೧೦. ಸೇರೀಸಕವಿಮಾನವಣ್ಣನಾ

ಸುಣೋಥ ಯಕ್ಖಸ್ಸ ಚ ವಾಣಿಜಾನ ಚಾತಿ ಸೇರೀಸಕವಿಮಾನಂ. ತಸ್ಸ ಕಾ ಉಪ್ಪತ್ತಿ? ಭಗವತಿ ಪರಿನಿಬ್ಬುತೇ ಆಯಸ್ಮಾ ಕುಮಾರಕಸ್ಸಪೋ ಪಞ್ಚಹಿ ಭಿಕ್ಖುಸತೇಹಿ ಸದ್ಧಿಂ ಸೇತಬ್ಯನಗರಂ ಸಮ್ಪತ್ತೋ. ತತ್ಥ ಪಾಯಾಸಿರಾಜಞ್ಞಂ ಅತ್ತನೋ ಸನ್ತಿಕಂ ಉಪಗತಂ ವಿಪರೀತಗ್ಗಾಹತೋ ವಿವೇಚೇತ್ವಾ ಸಮ್ಮಾದಸ್ಸನೇ ಪತಿಟ್ಠಾಪೇಸಿ. ಸೋ ತತೋ ಪಟ್ಠಾಯ ಪುಞ್ಞಪಸುತೋ ಹುತ್ವಾ ಸಮಣಬ್ರಾಹ್ಮಣಾನಂ ದಾನಂ ದೇನ್ತೋ ತತ್ಥ ಅಕತಪರಿಚಯತಾಯ ಅಸಕ್ಕಚ್ಚಂ ದಾನಂ ದತ್ವಾ ಅಪರಭಾಗೇ ಕಾಲಂ ಕತ್ವಾ ಚಾತುಮಹಾರಾಜಿಕಭವನೇ ಸುಞ್ಞೇ ಸೇರೀಸಕೇ ವಿಮಾನೇ ನಿಬ್ಬತ್ತಿ.

ಅತೀತೇ ಕಿರ ಕಸ್ಸಪಸ್ಸ ಭಗವತೋ ಕಾಲೇ ಏಕೋ ಖೀಣಾಸವತ್ಥೇರೋ ಅಞ್ಞತರಸ್ಮಿಂ ಗಾಮೇ ಪಿಣ್ಡಾಯ ಚರಿತ್ವಾ ಬಹಿಗಾಮೇ ದೇವಸಿಕಂ ಏಕಸ್ಮಿಂ ಪದೇಸೇ ಭತ್ತಕಿಚ್ಚಂ ಅಕಾಸಿ. ತಂ ದಿಸ್ವಾ ಏಕೋ ಗೋಪಾಲಕೋ ‘‘ಅಯ್ಯೋ ಸೂರಿಯಾತಪೇನ ಕಿಲಮತೀ’’ತಿ ಪಸನ್ನಚಿತ್ತೋ ಚತೂಹಿ ಸಿರೀಸಥಮ್ಭೇಹಿ ಸಾಖಾಮಣ್ಡಪಂ ಕತ್ವಾ ಅದಾಸಿ, ಮಣ್ಡಪಸ್ಸ ಸಮೀಪೇ ಸಿರೀಸರುಕ್ಖಂ ರೋಪೇಸೀತಿ ಚ ವದನ್ತಿ. ಸೋ ಕಾಲಂ ಕತ್ವಾ ತೇನೇವ ಪುಞ್ಞಕಮ್ಮೇನ ಚಾತುಮಹಾರಾಜಿಕೇಸು ನಿಬ್ಬತ್ತಿ, ತಸ್ಸ ಪುರಿಮಕಮ್ಮಸ್ಸ ಸೂಚಕಂ ವಿಮಾನದ್ವಾರೇ ಸಿರೀಸವನಂ ನಿಬ್ಬತ್ತಿ ವಣ್ಣಗನ್ಧಸಮ್ಪನ್ನೇಹಿ ಪುಪ್ಫೇಹಿ ಸಬ್ಬಕಾಲಂ ಉಪಸೋಭಮಾನಂ, ತೇನ ತಂ ವಿಮಾನಂ ‘‘ಸೇರೀಸಕ’’ನ್ತಿ ಪಞ್ಞಾಯಿತ್ಥ. ಸೋ ಚ ದೇವಪುತ್ತೋ ಏಕಂ ಬುದ್ಧನ್ತರಂ ದೇವೇಸು ಚೇವ ಮನುಸ್ಸೇಸು ಚ ಸಂಸರನ್ತೋ ಇಮಸ್ಮಿಂ ಬುದ್ಧುಪ್ಪಾದೇ ಯಸತ್ಥೇರಸ್ಸ ಚತೂಸು ವಿಮಲಾದೀಸು ಗಿಹಿಸಹಾಯೇಸು ಗವಮ್ಪತಿ ನಾಮ ಹುತ್ವಾ ಭಗವತೋ ಧಮ್ಮದೇಸನಾಯ ಅರಹತ್ತೇ ಪತಿಟ್ಠಿತೋ ಪುಬ್ಬಾಚಿಣ್ಣವಸೇನ ತಂ ಸುಞ್ಞವಿಮಾನಂ ದಿಸ್ವಾ ಅಭಿಣ್ಹಂ ದಿವಾವಿಹಾರಂ ಗಚ್ಛತಿ.

ಸೋ ಅಪರಭಾಗೇ ಪಾಯಾಸಿದೇವಪುತ್ತಂ ತತ್ಥ ದಿಸ್ವಾ ‘‘ಕೋಸಿ ತ್ವಂ, ಆವುಸೋ’’ತಿ ಪುಚ್ಛಿತ್ವಾ ತೇನ ‘‘ಅಹಂ, ಭನ್ತೇ, ಪಾಯಾಸಿರಾಜಞ್ಞೋ ಇಧೂಪಪನ್ನೋ’’ತಿ ವುತ್ತೇ ‘‘ನನು ತ್ವಂ ಮಿಚ್ಛಾದಿಟ್ಠಿಕೋ ವಿಪರೀತದಸ್ಸನೋ ಕಥಮಿಧೂಪಪನ್ನೋ’’ತಿ ಆಹ. ಅಥ ನಂ ಪಾಯಾಸಿದೇವಪುತ್ತೋ ‘‘ಅಯ್ಯೇನಮ್ಹಿ ಕುಮಾರಕಸ್ಸಪತ್ಥೇರೇನ ಮಿಚ್ಛಾದಸ್ಸನತೋ ವಿವೇಚಿತೋ, ಪುಞ್ಞಕಿರಿಯಾನಂ ಅಸಕ್ಕಚ್ಚಕಾರಿತಾಯ ಪನ ಸುಞ್ಞೇ ವಿಮಾನೇ ನಿಬ್ಬತ್ತೋ. ಸಾಧು, ಭನ್ತೇ, ಮನುಸ್ಸಲೋಕಂ ಗತಕಾಲೇ ಮಮ ಪರಿಜನಸ್ಸ ಆರೋಚೇಥ ‘ಪಾಯಾಸಿರಾಜಞ್ಞೋ ಅಸಕ್ಕಚ್ಚಂ ದಾನಂ ದತ್ವಾ ಸುಞ್ಞಂ ಸೇರೀಸಕವಿಮಾನಂ ಉಪಪನ್ನೋ, ತುಮ್ಹೇ ಪನ ಸಕ್ಕಚ್ಚಂ ಪುಞ್ಞಾನಿ ಕತ್ವಾ ತತ್ರೂಪಪತ್ತಿಯಾ ಚಿತ್ತಂ ಪಣಿದಹಥಾ’’ತಿ. ಥೇರೋ ತಸ್ಸಾನುಕಮ್ಪಾಯ ತಥಾ ಅಕಾಸಿ. ತೇಪಿ ಥೇರಸ್ಸ ವಚನಂ ಸುತ್ವಾ ತಥಾ ಚಿತ್ತಂ ಪಣಿಧಾಯ ಪುಞ್ಞಾನಿ ಕತ್ವಾ ಸೇರೀಸಕೇ ವಿಮಾನೇ ನಿಬ್ಬತ್ತಿಂಸು. ಸೇರೀಸಕದೇವಪುತ್ತಂ ಪನ ವೇಸ್ಸವಣಮಹಾರಾಜಾ ಮರುಭೂಮಿಯಂ ಛಾಯೂದಕರಹಿತೇ ಮಗ್ಗೇ ಮಗ್ಗಪಟಿಪನ್ನಾನಂ ಮನುಸ್ಸಾನಂ ಅಮನುಸ್ಸಪರಿಪನ್ಥ ಮೋಚನತ್ಥಂ ಮಗ್ಗರಕ್ಖಕಂ ಠಪೇಸಿ.

ಅಥ ಅಪರೇನ ಸಮಯೇನ ಅಙ್ಗಮಗಧವಾಸಿನೋ ವಾಣಿಜಾ ಸಕಟಸಹಸ್ಸಂ ಭಣ್ಡಸ್ಸ ಪೂರೇತ್ವಾ ಸಿನ್ಧುಸೋವೀರದೇಸಂ ಗಚ್ಛನ್ತಾ ಮರುಕನ್ತಾರೇ ದಿವಾ ಉಣ್ಹಭಯೇನ ಮಗ್ಗಂ ಅಪ್ಪಟಿಪಜ್ಜಿತ್ವಾ ರತ್ತಿಂ ನಕ್ಖತ್ತಸಞ್ಞಾಯ ಮಗ್ಗಂ ಪಟಿಪಜ್ಜಿಂಸು. ತೇ ಮಗ್ಗಮೂಳ್ಹಾ ಹುತ್ವಾ ಅಞ್ಞಂ ದಿಸಂ ಅಗಮಂಸು. ತೇಸಂ ಅನ್ತರೇ ಏಕೋ ಉಪಾಸಕೋ ಅಹೋಸಿ ಸದ್ಧೋ ಪಸನ್ನೋ ಸೀಲಸಮ್ಪನ್ನೋ ಅರಹತ್ತಪ್ಪತ್ತಿಯಾ ಉಪನಿಸ್ಸಯಸಮ್ಪನ್ನೋ ಮಾತಾಪಿತೂನಂ ಉಪಟ್ಠಾನತ್ಥಂ ವಣಿಜ್ಜಾಯ ಗತೋ. ತಂ ಅನುಗ್ಗಣ್ಹನ್ತೋ ಸೇರೀಸಕದೇವಪುತ್ತೋ ಸಹ ವಿಮಾನೇನ ಅತ್ತಾನಂ ದಸ್ಸೇಸಿ. ದಸ್ಸೇತ್ವಾ ಚ ಪನ ‘‘ಕಸ್ಮಾ ತುಮ್ಹೇ ಇಮಂ ಛಾಯೂದಕರಹಿತಂ ವಾಲುಕಾಕನ್ತಾರಂ ಪಟಿಪನ್ನಾ’’ತಿ ಪುಚ್ಛಿ. ತೇ ಚಸ್ಸ ತತ್ಥ ಅತ್ತನೋ ಆಗತಪ್ಪಕಾರಂ ಕಥೇಸುಂ, ತದತ್ಥದೀಪನಾ ದೇವಪುತ್ತಸ್ಸ ವಾಣಿಜಾನಞ್ಚ ವಚನಪಟಿವಚನಗಾಥಾ ಹೋನ್ತಿ. ಆದಿತೋ ಪನ ದ್ವೇ ಗಾಥಾ ತಾಸಂ ಸಮ್ಬನ್ಧದಸ್ಸನತ್ಥಂ ಧಮ್ಮಸಙ್ಗಾಹಕೇಹಿ ಠಪಿತಾ –

೧೨೨೮. ‘‘ಸುಣೋಥ ಯಕ್ಖಸ್ಸ ಚ ವಾಣಿಜಾನ ಚ, ಸಮಾಗಮೋ ಯತ್ಥ ತದಾ ಅಹೋಸಿ;

ಯಥಾ ಕಥಂ ಇತರಿತರೇನ ಚಾಪಿ, ಸುಭಾಸಿತಂ ತಞ್ಚ ಸುಣಾಥ ಸಬ್ಬೇ.

೧೨೨೯. ‘‘ಯೋ ಸೋ ಅಹು ರಾಜಾ ಪಾಯಾಸಿ ನಾಮ, ಭುಮ್ಮಾನಂ ಸಹಬ್ಯಗತೋ ಯಸಸ್ಸೀ;

ಸೋ ಮೋದಮಾನೋವ ಸಕೇ ವಿಮಾನೇ, ಅಮಾನುಸೋ ಮಾನುಸೇ ಅಜ್ಝಭಾಸೀ’’ತಿ.

೧೨೨೮-೯. ತತ್ಥ ಸುಣೋಥಾತಿ ಸವನಾಣತ್ತಿಕವಚನಂ. ಯಂ ಮಯಂ ಇದಾನಿ ಭಣಾಮ, ತಂ ಸುಣೋಥಾತಿ. ಯಕ್ಖಸ್ಸಾತಿ ದೇವಸ್ಸ. ದೇವೋ ಹಿ ಮನುಸ್ಸಾನಂ ಏಕಚ್ಚಾನಂ ದೇವಾನಞ್ಚ ಪೂಜನೀಯಭಾವತೋ ‘‘ಯಕ್ಖೋ’’ತಿ ವುಚ್ಚತಿ. ಅಪಿಚ ಸಕ್ಕೋಪಿ ಚತ್ತಾರೋ ಮಹಾರಾಜಾನೋಪಿ ವೇಸ್ಸವಣಪಾರಿಸಜ್ಜಾಪಿ ಪುರಿಸೋಪಿ ‘‘ಯಕ್ಖೋ’’ತಿ ವುಚ್ಚತಿ. ತಥಾ ಹಿ ‘‘ಅತಿಬಾಳ್ಹಂ ಖೋ ಅಯಂ ಯಕ್ಖೋ ಪಮತ್ತೋ ವಿಹರತಿ, ಯಂನೂನಾಹಂ ಇಮಂ ಯಕ್ಖಂ ಸಂವೇಜೇಯ್ಯ’’ನ್ತಿಆದೀಸು (ಮ. ನಿ. ೧.೩೯೩) ಸಕ್ಕೋ ‘‘ಯಕ್ಖೋ’’ತಿ ವುತ್ತೋ. ‘‘ಚತ್ತಾರೋ ಯಕ್ಖಾ ಖಗ್ಗಹತ್ಥಾ’’ತಿಆದೀಸು ಮಹಾರಾಜಾನೋ. ‘‘ಸನ್ತಿ ಹಿ, ಭನ್ತೇ, ಉಳಾರಾ ಯಕ್ಖಾ ಭಗವತೋ ಅಪ್ಪಸನ್ನಾ’’ತಿಆದೀಸು (ದೀ. ನಿ. ೩.೨೭೬) ವೇಸ್ಸವಣಪಾರಿಸಜ್ಜಾ. ‘‘ಏತ್ತಾವತಾ ಯಕ್ಖಸ್ಸ ಸುದ್ಧೀ’’ತಿಆದೀಸು (ಸು. ನಿ. ೪೮೨) ಪುರಿಸೋ. ಇಧ ಪನ ವೇಸ್ಸವಣಪಾರಿಸಜ್ಜೋ ಅಧಿಪ್ಪೇತೋ. ವಾಣಿಜಾನ ಚಾತಿ ಗಾಥಾಬನ್ಧಸುಖತ್ಥಂ ಅನುನಾಸಿಕಲೋಪಂ ಕತ್ವಾ ವುತ್ತಂ. ಸಮಾಗಮೋತಿ ಸಮೋಧಾನಂ. ಯತ್ಥಾತಿ ಯಸ್ಮಿಂ ವಣ್ಣುಪಥೇ. ತದಾತಿ ತಸ್ಮಿಂ ಮಗ್ಗಮೂಳ್ಹಾ ಹುತ್ವಾ ಗಮನಕಾಲೇ. ಇತರಿತರೇನ ಚಾಪೀತಿ ಇತರೀತರಞ್ಚಾಪಿ, ಇದಂ ಯಥಾತಿ ಇಮಿನಾ ಯೋಜೇತಬ್ಬಂ. ಅಯಞ್ಹೇತ್ಥ ಅತ್ಥೋ – ಸೇರೀಸಕದೇವಪುತ್ತಸ್ಸ ವಾಣಿಜಾನಞ್ಚ ತದಾ ಯತ್ಥ ಸಮಾಗಮೋ ಅಹೋಸಿ, ತಂ ಸುಣೋಥ, ಯಥಾ ವಾಪಿ ತೇಹಿ ಅಞ್ಞಮಞ್ಞಂ ಸುಭಾಸಿತಂ ಸುಲಪಿತಂ ಕಥಂ ಪವತ್ತಿತಂ, ತಞ್ಚ ಸಬ್ಬೇ ಓಹಿತಚಿತ್ತಾ ಸುಣಾಥಾತಿ. ಭುಮ್ಮಾನನ್ತಿ ಭುಮ್ಮದೇವಾನಂ.

ಇದಾನಿ ಯಕ್ಖಸ್ಸ ಪುಚ್ಛಾಗಾಥಾಯೋ ಹೋನ್ತಿ –

೧೨೩೦. ‘‘ವಙ್ಕೇ ಅರಞ್ಞೇ ಅಮನುಸ್ಸಟ್ಠಾನೇ, ಕನ್ತಾರೇ ಅಪ್ಪೋದಕೇ ಅಪ್ಪಭಕ್ಖೇ;

ಸುದುಗ್ಗಮೇ ವಣ್ಣುಪಥಸ್ಸ ಮಜ್ಝೇ, ವಙ್ಕಂಭಯಾ ನಟ್ಠಮನಾ ಮನುಸ್ಸಾ.

೧೨೩೧. ‘‘ನಯಿಧ ಫಲಾ ಮೂಲಮಯಾ ಚ ಸನ್ತಿ, ಉಪಾದಾನಂ ನತ್ಥಿ ಕುತೋಧ ಭಕ್ಖೋ;

ಅಞ್ಞತ್ರ ಪಂಸೂಹಿ ಚ ವಾಲುಕಾಹಿ ಚ, ತತ್ತಾಹಿ ಉಣ್ಹಾಹಿ ಚ ದಾರುಣಾಹಿ ಚ.

೧೨೩೨. ‘‘ಉಜ್ಜಙ್ಗಲಂ ತತ್ತಮಿವಂ ಕಪಾಲಂ, ಅನಾಯಸಂ ಪರಲೋಕೇನ ತುಲ್ಯಂ;

ಲುದ್ದಾನಮಾವಾಸಮಿದಂ ಪುರಾಣಂ, ಭೂಮಿಪ್ಪದೇಸೋ ಅಭಿಸತ್ತರೂಪೋ.

೧೨೩೩. ‘‘ಅಥ ತುಮ್ಹೇ ಕೇನ ವಣ್ಣೇನ, ಕಿಮಾಸಮಾನಾ ಇಮಂ ಪದೇಸಞ್ಹಿ;

ಅನುಪವಿಟ್ಠಾ ಸಹಸಾ ಸಮೇಚ್ಚ, ಲೋಭಾ ಭಯಾ ಅಥ ವಾ ಸಮ್ಪಮೂಳ್ಹಾ’’ತಿ.

೧೨೩೦. ತತ್ಥ ವಙ್ಕೇತಿ ಸಂಸಯಟ್ಠಾನೇ. ಯತ್ಥ ಪವಿಟ್ಠಾನಂ ‘‘ಜೀವಿಸ್ಸಾಮ ನು ಖೋ, ಮರಿಸ್ಸಾಮ ನು ಖೋ’’ತಿ ಜೀವಿತೇ ಸಂಸಯೋ ಹೋತಿ, ತಾದಿಸೇ ಅರಞ್ಞೇ. ಅಮನುಸ್ಸಟ್ಠಾನೇತಿ ಅಮನುಸ್ಸಾನಂ ಪಿಸಾಚಾದೀನಂ ಸಞ್ಚರಣಟ್ಠಾನೇ, ಮನುಸ್ಸಾನಂ ವಾ ಅಗೋಚರಟ್ಠಾನೇ. ಕನ್ತಾರೇತಿ ನಿರುದಕೇ ಇರಿಣೇ, ಕಂ ತಾರೇನ್ತಿ ನಯನ್ತಿ ಏತ್ಥಾತಿ ಹಿ ಕನ್ತಾರೋ, ಉದಕಂ ಗಹೇತ್ವಾ ತರಿತಬ್ಬಟ್ಠಾನಂ. ತೇನಾಹ ‘‘ಅಪ್ಪೋದಕೇ’’ತಿ. ಅಪ್ಪ-ಸದ್ದೋ ಹೇತ್ಥ ಅಭಾವತ್ಥೋ ‘‘ಅಪ್ಪಿಚ್ಛೋ ಅಪ್ಪನಿಗ್ಘೋಸೋ’’ತಿಆದೀಸು (ಅ. ನಿ. ೮.೨೩; ಚೂಳವ. ೪೫೬) ವಿಯ. ವಣ್ಣುಪಥಸ್ಸ ಮಜ್ಝೇತಿ ವಾಲುಕಾಕನ್ತಾರಮಜ್ಝೇತಿ ಅತ್ಥೋ. ವಙ್ಕಂಭಯಾತಿ ವಙ್ಕೇಹಿ ಭೀತಾ. ವಙ್ಕೇಹಿ ಭಯಂ ಏತೇಸನ್ತಿ ‘‘ವಙ್ಕಭಯಾ’’ತಿ ವತ್ತಬ್ಬೇ ಗಾಥಾಸುಖತ್ಥಂ ಸಾನುನಾಸಿಕಂ ಕತ್ವಾ ‘‘ವಙ್ಕಂಭಯಾ’’ತಿ ವುತ್ತಂ. ಇದಞ್ಚ ವಾಲುಕಾಕನ್ತಾರಪವೇಸನತೋ ಪುಬ್ಬೇ ತೇಸಂ ಉಪ್ಪನ್ನಭಯಂ ಸನ್ಧಾಯ ವುತ್ತಂ. ನಟ್ಠಮನಾತಿ ಮಗ್ಗಸತಿವಿಪ್ಪವಾಸೇನ ನಟ್ಠಮಾನಸಾ, ಮಗ್ಗಮೂಳ್ಹಾತಿ ಅತ್ಥೋ. ಮನುಸ್ಸಾತಿ ತೇಸಂ ಆಲಪನಂ.

೧೨೩೧. ಇಧಾತಿ ಇಮಸ್ಮಿಂ ಮರುಕನ್ತಾರೇ. ಫಲಾತಿ ಅಮ್ಬಜಮ್ಬುತಾಲನಾಳಿಕೇರಾದಿಫಲಾನಿ ನ ಸನ್ತೀತಿ ಯೋಜನಾ. ಮೂಲಮಯಾ ಚಾತಿ ಮೂಲಾನಿಯೇವ ಮೂಲಮಯಾ, ವಲ್ಲಿಕನ್ದಾದೀನಿ ಸನ್ಧಾಯ ವದತಿ. ಉಪಾದಾನಂ ನತ್ಥೀತಿ ಕಿಞ್ಚಾಪಿ ಕಿಞ್ಚಿ ಭಕ್ಖಂ ನತ್ಥಿ, ಉಪಾದಾನಂ ವಾ ಇನ್ಧನಂ, ಅಗ್ಗಿಸ್ಸ ಇನ್ಧನಮತ್ತಮ್ಪಿ ನತ್ಥಿ, ಕುತೋ ಕೇನ ಕಾರಣೇನ ಇಧ ಮರುಕನ್ತಾರೇ ಭಕ್ಖೋ ಸಿಯಾತಿ ಅತ್ಥೋ. ಯಂ ಪನ ಅತ್ಥಿ ತತ್ಥ, ತಂ ದಸ್ಸೇತುಂ ‘‘ಅಞ್ಞತ್ರ ಪಂಸೂಹೀ’’ತಿಆದಿ ವುತ್ತಂ.

೧೨೩೨. ಉಜ್ಜಙ್ಗಲನ್ತಿ ಜಙ್ಗಲಂ ವುಚ್ಚತಿ ಲೂಖಧೂಸರೋ ಅನುದಕೋ ಭೂಮಿಪ್ಪದೇಸೋ, ತಂ ಪನ ಠಾನಂ ಜಙ್ಗಲತೋಪಿ ಉಕ್ಕಂಸೇನ ಜಙ್ಗಲನ್ತಿ ಆಹ ‘‘ಉಜ್ಜಙ್ಗಲ’’ನ್ತಿ. ತೇನಾಹ ‘‘ತತ್ತಮಿವಂ ಕಪಾಲ’’ನ್ತಿ, ತತ್ತಂ ಅಯೋಕಪಾಲಸದಿಸನ್ತಿ ಅತ್ಥೋ. ಗಾಥಾಸುಖತ್ಥಞ್ಚೇತ್ಥ ಸಾನುನಾಸಿಕಂ ಕತ್ವಾ ವುತ್ತಂ, ತತ್ತಮಿವಇಚ್ಚೇವ ದಟ್ಠಬ್ಬಂ. ಅನಾಯಸನ್ತಿ ನತ್ಥಿ ಏತ್ಥ ಆಯೋ ಸುಖನ್ತಿ ಅನಾಯಂ, ತತೋ ಏವ ಜೀವಿತಂ ಸೀಯತಿ ವಿನಾಸೇತೀತಿ ಅನಾಯಸಂ. ಅಥ ವಾ ನ ಆಯಸನ್ತಿ ಅನಾಯಸಂ. ಪರಲೋಕೇನಾತಿ ನರಕೇನ ತುಲ್ಯಂ. ನರಕಞ್ಹಿ ಸತ್ತಾನಂ ಏಕನ್ತಾನತ್ಥತಾಯ ಪರಭೂತೋ ಪಟಿಸತ್ತುಭೂತೋ ಲೋಕೋತಿ ವಿಸೇಸತೋ ‘‘ಪರಲೋಕೋ’’ತಿ ವುಚ್ಚತಿ, ಸಮನ್ತತೋ ಅಯೋಮಯತ್ತಾ ಆಯಸಞ್ಚ, ಇದಂ ಪನ ತದಭಾವತೋ ಅನಾಯಸಂ, ಮಹತೋ ದುಕ್ಖಸ್ಸ ಉಪ್ಪತ್ತಿಟ್ಠಾನತಾಯ ಪರಲೋಕಸದಿಸನ್ತಿ ದಸ್ಸೇತಿ, ‘‘ಅನಸ್ಸಯ’’ನ್ತಿ ಚ ಕೇಚಿ ಪಠನ್ತಿ, ಸುಖಸ್ಸ ಅಪ್ಪತಿಟ್ಠಾನಭೂತನ್ತಿ ಅತ್ಥೋ. ಲುದ್ದಾನಮಾವಾಸಮಿದಂ ಪುರಾಣನ್ತಿ ಇದಂ ಠಾನಂ ಚಿರಕಾಲತೋ ಪಟ್ಠಾಯ ಲುದ್ದಾನಂ ದಾರುಣಾನಂ ಪಿಸಾಚಾದೀನಂ ಆವಾಸಭೂತಂ. ಅಭಿಸತ್ತರೂಪೋತಿ ‘‘ಏವಂ ಲೂಖೋ ಘೋರಾಕಾರೋ ಹೋತೂ’’ತಿ ಪೋರಾಣೇಹಿ ಇಸೀಹಿ ಸಪಿತಸದಿಸೋ, ದಿನ್ನಸಪೋ ವಿಯಾತಿ ಅತ್ಥೋ.

೧೨೩೩. ಕೇನ ವಣ್ಣೇನಾತಿ ಕೇನ ಕಾರಣೇನ. ಕಿಮಾಸಮಾನಾತಿ ಕಿಂ ಪಚ್ಚಾಸೀಸನ್ತಾ. ಹೀತಿ ನಿಪಾತಮತ್ತಂ. ‘‘ಪದೇಸಮ್ಪೀ’’ತಿ ಚ ಪಠನ್ತಿ, ಇಮಮ್ಪಿ ನಾಮ ಪದೇಸನ್ತಿ ಅತ್ಥೋ. ಸಹಸಾ ಸಮೇಚ್ಚಾತಿ ಸಹಸಾ ಆದೀನವಾನಿಸಂಸೇ ಅವಿಚಾರೇತ್ವಾ ಸಮವಾಯೇನ ಅನುಪವಿಟ್ಠಾ ಸಪ್ಪವಿಟ್ಠಾ. ಲೋಭಾ ಭಯಾ ಅಥ ವಾ ಕೇನಚಿ ಅನತ್ಥಕಾಮೇನ ಪಲೋಭಿತಾ ಲೋಭತೋ ಕೇನಚಿ ಅಮನುಸ್ಸಾದಿನಾ ಪರಿಪಾತಿತಾ ಭಯಾ ವಾ. ಅಥ ವಾ ಸಮ್ಪಮೂಳ್ಹಾತಿ ಮಗ್ಗವಿಪ್ಪನಟ್ಠಾ ಇಮಂ ಪದೇಸಂ ಅನುಪವಿಟ್ಠಾತಿ ಯೋಜನಾ.

ಇದಾನಿ ವಾಣಿಜಾ ಆಹಂಸು –

೧೨೩೪. ‘‘ಮಗಧೇಸು ಅಙ್ಗೇಸು ಚ ಸತ್ಥವಾಹಾ, ಆರೋಪಯಿತ್ವಾ ಪಣಿಯಂ ಪುಥುತ್ತಂ;

ತೇ ಯಾಮಸೇ ಸಿನ್ಧುಸೋವೀರಭೂಮಿಂ, ಧನತ್ಥಿಕಾ ಉದ್ದಯಂ ಪತ್ಥಯಾನಾ.

೧೨೩೫. ‘‘ದಿವಾ ಪಿಪಾಸಂನಧಿವಾಸಯನ್ತಾ, ಯೋಗ್ಗಾನುಕಮ್ಪಞ್ಚ ಸಮೇಕ್ಖಮಾನಾ;

ಏತೇನ ವೇಗೇನ ಆಯಾಮ ಸಬ್ಬೇ, ರತ್ತಿಂ ಮಗ್ಗಂ ಪಟಿಪನ್ನಾ ವಿಕಾಲೇ.

೧೨೩೬. ‘‘ತೇ ದುಪ್ಪಯಾತಾ ಅಪರದ್ಧಮಗ್ಗಾ, ಅನ್ಧಾಕುಲಾ ವಿಪ್ಪನಟ್ಠಾ ಅರಞ್ಞೇ;

ಸುದುಗ್ಗಮೇ ವಣ್ಣುಪಥಸ್ಸ ಮಜ್ಝೇ, ದಿಸಂ ನ ಜಾನಾಮ ಪಮೂಳ್ಹಚಿತ್ತಾ.

೧೨೩೭. ‘‘ಇದಞ್ಚ ದಿಸ್ವಾನ ಅದಿಟ್ಠಪುಬ್ಬಂ, ವಿಮಾನಸೇಟ್ಠಞ್ಚ ತವಞ್ಚ ಯಕ್ಖ;

ತತುತ್ತರಿಂ ಜೀವಿತಮಾಸಮಾನಾ, ದಿಸ್ವಾ ಪತೀತಾ ಸುಮನಾ ಉದಗ್ಗಾ’’ತಿ.

೧೨೩೪. ತತ್ಥ ಮಗಧೇಸು ಅಙ್ಗೇಸು ಚ ಸತ್ಥವಾಹಾತಿ ಮಗಧರಟ್ಠೇ ಚ ಅಙ್ಗರಟ್ಠೇ ಚ ಜಾತಾ ಸಂವಡ್ಢಾ ತಂನಿವಾಸಿನೋ ಸತ್ಥೇ ಸತ್ಥಸ್ಸ ಚ ವಾಹನಕಾ ಸತ್ಥಕಾ ಚೇವ ಸತ್ಥಸಾಮಿಕಾ ಚ. ಪಣಿಯನ್ತಿ ಭಣ್ಡಂ. ತೇತಿ ತೇ ಮಯಂ. ಯಾಮಸೇತಿ ಗಚ್ಛಾಮ. ಸಿನ್ಧುಸೋವೀರಭೂಮಿನ್ತಿ ಸಿನ್ಧುದೇಸಂ ಸೋವೀರದೇಸಞ್ಚ. ಉದ್ದಯನ್ತಿ ಆನಿಸಂಸಂ ಅತಿರೇಕಲಾಭಂ.

೧೨೩೫. ಅನಧಿವಾಸಯನ್ತಾತಿ ಅಧಿವಾಸೇತುಂ ಅಸಕ್ಕೋನ್ತಾ. ಯೋಗ್ಗಾನುಕಮ್ಪನ್ತಿ ಗೋಣಾದೀನಂ ಸತ್ತಾನಂ ಅನುಗ್ಗಹಂ. ಏತೇನ ವೇಗೇನಾತಿ ಇಮಿನಾ ಜವೇನ, ಯೇನ ತವ ದಸ್ಸನತೋ ಪುಬ್ಬೇ ಆಯಾಮ ಆಗತಮ್ಹ. ರತ್ತಿಂ ಮಗ್ಗಂ ಪಟಿಪನ್ನಾತಿ ರತ್ತಿಯಂ ಮಗ್ಗಂ ಪಟಿಪನ್ನಾ. ವಿಕಾಲೇತಿ ಅಕಾಲೇ ಅವೇಲಾಯಂ.

೧೨೩೬. ದುಪ್ಪಯಾತಾತಿ ದುಟ್ಠು ಪಯಾತಾ ಅಪಥೇ ಗತಾ, ತತೋ ಏವ ಅಪರದ್ಧಮಗ್ಗಾ. ಅನ್ಧಾಕುಲಾತಿ ಅನ್ಧಾ ವಿಯ ಆಕುಲಾ, ಮಗ್ಗಜಾನನಸಮತ್ಥಸ್ಸ ಪಞ್ಞಾಚಕ್ಖುನೋ ಅಭಾವೇನ ಅನ್ಧಾ, ತತೋ ಏವ ಆಕುಲಾ, ವಿಪ್ಪನಟ್ಠಾ ಚ ಮಗ್ಗಸಮ್ಮೂಳ್ಹತಾಯ. ದಿಸನ್ತಿ ಗನ್ತಬ್ಬದಿಸಂ, ಯಸ್ಸಂ ದಿಸಾಯಂ ಸಿನ್ಧುಸೋವೀರದೇಸೋ, ತಂ ದಿಸಂ. ಪಮೂಳ್ಹಚಿತ್ತಾತಿ ದಿಸಾಸಂಸಯಸುಮೂಳ್ಹಚಿತ್ತಾ.

೧೨೩೭. ತವಞ್ಚಾತಿ ತುವಞ್ಚ. ಯಕ್ಖಾತಿ ಆಲಪನಂ. ತತುತ್ತರಿಂ ಜೀವಿತಮಾಸಮಾನಾತಿ ಯೋ ‘‘ಇತೋ ಪರಂ ಅಮ್ಹಾಕಂ ಜೀವಿತಂ ನತ್ಥೀ’’ತಿ ಜೀವಿತಸಂಸಯೋ ಉಪ್ಪನ್ನೋ, ಇದಾನಿ ತತೋ ಉತ್ತರಿಮ್ಪಿ ಜೀವಿತಂ ಆಸೀಸನ್ತಾ. ದಿಸ್ವಾತಿ ದಸ್ಸನಹೇತು. ಪತೀತಾತಿ ಪಹಟ್ಠಾ. ಸುಮನಾತಿ ಸೋಮನಸ್ಸಪ್ಪತ್ತಾ. ಉದಗ್ಗಾತಿ ಉದಗ್ಗಾಯ ಪೀತಿಯಾ ಉದಗ್ಗಚಿತ್ತಾ.

ಏವಂ ವಾಣಿಜೇಹಿ ಅತ್ತನೋ ಪವತ್ತಿಯಾ ಪಕಾಸಿತಾಯ ಪುನ ದೇವಪುತ್ತೋ ದ್ವೀಹಿ ಗಾಥಾಹಿ ಪುಚ್ಛಿ –

೧೨೩೮. ‘‘ಪಾರಂ ಸಮುದ್ದಸ್ಸ ಇಮಞ್ಚ ವಣ್ಣುಂ, ವೇತ್ತಾಚರಂ ಸಙ್ಕುಪಥಞ್ಚ ಮಗ್ಗಂ;

ನದಿಯೋ ಪನ ಪಬ್ಬತಾನಞ್ಚ ದುಗ್ಗಾ, ಪುಥುದ್ದಿಸಾ ಗಚ್ಛಥ ಭೋಗಹೇತು.

೧೨೩೯. ‘‘ಪಕ್ಖನ್ದಿಯಾನ ವಿಜಿತಂ ಪರೇಸಂ, ವೇರಜ್ಜಕೇ ಮಾನುಸೇ ಪೇಕ್ಖಮಾನಾ;

ಯಂ ವೋ ಸುತಂ ವಾ ಅಥ ವಾಪಿ ದಿಟ್ಠಂ, ಅಚ್ಛೇರಕಂ ತಂ ವೋ ಸುಣೋಮ ತಾತಾ’’ತಿ.

ತಸ್ಸತ್ಥೋ – ಪಾರಂ ಸಮುದ್ದಸ್ಸಾತಿ ಸಮುದ್ದಸ್ಸ ಪರತೀರಂ, ಇಮಞ್ಚ ಈದಿಸಂ, ವಣ್ಣುಂ ವಣ್ಣುಪಥಂ ವೇತ್ತಲತಾ ಬನ್ಧಿತ್ವಾ ಆಚರಿತಬ್ಬತೋ ವೇತ್ತಾಚರಂ ಮಗ್ಗಂ, ಸಙ್ಕುಕೇ ಖಾಣುಕೇ ಕೋಟ್ಟೇತ್ವಾ ಗನ್ತಬ್ಬತೋ ಸಙ್ಕುಪಥಂ ಮಗ್ಗಂ, ನದಿಯೋ ಪನ ಚನ್ದಭಾಗಾದಿಕಾ, ಪಬ್ಬತಾನಞ್ಚ ವಿಸಮಪ್ಪದೇಸಾತಿ ಏವಂ ದುಗ್ಗಾ ಪುಥುದ್ದಿಸಾ ಭೋಗನಿಮಿತ್ತಂ ಗಚ್ಛಥ, ಏವಂ ಗಚ್ಛನ್ತಾ ಚ ಪಕ್ಖನ್ದಿಯಾನ ಪಕ್ಖನ್ದಿತ್ವಾ ಅನುಪವಿಸಿತ್ವಾ, ಪರೇಸಂ ರಾಜೂನಂ ವಿಜಿತಂ ತತ್ಥ ವೇರಜ್ಜಕೇ ವಿದೇಸವಾಸಿಕೇ ಮನುಸ್ಸೇ ಪೇಕ್ಖಮಾನಾ ಗಚ್ಛಥ, ಏವಂಭೂತೇಹಿ ವೋ ತುಮ್ಹೇಹಿ ಯಂ ಸುತಂ ವಾ ಅಥ ವಾ ದಿಟ್ಠಂ ವಾ ಅಚ್ಛೇರಕಂ ಅಚ್ಛರಿಯಂ, ತಂ ವೋ ಸನ್ತಿಕೇ ತಾತಾ ವಾಣಿಜಾ ಸುಣೋಮಾತಿ ಅತ್ತನೋ ವಿಮಾನಸ್ಸ ಅಚ್ಛರಿಯಭಾವಂ ತೇಹಿ ಕಥಾಪೇತುಕಾಮೋ ಪುಚ್ಛತಿ.

ಏವಂ ದೇವಪುತ್ತೇನ ಪುಟ್ಠಾ ವಾಣಿಜಾ ಆಹಂಸು –

೧೨೪೦. ‘‘ಇತೋಪಿ ಅಚ್ಛೇರತರಂ ಕುಮಾರ, ನ ನೋ ಸುತಂ ವಾ ಅಥ ವಾಪಿ ದಿಟ್ಠಂ;

ಅತೀತಮಾನುಸಕಮೇವ ಸಬ್ಬಂ, ದಿಸ್ವಾ ನ ತಪ್ಪಾಮ ಅನೋಮವಣ್ಣಂ.

೧೨೪೧. ‘‘ವೇಹಾಯಸಂ ಪೋಕ್ಖರಞ್ಞೋ ಸವನ್ತಿ, ಪಹೂತಮಲ್ಯಾ ಬಹುಪುಣ್ಡರೀಕಾ;

ದುಮಾ ಚಿಮೇ ನಿಚ್ಚಫಲೂಪಪನ್ನಾ, ಅತೀವ ಗನ್ಧಾ ಸುರಭಿಂ ಪವಾಯನ್ತಿ.

೧೨೪೨. ‘‘ವೇಳೂರಿಯಥಮ್ಭಾ ಸತಮುಸ್ಸಿತಾಸೇ, ಸಿಲಾಪವಾಳಸ್ಸ ಚ ಆಯತಂಸಾ;

ಮಸಾರಗಲ್ಲಾ ಸಹಲೋಹಿತಙ್ಗಾ, ಥಮ್ಭಾ ಇಮೇ ಜೋತಿರಸಾಮಯಾಸೇ.

೧೨೪೩. ‘‘ಸಹಸ್ಸಥಮ್ಭಂ ಅತುಲಾನುಭಾವಂ, ತೇಸೂಪರಿ ಸಾಧುಮಿದಂ ವಿಮಾನಂ;

ರತನನ್ತರಂ ಕಞ್ಚನವೇದಿಮಿಸ್ಸಂ, ತಪನೀಯಪಟ್ಟೇಹಿ ಚ ಸಾಧುಛನ್ನಂ.

೧೨೪೪. ‘‘ಜಮ್ಬೋನದುತ್ತತ್ತಮಿದಂ ಸುಮಟ್ಠೋ, ಪಾಸಾದಸೋಪಾನಫಲೂಪಪನ್ನೋ;

ದಳ್ಹೋ ಚ ವಗ್ಗು ಚ ಸುಸಙ್ಗತೋ ಚ, ಅತೀವ ನಿಜ್ಝಾನಖಮೋ ಮನುಞ್ಞೋ.

೧೨೪೫. ‘‘ರತನನ್ತರಸ್ಮಿಂ ಬಹುಅನ್ನಪಾನಂ, ಪರಿವಾರಿತೋ ಅಚ್ಛರಾಸಙ್ಗಣೇನ;

ಮುರಜಆಲಮ್ಬರತೂರಿಯಘುಟ್ಠೋ, ಅಭಿವನ್ದಿತೋಸಿ ಥುತಿವನ್ದನಾಯ.

೧೨೪೬. ‘‘ಸೋ ಮೋದಸಿ ನಾರಿಗಣಪ್ಪಬೋಧನೋ, ವಿಮಾನಪಾಸಾದವರೇ ಮನೋರಮೇ;

ಅಚಿನ್ತಿಯೋ ಸಬ್ಬಗುಣೂಪಪನ್ನೋ, ರಾಜಾ ಯಥಾ ವೇಸ್ಸವಣೋ ನಳಿನ್ಯಾ.

೧೨೪೭. ‘‘ದೇವೋ ನು ಆಸಿ ಉದವಾಸಿ ಯಕ್ಖೋ,

ಉದಾಹು ದೇವಿನ್ದೋ ಮನುಸ್ಸಭೂತೋ;

ಪುಚ್ಛನ್ತಿ ತಂ ವಾಣಿಜಾ ಸತ್ಥವಾಹಾ,

ಆಚಿಕ್ಖ ಕೋ ನಾಮ ತುವಂಸಿ ಯಕ್ಖೋ’’ತಿ.

೧೨೪೦-೨. ತತ್ಥ ಕುಮಾರಾತಿ ಪಠಮವಯೇ ಠಿತತ್ತಾ ದೇವಪುತ್ತಂ ಆಲಪತಿ. ಸಬ್ಬನ್ತಿ ದೇವಪುತ್ತಂ ತಸ್ಸ ವಿಮಾನಪಟಿಬದ್ಧಞ್ಚ ಸನ್ಧಾಯ ವದತಿ. ಪೋಕ್ಖರಞ್ಞೋತಿ ಪೋಕ್ಖರಣಿಯೋ. ಸತಮುಸ್ಸಿತಾಸೇತಿ ಸತರತನುಬ್ಬೇಧಾ. ಸಿಲಾಪವಾಳಸ್ಸಾತಿ ಸಿಲಾಯ ಪವಾಳಸ್ಸ ಚ, ಸಿಲಾಮಯಾ ಪವಾಳಮಯಾತಿ ಅತ್ಥೋ. ಆಯತಂಸಾತಿ ದೀಘಂಸಾ. ಅಥ ವಾ ಆಯತಾ ಹುತ್ವಾ ಅಟ್ಠಸೋಳಸದ್ವತ್ತಿಂಸಾದಿಅಂಸವನ್ತೋ.

೧೨೪೨. ತೇಸೂಪರೀತಿ ತೇಸಂ ಥಮ್ಭಾನಂ ಉಪರಿ. ಸಾಧುಮಿದನ್ತಿ ಸುನ್ದರಂ ಇದಂ ತವ ವಿಮಾನಂ. ರತನನ್ತರನ್ತಿ ರತನನ್ತರವನ್ತಂ, ಭಿತ್ತಿಥಮ್ಭಸೋಪಾನಾದೀಸು ನಾನಾವಿಧೇಹಿ ಅಞ್ಞೇಹಿ ರತನೇಹಿ ಯುತ್ತಂ. ಕಞ್ಚನವೇದಿಮಿಸ್ಸನ್ತಿ ಸುವಣ್ಣಮಯಾಯ ವೇದಿಕಾಯ ಸಹಿತಂ ಪರಿಕ್ಖಿತ್ತಂ. ತಪನೀಯಪಟ್ಟೇಹಿ ಚ ಸಾಧುಛನ್ನನ್ತಿ ತಪನೀಯಮಯೇಹಿ ಅನೇಕರತನಮಯೇಹಿ ಚ ಛದನೇಹಿ ತತ್ಥ ತತ್ಥ ಸುಟ್ಠು ಛಾದಿತಂ.

೧೨೪೪. ಜಮ್ಬೋನದುತ್ತತ್ತಮಿದನ್ತಿ ಇದಂ ತವ ವಿಮಾನಂ ಯೇಭುಯ್ಯೇನ ಉತ್ತತ್ತಜಮ್ಬುನದಭಾಸುರಂ. ಸುಮಟ್ಠೋ ಪಾಸಾದಸೋಪಾನಫಲೂಪಪನ್ನೋತಿ ತಸ್ಸ ಚ ಸೋ ಸೋ ಪದೇಸೋ ಸುಮಟ್ಠೋ ಸುಟ್ಠು ಮಜ್ಜಿತೋ, ತೇಹಿ ತೇಹಿ ಅನನ್ತರಪಾಸಾದೇಹಿ ಸೋಪಾನವಿಸೇಸೇಹಿ ರಮಣೀಯೇಹಿ ಫಲಕೇಹಿ ಚ ಯುತ್ತೋ. ದಳ್ಹೋತಿ ಥಿರೋ. ವಗ್ಗೂತಿ ಅಭಿರೂಪೋ ಸಮುಗ್ಗತೋ. ಸುಸಙ್ಗತೋತಿ ಸುಟ್ಠು ಸಙ್ಗತಾವಯವೋ ಅಞ್ಞಮಞ್ಞಾನುರೂಪಪಾಸಾದಾವಯವೋ. ಅತೀವ ನಿಜ್ಝಾನಖಮೋತಿ ಪಭಸ್ಸರಭಾವೇಪಿ ಅತಿವಿಯ ಓಲೋಕನಕ್ಖಮೋ. ಮನುಞ್ಞೋತಿ ಮನೋರಮೋ.

೧೨೪೫. ರತನನ್ತರಸ್ಮಿನ್ತಿ ರತನಮಯೇ, ರತನಭೂತೇ ವಾ ಸಾರಭೂತೇ ವಿಮಾನಸ್ಸ ಅಬ್ಭನ್ತರೇ. ಬಹುಅನ್ನಪಾನನ್ತಿ ಪೇಸಲಂ ಪಹೂತಂ ಅನ್ನಞ್ಚ ಪಾನಞ್ಚ ವಿಜ್ಜತಿ, ಉಪಲಬ್ಭತೀತಿ ಅಧಿಪ್ಪಾಯೋ. ಮುರಜಆಲಮ್ಬರತೂರಿಯಘುಟ್ಠೋತಿ ಮುದಿಙ್ಗಾನಂ ಆಲಮ್ಬರಾನಂ ಅವಸಿಟ್ಠತೂರಿಯಾನಞ್ಚ ಸದ್ದೇಹಿ ನಿಚ್ಚಘೋಸಿತೋ. ಅಭಿವನ್ದಿತೋಸೀತಿ ನಮಸ್ಸಿತೋ, ಥೋಮಿತೋ ವಾ ಅಸಿ. ತೇನಾಹ ‘‘ಥೂತಿವನ್ದನಾಯಾ’’ತಿ.

೧೨೪೬. ಅಚಿನ್ತಿಯೋತಿ ಅಚಿನ್ತೇಯ್ಯಾನುಭಾವೋ. ನಳಿನ್ಯಾತಿ ಏವಂನಾಮಕೇ ಕೀಳನಟ್ಠಾನೇ ಯಥಾ ವೇಸ್ಸವಣೋ ಮಹಾರಾಜಾ, ಏವಂ ತ್ವಂ ಮೋದಸೀತಿ ಯೋಜನಾ.

೧೨೪೭. ಆಸೀತಿ ಅಸಿ ಭವಸಿ. ದೇವಿನ್ದೋತಿ ಸಕ್ಕೋ ದೇವರಾಜಾ. ಮನುಸ್ಸಭೂತೋತಿ ಮನುಸ್ಸೇಸು ಭೂತೋ ಮನುಸ್ಸಜಾತಿಕೋ. ಯಕ್ಖೋತಿ ದೇವಾದಿಭಾವಂ ಪುಚ್ಛಿತ್ವಾಪಿ ಯಕ್ಖಭಾವಂ ಆಸಙ್ಕನ್ತಾ ವದನ್ತಿ.

ಇದಾನಿ ಸೋ ದೇವಪುತ್ತೋ ಅತ್ತಾನಂ ಜಾನಾಪೇನ್ತೋ –

೧೨೪೮. ‘‘ಸೇರೀಸಕೋ ನಾಮ ಅಹಮ್ಹಿ ಯಕ್ಖೋ, ಕನ್ತಾರಿಯೋ ವಣ್ಣುಪಥಮ್ಹಿ ಗುತ್ತೋ;

ಇಮಂ ಪದೇಸಂ ಅಭಿಪಾಲಯಾಮಿ, ವಚನಕರೋ ವೇಸ್ಸವಣಸ್ಸ ರಞ್ಞೋ’’ತಿ. –

ಆಹ. ತತ್ಥ ಅಹಮ್ಹೀ ಯಕ್ಖೋತಿ ಅಹಂ ಯಕ್ಖೋ ಅಮ್ಹಿ. ಕನ್ತಾರಿಯೋತಿ ಆರಕ್ಖಣತ್ಥಂ ಕನ್ತಾರೇ ನಿಯುತ್ತೋ. ಗುತ್ತೋತಿ ಗೋಪಕೋ. ತೇನಾಹ ‘‘ಅಭಿಪಾಲಯಾಮೀ’’ತಿ.

ಇದಾನಿ ವಾಣಿಜಾ ತಸ್ಸ ಕಮ್ಮಾದೀನಿ ಪುಚ್ಛನ್ತಾ ಆಹಂಸು –

೧೨೪೯. ‘‘ಅಧಿಚ್ಚಲದ್ಧಂ ಪರಿಣಾಮಜಂ ತೇ, ಸಯಂಕತಂ ಉದಾಹು ದೇವೇಹಿ ದಿನ್ನಂ;

ಪುಚ್ಛನ್ತಿ ತಂ ವಾಣಿಜಾ ಸತ್ಥವಾಹಾ, ಕಥಂ ತಯಾ ಲದ್ಧಮಿದಂ ಮನುಞ್ಞ’’ನ್ತಿ.

ತತ್ಥ ಅಧಿಚ್ಚಲದ್ಧನ್ತಿ ಅಧಿಚ್ಚಸಮುಪ್ಪತ್ತಿಕಂ, ಯದಿಚ್ಛಕಂ ಲದ್ಧನ್ತಿ ಅತ್ಥೋ. ಪರಿಣಾಮಜಂ ತೇತಿ ನಿಯತಿಸಙ್ಗತಿಭಾವಪರಿಣತಂ, ಕಾಲಪರಿಣತಂ ವಾ. ಸಯಂಕತನ್ತಿ ತಯಾ ಸಯಮೇವ ಕತಂ, ದೇವಿದ್ಧಿಯಾ ತಯಾ ಸಯಮೇವ ನಿಬ್ಬತ್ತಿತನ್ತಿ ಅತ್ಥೋ. ಉದಾಹು ದೇವೇಹಿ ದಿನ್ನನ್ತಿ ತಯಾ ಆರಾಧಿತೇಹಿ ದೇವೇಹಿ ಪಸಾದವಸೇನ ನಿಸ್ಸಟ್ಠಂ.

ಇದಾನಿ ದೇವಪುತ್ತೋ ಚತುರೋಪಿ ಪಕಾರೇ ಪಟಿಕ್ಖಿಪಿತ್ವಾ ಪುಞ್ಞಮೇವ ಅಪದಿಸನ್ತೋ –

೧೨೫೦. ‘‘ನಾಧಿಚ್ಚಲದ್ಧಂ ನ ಪರಿಣಾಮಜಂ ಮೇ, ನ ಸಯಂಕತಂ ನ ಹಿ ದೇವೇಹಿ ದಿನ್ನಂ;

ಸಕೇಹಿ ಕಮ್ಮೇಹಿ ಅಪಾಪಕೇಹಿ, ಪುಞ್ಞೇಹಿ ಮೇ ಲದ್ಧಮಿದಂ ಮನುಞ್ಞ’’ನ್ತಿ. –

ಗಾಥಮಾಹ.

ತಂ ಸುತ್ವಾ ವಾಣಿಜಾ ಪುನ ‘‘ನಾಧಿಚ್ಚಲದ್ಧ’’ನ್ತಿ ಗಾಥಾಯಂ ಪುಞ್ಞಾಧಿಕಮೇವ ತೇ ಚತುರೋ ಪಕಾರೇ ಆರೋಪೇತ್ವಾ ಪುಞ್ಞಸ್ಸ ಚ ಸರೂಪಂ ಪುಚ್ಛಿಂಸು –

೧೨೫೧. ‘‘ಕಿಂ ತೇ ವತಂ ಕಿಂ ಪನ ಬ್ರಹ್ಮಚರಿಯಂ, ಕಿಸ್ಸ ಸುಚಿಣ್ಣಸ್ಸ ಅಯಂ ವಿಪಾಕೋ;

ಪುಚ್ಛನ್ತಿ ತಂ ವಾಣಿಜಾ ಸತ್ಥವಾಹಾ, ಕಥಂ ತಯಾ ಲದ್ಧಮಿದಂ ವಿಮಾನ’’ನ್ತಿ.

ತತ್ಥ ವತನ್ತಿ ವತಸಮಾದಾನಂ. ಬ್ರಹ್ಮಚರಿಯನ್ತಿ ಸೇಟ್ಠಚರಿಯಂ.

ಪುನ ದೇವಪುತ್ತೋ ತೇ ಪಟಿಕ್ಖಿಪಿತ್ವಾ ಅತ್ತಾನಂ ಯಥೂಪಚಿತಂ ಪುಞ್ಞಞ್ಚ ದಸ್ಸೇನ್ತೋ –

೧೨೫೨. ‘‘ಮಮಂ ಪಾಯಾಸೀತಿ ಅಹು ಸಮಞ್ಞಾ, ರಜ್ಜಂ ಯದಾ ಕಾರಯಿಂ ಕೋಸಲಾನಂ;

ನತ್ಥಿಕದಿಟ್ಠಿ ಕದರಿಯೋ ಪಾಪಧಮ್ಮೋ, ಉಚ್ಛೇದವಾದೀ ಚ ತದಾ ಅಹೋಸಿಂ.

೧೨೫೩. ‘‘ಸಮಣೋ ಚ ಖೋ ಆಸಿ ಕುಮಾರಕಸ್ಸಪೋ, ಬಹುಸ್ಸುತೋ ಚಿತ್ತಕಥೀ ಉಳಾರೋ;

ಸೋ ಮೇ ತದಾ ಧಮ್ಮಕಥಂ ಅಭಾಸಿ, ದಿಟ್ಠಿವಿಸೂಕಾನಿ ವಿನೋದಯೀ ಮೇ.

೧೨೫೪. ‘‘ತಾಹಂ ತಸ್ಸ ಧಮ್ಮಕಥಂ ಸುಣಿತ್ವಾ, ಉಪಾಸಕತ್ತಂ ಪಟಿವೇದಯಿಸ್ಸಂ;

ಪಾಣಾತಿಪಾತಾ ವಿರತೋ ಅಹೋಸಿಂ, ಲೋಕೇ ಅದಿನ್ನಂ ಪರಿವಜ್ಜಯಿಸ್ಸಂ;

ಅಮಜ್ಜಪೋ ನೋ ಚ ಮುಸಾ ಅಭಾಣಿಂ, ಸಕೇನ ದಾರೇನ ಚ ಅಹೋಸಿಂ ತುಟ್ಠೋ.

೧೨೫೫. ‘‘ತಂ ಮೇ ವತಂ ತಂ ಪನ ಬ್ರಹ್ಮಚರಿಯಂ, ತಸ್ಸ ಸುಚಿಣ್ಣಸ್ಸ ಅಯಂ ವಿಪಾಕೋ;

ತೇಹೇವ ಕಮ್ಮೇಹಿ ಅಪಾಪಕೇಹಿ, ಪುಞ್ಞೇಹಿ ಮೇ ಲದ್ಧಮಿದಂ ವಿಮಾನ’’ನ್ತಿ. –

ಆಹ. ತಂ ಸುವಿಞ್ಞೇಯ್ಯಮೇವ.

ಅಥ ವಾಣಿಜಾ ದೇವಪುತ್ತಂ ವಿಮಾನಞ್ಚಸ್ಸ ಪಚ್ಚಕ್ಖತೋ ದಿಸ್ವಾ ಕಮ್ಮಫಲಂ ಸದ್ದಹಿತ್ವಾ ಅತ್ತನೋ ಕಮ್ಮಫಲೇ ಸದ್ಧಂ ಪವೇದೇನ್ತಾ –

೧೨೫೬. ‘‘ಸಚ್ಚಂ ಕಿರಾಹಂಸು ನರಾ ಸಪಞ್ಞಾ, ಅನಞ್ಞಥಾ ವಚನಂ ಪಣ್ಡಿತಾನಂ;

ಯಹಿಂ ಯಹಿಂ ಗಚ್ಛತಿ ಪುಞ್ಞಕಮ್ಮೋ, ತಹಿಂ ತಹಿಂ ಮೋದತಿ ಕಾಮಕಾಮೀ.

೧೨೫೭. ‘‘ಯಹಿಂ ಯಹಿಂ ಸೋಕಪರಿದ್ದವೋ ಚ, ವಧೋ ಚ ಬನ್ಧೋ ಚ ಪರಿಕ್ಕಿಲೇಸೋ;

ತಹಿಂ ತಹಿಂ ಗಚ್ಛತಿ ಪಾಪಕಮ್ಮೋ, ನ ಮುಚ್ಚತಿ ದುಗ್ಗತಿಯಾ ಕದಾಚೀ’’ತಿ. –

ಗಾಥಾದ್ವಯಂ ಅವೋಚುಂ. ತತ್ಥ ಸೋಕಪರಿದ್ದವೋತಿ ಸೋಕೋ ಚ ಪರಿದೇವೋ ಚ. ಪರಿಕ್ಕಿಲೇಸೋತಿ ವುತ್ತಾ ಅನತ್ಥುಪ್ಪತ್ತಿ.

ಏವಂ ತೇಸು ಕಥೇನ್ತೇಸುಯೇವ ವಿಮಾನದ್ವಾರೇ ಸಿರೀಸರುಕ್ಖತೋ ಪರಿಪಾಕೇನ ಮುತ್ತಬನ್ಧನಾ ಪರಿಪಕ್ಕಾ ಸಿಪಾಟಿಕಾ ಪತಿ, ತೇನ ದೇವಪುತ್ತೋ ಸಪರಿಜನೋ ದೋಮನಸ್ಸಪ್ಪತ್ತೋ ಅಹೋಸಿ. ತಂ ದಿಸ್ವಾ ವಾಣಿಜಾ –

೧೨೫೮. ‘‘ಸಮ್ಮೂಳ್ಹರೂಪೋವ ಜನೋ ಅಹೋಸಿ, ಅಸ್ಮಿಂ ಮುಹುತ್ತೇ ಕಲಲೀಕತೋವ;

ಜನಸ್ಸಿಮಸ್ಸ ತುಯ್ಹಞ್ಚ ಕುಮಾರ, ಅಪ್ಪಚ್ಚಯೋ ಕೇನ ನು ಖೋ ಅಹೋಸೀ’’ತಿ. –

ಗಾಥಮಾಹಂಸು. ತತ್ಥ ಸಮ್ಮೂಳ್ಹರೂಪೋವಾತಿ ಸೋಕವಸೇನ ಸಬ್ಬಸೋ ಮೂಳ್ಹಸಭಾವೋ ವಿಯ. ಜನೋತಿ ದೇವಜನೋ. ಅಸ್ಮಿಂ ಮುಹುತ್ತೇತಿ ಇಮಸ್ಮಿಂ ಮುಹುತ್ತಮತ್ತೇ. ಕಲಲೀಕತೋತಿ ಕಲಲಂ ವಿಯ ಕತೋ, ಕಲಲನಿಸ್ಸಿತಉದಕೀಭೂತೋ ವಿಯ ಆವಿಲೋತಿ ಅಧಿಪ್ಪಾಯೋ. ಜನಸ್ಸಿಮಸ್ಸ ತುಯ್ಹಞ್ಚಾತಿ ಇಮಸ್ಸ ತವ ಪರಿಜನಸ್ಸ ತುಯ್ಹಞ್ಚ. ಅಪ್ಪಚ್ಚಯೋತಿ ದೋಮನಸ್ಸಂ.

ತಂ ಸುತ್ವಾ ದೇವಪುತ್ತೋ –

೧೨೫೯. ‘‘ಇಮೇ ಚ ಸಿರೀಸವನಾ ತಾತಾ, ದಿಬ್ಬಾ ಗನ್ಧಾ ಸುರಭೀ ಸಮ್ಪವನ್ತಿ;

ತೇ ಸಮ್ಪವಾಯನ್ತಿ ಇಮಂ ವಿಮಾನಂ, ದಿವಾ ಚ ರತ್ತೋ ಚ ತಮಂ ನಿಹನ್ತ್ವಾ.

೧೨೬೦. ‘‘ಇಮೇಸಞ್ಚ ಖೋ ವಸ್ಸಸತಚ್ಚಯೇನ, ಸಿಪಾಟಿಕಾ ಫಲತಿ ಏಕಮೇಕಾ;

ಮಾನುಸ್ಸಕಂ ವಸ್ಸಸತಂ ಅತೀತಂ, ಯದಗ್ಗೇ ಕಾಯಮ್ಹಿ ಇಧೂಪಪನ್ನೋ.

೧೨೬೧. ‘‘ದಿಸ್ವಾನಹಂ ವಸ್ಸಸತಾನಿ ಪಞ್ಚ,

ಅಸ್ಮಿಂ ವಿಮಾನೇ ಠತ್ವಾನ ತಾತಾ;

ಆಯುಕ್ಖಯಾ ಪುಞ್ಞಕ್ಖಯಾ ಚವಿಸ್ಸಂ,

ತೇನೇವ ಸೋಕೇನ ಪಮುಚ್ಛಿತೋಸ್ಮೀ’’ತಿ. – ಆಹ;

೧೨೫೬. ತತ್ಥ ಸಿರೀಸವನಾತಿ ಸಿರೀಸವಿಪಿನತೋ. ತಾತಾತಿ ವಾಣಿಜೇ ಆಲಪತಿ. ಇಮೇ ತುಮ್ಹಾಕಂ ಮಯ್ಹಞ್ಚ ಪಚ್ಚಕ್ಖಭೂತಾ ದಿಬ್ಬಾ ಗನ್ಧಾ ಸುರಭೀ ಅತಿವಿಯ ಸುಗನ್ಧಾಯೇವ ಸಮನ್ತತೋ ಪವನ್ತಿ ಪವಾಯನ್ತಿ. ತೇ ದಿಬ್ಬಾ ಗನ್ಧಾ ಏವಂ ವಾಯನ್ತಾ ಇಮಂ ವಿಮಾನಂ ಸಮ್ಪವಾಯನ್ತಿ ಸಮ್ಮದೇವ ಗನ್ಧಂ ಗಾಹಾಪೇನ್ತಿ, ನ ಕೇವಲಂ ಸಮ್ಪವಾಯನಮೇವ, ಅಥ ಖೋ ಅತ್ತನೋ ಪಭಾಯ ತಮಮ್ಪಿ ನಿಹನ್ತಿ. ತೇನಾಹ ‘‘ದಿವಾ ಚ ರತ್ತೋ ಚ ತಮಂ ನಿಹನ್ತ್ವಾ’’ತಿ.

೧೨೬೦-೬೧. ಇಮೇಸನ್ತಿ ಸಿರೀಸಾನಂ. ಸಿಪಾಟಿಕಾತಿ ಫಲಕುಟ್ಠಿಲಿಕಾ. ಫಲತೀತಿ ಪಚ್ಚಿತ್ವಾ ವಣ್ಟತೋ ಮುಚ್ಚತಿ, ಪುಟಭೇದಂ ವಾ ಪತ್ವಾ ಸಿಸ್ಸತಿ. ಮಾನುಸ್ಸಕಂ ವಸ್ಸಸತಂ ಅತೀತನ್ತಿ ಯಸ್ಮಾ ವಸ್ಸಸತಸ್ಸ ಅಚ್ಚಯೇನ ಇಮಸ್ಸ ಸಿರೀಸಸ್ಸ ಸಿಪಾಟಿಕಾ ಫಲತಿ, ಅಯಞ್ಚ ಫಲಿತಾ, ತಸ್ಮಾ ಮಯ್ಹಂ ಮಾನುಸ್ಸಕಂ ವಸ್ಸಸತಂ ಅತೀತಂ. ಯದಗ್ಗೇ ಯತೋ ಪಟ್ಠಾಯ, ಕಾಯಮ್ಹಿ ಇಧ ಇಮಸ್ಮಿಂ ದೇವನಿಕಾಯೇ ಉಪಪನ್ನೋ ನಿಬ್ಬತ್ತೋ. ಮಯ್ಹಞ್ಚ ದೇವಗಣನಾಯ ಪಞ್ಚ ವಸ್ಸಸತಾನಿ ಆಯು, ತಸ್ಮಾ ಖೀಯತಿ ಮೇ ಆಯೂತಿ ಸೋಕವಸೇನ ಸಮ್ಪಮೂಳ್ಹೋತಿ ದಸ್ಸೇತಿ. ತೇನಾಹ ‘‘ದಿಸ್ವಾನಹಂ ವಸ್ಸಸತಾನಿ ಪಞ್ಚ…ಪೇ… ತೇನೇವ ಸೋಕೇನ ಪಮುಚ್ಛಿತೋಸ್ಮೀ’’ತಿ.

ಅಥ ನಂ ವಾಣಿಜಾ ಸಮಸ್ಸಾಸೇನ್ತೋ –

೧೨೬೨. ‘‘ಕಥಂ ನು ಸೋಚೇಯ್ಯ ತಥಾವಿಧೋ ಸೋ, ಲದ್ಧಾ ವಿಮಾನಂ ಅತುಲಂ ಚಿರಾಯ;

ಯೇ ಚಾಪಿ ಖೋ ಇತ್ತರಮುಪಪನ್ನಾ, ತೇ ನೂನ ಸೋಚೇಯ್ಯುಂ ಪರಿತ್ತಪುಞ್ಞಾ’’ತಿ. –

ಆಹಂಸು. ತತ್ಥ ಯಾದಿಸೇಹಿ ಅಪ್ಪಾಯುಕೇಹಿ ಮರಣಂ ಪಟಿಚ್ಚ ಸೋಚಿತಬ್ಬಂ ಸಿಯಾ, ತಾದಿಸೋ ಪನ ಏವಂ ದಿಬ್ಬಾನುಭಾವಸಮ್ಪನ್ನೋ ನವುತಿವಸ್ಸಸತಸಹಸ್ಸಾಯುಕೋ ಕಥಂ ನು ಸೋಚೇಯ್ಯ, ನ ಸೋಚಿತಬ್ಬಮೇವಾತಿ ಅಧಿಪ್ಪಾಯೋ.

ದೇವಪುತ್ತೋ ತತ್ತಕೇನೇವ ಸಮಸ್ಸಾಸೇತ್ವಾ ತೇಸಂ ವಚನಂ ಸಮ್ಪಟಿಚ್ಛನ್ತೋ ತೇಸಞ್ಚ ಉಪದೇಸಂ ದೇನ್ತೋ –

೧೨೬೩. ‘‘ಅನುಚ್ಛವಿಂ ಓವದಿಯಞ್ಚ ಮೇತಂ, ಯಂ ಮಂ ತುಮ್ಹೇ ಪೇಯ್ಯವಾಚಂ ವದೇಥ;

ತುಮ್ಹೇ ಚ ಖೋ ತಾತಾ ಮಯಾನುಗುತ್ತಾ, ಯೇಹಿಚ್ಛಕಂ ತೇನ ಪಲೇಥ ಸೋತ್ಥಿ’’ನ್ತಿ. –

ಗಾಥಮಾಹ. ತತ್ಥ ಅನುಚ್ಛವಿನ್ತಿ ಅನುಚ್ಛವಿಕಂ, ತುಮ್ಹಾಕಮೇವ ತಂ ಯುತ್ತರೂಪಂ. ಓವದಿಯಞ್ಚ ಮೇತನ್ತಿ ಮೇ ಮಯ್ಹಂ ತುಮ್ಹೇಹಿ ಓವದಿಯಂ ಓವಾದವಸೇನ ವತ್ತಬ್ಬಮೇತಂ. ಯಂ ಯಸ್ಮಾ, ಮಂ ಮಯ್ಹಂ, ತುಮ್ಹೇ ‘‘ಕಥಂ ನು ಸೋಚೇಯ್ಯ’’ನ್ತಿಆದಿನಾ ಪೇಯ್ಯವಾಚಂ ಪಿಯವಚನಂ ವದೇಥ. ಯಂ ವಾ ಪೇಯ್ಯವಾಚಾಯ ವದನಂ ಕಥನಂ, ತಂ ತುಮ್ಹಾಕಮೇವ ಅನುಚ್ಛವಿಕನ್ತಿ ಯೋಜನಾ. ಅಥ ವಾ ಯಂ ಯಸ್ಮಾ ತುಮ್ಹೇ ಪೇಯ್ಯವಾಚಂ ವದೇಥ, ತಸ್ಮಾ ಅನುಚ್ಛವಿಕಂ ಓವದಿಯಞ್ಚ ಓವದಿತಬ್ಬಂ ಓವಾದಾನುರೂಪಂ ಕಾತಬ್ಬಞ್ಚ ಮೇ ಮಯಾ ಕತಂ, ಕಿಂ ಪನ ತನ್ತಿ ಆಹ ‘‘ತುಮ್ಹೇ ಚ ಖೋ ತಾತಾ’’ತಿಆದಿ. ತತ್ಥ ಮಯಾನುಗುತ್ತಾತಿ ಇಮಸ್ಮಿಂ ಅಮನುಸ್ಸಪರಿಗ್ಗಹೇ ಮರುಕನ್ತಾರೇ ಯಾವ ಕನ್ತಾರಾತಿಕ್ಕಮಾ ಮಯಾ ಅನುಗುತ್ತಾ ರಕ್ಖಿತಾ, ಯೇನಿಚ್ಛಕಂ ಯಥಾರುಚಿತೇನ, ಸೋತ್ಥಿಂ ಖೇಮೇನ, ಪಲೇಥ ಗಚ್ಛಥಾತಿ ಅತ್ಥೋ.

ಅಥ ವಾಣಿಜಾ ಕತಞ್ಞುಭಾವಂ ಪಕಾಸೇನ್ತಾ –

೧೨೬೪. ‘‘ಗನ್ತ್ವಾ ಮಯಂ ಸಿನ್ಧುಸೋವೀರಭೂಮಿಂ, ಧನತ್ಥಿಕಾ ಉದ್ದಯಂ ಪತ್ಥಯಾನಾ;

ಯಥಾಪಯೋಗಾ ಪರಿಪುಣ್ಣಚಾಗಾ, ಕಾಹಾಮ ಸೇರೀಸಮಹಂ ಉಳಾರನ್ತಿ. –

ಗಾಥಮಾಹಂಸು. ತತ್ಥ ಯಥಾಪಯೋಗಾತಿ ಇದಾನಿ ಕತಪಟಿಞ್ಞಾನುರೂಪಪಯೋಗಾ. ಪರಿಪುಣ್ಣಚಾಗಾತಿ ಸಮತ್ತಚಾಗಾ, ಉಳಾರಸ್ಸ ಮಹಸ್ಸ ಪರಿಯತ್ತಪರಿಚ್ಚಾಗಾ. ಮಹನ್ತಿ ಉಸ್ಸವಪೂಜಂ.

ಪುನ ದೇವಪುತ್ತೋ ಮಹಕರಣಂ ಪಟಿಕ್ಖಿಪನ್ತೋ ಕತ್ತಬ್ಬೇಸು ಚ ತೇ ನಿಯೋಜೇನ್ತೋ –

೧೨೬೫. ‘‘ಮಾ ಚೇವ ಸೇರೀಸಮಹಂ ಅಕತ್ಥ, ಸಬ್ಬಞ್ಚ ವೋ ಭವಿಸ್ಸತಿ ಯಂ ವದೇಥ;

ಪಾಪಾನಿ ಕಮ್ಮಾನಿ ವಿವಜ್ಜಯಾಥ, ಧಮ್ಮಾನುಯೋಗಞ್ಚ ಅಧಿಟ್ಠಹಾಥಾ’’ತಿ. –

ಗಾಥಮಾಹ. ತತ್ಥ ಯಂ ವದೇಥಾತಿ ಯಂ ತುಮ್ಹೇ ಖೇಮೇನ ಸಿನ್ಧುಸೋವೀರದೇಸಪತ್ತಿಂ ತತ್ಥ ಚ ವಿಪುಲಂ ಉದ್ದಯಂ ಲಾಭಂ ಪಚ್ಚಾಸೀಸನ್ತಾ ‘‘ಗನ್ತ್ವಾ ಮಯ’’ನ್ತಿಆದೀನಿ ವದಥ. ಸಬ್ಬಂ ತಂ ವೋ ತುಮ್ಹಾಕಂ ತಥೇವ ಭವಿಸ್ಸತಿ, ತತ್ಥ ನಿಕ್ಕಙ್ಖಾ ಹೋಥ, ತುಮ್ಹೇ ಪನ ಇತೋ ಪಟ್ಠಾಯ ಪಾಪಾನಿ ಕಮ್ಮಾನಿ ಪಾಣಾತಿಪಾತಾದೀನಿ ವಿವಜ್ಜಯಾಥ ಪರಿವಜ್ಜೇಥ. ಧಮ್ಮಾನುಯೋಗನ್ತಿ ದಾನಾದಿಕುಸಲಧಮ್ಮಸ್ಸ ಅನುಯುಞ್ಜನಂ. ಅಧಿಟ್ಠಹಾಥಾತಿ ಅನುಸಿಕ್ಖಥ ಇದಂ ಸೇರೀಸಕಮಹನ್ತಿ ದಸ್ಸೇತಿ.

ಯಂ ಪನ ಉಪಾಸಕಂ ಅನುಗ್ಗಣ್ಹನ್ತೋ ತೇಸಂ ರಕ್ಖಾವರಣಂ ಕಾತುಕಾಮೋ ಅಹೋಸಿ, ತಸ್ಸ ಗುಣಂ ಕಿತ್ತೇತ್ವಾ ತಂ ತೇಸಂ ಉದ್ದಿಸನ್ತೋ ಇಮಾ ಗಾಥಾಯೋ ಆಹ –

೧೨೬೬. ‘‘ಉಪಾಸಕೋ ಅತ್ಥಿ ಇಮಮ್ಹಿ ಸಙ್ಘೇ, ಬಹುಸ್ಸುತೋ ಸೀಲವತೂಪಪನ್ನೋ;

ಸದ್ಧೋ ಚ ಚಾಗೀ ಚ ಸುಪೇಸಲೋ ಚ, ವಿಚಕ್ಖಣೋ ಸನ್ತುಸಿತೋ ಮುತೀಮಾ.

೧೨೬೭. ‘‘ಸಞ್ಜಾನಮಾನೋ ನ ಮುಸಾ ಭಣೇಯ್ಯ, ಪರೂಪಘಾತಾಯ ನ ಚೇತಯೇಯ್ಯ;

ವೇಭೂತಿಕಂ ಪೇಸುಣಂ ನೋ ಕರೇಯ್ಯ, ಸಣ್ಹಞ್ಚ ವಾಚಂ ಸಖಿಲಂ ಭಣೇಯ್ಯ.

೧೨೬೮. ‘‘ಸಗಾರವೋ ಸಪ್ಪತಿಸ್ಸೋ ವಿನೀತೋ, ಅಪಾಪಕೋ ಅಧಿಸೀಲೇ ವಿಸುದ್ಧೋ;

ಸೋ ಮಾತರಂ ಪಿತರಞ್ಚಾಪಿ ಜನ್ತು, ಧಮ್ಮೇನ ಪೋಸೇತಿ ಅರಿಯವುತ್ತಿ.

೧೨೬೯. ‘‘ಮಞ್ಞೇ ಸೋ ಮಾತಾಪಿತೂನಂ ಕಾರಣಾ, ಭೋಗಾನಿ ಪರಿಯೇಸತಿ ನ ಅತ್ತಹೇತು;

ಮಾತಾಪಿತೂನಞ್ಚ ಯೋ ಅಚ್ಚಯೇನ, ನೇಕ್ಖಮ್ಮಪೋಣೋ ಚರಿಸ್ಸತಿ ಬ್ರಹ್ಮಚರಿಯಂ.

೧೨೭೦. ‘‘ಉಜೂ ಅವಙ್ಕೋ ಅಸಠೋ ಅಮಾಯೋ, ನ ಲೇಸಕಪ್ಪೇನ ಚ ವೋಹರೇಯ್ಯ;

ಸೋ ತಾದಿಸೋ ಸುಕತಕಮ್ಮಕಾರೀ, ಧಮ್ಮೇ ಠಿತೋ ಕಿನ್ತಿ ಲಭೇಥ ದುಕ್ಖಂ.

೧೨೭೧. ‘‘ತಂಕಾರಣಾ ಪಾತುಕತೋಮ್ಹಿ ಅತ್ತನಾ, ತಸ್ಮಾ ಧಮ್ಮಂ ಪಸ್ಸಥ ವಾಣಿಜಾಸೇ;

ಅಞ್ಞತ್ರ ತೇನಿಹ ಭಸ್ಮೀ ಭವೇಥ, ಅನ್ಧಾಕುಲಾ ವಿಪ್ಪನಟ್ಠಾ ಅರಞ್ಞೇ;

ತಂ ಖಿಪ್ಪಮಾನೇನ ಲಹುಂ ಪರೇನ, ಸುಖೋ ಹವೇ ಸಪ್ಪುರಿಸೇನ ಸಙ್ಗಮೋ’’ತಿ.

೧೨೬೬. ತತ್ಥ ಸಙ್ಘೇತಿ ಸತ್ತಸಮೂಹೇ. ವಿಚಕ್ಖಣೋತಿ ತತ್ಥ ತತ್ಥ ಕತ್ತಬ್ಬತಾಯ ಕುಸಲೋ. ಸನ್ತುಸಿತೋತಿ ಸನ್ತುಟ್ಠೋ. ಮುತೀಮಾತಿ ಕಮ್ಮಸ್ಸಕತಞಾಣಾದಿನಾ ಇಧಲೋಕಪರಲೋಕಹಿತಾನಂ ಮುನನತೋ ಮುತಿಮಾ.

೧೨೬೭. ಸಞ್ಜಾನಮಾನೋ ನ ಮುಸಾ ಭಣೇಯ್ಯಾತಿ ಸಮ್ಪಜಾನಮುಸಾ ನ ಭಾಸೇಯ್ಯ. ವೇಭೂತಿಕನ್ತಿ ಸಹಿತಾನಂ ವಿನಾಭಾವಕರಣತೋ ‘‘ವೇಭೂತಿಕ’’ನ್ತಿ ಲದ್ಧನಾಮಂ ಪಿಸುಣಂ, ನೋ ಕರೇಯ್ಯ ನ ವದೇಯ್ಯ.

೧೨೬೮. ಸಪ್ಪತಿಸ್ಸೋತಿ ಪತಿಸ್ಸಯೋ ಗರುಟ್ಠಾನಿಯೇಸು ನಿವಾತವುತ್ತಿಕತ್ತಾ ಸೋರಚ್ಚಂ, ಸಹ ಪತಿಸ್ಸೇನಾತಿ ಸಪ್ಪತಿಸ್ಸೋ. ಅಧಿಸೀಲೇತಿ ಉಪಾಸಕೇನ ರಕ್ಖಿತಬ್ಬಅಧಿಸೀಲಸಿಕ್ಖಾಯ. ಅರಿಯವುತ್ತೀತಿ ಪರಿಸುದ್ಧವುತ್ತಿ.

೧೨೬೯. ನೇಕ್ಖಮ್ಮಪೋಣೋತಿ ನಿಬ್ಬಾನನಿನ್ನೋ. ಚರಿಸ್ಸತಿ ಬ್ರಹ್ಮಚರಿಯನ್ತಿ ಪಬ್ಬಜ್ಜಂ ಸಾಸನಬ್ರಹ್ಮಚರಿಯಂ ಚರಿಸ್ಸತಿ.

೧೨೭೦. ಲೇಸಕಪ್ಪೇನಾತಿ ಕಪ್ಪಿಯಲೇಸೇನ. ನ ಚ ವೋಹರೇಯ್ಯಾತಿ ಮಾಯಾಸಾಠೇಯ್ಯವಸೇನ ವಚನಂ ನ ನಿಚ್ಛಾರೇಯ್ಯ. ಧಮ್ಮೇ ಠಿತೋ ಕಿನ್ತಿ ಲಭೇಥ ದುಕ್ಖನ್ತಿ ಏವಂ ವುತ್ತನಯೇನ ಧಮ್ಮೇ ಠಿತೋ ಧಮ್ಮಚಾರೀ ಸಮಚಾರೀ ಕಿನ್ತಿ ಕೇನ ಪಕಾರೇನ ದುಕ್ಖಂ ಲಭೇಥ ಪಾಪುಣೇಯ್ಯ.