೧೦. ಸಿಙ್ಗಾಲವಗ್ಗೋ

೨೪೧. ಸಬ್ಬದಾಠಿಜಾತಕಂ (೨-೧೦-೧)

೧೮೨. ಸಿಙ್ಗಾಲೋ ಮಾನಥದ್ಧೋ ಚ, ಪರಿವಾರೇನ ಅತ್ಥಿಕೋ;

ಪಾಪುಣಿ ಮಹತಿಂ ಭೂಮಿಂ, ರಾಜಾಸಿ ಸಬ್ಬದಾಠಿನಂ.

೧೮೩. ಏವಮೇವ ಮನುಸ್ಸೇಸು, ಯೋ ಹೋತಿ ಪರಿವಾರವಾ;

ಸೋ ಹಿ ತತ್ಥ ಮಹಾ ಹೋತಿ, ಸಿಙ್ಗಾಲೋ ವಿಯ ದಾಠಿನನ್ತಿ.

ಸಬ್ಬದಾಠಿಜಾತಕಂ ಪಠಮಂ.

೨೪೨. ಸುನಖಜಾತಕಂ (೨-೧೦-೨)

೧೮೪. ಬಾಲೋ ವತಾಯಂ ಸುನಖೋ, ಯೋ ವರತ್ತಂ [ಯೋ ಚ ಯೋತ್ತಂ (ಕ.)] ನ ಖಾದತಿ;

ಬನ್ಧನಾ ಚ ಪಮುಞ್ಚೇಯ್ಯ, ಅಸಿತೋ ಚ ಘರಂ ವಜೇ.

೧೮೫. ಅಟ್ಠಿತಂ ಮೇ ಮನಸ್ಮಿಂ ಮೇ, ಅಥೋ ಮೇ ಹದಯೇ ಕತಂ;

ಕಾಲಞ್ಚ ಪಟಿಕಙ್ಖಾಮಿ, ಯಾವ ಪಸ್ಸುಪತೂ ಜನೋ [ಪಸುಪತುಜ್ಜನೋ (ಸ್ಯಾ. ಕ.)].

ಸುನಖಜಾತಕಂ ದುತಿಯಂ.

೨೪೩. ಗುತ್ತಿಲಜಾತಕಂ (೨-೧೦-೩)

೧೮೬. ಸತ್ತತನ್ತಿಂ ಸುಮಧುರಂ, ರಾಮಣೇಯ್ಯಂ ಅವಾಚಯಿಂ;

ಸೋ ಮಂ ರಙ್ಗಮ್ಹಿ ಅವ್ಹೇತಿ, ಸರಣಂ ಮೇ ಹೋಹಿ ಕೋಸಿಯ.

೧೮೭. ಅಹಂ ತಂ ಸರಣಂ ಸಮ್ಮ [ಅಹಂ ತೇ ಸರಣಂ ಹೋಮಿ (ವಿ. ವ. ೩೨೮)], ಅಹಮಾಚರಿಯಪೂಜಕೋ;

ನ ತಂ ಜಯಿಸ್ಸತಿ ಸಿಸ್ಸೋ, ಸಿಸ್ಸಮಾಚರಿಯ ಜೇಸ್ಸಸೀತಿ.

ಗುತ್ತಿಲಜಾತಕಂ ತತಿಯಂ.

೨೪೪. ವಿಗತಿಚ್ಛಜಾತಕಂ (೨-೧೦-೪)

೧೮೮. ಯಂ ಪಸ್ಸತಿ ನ ತಂ ಇಚ್ಛತಿ, ಯಞ್ಚ ನ ಪಸ್ಸತಿ ತಂ ಕಿರಿಚ್ಛತಿ;

ಮಞ್ಞಾಮಿ ಚಿರಂ ಚರಿಸ್ಸತಿ, ನ ಹಿ ತಂ ಲಚ್ಛತಿ ಯಂ ಸ ಇಚ್ಛತಿ.

೧೮೯. ಯಂ ಲಭತಿ ನ ತೇನ ತುಸ್ಸತಿ, ಯಞ್ಚ ಪತ್ಥೇತಿ ಲದ್ಧಂ ಹೀಳೇತಿ;

ಇಚ್ಛಾ ಹಿ ಅನನ್ತಗೋಚರಾ, ವಿಗತಿಚ್ಛಾನ [ವೀತಿಚ್ಛಾನಂ (ಸೀ. ಪೀ.)] ನಮೋ ಕರೋಮಸೇತಿ.

ವಿಗತಿಚ್ಛ [ವೀತಿಚ್ಛ (ಸೀ. ಪೀ.)] ಜಾತಕಂ ಚತುತ್ಥಂ.

೨೪೫. ಮೂಲಪರಿಯಾಯಜಾತಕಂ (೨-೧೦-೫)

೧೯೦. ಕಾಲೋ ಘಸತಿ ಭೂತಾನಿ, ಸಬ್ಬಾನೇವ ಸಹತ್ತನಾ;

ಯೋ ಚ ಕಾಲಘಸೋ ಭೂತೋ, ಸ ಭೂತಪಚನಿಂ ಪಚಿ.

೧೯೧. ಬಹೂನಿ ನರಸೀಸಾನಿ, ಲೋಮಸಾನಿ ಬ್ರಹಾನಿ ಚ;

ಗೀವಾಸು ಪಟಿಮುಕ್ಕಾನಿ, ಕೋಚಿದೇವೇತ್ಥ ಕಣ್ಣವಾತಿ.

ಮೂಲಪರಿಯಾಯಜಾತಕಂ ಪಞ್ಚಮಂ.

೨೪೬. ಬಾಲೋವಾದಜಾತಕಂ (೨-೧೦-೬)

೧೯೨. ಹನ್ತ್ವಾ ಛೇತ್ವಾ [ಝತ್ವಾ (ಸೀ. ಪೀ.), ಘತ್ವಾ (ಸ್ಯಾ.)] ವಧಿತ್ವಾ ಚ, ದೇತಿ ದಾನಂ ಅಸಞ್ಞತೋ;

ಏದಿಸಂ ಭತ್ತಂ ಭುಞ್ಜಮಾನೋ, ಸ ಪಾಪಮುಪಲಿಮ್ಪತಿ [ಸ ಪಾಪೇನ ಉಪಲಿಪ್ಪತಿ (ಸೀ. ಪೀ.)].

೧೯೩. ಪುತ್ತದಾರಮ್ಪಿ ಚೇ ಹನ್ತ್ವಾ, ದೇತಿ ದಾನಂ ಅಸಞ್ಞತೋ;

ಭುಞ್ಜಮಾನೋಪಿ ಸಪ್ಪಞ್ಞೋ, ನ ಪಾಪಮುಪಲಿಮ್ಪತೀತಿ.

ಬಾಲೋವಾದಜಾತಕಂ ಛಟ್ಠಂ.

೨೪೭. ಪಾದಞ್ಜಲೀಜಾತಕಂ (೨-೧೦-೭)

೧೯೪. ಅದ್ಧಾ ಪಾದಞ್ಜಲೀ ಸಬ್ಬೇ, ಪಞ್ಞಾಯ ಅತಿರೋಚತಿ;

ತಥಾ ಹಿ ಓಟ್ಠಂ ಭಞ್ಜತಿ, ಉತ್ತರಿಂ ನೂನ ಪಸ್ಸತಿ.

೧೯೫. ನಾಯಂ ಧಮ್ಮಂ ಅಧಮ್ಮಂ ವಾ, ಅತ್ಥಾನತ್ಥಞ್ಚ ಬುಜ್ಝತಿ;

ಅಞ್ಞತ್ರ ಓಟ್ಠನಿಬ್ಭೋಗಾ, ನಾಯಂ ಜಾನಾತಿ ಕಿಞ್ಚನನ್ತಿ.

ಪಾದಞ್ಜಲೀಜಾತಕಂ ಸತ್ತಮಂ.

೨೪೮. ಕಿಂಸುಕೋಪಮಜಾತಕಂ (೨-೧೦-೮)

೧೯೬. ಸಬ್ಬೇಹಿ ಕಿಂಸುಕೋ ದಿಟ್ಠೋ, ಕಿಂನ್ವೇತ್ಥ ವಿಚಿಕಿಚ್ಛಥ;

ನ ಹಿ ಸಬ್ಬೇಸು ಠಾನೇಸು, ಸಾರಥೀ ಪರಿಪುಚ್ಛಿತೋ.

೧೯೭. ಏವಂ ಸಬ್ಬೇಹಿ ಞಾಣೇಹಿ, ಯೇಸಂ ಧಮ್ಮಾ ಅಜಾನಿತಾ;

ತೇ ವೇ ಧಮ್ಮೇಸು ಕಙ್ಖನ್ತಿ, ಕಿಂಸುಕಸ್ಮಿಂವ ಭಾತರೋತಿ.

ಕಿಂಸುಕೋಪಮಜಾತಕಂ ಅಟ್ಠಮಂ.

೨೪೯. ಸಾಲಕಜಾತಕಂ (೨-೧೦-೯)

೧೯೮. ಏಕಪುತ್ತಕೋ ಭವಿಸ್ಸಸಿ, ತ್ವಞ್ಚ ನೋ ಹೇಸ್ಸಸಿ ಇಸ್ಸರೋ ಕುಲೇ;

ಓರೋಹ ದುಮಸ್ಮಾ ಸಾಲಕ, ಏಹಿ ದಾನಿ ಘರಕಂ ವಜೇಮಸೇ.

೧೯೯. ನನು ಮಂ ಸುಹದಯೋತಿ [ನನು ಮಂ ಹದಯೇತಿ (ಸೀ. ಪೀ.)] ಮಞ್ಞಸಿ, ಯಞ್ಚ ಮಂ ಹನಸಿ ವೇಳುಯಟ್ಠಿಯಾ;

ಪಕ್ಕಮ್ಬವನೇ ರಮಾಮಸೇ, ಗಚ್ಛ ತ್ವಂ ಘರಕಂ ಯಥಾಸುಖನ್ತಿ.

ಸಾಲಕಜಾತಕಂ ನವಮಂ.

೨೫೦. ಕಪಿಜಾತಕಂ (೨-೧೦-೧೦)

೨೦೦. ಅಯಂ ಇಸೀ ಉಪಸಮಸಂಯಮೇ ರತೋ, ಸ ತಿಟ್ಠತಿ [ಸನ್ತಿಟ್ಠತಿ (ಸೀ. ಪೀ.)] ಸಿಸಿರಭಯೇನ ಅಟ್ಟಿತೋ;

ಹನ್ದ ಅಯಂ ಪವಿಸತುಮಂ ಅಗಾರಕಂ, ವಿನೇತು ಸೀತಂ ದರಥಞ್ಚ ಕೇವಲಂ.

೨೦೧. ನಾಯಂ ಇಸೀ ಉಪಸಮಸಂಯಮೇ ರತೋ, ಕಪೀ ಅಯಂ ದುಮವರಸಾಖಗೋಚರೋ;

ಸೋ ದೂಸಕೋ ರೋಸಕೋ ಚಾಪಿ ಜಮ್ಮೋ, ಸಚೇವಜೇಮಮ್ಪಿ [ಸಚೇ + ಆವಜೇ + ಇಮಮ್ಪಿ] ದೂಸೇಯ್ಯಗಾರನ್ತಿ [ದೂಸಯೇ ಘರನ್ತಿ (ಸೀ. ಸ್ಯಾ. ಪೀ.)].

ಕಪಿಜಾತಕಂ ದಸಮಂ.

ಸಿಙ್ಗಾಲವಗ್ಗೋ ದಸಮೋ.

ತಸ್ಸುದ್ದಾನಂ –

ಅಥ ರಾಜಾ ಸಿಙ್ಗಾಲವರೋ ಸುನಖೋ, ತಥಾ ಕೋಸಿಯ ಇಚ್ಛತಿ ಕಾಲಘಸೋ;

ಅಥ ದಾನವರೋಟ್ಠಪಿ ಸಾರಥಿನಾ, ಪುನಮ್ಬವನಞ್ಚ ಸಿಸಿರಕಪಿ ದಸಾತಿ.

ಅಥ ವಗ್ಗುದ್ದಾನಂ –

ದಳ್ಹಞ್ಚ ವಗ್ಗಂ ಅಪರೇನ ಸನ್ಥವಂ, ಕಲ್ಯಾಣವಗ್ಗಾಸದಿಸೋ ಚ ರೂಹಕಂ;

ನತಂದಳ್ಹ ಬೀರಣಥಮ್ಭಕಂ ಪುನ, ಕಾಸಾವುಪಾಹನ ಸಿಙ್ಗಾಲಕೇನ ದಸಾತಿ.

ದುಕನಿಪಾತಂ ನಿಟ್ಠಿತಂ.