೭. ಸುನಿಕ್ಖಿತ್ತವಿಮಾನವಗ್ಗೋ

೧. ಚಿತ್ತಲತಾವಿಮಾನವಣ್ಣನಾ

ಯಥಾ ವನಂ ಚಿತ್ತಲತಂ ಪಭಾಸತೀತಿ ಚಿತ್ತಲತಾವಿಮಾನಂ. ತಸ್ಸ ಕಾ ಉಪ್ಪತ್ತಿ? ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ. ತೇನ ಸಮಯೇನ ಸಾವತ್ಥಿಯಂ ಅಞ್ಞತರೋ ಉಪಾಸಕೋ ದಲಿದ್ದೋ ಅಪ್ಪಭೋಗೋ ಪರೇಸಂ ಕಮ್ಮಂ ಕತ್ವಾ ಜೀವತಿ. ಸೋ ಸದ್ಧೋ ಪಸನ್ನೋ ಜಿಣ್ಣೇ ವುಡ್ಢೇ ಮಾತಾಪಿತರೋ ಪೋಸೇನ್ತೋ ‘‘ಇತ್ಥಿಯೋ ನಾಮ ಪತಿಕುಲೇ ಠಿತಾ ಇಸ್ಸರಿಯಂ ಕರೋನ್ತಿ, ಸಸ್ಸುಸಸುರಾನಂ ಮನಾಪಚಾರಿನಿಯೋ ದುಲ್ಲಭಾ’’ತಿ ಮಾತಾಪಿತೂನಂ ಚಿತ್ತದುಕ್ಖಂ ಪರಿಹರನ್ತೋ ದಾರಪರಿಗ್ಗಹಂ ಅಕತ್ವಾ ಸಯಮೇವ ನೇ ಉಪಟ್ಠಹತಿ, ಸೀಲಾನಿ ರಕ್ಖತಿ, ಉಪೋಸಥಂ ಉಪವಸತಿ, ಯಥಾವಿಭವಂ ದಾನಾನಿ ದೇತಿ. ಸೋ ಅಪರಭಾಗೇ ಕಾಲಂ ಕತ್ವಾ ತಾವತಿಂಸೇಸು ದ್ವಾದಸಯೋಜನಿಕೇ ವಿಮಾನೇ ನಿಬ್ಬತ್ತಿ. ತಂ ಆಯಸ್ಮಾ ಮಹಾಮೋಗ್ಗಲ್ಲಾನೋ ಹೇಟ್ಠಾ ವುತ್ತನಯೇನ ಗನ್ತ್ವಾ ಕತಕಮ್ಮಂ ಇಮಾಹಿ ಗಾಥಾಹಿ ಪಟಿಪುಚ್ಛಿ –

೧೧೧೪. ‘‘ಯಥಾ ವನಂ ಚಿತ್ತಲತಂ ಪಭಾಸತಿ, ಉಯ್ಯಾನಸೇಟ್ಠಂ ತಿದಸಾನಮುತ್ತಮಂ;

ತಥೂಪಮಂ ತುಯ್ಹಮಿದಂ ವಿಮಾನಂ, ಓಭಾಸಯಂ ತಿಟ್ಠತಿ ಅನ್ತಲಿಕ್ಖೇ.

೧೧೧೫. ‘‘ದೇವಿದ್ಧಿಪತ್ತೋಸಿ ಮಹಾನುಭಾವೋ…ಪೇ…

ವಣ್ಣೋ ಚ ತೇ ಸಬ್ಬದಿಸಾ ಪಭಾಸತೀ’’ತಿ.

೧೧೧೬. ‘‘ಸೋ ದೇವಪುತ್ತೋ ಅತ್ತಮನೋ…ಪೇ… ಯಸ್ಸ ಕಮ್ಮಸ್ಸಿದಂ ಫಲಂ’’.

೧೧೧೭. ‘‘ಅಹಂ ಮನುಸ್ಸೇಸು ಮನುಸ್ಸಭೂತೋ, ದಲಿದ್ದೋ ಅತಾಣೋ ಕಪಣೋ ಕಮ್ಮಕರೋ ಅಹೋಸಿಂ;

ಜಿಣ್ಣೇ ಚ ಮಾತಾಪಿತರೋ ಅಭಾರಿಂ, ಪಿಯಾ ಚ ಮೇ ಸೀಲವನ್ತೋ ಅಹೇಸುಂ;

ಅನ್ನಞ್ಚ ಪಾನಞ್ಚ ಪಸನ್ನಚಿತ್ತೋ, ಸಕ್ಕಚ್ಚ ದಾನಂ ವಿಪುಲಂ ಅದಾಸಿಂ.

೧೧೧೮. ‘‘ತೇನ ಮೇತಾದಿಸೋ ವಣ್ಣೋ…ಪೇ…ವಣ್ಣೋ ಚ ಮೇ ಸಬ್ಬದಿಸಾ ಪಭಾಸತೀ’’ತಿ. –

ಸೋಪಿ ತಸ್ಸ ಬ್ಯಾಕಾಸಿ. ಸೇಸಂ ವುತ್ತನಯಮೇವ.

ಚಿತ್ತಲತಾವಿಮಾನವಣ್ಣನಾ ನಿಟ್ಠಿತಾ.

೨. ನನ್ದನವಿಮಾನವಣ್ಣನಾ

ಯಥಾ ವನಂ ನನ್ದನಂ ಪಭಾಸತೀತಿ ನನ್ದನವಿಮಾನಂ. ತಸ್ಸ ಕಾ ಉಪ್ಪತ್ತಿ? ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ. ತೇನ ಸಮಯೇನ ಸಾವತ್ಥಿಯಂ ಅಞ್ಞತರೋ ಉಪಾಸಕೋತಿಆದಿ ಸಬ್ಬಂ ಅನನ್ತರವಿಮಾನಸದಿಸಂ. ಅಯಂ ಪನ ದಾರಪರಿಗ್ಗಹಂ ಕತ್ವಾ ಮಾತಾಪಿತರೋ ಪೋಸೇಸೀತಿ ಅಯಮೇವ ವಿಸೇಸೋ.

೧೧೨೦. ಯಥಾ ವನಂ ನನ್ದನಂ ಪಭಾಸತಿ, ಉಯ್ಯಾನಸೇಟ್ಠಂ ತಿದಸಾನಮುತ್ತಮಂ;

ತಥೂಪಮಂ ತುಯ್ಹಮಿದಂ ವಿಮಾನಂ, ಓಭಾಸಯಂ ತಿಟ್ಠತಿ ಅನ್ತಲಿಕ್ಖೇ.

೧೧೨೧. ‘‘ದೇವಿದ್ಧಿಪತ್ತೋಸಿ ಮಹಾನುಭಾವೋ…ಪೇ…ವಣ್ಣೋ ಚ ತೇ ಸಬ್ಬದಿಸಾ ಪಭಾಸತೀತಿ.

೧೧೨೨. ‘‘ಸೋ ದೇವಪುತ್ತೋ ಅತ್ತಮನೋ…ಪೇ… ಯಸ್ಸ ಕಮ್ಮಸ್ಸಿದಂ ಫಲಂ’’.

೧೧೨೩. ‘‘ಅಹಂ ಮನುಸ್ಸೇಸು ಮನುಸ್ಸಭೂತೋ, ದಲಿದ್ದೋ ಅತಾಣೋ ಕಪಣೋ ಕಮ್ಮಕರೋ ಅಹೋಸಿಂ;

ಜಿಣ್ಣೇ ಚ ಮಾತಾಪಿತರೋ ಅಭಾರಿಂ, ಪಿಯಾ ಚ ಮೇ ಸೀಲವನ್ತೋ ಅಹೇಸುಂ;

ಅನ್ನಞ್ಚ ಪಾನಞ್ಚ ಪಸನ್ನಚಿತ್ತೋ, ಸಕ್ಕಚ್ಚ ದಾನಂ ವಿಪುಲಂ ಅದಾಸಿಂ.

೧೧೨೪. ‘‘ತೇನ ಮೇತಾದಿಸೋ ವಣ್ಣೋ…ಪೇ…ವಣ್ಣೋ ಚ ಮೇ ಸಬ್ಬದಿಸಾ ಪಭಾಸತೀ’’ತಿ. –

ಗಾಥಾಹಿ ಬ್ಯಾಕಾಸಿ. ತತ್ಥ ಗಾಥಾಸುಪಿ ಅಪುಬ್ಬಂ ನತ್ಥಿ.

ನನ್ದನವಿಮಾನವಣ್ಣನಾ ನಿಟ್ಠಿತಾ.

೩. ಮಣಿಥೂಣವಿಮಾನವಣ್ಣನಾ

ಉಚ್ಚಮಿದಂ ಮಣಿಥೂಣಂ ವಿಮಾನನ್ತಿ ಮಣಿಥೂಣವಿಮಾನಂ. ತಸ್ಸ ಕಾ ಉಪ್ಪತ್ತಿ? ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ. ತೇನ ಸಮಯೇನ ಸಮ್ಬಹುಲಾ ಥೇರಾ ಭಿಕ್ಖೂ ಅರಞ್ಞಾಯತನೇ ವಿಹರನ್ತಿ. ತೇಸಂ ಗಾಮಂ ಪಿಣ್ಡಾಯ ಗಮನಮಗ್ಗೇ ಏಕೋ ಉಪಾಸಕೋ ವಿಸಮಂ ಸಮಂ ಕರೋತಿ, ಕಣ್ಟಕೇ ನೀಹರತಿ, ಗಚ್ಛಗುಮ್ಬೇ ಅಪನೇತಿ, ಉದಕಕಾಲೇ ಮಾತಿಕಾಸು ಸೇತುಂ ಬನ್ಧತಿ, ವಿವನಟ್ಠಾನೇಸು ಛಾಯಾರುಕ್ಖೇ ರೋಪೇತಿ, ಜಲಾಸಯೇಸು ಮತ್ತಿಕಂ ಉದ್ಧರಿತ್ವಾ ತೇ ಪುಥುಲಗಮ್ಭೀರೇ ಕರೋತಿ, ತಿತ್ಥೇ ಸಮ್ಪಾದೇತಿ, ಯಥಾವಿಭವಂ ದಾನಂ ದೇತಿ, ಸೀಲಂ ರಕ್ಖತಿ. ಸೋ ಅಪರಭಾಗೇ ಕಾಲಂ ಕತ್ವಾ ತಾವತಿಂಸೇಸು ದ್ವಾದಸಯೋಜನಿಕೇ ಕನಕವಿಮಾನೇ ನಿಬ್ಬತ್ತಿ. ತಂ ಆಯಸ್ಮಾ ಮಹಾಮೋಗ್ಗಲ್ಲಾನತ್ಥೇರೋ ಉಪಸಙ್ಕಮಿತ್ವಾ ಇಮಾಹಿ ಗಾಥಾಹಿ ಪಟಿಪುಚ್ಛಿ –

೧೧೨೬. ‘‘ಉಚ್ಚಮಿದಂ ಮಣಿಥೂಣಂ ವಿಮಾನಂ, ಸಮನ್ತತೋ ದ್ವಾದಸ ಯೋಜನಾನಿ;

ಕೂಟಾಗಾರಾ ಸತ್ತಸತಾ ಉಳಾರಾ, ವೇಳುರಿಯಥಮ್ಭಾ ರುಚಕತ್ಥತಾ ಸುಭಾ.

೧೧೨೭. ‘‘ತತ್ಥಚ್ಛಸಿ ಪಿವಸಿ ಖಾದಸಿ ಚ, ದಿಬ್ಬಾ ಚ ವೀಣಾ ಪವದನ್ತಿ ವಗ್ಗುಂ;

ದಿಬ್ಬಾ ರಸಾ ಕಾಮಗುಣೇತ್ಥ ಪಞ್ಚ, ನಾರಿಯೋ ಚ ನಚ್ಚನ್ತಿ ಸುವಣ್ಣಚ್ಛನ್ನಾ.

೧೧೨೮. ‘‘ಕೇನ ತೇತಾದಿಸೋ ವಣ್ಣೋ…ಪೇ…ವಣ್ಣೋ ಚ ತೇ ಸಬ್ಬದಿಸಾ ಪಭಾಸತೀ’’ತಿ.

ಸೋಪಿ ತಸ್ಸ ಗಾಥಾಹಿ ಬ್ಯಾಕಾಸಿ –

೧೧೩೦. ‘‘ಸೋ ದೇವಪುತ್ತೋ ಅತ್ತಮನೋ…ಪೇ… ಯಸ್ಸ ಕಮ್ಮಸ್ಸಿದಂ ಫಲಂ’’.

೧೧೩೧. ‘‘ಅಹಂ ಮನುಸ್ಸೇಸು ಮನುಸ್ಸಭೂತೋ, ವಿವನೇ ಪಥೇ ಸಙ್ಕಮನಂ ಅಕಾಸಿಂ;

ಆರಾಮರುಕ್ಖಾನಿ ಚ ರೋಪಯಿಸ್ಸಂ, ಪಿಯಾ ಚ ಮೇ ಸೀಲವನ್ತೋ ಅಹೇಸುಂ;

ಅನ್ನಞ್ಚ ಪಾನಞ್ಚ ಪಸನ್ನಚಿತ್ತೋ, ಸಕ್ಕಚ್ಚ ದಾನಂ ವಿಪುಲಂ ಅದಾಸಿಂ.

೧೧೩೨. ‘‘ತೇನ ಮೇತಾದಿಸೋ ವಣ್ಣೋ…ಪೇ…ವಣ್ಣೋ ಚ ಮೇ ಸಬ್ಬದಿಸಾ ಪಭಾಸತೀ’’ತಿ.

೧೧೩೧. ತತ್ಥ ವಿವನೇತಿ ಅರಞ್ಞೇ. ಆರಾಮರುಕ್ಖಾನಿ ಚಾ ಆರಾಮಭೂತೇ ರುಕ್ಖೇ, ಆರಾಮಂ ಕತ್ವಾ ತತ್ಥ ರುಕ್ಖೇ ರೋಪೇಸಿನ್ತಿ ಅತ್ಥೋ. ಸೇಸಂ ಸಬ್ಬಂ ವುತ್ತನಯಮೇವ.

ಮಣಿಥೂಣವಿಮಾನವಣ್ಣನಾ ನಿಟ್ಠಿತಾ.

೪. ಸುವಣ್ಣವಿಮಾನವಣ್ಣನಾ

ಸೋವಣ್ಣಮಯೇ ಪಬ್ಬತಸ್ಮಿನ್ತಿ ಸುವಣ್ಣವಿಮಾನಂ. ತಸ್ಸ ಕಾ ಉಪ್ಪತ್ತಿ? ಭಗವಾ ಅನ್ಧಕವಿನ್ದೇ ವಿಹರತಿ. ತೇನ ಸಮಯೇನ ಅಞ್ಞತರೋ ಉಪಾಸಕೋ ಸದ್ಧೋ ಪಸನ್ನೋ ವಿಭವಸಮ್ಪನ್ನೋ ತಸ್ಸ ಗಾಮಸ್ಸ ಅವಿದೂರೇ ಅಞ್ಞತರಸ್ಮಿಂ ಮುಣ್ಡಕಪಬ್ಬತೇ ಸಬ್ಬಾಕಾರಸಮ್ಪನ್ನಂ ಭಗವತೋ ವಸನಾನುಚ್ಛವಿಕಂ ಗನ್ಧಕುಟಿಂ ಕಾರೇತ್ವಾ ತತ್ಥ ಭಗವನ್ತಂ ವಸಾಪೇನ್ತೋ ಸಕ್ಕಚ್ಚಂ ಉಪಟ್ಠಹಿ, ಸಯಞ್ಚ ನಿಚ್ಚಸೀಲೇ ಪತಿಟ್ಠಿತೋ ಸುವಿಸುದ್ಧಸೀಲಸಂವರೋ ಹುತ್ವಾ ಕಾಲಂ ಕತ್ವಾ ತಾವತಿಂಸಭವನೇ ನಿಬ್ಬತ್ತಿ. ತಸ್ಸ ಕಮ್ಮಾನುಭಾವಸಂಸೂಚಕಂ ನಾನಾರತನರಂಸಿಜಾಲಸಮುಜ್ಜಲಂ ವಿಚಿತ್ತವೇದಿಕಾಪರಿಕ್ಖಿತ್ತಂ ವಿವಿಧವಿಪುಲಾಲಙ್ಕಾರೋಪಸೋಭಿತಂ ಸುವಿಭತ್ತಭಿತ್ತಿತ್ಥಮ್ಭಸೋಪಾನಂ ಆರಾಮರಮಣೀಯಕಂ ಕಞ್ಚನಪಬ್ಬತಮುದ್ಧನಿ ವಿಮಾನಂ ಉಪ್ಪಜ್ಜಿ. ತಂ ಆಯಸ್ಮಾ ಮಹಾಮೋಗ್ಗಲ್ಲಾನೋ ದೇವಚಾರಿಕಂ ಚರನ್ತೋ ದಿಸ್ವಾ ಇಮಾಹಿ ಗಾಥಾಹಿ ಪಟಿಪುಚ್ಛಿ –

೧೧೩೪. ‘‘ಸೋವಣ್ಣಮಯೇ ಪಬ್ಬತಸ್ಮಿಂ, ವಿಮಾನಂ ಸಬ್ಬತೋಪಭಂ;

ಹೇಮಜಾಲಪಟಿಚ್ಛನ್ನಂ, ಕಿಙ್ಕಿಣಿಜಾಲಕಪ್ಪಿತಂ.

೧೧೩೫. ‘‘ಅಟ್ಠಂಸಾ ಸುಕತಾ ಥಮ್ಭಾ, ಸಬ್ಬೇ ವೇಳುರಿಯಾಮಯಾ;

ಏಕಮೇಕಾಯ ಅಂಸಿಯಾ, ರತನಾ ಸತ್ತ ನಿಮ್ಮಿತಾ.

೧೧೩೬. ‘‘ವೇಳೂರಿಯಸುವಣ್ಣಸ್ಸ, ಫಲಿಕಾ ರೂಪಿಯಸ್ಸ ಚ;

ಮಸಾರಗಲ್ಲಮುತ್ತಾಹಿ, ಲೋಹಿತಙ್ಗಮಣೀಹಿ ಚ.

೧೧೩೭. ‘‘ಚಿತ್ರಾ ಮನೋರಮಾ ಭೂಮಿ, ನ ತತ್ಥುದ್ಧಂಸತೀ ರಜೋ;

ಗೋಪಾನಸೀಗಣಾ ಪೀತಾ, ಕೂಟಂ ದಾರೇನ್ತಿ ನಿಮ್ಮಿತಾ.

೧೧೩೮. ‘‘ಸೋಪಾನಾನಿ ಚ ಚತ್ತಾರಿ, ನಿಮ್ಮಿತಾ ಚತುರೋ ದಿಸಾ;

ನಾನಾರತನಗಬ್ಭೇಹಿ, ಆದಿಚ್ಚೋವ ವಿರೋಚತಿ.

೧೧೩೯. ‘‘ವೇದಿಯಾ ಚತಸ್ಸೋ ತತ್ಥ, ವಿಭತ್ತಾ ಭಾಗಸೋ ಮಿತಾ;

ದದ್ದಲ್ಲಮಾನಾ ಆಭನ್ತಿ, ಸಮನ್ತಾ ಚತುರೋ ದಿಸಾ.

೧೧೪೦. ‘‘ತಸ್ಮಿಂ ವಿಮಾನೇ ಪವರೇ, ದೇವಪುತ್ತೋ ಮಹಪ್ಪಭೋ;

ಅತಿರೋಚಸಿ ವಣ್ಣೇನ, ಉದಯನ್ತೋವ ಭಾಣುಮಾ.

೧೧೪೧. ‘‘ದಾನಸ್ಸ ತೇ ಇದಂ ಫಲಂ, ಅಥೋ ಸೀಲಸ್ಸ ವಾ ಪನ;

ಅಥೋ ಅಞ್ಜಲಿಕಮ್ಮಸ್ಸ, ತಂ ಮೇ ಅಕ್ಖಾಹಿ ಪುಚ್ಛಿತೋ’’ತಿ.

ಸೋಪಿಸ್ಸ ಇಮಾಹಿ ಗಾಥಾಹಿ ಬ್ಯಾಕಾಸಿ –

೧೧೪೨. ‘‘ಸೋ ದೇವಪುತ್ತೋ ಅತ್ತಮನೋ…ಪೇ… ಯಸ್ಸ ಕಮ್ಮಸ್ಸಿದಂ ಫಲಂ’’.

೧೧೪೩. ‘‘ಅಹಂ ಅನ್ಧಕವಿನ್ದಸ್ಮಿಂ, ಬುದ್ಧಸ್ಸಾದಿಚ್ಚಬನ್ಧುನೋ;

ವಿಹಾರಂ ಸತ್ಥು ಕಾರೇಸಿಂ, ಪಸನ್ನೋ ಸೇಹಿ ಪಾಣಿಭಿ.

೧೧೪೪. ‘‘ತತ್ಥ ಗನ್ಧಞ್ಚ ಮಾಲಞ್ಚ, ಪಚ್ಚಯಞ್ಚ ವಿಲೇಪನಂ;

ವಿಹಾರಂ ಸತ್ಥು ಅದಾಸಿಂ, ವಿಪ್ಪಸನ್ನೇನ ಚೇತಸಾ;

ತೇನ ಮಯ್ಹಂ ಇದಂ ಲದ್ಧಂ, ವಸಂ ವತ್ತೇಮಿ ನನ್ದನೇ.

೧೧೪೫. ‘‘ನನ್ದನೇ ಚ ವನೇ ರಮ್ಮೇ, ನಾನಾದಿಜಗಣಾಯುತೇ;

ರಮಾಮಿ ನಚ್ಚಗೀತೇಹಿ, ಅಚ್ಛರಾಹಿ ಪುರಕ್ಖತೋ’’ತಿ.

೧೧೩೪. ತತ್ಥ ಸಬ್ಬತೋಪಭನ್ತಿ ಸಬ್ಬಭಾಗೇಹಿ ಪಭಾಸನ್ತಂ ಪಭಾಮುಞ್ಚನಕಂ. ಕಿಙ್ಕಿಣಿಜಾಲಕಪ್ಪಿತನ್ತಿ ಕಪ್ಪಿತಕಿಙ್ಕಿಣಿಕಜಾಲಂ.

೧೧೩೫. ಸಬ್ಬೇ ವೇಳುರಿಯಾಮಯಾತಿ ಸಬ್ಬೇ ಥಮ್ಭಾ ವೇಳುರಿಯಮಣಿಮಯಾ. ತತ್ಥ ಪನ ಏಕಮೇಕಾಯ ಅಂಸಿಯಾತಿ ಅಟ್ಠಂಸೇಸು ಥಮ್ಭೇಸು ಏಕಮೇಕಸ್ಮಿಂ ಅಂಸಭಾಗೇ. ರತನಾ ಸತ್ತ ನಿಮ್ಮಿತಾತಿ ಸತ್ತರತನಕಮ್ಮನಿಮ್ಮಿತಾ, ಏಕೇಕೋ ಅಂಸೋ ಸತ್ತರತನಮಯೋತಿ ಅತ್ಥೋ.

೧೧೩೬. ‘‘ವೇಳೂರಿಯಸುವಣ್ಣಸ್ಸಾ’’ತಿಆದಿನಾ ನಾನಾರತನಾನಿ ದಸ್ಸೇತಿ. ತತ್ಥ ವೇಳೂರಿಯಸುವಣ್ಣಸ್ಸಾತಿ ವೇಳುರಿಯೇನ ಚ ಸುವಣ್ಣೇನ ಚ ನಿಮ್ಮಿತಾ, ಚಿತ್ರಾತಿ ವಾ ಯೋಜನಾ. ಕರಣತ್ಥೇ ಹಿ ಇದಂ ಸಾಮಿವಚನಂ. ಫಲಿಕಾ ರೂಪಿಯಸ್ಸ ಚಾತಿ ಏತ್ಥಾಪಿ ಏಸೇವ ನಯೋ. ಮಸಾರಗಲ್ಲಮುತ್ತಾಹೀತಿ ಕಬರಮಣೀಹಿ. ಲೋಹಿತಙ್ಗಮಣೀಹಿ ಚಾತಿ ರತ್ತಮಣೀಹಿ.

೧೧೩೭. ನ ತತ್ಥುದ್ಧಂಸತೀ ರಜೋತಿ ಮಣಿಮಯಭೂಮಿಕತ್ತಾ ನ ತಸ್ಮಿಂ ವಿಮಾನೇ ರಜೋ ಉಗ್ಗಚ್ಛತಿ. ಗೋಪಾನಸೀಗಣಾತಿ ಗೋಪಾನಸೀಸಮೂಹಾ. ಪೀತಾತಿ ಪೀತವಣ್ಣಾ, ಸುವಣ್ಣಮಯಾ ಚೇವ ಫುಸ್ಸರಾಗಾದಿಮಣಿಮಯಾ ಚಾತಿ ಅತ್ಥೋ. ಕೂಟಂ ಧಾರೇನ್ತೀತಿ ಸತ್ತರತನಮಯಂ ಕಣ್ಣಿಕಂ ಧಾರೇನ್ತಿ.

೧೧೩೮-೯. ನಾನಾರತನಗಬ್ಭೇಹೀತಿ ನಾನಾರತನಮಯೇಹಿ ಓವರಕೇಹಿ. ವೇದಿಯಾತಿ ವೇದಿಕಾ. ಚತಸ್ಸೋತಿ ಚತೂಸು ದಿಸಾಸು ಚತಸ್ಸೋ. ತೇನಾಹ ‘‘ಸಮನ್ತಾ ಚತುರೋ ದಿಸಾ’’ತಿ.

೧೧೪೦. ಮಹಪ್ಪಭೋತಿ ಮಹಾಜುತಿಕೋ. ಉದಯನ್ತೋತಿ ಉಗ್ಗಚ್ಛನ್ತೋ. ಭಾಣುಮಾತಿ ಆದಿಚ್ಚೋ.

೧೧೪೩. ಸೇಹಿ ಪಾಣಿಭೀತಿ ಕಾಯಸಾರಂ ಪುಞ್ಞಂ ಪಸವನ್ತೋ ಅತ್ತನೋ ಪಾಣೀಹಿ ತಂ ತಂ ಕಿಚ್ಚಂ ಕರೋನ್ತೋ ವಿಹಾರಂ ಸತ್ಥು ಕಾರೇಸಿನ್ತಿ ಯೋಜನಾ. ಅಥ ವಾ ಸೇಹಿ ಪಾಣಿಭೀತಿ ತತ್ಥ ಅನ್ಧಕವಿನ್ದಸ್ಮಿಂ ಗನ್ಧಞ್ಚ ಮಾಲಞ್ಚ ಪಚ್ಚಯಞ್ಚ ವಿಲೇಪನಞ್ಚ ಪೂಜಾವಸೇನ. ಯಥಾ ಕಥಂ? ವಿಹಾರಞ್ಚ ವಿಪ್ಪಸನ್ನೇನ ಚೇತಸಾ ಸತ್ಥುನೋ ಅದಾಸಿಂ ಪೂಜೇಸಿಂ ನಿಯ್ಯಾದೇಸಿಂ ಚಾತಿ ಏವಮೇತ್ಥ ಯೋಜನಾ ವೇದಿತಬ್ಬಾ.

೧೧೪೪. ತೇನಾತಿ ತೇನ ಯಥಾವುತ್ತೇನ ಪುಞ್ಞಕಮ್ಮೇನ ಕಾರಣಭೂತೇನ. ಮಯ್ಹನ್ತಿ ಮಯಾ. ಇದನ್ತಿ ಇದಂ ಪುಞ್ಞಫಲಂ, ಇದಂ ವಾ ದಿಬ್ಬಂ ಆಧಿಪತೇಯ್ಯಂ. ತೇನಾಹ ‘‘ವಸಂ ವತ್ತೇಮೀ’’ತಿ.

೧೧೪೫. ನನ್ದನೇತಿ ನನ್ದಿಯಾ ದಿಬ್ಬಸಮಿದ್ಧಿಯಾ ಉಪ್ಪಜ್ಜನಟ್ಠಾನೇ ಇಮಸ್ಮಿಂ ದೇವಲೋಕೇ, ತತ್ಥಾಪಿ ವಿಸೇಸತೋ ನನ್ದನೇ ವನೇ ರಮ್ಮೇ, ಏವಂ ರಮಣೀಯೇ ಇಮಸ್ಮಿಂ ನನ್ದನೇ ವನೇ ರಮಾಮೀತಿ ಯೋಜನಾ. ಸೇಸಂ ವುತ್ತನಯಮೇವ.

ಏವಂ ದೇವತಾಯ ಅತ್ತನೋ ಪುಞ್ಞಕಮ್ಮೇ ಆವಿಕತೇ ಥೇರೋ ಸಪರಿವಾರಸ್ಸ ತಸ್ಸ ದೇವಪುತ್ತಸ್ಸ ಧಮ್ಮಂ ದೇಸೇತ್ವಾ ಭಗವತೋ ತಮತ್ಥಂ ನಿವೇದೇಸಿ. ಭಗವಾ ತಂ ಅಟ್ಠುಪ್ಪತ್ತಿಂ ಕತ್ವಾ ಸಮ್ಪತ್ತಪರಿಸಾಯ ಧಮ್ಮಂ ದೇಸೇಸಿ. ಸಾ ದೇಸನಾ ಮಹಾಜನಸ್ಸ ಸಾತ್ಥಿಕಾ ಅಹೋಸೀತಿ.

ಸುವಣ್ಣವಿಮಾನವಣ್ಣನಾ ನಿಟ್ಠಿತಾ.

೫. ಅಮ್ಬವಿಮಾನವಣ್ಣನಾ

ಉಚ್ಚಮಿದಂ ಮಣಿಥೂಣನ್ತಿ ಅಮ್ಬವಿಮಾನಂ. ತಸ್ಸ ಕಾ ಉಪ್ಪತ್ತಿ? ಭಗವಾ ರಾಜಗಹೇ ವಿಹರತಿ ವೇಳುವನೇ. ತೇನ ಸಮಯೇನ ರಾಜಗಹೇ ಅಞ್ಞತರೋ ದುಗ್ಗತಪುರಿಸೋ ಪರೇಸಂ ಭತ್ತವೇತನಭತೋ ಹುತ್ವಾ ಅಮ್ಬವನಂ ರಕ್ಖತಿ. ಸೋ ಏಕದಿವಸಂ ಆಯಸ್ಮನ್ತಂ ಸಾರಿಪುತ್ತಂ ಗಿಮ್ಹಸಮಯೇ ಸೂರಿಯಾತಪಸನ್ತತ್ತೇ ಉಣ್ಹವಾಲಿಕಾನಿಪ್ಪೀಳಿತೇ ವಿಪ್ಫನ್ದಮಾನಮರೀಚಿಜಾಲವಿತ್ಥತೇ ಭೂಮಿಪ್ಪದೇಸೇ ತಸ್ಸ ಅಮ್ಬಾರಾಮಸ್ಸ ಅವಿದೂರೇನ ಮಗ್ಗೇನ ಸೇದಾಗತೇನ ಗತ್ತೇನ ಗಚ್ಛನ್ತಂ ದಿಸ್ವಾ ಸಞ್ಜಾತಗಾರವಬಹುಮಾನೋ ಉಪಸಙ್ಕಮಿತ್ವಾ ಏವಮಾಹ ‘‘ಮಹಾ ಅಯಂ, ಭನ್ತೇ, ಘಮ್ಮಪರಿಳಾಹೋ, ಅತಿವಿಯ ಪರಿಸ್ಸನ್ತರೂಪೋ ವಿಯ ದಿಸ್ಸತಿ, ಸಾಧು, ಭನ್ತೇ, ಅಯ್ಯೋ ಇಮಂ ಅಮ್ಬಾರಾಮಂ ಪವಿಸಿತ್ವಾ ಮುಹುತ್ತಂ ವಿಸ್ಸಮಿತ್ವಾ ಅದ್ಧಾನಪರಿಸ್ಸಮಂ ಪಟಿವಿನೋದೇತ್ವಾ ಗಚ್ಛಥ ಅನುಕಮ್ಪಂ ಉಪಾದಾಯಾ’’ತಿ. ಥೇರೋ ವಿಸೇಸತೋ ತಸ್ಸ ಚಿತ್ತಪ್ಪಸಾದಂ ಪರಿಬ್ರೂಹೇತುಕಾಮೋ ತಂ ಆರಾಮಂ ಪವಿಸಿತ್ವಾ ಅಞ್ಞತರಸ್ಸ ಅಮ್ಬರುಕ್ಖಸ್ಸ ಮೂಲೇ ನಿಸೀದಿ.

ಪುನ ಸೋ ಪುರಿಸೋ ಆಹ ‘‘ಸಚೇ, ಭನ್ತೇ, ನ್ಹಾಯಿತುಕಾಮತ್ಥ, ಅಹಂ ಇತೋ ಕೂಪತೋ ಉದಕಂ ಉದ್ಧರಿತ್ವಾ ತುಮ್ಹೇ ನ್ಹಾಪೇಸ್ಸಾಮಿ, ಪಾನೀಯಞ್ಚ ದಸ್ಸಾಮೀ’’ತಿ. ಥೇರೋಪಿ ಅಧಿವಾಸೇಸಿ ತುಣ್ಹೀಭಾವೇನ. ಸೋ ಕೂಪತೋ ಉದಕಂ ಉದ್ಧರಿತ್ವಾ ಪರಿಸ್ಸಾವೇತ್ವಾ ಥೇರಂ ನ್ಹಾಪೇಸಿ, ನ್ಹಾಪೇತ್ವಾ ಚ ಹತ್ಥಪಾದೇ ಧೋವಿತ್ವಾ ನಿಸಿನ್ನಸ್ಸ ಪಾನೀಯಂ ಉಪನೇಸಿ. ಥೇರೋ ಪಾನೀಯಂ ಪಿವಿತ್ವಾ ಪಟಿಪ್ಪಸ್ಸದ್ಧದರಥೋ ತಸ್ಸ ಪುರಿಸಸ್ಸ ಉದಕದಾನೇ ಚೇವ ನ್ಹಾಪನೇ ಚ ಅನುಮೋದನಂ ವತ್ವಾ ಪಕ್ಕಾಮಿ. ಅಥ ಸೋ ಪುರಿಸೋ ‘‘ಘಮ್ಮಾಭಿತತ್ತಸ್ಸ ವತ ಥೇರಸ್ಸ ಘಮ್ಮಪರಿಳಾಹಂ ಪಟಿಪ್ಪಸ್ಸಮ್ಭೇಸಿಂ, ಬಹುಂ ವತ ಮಯಾ ಪುಞ್ಞಂ ಪಸುತ’’ನ್ತಿ ಉಳಾರಪೀತಿಸೋಮನಸ್ಸಂ ಪಟಿಸಂವೇದೇಸಿ. ಸೋ ಅಪರಭಾಗೇ ಕಾಲಂ ಕತ್ವಾ ತಾವತಿಂಸೇಸು ಉಪ್ಪಜ್ಜಿ. ತಂ ಆಯಸ್ಮಾ ಮಹಾಮೋಗ್ಗಲ್ಲಾನೋ ಉಪಸಙ್ಕಮಿತ್ವಾ ಇಮಾಹಿ ಗಾಥಾಹಿ ಕತಪುಞ್ಞಂ ಪುಚ್ಛಿ.

೧೧೪೬. ‘‘ಉಚ್ಚಮಿದಂ ಮಣಿಥೂಣಂ ವಿಮಾನಂ, ಸಮನ್ತತೋ ದ್ವಾದಸ ಯೋಜನಾನಿ;

ಕೂಟಾಗಾರಾ ಸತ್ತಸತಾ ಉಳಾರಾ, ವೇಳುರಿಯಥಮ್ಭಾ ರುಚಕತ್ಥತಾ ಸುಭಾ.

೧೧೪೭. ‘‘ತತ್ಥಚ್ಛಸಿ ಪಿವಸಿ ಖಾದಸಿ ಚ, ದಿಬ್ಬಾ ಚ ವೀಣಾ ಪವದನ್ತಿ ವಗ್ಗುಂ;

ದಿಬ್ಬಾ ರಸಾ ಕಾಮಗುಣೇತ್ಥ ಪಞ್ಚ, ನಾರಿಯೋ ಚ ನಚ್ಚನ್ತಿ ಸುವಣ್ಣಛನ್ನಾ.

೧೧೪೮. ‘‘ಕೇನ ತೇತಾದಿಸೋ ವಣ್ಣೋ…ಪೇ…

ವಣ್ಣೋ ಚ ತೇ ಸಬ್ಬದಿಸಾ ಪಭಾಸತೀ’’ತಿ.

೧೧೫೦. ‘‘ಸೋ ದೇವಪುತ್ತೋ ಅತ್ತಮನೋ…ಪೇ…

ಯಸ್ಸ ಕಮ್ಮಸ್ಸಿದಂ ಫಲಂ’’.

೧೧೫೧. ‘‘ಗಿಮ್ಹಾನಂ ಪಚ್ಛಿಮೇ ಮಾಸೇ, ಪತಪನ್ತೇ ದಿವಙ್ಕರೇ;

ಪರೇಸಂ ಭತಕೋ ಪೋಸೋ, ಅಮ್ಬಾರಾಮಮಸಿಞ್ಚತಿ.

೧೧೫೨. ‘‘ಅಥ ತೇನಾಗಮಾ ಭಿಕ್ಖು, ಸಾರಿಪುತ್ತೋತಿ ವಿಸ್ಸುತೋ;

ಕಿಲನ್ತರೂಪೋ ಕಾಯೇನ, ಅಕಿಲನ್ತೋವ ಚೇತಸಾ.

೧೧೫೩. ‘‘ತಞ್ಚ ದಿಸ್ವಾನ ಆಯನ್ತಂ, ಅವೋಚಂ ಅಮ್ಬಸಿಞ್ಚಕೋ;

ಸಾಧು ತಂ ಭನ್ತೇ ನ್ಹಾಪೇಯ್ಯಂ, ಯಂ ಮಮಸ್ಸ ಸುಖಾವಹಂ.

೧೧೫೪. ‘‘ತಸ್ಸ ಮೇ ಅನುಕಮ್ಪಾಯ, ನಿಕ್ಖಿಪಿ ಪತ್ತಚೀವರಂ;

ನಿಸೀದಿ ರುಕ್ಖಮೂಲಸ್ಮಿಂ, ಛಾಯಾಯ ಏಕಚೀವರೋ.

೧೧೫೫. ‘‘ತಞ್ಚ ಅಚ್ಛೇನ ವಾರಿನಾ, ಪಸನ್ನಮಾನಸೋ ನರೋ;

ನ್ಹಾಪಯೀ ರುಕ್ಖಮೂಲಸ್ಮಿಂ, ಛಾಯಾಯ ಏಕಚೀವರಂ.

೧೧೫೬. ‘‘ಅಮ್ಬೋ ಚ ಸಿತ್ತೋ ಸಮಣೋ ಚ ನ್ಹಾಪಿತೋ,

ಮಯಾ ಚ ಪುಞ್ಞಂ ಪಸುತಂ ಅನಪ್ಪಕಂ;

ಇತಿ ಸೋ ಪೀತಿಯಾ ಕಾಯಂ, ಸಬ್ಬಂ ಫರತಿ ಅತ್ತನೋ.

೧೧೫೭. ‘‘ತದೇವ ಏತ್ತಕಂ ಕಮ್ಮಂ, ಅಕಾಸಿಂ ತಾಯ ಜಾತಿಯಾ;

ಪಹಾಯ ಮಾನುಸಂ ದೇಹಂ, ಉಪಪನ್ನೋಮ್ಹಿ ನನ್ದನಂ.

೧೧೫೮. ‘‘ನನ್ದನೇ ಚ ವನೇ ರಮ್ಮೇ, ನಾನಾದಿಜಗಣಾಯುತೇ;

ರಮಾಮಿ ನಚ್ಚಗೀತೇಹಿ, ಅಚ್ಛರಾಹಿ ಪುರಕ್ಖತೋ’’ತಿ. –

ಸೋಪಿ ತಸ್ಸ ಇಮಾಹಿ ಗಾಥಾಹಿ ಬ್ಯಾಕಾಸಿ.

೧೧೫೧. ತತ್ಥ ಗಿಮ್ಹಾನಂ ಪಚ್ಛಿಮೇ ಮಾಸೇತಿ ಆಸಾಳ್ಹಿಮಾಸೇ. ಪತಪನ್ತೇತಿ ಅತಿವಿಯ ದಿಪ್ಪನ್ತೇ, ಸಬ್ಬಸೋ ಉಣ್ಹಂ ವಿಸ್ಸಜ್ಜೇನ್ತೇತಿ ಅತ್ಥೋ. ದಿವಙ್ಕರೇತಿ ದಿವಾಕರೇ, ಅಯಮೇವ ವಾ ಪಾಠೋ. ಅಸಿಞ್ಚತೀತಿ ಸಿಞ್ಚತಿ, -ಕಾರೋ ನಿಪಾತಮತ್ತಂ, ಸಿಞ್ಚತಿ ಅಮ್ಬರುಕ್ಖಮೂಲೇಸು ಧುವಂ ಜಲಸೇಕಂ ಕರೋತೀತಿ ಅತ್ಥೋ. ‘‘ಅಸಿಞ್ಚಥಾ’’ತಿ ಚ ಪಾಠೋ, ಸಿಞ್ಚಿತ್ಥಾತಿ ಅತ್ಥೋ. ‘‘ಅಸಿಞ್ಚಹ’’ನ್ತಿ ಚ ಪಠನ್ತಿ, ಪರೇಸಂ ಭತಕೋ ಪೋಸೋ ಹುತ್ವಾ ತದಾ ಅಮ್ಬಾರಾಮಂ ಅಸಿಞ್ಚಿಂ ಅಹನ್ತಿ ಅತ್ಥೋ.

೧೧೫೨. ತೇನಾತಿ ಯೇನ ದಿಸಾಭಾಗೇನ ಸೋ ಅಮ್ಬಾರಾಮೋ, ತೇನ ಅಗಮಾ ಅಗಞ್ಛಿ. ಅಕಿಲನ್ತೋವ ಚೇತಸಾತಿ ಚೇತೋದುಕ್ಖಸ್ಸ ಮಗ್ಗೇನೇವ ಪಹೀನತ್ತಾ ಚೇತಸಾ ಅಕಿಲನ್ತೋಪಿ ಸಮಾನೋ ಕಿಲನ್ತುರೂಪೋ ಕಾಯೇನ ತೇನ ಮಗ್ಗೇನ ಅಗಮಾತಿ ಯೋಜನಾ.

೧೧೫೩-೪. ಅವೋಚಂ ಅಹಂ ತದಾ ಅಮ್ಬಸಿಞ್ಚಕೋ ಹುತ್ವಾತಿ ಯೋಜನಾ. ಏಕಚೀವರೋತಿ ನ್ಹಾಯಿತುಕಾಮೋತಿ ಅಧಿಪ್ಪಾಯೋ.

೧೧೫೬. ಇತೀತಿ ಏವಂ ‘‘ಅಮ್ಬೋ ಚ ಸಿತ್ತೋ, ಸಮಣೋ ಚ ನ್ಹಾಪಿತೋ, ಮಯಾ ಚ ಪುಞ್ಞಂ ಪಸುತಂ ಅನಪ್ಪಕಂ, ಏಕೇನೇವ ಪಯೋಗೇನ ತಿವಿಧೋಪಿ ಅತ್ಥೋ ಸಾಧಿತೋ’’ತಿ ಇಮಿನಾಕಾರೇನ ಪವತ್ತಾಯ ಪೀತಿಯಾ ಸೋ ಪುರಿಸೋ ಅತ್ತನೋ ಸಬ್ಬಂ ಕಾಯಂ ಫರತಿ, ನಿರನ್ತರಂ ಫುಟಂ ಕರೋತೀತಿ ಯೋಜನಾ. ಅತೀತತ್ಥೇ ಚೇತಂ ವತ್ತಮಾನವಚನಂ, ಫರೀತಿ ಅತ್ಥೋ.

೧೧೫೭. ತದೇವ ಏತ್ತಕಂ ಕಮ್ಮನ್ತಿ ತಂ ಏತ್ತಕಂ ಏವಂ ಪಾನೀಯದಾನಮತ್ತಕಂ ಕಮ್ಮಂ ಅಕಾಸಿಂ, ತಾಯ ತಸ್ಸಂ ಜಾತಿಯಂ ಅಞ್ಞಂ ನಾನುಸ್ಸರಾಮೀತಿ ಅಧಿಪ್ಪಾಯೋ. ತೇಸಂ ವುತ್ತನಯಮೇವ.

ಅಮ್ಬವಿಮಾನವಣ್ಣನಾ ನಿಟ್ಠಿತಾ.

೬. ಗೋಪಾಲವಿಮಾನವಣ್ಣನಾ

ದಿಸ್ವಾನ ದೇವಂ ಪಟಿಪುಚ್ಛಿ ಭಿಕ್ಖೂತಿ ಗೋಪಾಲವಿಮಾನಂ. ತಸ್ಸ ಕಾ ಉಪ್ಪತ್ತಿ? ಭಗವಾ ರಾಜಗಹೇ ವಿಹರತಿ ವೇಳುವನೇ. ತೇನ ಸಮಯೇನ ರಾಜಗಹವಾಸೀ ಅಞ್ಞತರೋ ಗೋಪಾಲಕೋ ಪಾತರಾಸತ್ಥಾಯ ಪಿಲೋತಿಕಾಯ ಪುಟಬದ್ಧಂ ಕುಮ್ಮಾಸಂ ಗಹೇತ್ವಾ ನಗರತೋ ನಿಕ್ಖಮಿತ್ವಾ ಗಾವೀನಂ ಚರಣಟ್ಠಾನಭೂತಂ ಗೋಚರಭೂಮಿಂ ಸಮ್ಪಾಪುಣಿ. ತಂ ಆಯಸ್ಮಾ ಮಹಾಮೋಗ್ಗಲ್ಲಾನೋ ‘‘ಅಯಂ ಇದಾನೇವ ಕಾಲಂ ಕರಿಸ್ಸತಿ, ಮಯ್ಹಞ್ಚ ಕುಮ್ಮಾಸಂ ದತ್ವಾ ತಾವತಿಂಸೇಸು ಉಪ್ಪಜ್ಜಿಸ್ಸತೀ’’ತಿ ಚ ಞತ್ವಾ ತಸ್ಸ ಸಮೀಪಂ ಅಗಮಾಸಿ. ಸೋ ವೇಲಂ ಓಲೋಕೇತ್ವಾ ಥೇರಸ್ಸ ಕುಮ್ಮಾಸಂ ದಾತುಕಾಮೋ ಅಹೋಸಿ. ತೇನ ಚ ಸಮಯೇನ ಗಾವಿಯೋ ಮಾಸಕ್ಖೇತ್ತಂ ಪವಿಸನ್ತಿ. ಅಥ ಸೋ ಗೋಪಾಲೋ ಚಿನ್ತೇಸಿ ‘‘ಕಿಂ ನು ಖೋ ಥೇರಸ್ಸ ಕುಮ್ಮಾಸಂ ದದೇಯ್ಯಂ, ಉದಾಹು ಗಾವಿಯೋ ಮಾಸಕ್ಖೇತ್ತತೋ ನೀಹರೇಯ್ಯ’’ನ್ತಿ. ಅಥಸ್ಸ ಏತದಹೋಸಿ ‘‘ಮಾಸಸಾಮಿಕಾ ಮಂ ಯಂ ಇಚ್ಛನ್ತಿ, ತಂ ಕರೋನ್ತು, ಥೇರೇ ಪನ ಗತೇ ಕುಮ್ಮಾಸದಾನನ್ತರಾಯೋ ಮೇ ಸಿಯಾ, ಹನ್ದಾಹಂ ಪಠಮಂ ಅಯ್ಯಸ್ಸ ಕುಮ್ಮಾಸಂ ದಸ್ಸಾಮೀ’’ತಿ ತಂ ಥೇರಸ್ಸ ಉಪನೇಸಿ. ಪಟಿಗ್ಗಹೇಸಿ ಥೇರೋ ಅನುಕಮ್ಪಂ ಉಪಾದಾಯ.

ಅಥ ನಂ ಗಾವಿಯೋ ನಿವತ್ತೇತುಂ ಪರಿಸ್ಸಯಂ ಅನೋಲೋಕೇತ್ವಾ ವೇಗೇನ ಉಪಧಾವನ್ತಂ ಪಾದೇನ ಫುಟ್ಠೋ ಆಸೀವಿಸೋ ಡಂಸಿ. ಥೇರೋಪಿ ತಂ ಅನುಕಮ್ಪಮಾನೋ ತಂ ಕುಮ್ಮಾಸಂ ಪರಿಭುಞ್ಜಿತುಂ ಆರಭಿ. ಗೋಪಾಲಕೋಪಿ ಗಾವಿಯೋ ನಿವತ್ತೇತ್ವಾ ಆಗತೋ ಥೇರಂ ಕುಮ್ಮಾಸಂ ಪರಿಭುಞ್ಜನ್ತಂ ದಿಸ್ವಾ ಪಸನ್ನಚಿತ್ತೋ ಉಳಾರಂ ಪೀತಿಸೋಮನಸ್ಸಂ ಪಟಿಸಂವೇದೇನ್ತೋ ನಿಸೀದಿ. ತಾವದೇವಸ್ಸ ಸಕಲಸರೀರಂ ವಿಸಂ ಅಜ್ಝೋತ್ಥರಿ. ಮುಹುತ್ತಮೇವ ವೇಗೇ ಮುದ್ಧಪತ್ತೇ ಕಾಲಮಕಾಸಿ, ಕಾಲಕತೋ ಚ ತಾವತಿಂಸೇಸು ದ್ವಾದಸಯೋಜನಿಕೇ ಕನಕವಿಮಾನೇ ನಿಬ್ಬತ್ತಿ. ತಂ ಆಯಸ್ಮಾ ಮಹಾಮೋಗ್ಗಲ್ಲಾನೋ ದಿಸ್ವಾ ಇಮಾಹಿ ಗಾಥಾಹಿ ಪಟಿಪುಚ್ಛಿ –

೧೧೫೯. ‘‘ದಿಸ್ವಾನ ದೇವಂ ಪಟಿಪುಚ್ಛಿ ಭಿಕ್ಖು, ಉಚ್ಚೇ ವಿಮಾನಮ್ಹಿ ಚಿರಟ್ಠಿತಿಕೇ;

ಆಮುತ್ತಹತ್ಥಾಭರಣಂ ಯಸಸ್ಸಿಂ, ದಿಬ್ಬೇ ವಿಮಾನಮ್ಹಿ ಯಥಾಪಿ ಚನ್ದಿಮಾ.

೧೧೬೦. ‘‘ಅಲಙ್ಕತೋ ಮಲ್ಯಧರೋ ಸುವತ್ಥೋ, ಸುಕುಣ್ಡಲೀ ಕಪ್ಪಿತಕೇಸಮಸ್ಸು;

ಆಮುತ್ತಹತ್ಥಾಭರಣೋ ಯಸಸ್ಸೀ, ದಿಬ್ಬೇ ವಿಮಾನಮ್ಹಿ ಯಥಾಪಿ ಚನ್ದಿಮಾ.

೧೧೬೧. ‘‘ದಿಬ್ಬಾ ಚ ವೀಣಾ ಪವದನ್ತಿ ವಗ್ಗುಂ; ಅಟ್ಠಟ್ಠಕಾ ಸಿಕ್ಖಿತಾ ಸಾಧುರೂಪಾ;

ದಿಬ್ಬಾ ಚ ಕಞ್ಞಾ ತಿದಸಚರಾ ಉಳಾರಾ, ನಚ್ಚನ್ತಿ ಗಾಯನ್ತಿ ಪಮೋದಯನ್ತಿ.

೧೧೬೨. ‘‘ದೇವಿದ್ಧಿಪತ್ತೋಸಿ ಮಹಾನುಭಾವೋ…ಪೇ…

ವಣ್ಣೋ ಚ ತೇ ಸಬ್ಬದಿಸಾ ಪಭಾಸತೀ’’ತಿ.

ಸೋಪಿ ತಸ್ಸ ಬ್ಯಾಕಾಸಿ –

೧೧೬೩. ‘‘ಸೋ ದೇವಪುತ್ತೋ ಅತ್ತಮನೋ…ಪೇ…ಯಸ್ಸ ಕಮ್ಮಸ್ಸಿದಂ ಫಲಂ’’.

೧೧೬೪. ‘‘ಅಹಂ ಮನುಸ್ಸೇಸು ಮನುಸ್ಸಭೂತೋ, ಸಙ್ಗಮ್ಮ ರಕ್ಖಿಸ್ಸಂ ಪರೇಸಂ ಧೇನುಯೋ;

ತತೋ ಚ ಆಗಾ ಸಮಣೋ ಮಮನ್ತಿಕೇ, ಗಾವೋ ಚ ಮಾಸೇ ಅಗಮಂಸು ಖಾದಿತುಂ.

೧೧೬೫. ‘‘ದ್ವಯಜ್ಜ ಕಿಚ್ಚಂ ಉಭಯಞ್ಚ ಕಾರಿಯಂ, ಇಚ್ಚೇವಹಂ ಭನ್ತೇ ತದಾ ವಿಚಿನ್ತಯಿಂ;

ತತೋ ಚ ಸಞ್ಞಂ ಪಟಿಲದ್ಧ ಯೋನಿಸೋ, ‘ದದಾಮಿ ಭನ್ತೇ’ತಿ ಖಿಪಿಂ ಅನನ್ತಕಂ.

೧೧೬೬. ‘‘ಸೋ ಮಾಸಖೇತ್ತಂ ತುರಿತೋ ಅವಾಸರಿಂ, ಪುರಾ ಅಯಂ ಭಞ್ಜತಿ ಯಸ್ಸಿದಂ ಧನಂ;

ತತೋ ಚ ಕಣ್ಹೋ ಉರಗೋ ಮಹಾವಿಸೋ, ಅಡಂಸಿ ಪಾದೇ ತುರಿತಸ್ಸ ಮೇ ಸತೋ.

೧೧೬೭. ‘‘ಸ್ವಾಹಂ ಅಟ್ಟೋಮ್ಹಿ ದುಕ್ಖೇನ ಪೀಳಿತೋ, ಭಿಕ್ಖು ಚ ತಂ ಸಾಮಂ ಮುಞ್ಚಿತ್ವಾನನ್ತಕಂ;

ಅಹಾಸಿ ಕುಮ್ಮಾಸಂ ಮಮಾನುಕಮ್ಪಯಾ, ತತೋ ಚುತೋ ಕಾಲಕತೋಮ್ಹಿ ದೇವತಾ.

೧೧೬೮. ‘‘ತದೇವ ಕಮ್ಮಂ ಕುಸಲಂ ಕತಂ ಮಯಾ, ಸುಖಞ್ಚ ಕಮ್ಮಂ ಅನುಭೋಮಿ ಅತ್ತನಾ;

ತಯಾ ಹಿ ಭನ್ತೇ ಅನುಕಮ್ಪಿತೋ ಭುಸಂ, ಕತಞ್ಞುತಾಯ ಅಭಿವಾದಯಾಮಿ ತಂ.

೧೧೬೯. ‘‘ಸದೇವಕೇ ಲೋಕೇ ಸಮಾರಕೇ ಚ, ಅಞ್ಞೋ ಮುನಿ ನತ್ಥಿ ತಯಾನುಕಮ್ಪಕೋ;

ತಯಾ ಹಿ ಭನ್ತೇ ಅನುಕಮ್ಪಿತೋ ಭುಸಂ, ಕತಞ್ಞುತಾಯ ಅಭಿವಾದಯಾಮಿ ತಂ.

೧೧೭೦. ‘‘ಇಮಸ್ಮಿಂ ಲೋಕೇ ಪರಸ್ಮಿಂ ವಾ ಪನ, ಅಞ್ಞೋ ಮುನೀ ನತ್ಥಿ ತಯಾನುಕಮ್ಪಕೋ;

ತಯಾ ಹಿ ಭನ್ತೇ ಅನುಕಮ್ಪಿತೋ ಭುಸಂ, ಕತಞ್ಞುತಾಯ ಅಭಿವಾದಯಾಮಿ ತ’’ನ್ತಿ.

ಅಥಾಯಸ್ಮಾ ಮಹಾಮೋಗ್ಗಲ್ಲಾನೋ ಅತ್ತನಾ ಚ ದೇವತಾಯ ಚ ಕಥಿತನಿಯಾಮೇನೇವ ತಂ ಭಗವತೋ ಆರೋಚೇಸಿ. ಸತ್ಥಾ ತಮತ್ಥಂ ಪಚ್ಚನುಭಾಸಿತ್ವಾ ತಂ ಅಟ್ಠುಪ್ಪತ್ತಿಂ ಕತ್ವಾ ಸಮ್ಪತ್ತಪರಿಸಾಯ ಧಮ್ಮಂ ದೇಸೇತುಂ ‘‘ದಿಸ್ವಾನ ದೇವಂ ಪಟಿಪುಚ್ಛಿ ಭಿಕ್ಖೂ’’ತಿಆದಿಮಾಹ.

೧೧೫೯. ತತ್ಥ ದೇವನ್ತಿ ಗೋಪಾಲದೇವಪುತ್ತಂ. ಭಿಕ್ಖೂತಿ ಆಯಸ್ಮನ್ತಂ ಮಹಾಮೋಗ್ಗಲ್ಲಾನಂ ಸನ್ಧಾಯ ಸತ್ಥಾ ವದತಿ. ಸೋ ಹಿ ಸಬ್ಬಸೋ ಭಿನ್ನಕಿಲೇಸತಾಯ ಭಿಕ್ಖು. ವಿಮಾನಸ್ಸ ಬಹುಕಾಲಾವಟ್ಠಾಯಿತಾಯ ಕಪ್ಪಟ್ಠಿತಿಕತಾಯ ಏವ ವಾ ‘‘ಚಿರಟ್ಠಿತಿಕೇ’’ತಿ ವುತ್ತಂ, ‘‘ಚಿರಟ್ಠಿತಿಕ’’ನ್ತಿಪಿ ಕೇಚಿ ಪಠನ್ತಿ. ತಞ್ಹಿ ‘‘ದೇವ’’ನ್ತಿ ಇಮಿನಾ ಸಮ್ಬನ್ಧಿತಬ್ಬಂ. ಸೋಪಿ ಹಿ ಸಟ್ಠಿಸತಸಹಸ್ಸಾಧಿಕಾ ತಿಸ್ಸೋ ವಸ್ಸಕೋಟಿಯೋ ತತ್ಥ ಅವಟ್ಠಾನತೋ ‘‘ಚಿರಟ್ಠಿತಿಕೇ’’ತಿ ವತ್ತಬ್ಬತಂ ಲಭತಿ. ಯಥಾಪಿ ಚನ್ದಿಮಾತಿ ಯಥಾ ಚನ್ದಿಮಾ ದೇವಪುತ್ತೋ ಕನ್ತಸೀತಲಮನೋಹರಕಿರಣಜಾಲಸಮುಜ್ಜಲೇ ಅತ್ತನೋ ದಿಬ್ಬೇ ವಿಮಾನಮ್ಹಿ ವಿರೋಚತಿ, ಏವಂ ವಿರೋಚಮಾನನ್ತಿ ವಚನಸೇಸಾ.

೧೧೬೦. ಅಲಙ್ಕತೋತಿಆದಿ ತಸ್ಸ ದೇವಪುತ್ತಸ್ಸ ಥೇರೇನ ಪುಚ್ಛಿತಾಕಾರದಸ್ಸನಂ, ತಂ ಹೇಟ್ಠಾ ವುತ್ತತ್ಥಮೇವ.

೧೧೬೪. ಸಙ್ಗಮ್ಮಾತಿ ಸಙ್ಗಮೇತ್ವಾ, ಸಙ್ಗಮ್ಮಾತಿ ವಾ ಸಙ್ಗಹೇತ್ವಾ. ಹೇತ್ವತ್ಥೋಪಿ ಹಿ ಇಧ ಅನ್ತೋನೀತೋ, ಬಹೂ ಏಕತೋ ಹುತ್ವಾತಿ ಅತ್ಥೋ. ಆಗಾತಿ ಆಗಞ್ಛಿ. ಮಾಸೇತಿ ಮಾಸಸಸ್ಸಾನಿ.

೧೧೬೫. ದ್ವಯಜ್ಜಾತಿ ದ್ವಯಂ ಅಜ್ಜ ಏತರಹಿ ಕಿಚ್ಚಂ ಕಾತಬ್ಬಂ. ಉಭಯಞ್ಚ ಕಾರಿಯನ್ತಿ ವುತ್ತಸ್ಸೇವತ್ಥಸ್ಸ ಪರಿಯಾಯವಚನಂ. ಸಞ್ಞನ್ತಿ ಧಮ್ಮಸಞ್ಞಂ. ತೇನಾಹ ‘‘ಯೋನಿಸೋ’’ತಿ ಪಟಿಲದ್ಧಾತಿ ಪಟಿಲಭಿತ್ವಾ. ಖಿಪಿನ್ತಿ ಪನಿಗ್ಗಾಹಾಪನವಸೇನ ಹತ್ಥೇ ಖಿಪಿಂ. ಅನನ್ತಕನ್ತಿ ನನ್ತಕಂ ಕುಮ್ಮಾಸಂ ಪಕ್ಖಿಪಿತ್ವಾ ಬನ್ಧಿತ್ವಾ ಠಪಿತಂ ಪಿಲೋತಿಕಂ. ಅ-ಕಾರೋ ಚೇತ್ಥ ನಿಪಾತಮತ್ತಂ.

೧೧೬೬. ಸೋತಿ ಸೋ ಅಹಂ. ತುರಿತೋತಿ ತುರಿತೋ ಸಮ್ಭಮನ್ತೋ. ಅವಾಸರಿನ್ತಿ ಉಪಗಚ್ಛಿ, ಪಾವಿಸಿಂ ವಾ. ಪುರಾ ಅಯಂ ಭಞ್ಜತಿ ಯಸ್ಸಿದಂ ಧನನ್ತಿ ಯಸ್ಸ ಖೇತ್ತಸಾಮಿಕಸ್ಸ ಇದಂ ಮಾಸಸಸ್ಸಂ ಧನಂ, ತಂ ಅಯಂ ಗೋಗಣೋ ಭಞ್ಜತಿ ಪುರಾ ತಸ್ಸ ಭಞ್ಜನತೋ, ಆಮದ್ದನತೋ ಪುರೇತರಮೇವಾತಿ ಅತ್ಥೋ. ತತೋತಿ ತತ್ಥ. ತುರಿತಸ್ಸ ಮೇ ಸತೋತಿ ಸಮ್ಭಮನ್ತಸ್ಸ ಮೇ ಸಮಾನಸ್ಸ, ಸಹಸಾ ಗಮನೇನ ಮಗ್ಗೇ ಕಣ್ಹಸಪ್ಪಂ ಅನೋಲೋಕೇತ್ವಾ ಗತಸ್ಸಾತಿ ಅಧಿಪ್ಪಾಯೋ.

೧೧೬೭. ಅಟ್ಟೋಮ್ಹಿ ದುಕ್ಖೇನ ಪೀಳಿತೋತಿ ತೇನ ಆಸೀವಿಸಡಂಸನೇನ ಅಟ್ಟೋ ಅಟ್ಟಿತೋ ಉಪದ್ದುತೋ ಮರಣದುಕ್ಖೇನ ಬಾಧಿತೋ ಭವಾಮಿ. ಅಹಾಸೀತಿ ಅಜ್ಝೋಹರಿ, ಪರಿಭುಞ್ಜೀತಿ ಅತ್ಥೋ. ತತೋ ಚುತೋ ಕಾಲಕತೋಮ್ಹಿ ದೇವತಾತಿ ತತೋ ಮನುಸ್ಸತ್ತಭಾವತೋ ಚುತೋ ಮರಣಕಾಲಪ್ಪತ್ತಿಯಾ, ತತ್ಥ ವಾ ಆಯುಸಙ್ಖಾರಸ್ಸ ಖೇಪನಸಙ್ಖಾತಸ್ಸ ಕಾಲಸ್ಸ ಕತತ್ತಾ ಕಾಲಕತೋ, ತದನನ್ತರಮೇವ ಚ ಅಮ್ಹಿ ದೇವತಾ ದೇವತ್ತಭಾವಪ್ಪತ್ತಿಯಾ ದೇವತಾ ಹೋಮೀತಿ ಅತ್ಥೋ.

೧೧೬೯. ತಯಾತಿ ತಯಾ ಸದಿಸೋ ಅಞ್ಞೋ ಮುನಿ ಮೋನೇಯ್ಯಗುಣಯುತ್ತೋ ಇಸಿ ನತ್ಥಿ. ತಯಾತಿ ವಾ ನಿಸ್ಸಕ್ಕೇ ಇದಂ ಕರಣವಚನಂ. ಸೇಸಂ ವುತ್ತನಯಮೇವ.

ಗೋಪಾಲವಿಮಾನವಣ್ಣನಾ ನಿಟ್ಠಿತಾ.