸ ಕಥಂ ನ ದಜ್ಜಂ, ಮಯಮ್ಪಿ ತಸ್ಸೇವ ಭವಾಮ ದೂತಾತಿ.

ದೂತಜಾತಕಂ ದಸಮಂ.

ಸಙ್ಕಪ್ಪವಗ್ಗೋ ಪಠಮೋ.

ತಸ್ಸುದ್ದಾನಂ –

ಉಸುಕಾರವರೋ ತಿಲಮುಟ್ಠಿ ಮಣಿ, ಹಯರಾಜ ವಿಹಙ್ಗಮ ಆಸಿವಿಸೋ;

ಜನಸನ್ಧ ಕಹಾಪಣವಸ್ಸ ಪುನ, ತಿರಿಟಂ ಪುನ ದೂತವರೇನ ದಸಾತಿ.

೨. ಪದುಮವಗ್ಗೋ

೨೬೧. ಪದುಮಜಾತಕಂ (೩-೨-೧)

೩೧. ಯಥಾ ಕೇಸಾ ಚ ಮಸ್ಸೂ ಚ, ಛಿನ್ನಂ ಛಿನ್ನಂ ವಿರೂಹತಿ;

ಏವಂ ರೂಹತು ತೇ ನಾಸಾ, ಪದುಮಂ ದೇಹಿ ಯಾಚಿತೋ.

೩೨. ಯಥಾ ಸಾರದಿಕಂ ಬೀಜಂ, ಖೇತ್ತೇ ವುತ್ತಂ ವಿರೂಹತಿ;

ಏವಂ ರೂಹತು ತೇ ನಾಸಾ, ಪದುಮಂ ದೇಹಿ ಯಾಚಿತೋ.

೩೩. ಉಭೋಪಿ ಪಲಪನ್ತೇತೇ [ವಿಲಪನ್ತೇತೇ (ಸ್ಯಾ. ಕ.)], ಅಪಿ ಪದ್ಮಾನಿ ದಸ್ಸತಿ;

ವಜ್ಜುಂ ವಾ ತೇ ನ ವಾ ವಜ್ಜುಂ, ನತ್ಥಿ ನಾಸಾಯ ರೂಹನಾ;

ದೇಹಿ ಸಮ್ಮ ಪದುಮಾನಿ, ಅಹಂ ಯಾಚಾಮಿ ಯಾಚಿತೋತಿ.

ಪದುಮಜಾತಕಂ ಪಠಮಂ.

೨೬೨. ಮುದುಪಾಣಿಜಾತಕಂ (೩-೨-೨)

೩೪. ಪಾಣಿ ಚೇ ಮುದುಕೋ ಚಸ್ಸ, ನಾಗೋ ಚಸ್ಸ ಸುಕಾರಿತೋ;

ಅನ್ಧಕಾರೋ ಚ ವಸ್ಸೇಯ್ಯ, ಅಥ ನೂನ ತದಾ ಸಿಯಾ.

೩೫. ಅನಲಾ ಮುದುಸಮ್ಭಾಸಾ, ದುಪ್ಪೂರಾ ತಾ [ದುಪ್ಪೂರತ್ತಾ (ಕ.)] ನದೀಸಮಾ;

ಸೀದನ್ತಿ ನಂ ವಿದಿತ್ವಾನ, ಆರಕಾ ಪರಿವಜ್ಜಯೇ.

೩೬. ಯಂ ಏತಾ ಉಪಸೇವನ್ತಿ, ಛನ್ದಸಾ ವಾ ಧನೇನ ವಾ;

ಜಾತವೇದೋವ ಸಂ ಠಾನಂ, ಖಿಪ್ಪಂ ಅನುದಹನ್ತಿ ನನ್ತಿ.

ಮುದುಪಾಣಿಜಾತಕಂ ದುತಿಯಂ.

೨೬೩. ಚೂಳಪಲೋಭನಜಾತಕಂ (೩-೨-೩)

೩೭. ಅಭಿಜ್ಜಮಾನೇ ವಾರಿಸ್ಮಿಂ, ಸಯಂ [ಅಯಂ (ಕ.)] ಆಗಮ್ಮ ಇದ್ಧಿಯಾ;

ಮಿಸ್ಸೀಭಾವಿತ್ಥಿಯಾ ಗನ್ತ್ವಾ, ಸಂಸೀದಸಿ [ಸಂಸೀದತಿ (ಕ.)] ಮಹಣ್ಣವೇ.

೩೮. ಆವಟ್ಟನೀ ಮಹಾಮಾಯಾ, ಬ್ರಹ್ಮಚರಿಯವಿಕೋಪನಾ;

ಸೀದನ್ತಿ ನಂ ವಿದಿತ್ವಾನ, ಆರಕಾ ಪರಿವಜ್ಜಯೇ.

೩೯. ಯಂ ಏತಾ ಉಪಸೇವನ್ತಿ, ಛನ್ದಸಾ ವಾ ಧನೇನ ವಾ;

ಜಾತವೇದೋವ ಸಂ ಠಾನಂ, ಖಿಪ್ಪಂ ಅನುದಹನ್ತಿ ನನ್ತಿ.

ಚೂಳಪಲೋಭನ [ಚುಲ್ಲಪಲೋಭನ (ಸೀ. ಸ್ಯಾ. ಪೀ.)] ಜಾತಕಂ ತತಿಯಂ.

೨೬೪. ಮಹಾಪನಾದಜಾತಕಂ (೩-೨-೪)

೪೦. ಪನಾದೋ ನಾಮ ಸೋ ರಾಜಾ, ಯಸ್ಸ ಯೂಪೋ ಸುವಣ್ಣಯೋ;

ತಿರಿಯಂ ಸೋಳಸುಬ್ಬೇಧೋ [ಸೋಳಸಪಬ್ಬೇಧೋ (ಸೀ. ಪೀ.)], ಉದ್ಧಮಾಹು [ಉಚ್ಚಮಾಹು (ಸೀ. ಸ್ಯಾ. ಪೀ.)] ಸಹಸ್ಸಧಾ.

೪೧. ಸಹಸ್ಸಕಣ್ಡೋ ಸತಗೇಣ್ಡು [ಸತಭೇದೋ (ಸೀ. ಪೀ.), ಸತಭೇಣ್ಡು (ಸೀ. ನಿಸ್ಸಯ)], ಧಜಾಸು ಹರಿತಾಮಯೋ;

ಅನಚ್ಚುಂ ತತ್ಥ ಗನ್ಧಬ್ಬಾ, ಛ ಸಹಸ್ಸಾನಿ ಸತ್ತಧಾ.

೪೨. ಏವಮೇತಂ [ಏವಮೇವ (ಕ.)] ತದಾ ಆಸಿ, ಯಥಾ ಭಾಸಸಿ ಭದ್ದಜಿ;

ಸಕ್ಕೋ ಅಹಂ ತದಾ ಆಸಿಂ, ವೇಯ್ಯಾವಚ್ಚಕರೋ ತವಾತಿ.

ಮಹಾಪನಾದಜಾತಕಂ ಚತುತ್ಥಂ.

೨೬೫. ಖುರಪ್ಪಜಾತಕಂ (೩-೨-೫)

೪೩. ದಿಸ್ವಾ ಖುರಪ್ಪೇ ಧನುವೇಗನುನ್ನೇ, ಖಗ್ಗೇ ಗಹೀತೇ ತಿಖಿಣೇ ತೇಲಧೋತೇ;

ತಸ್ಮಿಂ ಭಯಸ್ಮಿಂ ಮರಣೇ ವಿಯೂಳ್ಹೇ, ಕಸ್ಮಾ ನು ತೇ ನಾಹು ಛಮ್ಭಿತತ್ತಂ.

೪೪. ದಿಸ್ವಾ ಖುರಪ್ಪೇ ಧನುವೇಗನುನ್ನೇ, ಖಗ್ಗೇ ಗಹೀತೇ ತಿಖಿಣೇ ತೇಲಧೋತೇ;

ತಸ್ಮಿಂ ಭಯಸ್ಮಿಂ ಮರಣೇ ವಿಯೂಳ್ಹೇ, ವೇದಂ ಅಲತ್ಥಂ ವಿಪುಲಂ ಉಳಾರಂ.

೪೫. ಸೋ ವೇದಜಾತೋ ಅಜ್ಝಭವಿಂ ಅಮಿತ್ತೇ, ಪುಬ್ಬೇವ ಮೇ ಜೀವಿತಮಾಸಿ ಚತ್ತಂ;

ನ ಹಿ ಜೀವಿತೇ ಆಲಯಂ ಕುಬ್ಬಮಾನೋ, ಸೂರೋ ಕಯಿರಾ ಸೂರಕಿಚ್ಚಂ ಕದಾಚೀತಿ.

ಖುರಪ್ಪಜಾತಕಂ ಪಞ್ಚಮಂ.

೨೬೬. ವಾತಗ್ಗಸಿನ್ಧವಜಾತಕಂ (೩-೨-೬)

೪೬. ಯೇನಾಸಿ ಕಿಸಿಯಾ ಪಣ್ಡು, ಯೇನ ಭತ್ತಂ ನ ರುಚ್ಚತಿ;

ಅಯಂ ಸೋ ಆಗತೋ ಭತ್ತಾ [ತಾತೋ (ಸೀ. ಸ್ಯಾ. ಪೀ.)], ಕಸ್ಮಾ ದಾನಿ ಪಲಾಯಸಿ.

೪೭. ಸಚೇ [ನ ಖೋ (ಸ್ಯಾ. ಕ.)] ಪನಾದಿಕೇನೇವ, ಸನ್ಥವೋ ನಾಮ ಜಾಯತಿ;

ಯಸೋ ಹಾಯತಿ ಇತ್ಥೀನಂ, ತಸ್ಮಾ ತಾತ ಪಲಾಯಹಂ [ಪಲಾಯಿಹಂ (ಸ್ಯಾ.), ಪಲಾಯಿತಂ (ಕ.)].

೪೮. ಯಸ್ಸಸ್ಸಿನಂ ಕುಲೇ ಜಾತಂ, ಆಗತಂ ಯಾ ನ ಇಚ್ಛತಿ;

ಸೋಚತಿ ಚಿರರತ್ತಾಯ, ವಾತಗ್ಗಮಿವ ಭದ್ದಲೀತಿ [ಕುನ್ದಲೀತಿ (ಸೀ. ಪೀ.), ಗದ್ರಭೀತಿ (ಸ್ಯಾ.)].

ವಾತಗ್ಗಸಿನ್ಧವಜಾತಕಂ ಛಟ್ಠಂ.

೨೬೭. ಕಕ್ಕಟಕಜಾತಕಂ (೩-೨-೭)

೪೯. ಸಿಙ್ಗೀಮಿಗೋ ಆಯತಚಕ್ಖುನೇತ್ತೋ, ಅಟ್ಠಿತ್ತಚೋ ವಾರಿಸಯೋ ಅಲೋಮೋ;

ತೇನಾಭಿಭೂತೋ ಕಪಣಂ ರುದಾಮಿ, ಮಾ ಹೇವ ಮಂ ಪಾಣಸಮಂ ಜಹೇಯ್ಯ [ಜಹೇಯ್ಯಾ (ಪೀ.) ಜಹಾ’ಯ್ಯೇ (?)].

೫೦. ಅಯ್ಯ ನ ತಂ ಜಹಿಸ್ಸಾಮಿ, ಕುಞ್ಜರಂ ಸಟ್ಠಿಹಾಯನಂ [ಕುಞ್ಜರ ಸಟ್ಠಿಹಾಯನ (ಸೀ. ಪೀ.)];

ಪಥಬ್ಯಾ ಚಾತುರನ್ತಾಯ, ಸುಪ್ಪಿಯೋ ಹೋಸಿ ಮೇ ತುವಂ.

೫೧. ಯೇ ಕುಳೀರಾ ಸಮುದ್ದಸ್ಮಿಂ, ಗಙ್ಗಾಯ ಯಮುನಾಯ [ನಮ್ಮದಾಯ (ಸೀ. ಪೀ.)] ಚ;

ತೇಸಂ ತ್ವಂ ವಾರಿಜೋ ಸೇಟ್ಠೋ, ಮುಞ್ಚ ರೋದನ್ತಿಯಾ ಪತಿನ್ತಿ.

ಕಕ್ಕಟಕ [ಕುಳೀರ (ಕ.)] ಜಾತಕಂ ಸತ್ತಮಂ.

೨೬೮. ಆರಾಮದೂಸಕಜಾತಕಂ (೩-೨-೮)

೫೨. ಯೋ ವೇ ಸಬ್ಬಸಮೇತಾನಂ, ಅಹುವಾ ಸೇಟ್ಠಸಮ್ಮತೋ;

ತಸ್ಸಾಯಂ ಏದಿಸೀ ಪಞ್ಞಾ, ಕಿಮೇವ ಇತರಾ ಪಜಾ.

೫೩. ಏವಮೇವ ತುವಂ ಬ್ರಹ್ಮೇ, ಅನಞ್ಞಾಯ ವಿನಿನ್ದಸಿ;

ಕಥಂ ಮೂಲಂ ಅದಿಸ್ವಾನ [ಕಥಂಹಿ ಮೂಲಂ ಅದಿತ್ವಾ (ಸ್ಯಾ. ಪೀ.)], ರುಕ್ಖಂ ಜಞ್ಞಾ ಪತಿಟ್ಠಿತಂ.