೨. ದುಕನಿಪಾತೋ

೧. ದಳ್ಹವಗ್ಗೋ

೧೫೧. ರಾಜೋವಾದಜಾತಕಂ (೨-೧-೧)

೧. ದಳ್ಹಂ ದಳ್ಹಸ್ಸ ಖಿಪತಿ, ಬಲ್ಲಿಕೋ [ಮಲ್ಲಿಕೋ (ಸೀ. ಪೀ.)] ಮುದುನಾ ಮುದುಂ;

ಸಾಧುಮ್ಪಿ ಸಾಧುನಾ ಜೇತಿ, ಅಸಾಧುಮ್ಪಿ ಅಸಾಧುನಾ;

ಏತಾದಿಸೋ ಅಯಂ ರಾಜಾ, ಮಗ್ಗಾ ಉಯ್ಯಾಹಿ ಸಾರಥಿ.

೨. ಅಕ್ಕೋಧೇನ ಜಿನೇ ಕೋಧಂ, ಅಸಾಧುಂ ಸಾಧುನಾ ಜಿನೇ;

ಜಿನೇ ಕದರಿಯಂ ದಾನೇನ, ಸಚ್ಚೇನಾಲಿಕವಾದಿನಂ;

ಏತಾದಿಸೋ ಅಯಂ ರಾಜಾ, ಮಗ್ಗಾ ಉಯ್ಯಾಹಿ ಸಾರಥೀತಿ.

ರಾಜೋವಾದಜಾತಕಂ ಪಠಮಂ.

೧೫೨. ಅಸಮೇಕ್ಖಿತಕಮ್ಮನ್ತಂ, ತುರಿತಾಭಿನಿಪಾತಿನಂ.

ಸಾನಿ ಕಮ್ಮಾನಿ ತಪ್ಪೇನ್ತಿ, ಉಣ್ಹಂವಜ್ಝೋಹಿತಂ ಮುಖೇ.

೪. ಸೀಹೋ ಚ ಸೀಹನಾದೇನ, ದದ್ದರಂ ಅಭಿನಾದಯಿ;

ಸುತ್ವಾ ಸೀಹಸ್ಸ ನಿಗ್ಘೋಸಂ, ಸಿಙ್ಗಾಲೋ [ಸಿಗಾಲೋ (ಸೀ. ಸ್ಯಾ. ಪೀ.)] ದದ್ದರೇ ವಸಂ;

ಭೀತೋ ಸನ್ತಾಸಮಾಪಾದಿ, ಹದಯಞ್ಚಸ್ಸ ಅಪ್ಫಲೀತಿ.

ಸಿಙ್ಗಾಲಜಾತಕಂ [ಸಿಗಾಲಜಾತಕಂ (ಸೀ. ಸ್ಯಾ. ಪೀ.)] ದುತಿಯಂ.

೧೫೩. ಸೂಕರಜಾತಕಂ (೨-೧-೩)

೫. ಚತುಪ್ಪದೋ ಅಹಂ ಸಮ್ಮ, ತ್ವಮ್ಪಿ ಸಮ್ಮ ಚತುಪ್ಪದೋ;

ಏಹಿ ಸಮ್ಮ [ಸೀಹ (ಸೀ. ಪೀ.)] ನಿವತ್ತಸ್ಸು, ಕಿಂ ನು ಭೀತೋ ಪಲಾಯಸಿ.

೬. ಅಸುಚಿ ಪೂತಿಲೋಮೋಸಿ, ದುಗ್ಗನ್ಧೋ ವಾಸಿ ಸೂಕರ;

ಸಚೇ ಯುಜ್ಝಿತುಕಾಮೋಸಿ, ಜಯಂ ಸಮ್ಮ ದದಾಮಿ ತೇತಿ.

ಸೂಕರಜಾತಕಂ ತತಿಯಂ.

೧೫೪. ಉರಗಜಾತಕ (೨-೧-೪)

೭. ಇಧೂರಗಾನಂ ಪವರೋ ಪವಿಟ್ಠೋ, ಸೇಲಸ್ಸ ವಣ್ಣೇನ ಪಮೋಕ್ಖಮಿಚ್ಛಂ;

ಬ್ರಹ್ಮಞ್ಚ ವಣ್ಣಂ [ವಕ್ಕಂ (ಕ.)] ಅಪಚಾಯಮಾನೋ, ಬುಭುಕ್ಖಿತೋ ನೋ ವಿತರಾಮಿ [ವಿಸಹಾಮಿ (ಕ. ಸಿ. ಸ್ಯಾ. ಪೀ.)] ಭೋತ್ತುಂ.

೮. ಸೋ ಬ್ರಹ್ಮಗುತ್ತೋ ಚಿರಮೇವ ಜೀವ, ದಿಬ್ಯಾ ಚ ತೇ ಪಾತುಭವನ್ತು ಭಕ್ಖಾ;

ಯೋ ಬ್ರಹ್ಮವಣ್ಣಂ ಅಪಚಾಯಮಾನೋ, ಬುಭುಕ್ಖಿತೋ ನೋ ವಿತರಾಸಿ [ಸಬ್ಬತ್ಥಪಿ ಸಮಾನಂ] ಭೋತ್ತುನ್ತಿ.

ಉರಗಜಾತಕಂ ಚತುತ್ಥಂ.

೧೫೫. ಭಗ್ಗಜಾತಕಂ (೨-೧-೫)

೯. ಜೀವ ವಸ್ಸಸತಂ ಭಗ್ಗ [ಗಗ್ಗ (ಸೀ. ಪೀ.)], ಅಪರಾನಿ ಚ ವೀಸತಿಂ [ವೀಸತಿ (ಸ್ಯಾ. ಕ.)];

ಮಾ ಮಂ ಪಿಸಾಚಾ ಖಾದನ್ತು, ಜೀವ ತ್ವಂ ಸರದೋ ಸತಂ.

೧೦. ತ್ವಮ್ಪಿ ವಸ್ಸಸತಂ ಜೀವ, ಅಪರಾನಿ ಚ ವೀಸತಿಂ;

ವಿಸಂ ಪಿಸಾಚಾ ಖಾದನ್ತು, ಜೀವ ತ್ವಂ ಸರದೋ ಸತನ್ತಿ.

ಭಗ್ಗಜಾತಕಂ ಪಞ್ಚಮಂ.

೧೫೬. ಅಲೀನಚಿತ್ತಜಾತಕಂ (೨-೧-೬)

೧೧. ಅಲೀನಚಿತ್ತಂ ನಿಸ್ಸಾಯ, ಪಹಟ್ಠಾ ಮಹತೀ ಚಮೂ;

ಕೋಸಲಂ ಸೇನಾಸನ್ತುಟ್ಠಂ, ಜೀವಗ್ಗಾಹಂ ಅಗಾಹಯಿ.

೧೨. ಏವಂ ನಿಸ್ಸಯಸಮ್ಪನ್ನೋ, ಭಿಕ್ಖು ಆರದ್ಧವೀರಿಯೋ;

ಭಾವಯಂ ಕುಸಲಂ ಧಮ್ಮಂ, ಯೋಗಕ್ಖೇಮಸ್ಸ ಪತ್ತಿಯಾ;

ಪಾಪುಣೇ ಅನುಪುಬ್ಬೇನ, ಸಬ್ಬಸಂಯೋಜನಕ್ಖಯನ್ತಿ.

ಅಲೀನಚಿತ್ತಜಾತಕಂ ಛಟ್ಠಂ.

೧೫೭. ಗುಣಜಾತಕಂ (೨-೧-೭)

೧೩. ಯೇನ ಕಾಮಂ ಪಣಾಮೇತಿ, ಧಮ್ಮೋ ಬಲವತಂ ಮಿಗೀ;

ಉನ್ನದನ್ತೀ ವಿಜಾನಾಹಿ, ಜಾತಂ ಸರಣತೋ ಭಯಂ.

೧೪. ಅಪಿ ಚೇಪಿ ದುಬ್ಬಲೋ ಮಿತ್ತೋ, ಮಿತ್ತಧಮ್ಮೇಸು ತಿಟ್ಠತಿ;

ಸೋ ಞಾತಕೋ ಚ ಬನ್ಧು ಚ, ಸೋ ಮಿತ್ತೋ ಸೋ ಚ ಮೇ ಸಖಾ;

ದಾಠಿನಿ ಮಾತಿಮಞ್ಞಿತ್ಥೋ [ಮಞ್ಞಿವೋ (ಸ್ಯಾ.), ಮಞ್ಞವ್ಹೋ (ಕ.)], ಸಿಙ್ಗಾಲೋ ಮಮ ಪಾಣದೋತಿ.

ಗುಣಜಾತಕಂ ಸತ್ತಮಂ.

೧೫೮. ಸುಹನುಜಾತಕಂ (೨-೧-೮)

೧೫. ನಯಿದಂ ವಿಸಮಸೀಲೇನ, ಸೋಣೇನ ಸುಹನೂ ಸಹ;

ಸುಹನೂಪಿ ತಾದಿಸೋಯೇವ, ಯೋ ಸೋಣಸ್ಸ ಸಗೋಚರೋ.

೧೬. ಪಕ್ಖನ್ದಿನಾ ಪಗಬ್ಭೇನ, ನಿಚ್ಚಂ ಸನ್ದಾನಖಾದಿನಾ;

ಸಮೇತಿ ಪಾಪಂ ಪಾಪೇನ, ಸಮೇತಿ ಅಸತಾ ಅಸನ್ತಿ.

ಸುಹನುಜಾತಕಂ ಅಟ್ಠಮಂ.

೧೫೯. ಮೋರಜಾತಕಂ (೨-೧-೯)

೧೭. ಉದೇತಯಂ ಚಕ್ಖುಮಾ ಏಕರಾಜಾ, ಹರಿಸ್ಸವಣ್ಣೋ ಪಥವಿಪ್ಪಭಾಸೋ [ಪಠವಿಪ್ಪಭಾಸೋ (ಸೀ. ಸ್ಯಾ. ಪೀ.)];

ತಂ ತಂ ನಮಸ್ಸಾಮಿ ಹರಿಸ್ಸವಣ್ಣಂ ಪಥವಿಪ್ಪಭಾಸಂ, ತಯಾಜ್ಜ ಗುತ್ತಾ ವಿಹರೇಮು ದಿವಸಂ.

ಯೇ ಬ್ರಾಹ್ಮಣಾ ವೇದಗೂ ಸಬ್ಬಧಮ್ಮೇ, ತೇ ಮೇ ನಮೋ ತೇ ಚ ಮಂ ಪಾಲಯನ್ತು;

ನಮತ್ಥು ಬುದ್ಧಾನಂ [ಬುದ್ಧಾನ (?)] ನಮತ್ಥು ಬೋಧಿಯಾ, ನಮೋ ವಿಮುತ್ತಾನಂ [ವಿಮುತ್ತಾನ (?)] ನಮೋ ವಿಮುತ್ತಿಯಾ;

ಇಮಂ ಸೋ ಪರಿತ್ತಂ ಕತ್ವಾ, ಮೋರೋ ಚರತಿ ಏಸನಾ.

೧೮. ಅಪೇತಯಂ ಚಕ್ಖುಮಾ ಏಕರಾಜಾ, ಹರಿಸ್ಸವಣ್ಣೋ ಪಥವಿಪ್ಪಭಾಸೋ;

ತಂ ತಂ ನಮ್ಮಸ್ಸಾಮಿ ಹರಿಸ್ಸವಣ್ಣಂ ಪಥವಿಪ್ಪಭಾಸಂ, ತಯಾಜ್ಜ ಗುತ್ತಾ ವಿಹರೇಮು ರತ್ತಿಂ.

ಯೇ ಬ್ರಾಹ್ಮಣಾ ವೇದಗೂ ಸಬ್ಬಧಮ್ಮೇ, ತೇ ಮೇ ನಮೋ ತೇ ಚ ಮಂ ಪಾಲಯನ್ತು;

ನಮತ್ಥು ಬುದ್ಧಾನಂ ನಮತ್ಥು ಬೋಧಿಯಾ, ನಮೋ ವಿಮುತ್ತಾನಂ ನಮೋ ವಿಮುತ್ತಿಯಾ;

ಇಮಂ ಸೋ ಪರಿತ್ತಂ ಕತ್ವಾ, ಮೋರೋ ವಾಸಮಕಪ್ಪಯೀತಿ.

ಮೋರಜಾತಕಂ ನವಮಂ.

೧೬೦. ವಿನೀಲಜಾತಕಂ (೨-೧-೧೦)

೧೯. ಏವಮೇವ ನೂನ [ನು (ಕ.)] ರಾಜಾನಂ, ವೇದೇಹಂ ಮಿಥಿಲಗ್ಗಹಂ;

ಅಸ್ಸಾ ವಹನ್ತಿ ಆಜಞ್ಞಾ, ಯಥಾ ಹಂಸಾ ವಿನೀಲಕಂ.

೨೦. ವಿನೀಲ ದುಗ್ಗಂ ಭಜಸಿ, ಅಭೂಮಿಂ ತಾತ ಸೇವಸಿ;

ಗಾಮನ್ತಕಾನಿ [ಗಾಮನ್ತಿಕಾನಿ (ಸೀ.), ಗಾಮನ್ತರಾನಿ (ಕ.)] ಸೇವಸ್ಸು, ಏತಂ ಮಾತಾಲಯಂ ತವಾತಿ.

ವಿನೀಲಜಾತಕಂ ದಸಮಂ.

ದಳ್ಹವಗ್ಗೋ ಪಠಮೋ.

ತಸ್ಸುದ್ದಾನಂ –

ವರಬಲ್ಲಿಕ ದದ್ದರ ಸೂಕರಕೋ, ಉರಗೂತ್ತಮ ಪಞ್ಚಮಭಗ್ಗವರೋ;

ಮಹತೀಚಮು ಯಾವ ಸಿಙ್ಗಾಲವರೋ, ಸುಹನುತ್ತಮ ಮೋರ ವಿನೀಲಂ ದಸಾತಿ.

೨. ಸನ್ಥವವಗ್ಗೋ

೧೬೧. ಇನ್ದಸಮಾನಗೋತ್ತಜಾತಕಂ (೨-೨-೧)

೨೧. ನ ಸನ್ಥವಂ [ಸನ್ಧವಂ (ಕ.)] ಕಾಪುರಿಸೇನ ಕಯಿರಾ, ಅರಿಯೋ ಅನರಿಯೇನ ಪಜಾನಮತ್ಥಂ;

ಚಿರಾನುವುತ್ಥೋಪಿ ಕರೋತಿ ಪಾಪಂ, ಗಜೋ ಯಥಾ ಇನ್ದಸಮಾನಗೋತ್ತಂ.

೨೨. ಯಂ ತ್ವೇವ ಜಞ್ಞಾ ಸದಿಸೋ ಮಮನ್ತಿ, ಸೀಲೇನ ಪಞ್ಞಾಯ ಸುತೇನ ಚಾಪಿ;

ತೇನೇವ ಮೇತ್ತಿಂ ಕಯಿರಾಥ ಸದ್ಧಿಂ, ಸುಖೋ ಹವೇ ಸಪ್ಪುರಿಸೇನ ಸಙ್ಗಮೋತಿ.

ಇನ್ದಸಮಾನಗೋತ್ತಜಾತಕಂ ಪಠಮಂ.

೧೬೨. ಸನ್ಥವಜಾತಕಂ (೨-೨-೨)

೨೩. ನ ಸನ್ಥವಸ್ಮಾ ಪರಮತ್ಥಿ ಪಾಪಿಯೋ, ಯೋ ಸನ್ಥವೋ [ಸನ್ಧವೋ (ಕ.)] ಕಾಪುರಿಸೇನ ಹೋತಿ;

ಸನ್ತಪ್ಪಿತೋ ಸಪ್ಪಿನಾ ಪಾಯಸೇನ [ಪಾಯಾಸೇನ (ಕ.)], ಕಿಚ್ಛಾಕತಂ ಪಣ್ಣಕುಟಿಂ ಅದಯ್ಹಿ [ಅದಡ್ಢಹಿ (ಸೀ. ಸ್ಯಾ.), ಅದಟ್ಠಹಿ (ಪೀ.), ಅದದ್ದಹಿ (?)].

೨೪. ನ ಸನ್ಥವಸ್ಮಾ ಪರಮತ್ಥಿ ಸೇಯ್ಯೋ, ಯೋ ಸನ್ಥವೋ ಸಪ್ಪುರಿಸೇನ ಹೋತಿ;

ಸೀಹಸ್ಸ ಬ್ಯಗ್ಘಸ್ಸ ಚ ದೀಪಿನೋ ಚ, ಸಾಮಾ ಮುಖಂ ಲೇಹತಿ ಸನ್ಥವೇನಾತಿ.

ಸನ್ಥವಜಾತಕಂ ದುತಿಯಂ.

೧೬೩. ಸುಸೀಮಜಾತಕಂ (೨-೨-೩)

೨೫. ಕಾಳಾ ಮಿಗಾ ಸೇತದನ್ತಾ ತವೀಮೇ [ತವ ಇಮೇ (ಸೀ. ಸ್ಯಾ. ಪೀ.)], ಪರೋಸತಂ ಹೇಮಜಾಲಾಭಿಛನ್ನಾ [ಹೇಮಜಾಲಾಭಿಸಞ್ಛನ್ನಾ (ಸೀ.)];

ತೇ ತೇ ದದಾಮೀತಿ ಸುಸೀಮ ಬ್ರೂಸಿ, ಅನುಸ್ಸರಂ ಪೇತ್ತಿಪಿತಾಮಹಾನಂ.

೨೬. ಕಾಳಾ ಮಿಗಾ ಸೇತದನ್ತಾ ಮಮೀಮೇ [ಮಮ ಇಮೇ (ಸೀ. ಪೀ.)], ಪರೋಸತಂ ಹೇಮಜಾಲಾಭಿಚ್ಛನ್ನಾ;

ತೇ ತೇ ದದಾಮೀತಿ ವದಾಮಿ ಮಾಣವ, ಅನುಸ್ಸರಂ ಪೇತ್ತಿಪಿತಾಮಹಾನನ್ತಿ.

ಸುಸೀಮಜಾತಕಂ ತತಿಯಂ.

೧೬೪. ಗಿಜ್ಝಜಾತಕಂ (೨-೨-೪)

೨೭. ಯಂ ನು ಗಿಜ್ಝೋ ಯೋಜನಸತಂ, ಕುಣಪಾನಿ ಅವೇಕ್ಖತಿ;

ಕಸ್ಮಾ ಜಾಲಞ್ಚ ಪಾಸಞ್ಚ, ಆಸಜ್ಜಾಪಿ ನ ಬುಜ್ಝಸಿ.

೨೮. ಯದಾ ಪರಾಭವೋ ಹೋತಿ, ಪೋಸೋ ಜೀವಿತಸಙ್ಖಯೇ;

ಅಥ ಜಾಲಞ್ಚ ಪಾಸಞ್ಚ, ಆಸಜ್ಜಾಪಿ ನ ಬುಜ್ಝತೀತಿ.

ಗಿಜ್ಝಜಾತಕಂ ಚತುತ್ಥಂ.

೧೬೫. ನಕುಲಜಾತಕಂ (೨-೨-೫)

೨೯. ಸನ್ಧಿಂ ಕತ್ವಾ ಅಮಿತ್ತೇನ, ಅಣ್ಡಜೇನ ಜಲಾಬುಜ;

ವಿವರಿಯ ದಾಠಂ ಸೇಸಿ [ಸಯಸಿ (ಸೀ. ಸ್ಯಾ. ಪೀ.)], ಕುತೋ ತೇ ಭಯಮಾಗತಂ.

೩೦. ಸಙ್ಕೇಥೇವ [ಸಙ್ಕತೇವ (ಕ.)] ಅಮಿತ್ತಸ್ಮಿಂ, ಮಿತ್ತಸ್ಮಿಮ್ಪಿ ನ ವಿಸ್ಸಸೇ;

ಅಭಯಾ ಭಯಮುಪ್ಪನ್ನಂ, ಅಪಿ ಮೂಲಾನಿ ಕನ್ತತೀತಿ [ಮೂಲಂ ನಿಕನ್ತತೀತಿ (ಸೀ.)].

ನಕುಲಜಾತಕಂ ಪಞ್ಚಮಂ.

೧೬೬. ಉಪಸಾಳಕಜಾತಕಂ (೨-೨-೬)

೩೧. ಉಪಸಾಳಕನಾಮಾನಿ [ಉಪಸಾಳ್ಹಕನಾಮಾನಂ (ಸೀ. ಸ್ಯಾ. ಪೀ.)], ಸಹಸ್ಸಾನಿ ಚತುದ್ದಸ;

ಅಸ್ಮಿಂ ಪದೇಸೇ ದಡ್ಢಾನಿ, ನತ್ಥಿ ಲೋಕೇ ಅನಾಮತಂ.

೩೨. ಯಮ್ಹಿ ಸಚ್ಚಞ್ಚ ಧಮ್ಮೋ ಚ, ಅಹಿಂಸಾ ಸಂಯಮೋ ದಮೋ;

ಏತಂ ಅರಿಯಾ ಸೇವನ್ತಿ, ಏತಂ ಲೋಕೇ ಅನಾಮತನ್ತಿ.

ಉಪಸಾಳಕಜಾತಕಂ ಛಟ್ಠಂ.

೧೬೭. ಸಮಿದ್ಧಿಜಾತಕಂ (೨-೨-೭)

೩೩. ಅಭುತ್ವಾ ಭಿಕ್ಖಸಿ ಭಿಕ್ಖು, ನ ಹಿ ಭುತ್ವಾನ ಭಿಕ್ಖಸಿ;

ಭುತ್ವಾನ ಭಿಕ್ಖು ಭಿಕ್ಖಸ್ಸು, ಮಾ ತಂ ಕಾಲೋ ಉಪಚ್ಚಗಾ.

೩೪. ಕಾಲಂ ವೋಹಂ ನ ಜಾನಾಮಿ, ಛನ್ನೋ ಕಾಲೋ ನ ದಿಸ್ಸತಿ;

ತಸ್ಮಾ ಅಭುತ್ವಾ ಭಿಕ್ಖಾಮಿ, ಮಾ ಮಂ ಕಾಲೋ ಉಪಚ್ಚಗಾತಿ.

ಸಮಿದ್ಧಿಜಾತಕಂ ಸತ್ತಮಂ.

೧೬೮. ಸಕುಣಗ್ಘಿಜಾತಕಂ (೨-೨-೮)

೩೫. ಸೇನೋ ಬಲಸಾ ಪತಮಾನೋ, ಲಾಪಂ ಗೋಚರಠಾಯಿನಂ;

ಸಹಸಾ ಅಜ್ಝಪ್ಪತ್ತೋವ, ಮರಣಂ ತೇನುಪಾಗಮಿ.

೩೬. ಸೋಹಂ ನಯೇನ ಸಮ್ಪನ್ನೋ, ಪೇತ್ತಿಕೇ ಗೋಚರೇ ರತೋ;

ಅಪೇತಸತ್ತು ಮೋದಾಮಿ, ಸಮ್ಪಸ್ಸಂ ಅತ್ಥಮತ್ತನೋತಿ.

ಸಕುಣಗ್ಘಿಜಾತಕಂ ಅಟ್ಠಮಂ.

೧೬೯. ಅರಕಜಾತಕಂ (೨-೨-೯)

೩೭. ಯೋ ವೇ ಮೇತ್ತೇನ ಚಿತ್ತೇನ, ಸಬ್ಬಲೋಕಾನುಕಮ್ಪತಿ;

ಉದ್ಧಂ ಅಧೋ ಚ ತಿರಿಯಂ, ಅಪ್ಪಮಾಣೇನ ಸಬ್ಬಸೋ.

೩೮. ಅಪ್ಪಮಾಣಂ ಹಿತಂ ಚಿತ್ತಂ, ಪರಿಪುಣ್ಣಂ ಸುಭಾವಿತಂ;

ಯಂ ಪಮಾಣಕತಂ ಕಮ್ಮಂ, ನ ತಂ ತತ್ರಾವಸಿಸ್ಸತೀತಿ.

ಅರಕಜಾತಕಂ ನವಮಂ.

೧೭೦. ಕಕಣ್ಟಕಜಾತಕಂ (೨-೨-೧೦)

೩೯. ನಾಯಂ ಪುರೇ ಉಣ್ಣಮತಿ [ಉನ್ನಮತಿ (ಸ್ಯಾ.)], ತೋರಣಗ್ಗೇ ಕಕಣ್ಟಕೋ;

ಮಹೋಸಧ ವಿಜಾನಾಹಿ, ಕೇನ ಥದ್ಧೋ ಕಕಣ್ಟಕೋ.

೪೦. ಅಲದ್ಧಪುಬ್ಬಂ ಲದ್ಧಾನ, ಅಡ್ಢಮಾಸಂ ಕಕಣ್ಟಕೋ;

ಅತಿಮಞ್ಞತಿ ರಾಜಾನಂ, ವೇದೇಹಂ ಮಿಥಿಲಗ್ಗಹನ್ತಿ.

ಕಕಣ್ಟಕಜಾತಕಂ ದಸಮಂ.

ಸನ್ಥವವಗ್ಗೋ ದುತಿಯೋ.

ತಸ್ಸುದ್ದಾನಂ –

ಅಥ ಇನ್ದಸಮಾನ ಸಪಣ್ಣಕುಟಿ, ಸುಸಿಮುತ್ತಮ ಗಿಜ್ಝ ಜಲಾಬುಜಕೋ;

ಉಪಸಾಳಕ ಭಿಕ್ಖು ಸಲಾಪವರೋ, ಅಥ ಮೇತ್ತವರೋ ದಸಪುಣ್ಣಮತೀತಿ.

೩. ಕಲ್ಯಾಣವಗ್ಗೋ

೧೭೧. ಕಲ್ಯಾಣಧಮ್ಮಜಾತಕಂ (೨-೩-೧)

೪೧. ಕಲ್ಯಾಣಧಮ್ಮೋತಿ ಯದಾ ಜನಿನ್ದ, ಲೋಕೇ ಸಮಞ್ಞಂ ಅನುಪಾಪುಣಾತಿ;

ತಸ್ಮಾ ನ ಹಿಯ್ಯೇಥ [ಹೀಯೇಥ (ಸೀ.)] ನರೋ ಸಪಞ್ಞೋ, ಹಿರಿಯಾಪಿ ಸನ್ತೋ ಧುರಮಾದಿಯನ್ತಿ.

೪೨. ಸಾಯಂ ಸಮಞ್ಞಾ ಇಧ ಮಜ್ಜ ಪತ್ತಾ, ಕಲ್ಯಾಣಧಮ್ಮೋತಿ ಜನಿನ್ದ ಲೋಕೇ;

ತಾಹಂ ಸಮೇಕ್ಖಂ ಇಧ ಪಬ್ಬಜಿಸ್ಸಂ, ನ ಹಿ ಮತ್ಥಿ ಛನ್ದೋ ಇಧ ಕಾಮಭೋಗೇತಿ.

ಕಲ್ಯಾಣಧಮ್ಮಜಾತಕಂ ಪಠಮಂ.

೧೭೨. ದದ್ದರಜಾತಕಂ (೨-೩-೨)

೪೩. ಕೋ ನು ಸದ್ದೇನ ಮಹತಾ, ಅಭಿನಾದೇತಿ ದದ್ದರಂ;