೧. ಚಿತ್ತಲತಾವಿಮಾನವಣ್ಣನಾ

ಯಥಾ ವನಂ ಚಿತ್ತಲತಂ ಪಭಾಸತೀತಿ ಚಿತ್ತಲತಾವಿಮಾನಂ. ತಸ್ಸ ಕಾ ಉಪ್ಪತ್ತಿ? ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ. ತೇನ ಸಮಯೇನ ಸಾವತ್ಥಿಯಂ ಅಞ್ಞತರೋ ಉಪಾಸಕೋ ದಲಿದ್ದೋ ಅಪ್ಪಭೋಗೋ ಪರೇಸಂ ಕಮ್ಮಂ ಕತ್ವಾ ಜೀವತಿ. ಸೋ ಸದ್ಧೋ ಪಸನ್ನೋ ಜಿಣ್ಣೇ ವುಡ್ಢೇ ಮಾತಾಪಿತರೋ ಪೋಸೇನ್ತೋ ‘‘ಇತ್ಥಿಯೋ ನಾಮ ಪತಿಕುಲೇ ಠಿತಾ ಇಸ್ಸರಿಯಂ ಕರೋನ್ತಿ, ಸಸ್ಸುಸಸುರಾನಂ ಮನಾಪಚಾರಿನಿಯೋ ದುಲ್ಲಭಾ’’ತಿ ಮಾತಾಪಿತೂನಂ ಚಿತ್ತದುಕ್ಖಂ ಪರಿಹರನ್ತೋ ದಾರಪರಿಗ್ಗಹಂ ಅಕತ್ವಾ ಸಯಮೇವ ನೇ ಉಪಟ್ಠಹತಿ, ಸೀಲಾನಿ ರಕ್ಖತಿ, ಉಪೋಸಥಂ ಉಪವಸತಿ, ಯಥಾವಿಭವಂ ದಾನಾನಿ ದೇತಿ. ಸೋ ಅಪರಭಾಗೇ ಕಾಲಂ ಕತ್ವಾ ತಾವತಿಂಸೇಸು ದ್ವಾದಸಯೋಜನಿಕೇ ವಿಮಾನೇ ನಿಬ್ಬತ್ತಿ. ತಂ ಆಯಸ್ಮಾ ಮಹಾಮೋಗ್ಗಲ್ಲಾನೋ ಹೇಟ್ಠಾ ವುತ್ತನಯೇನ ಗನ್ತ್ವಾ ಕತಕಮ್ಮಂ ಇಮಾಹಿ ಗಾಥಾಹಿ ಪಟಿಪುಚ್ಛಿ –

೧೧೧೪. ‘‘ಯಥಾ ವನಂ ಚಿತ್ತಲತಂ ಪಭಾಸತಿ, ಉಯ್ಯಾನಸೇಟ್ಠಂ ತಿದಸಾನಮುತ್ತಮಂ;

ತಥೂಪಮಂ ತುಯ್ಹಮಿದಂ ವಿಮಾನಂ, ಓಭಾಸಯಂ ತಿಟ್ಠತಿ ಅನ್ತಲಿಕ್ಖೇ.

೧೧೧೫. ‘‘ದೇವಿದ್ಧಿಪತ್ತೋಸಿ ಮಹಾನುಭಾವೋ…ಪೇ…

ವಣ್ಣೋ ಚ ತೇ ಸಬ್ಬದಿಸಾ ಪಭಾಸತೀ’’ತಿ.

೧೧೧೬. ‘‘ಸೋ ದೇವಪುತ್ತೋ ಅತ್ತಮನೋ…ಪೇ… ಯಸ್ಸ ಕಮ್ಮಸ್ಸಿದಂ ಫಲಂ’’.

೧೧೧೭. ‘‘ಅಹಂ ಮನುಸ್ಸೇಸು ಮನುಸ್ಸಭೂತೋ, ದಲಿದ್ದೋ ಅತಾಣೋ ಕಪಣೋ ಕಮ್ಮಕರೋ ಅಹೋಸಿಂ;

ಜಿಣ್ಣೇ ಚ ಮಾತಾಪಿತರೋ ಅಭಾರಿಂ, ಪಿಯಾ ಚ ಮೇ ಸೀಲವನ್ತೋ ಅಹೇಸುಂ;

ಅನ್ನಞ್ಚ ಪಾನಞ್ಚ ಪಸನ್ನಚಿತ್ತೋ, ಸಕ್ಕಚ್ಚ ದಾನಂ ವಿಪುಲಂ ಅದಾಸಿಂ.

೧೧೧೮. ‘‘ತೇನ ಮೇತಾದಿಸೋ ವಣ್ಣೋ…ಪೇ…ವಣ್ಣೋ ಚ ಮೇ ಸಬ್ಬದಿಸಾ ಪಭಾಸತೀ’’ತಿ. –

ಸೋಪಿ ತಸ್ಸ ಬ್ಯಾಕಾಸಿ. ಸೇಸಂ ವುತ್ತನಯಮೇವ.

ಚಿತ್ತಲತಾವಿಮಾನವಣ್ಣನಾ ನಿಟ್ಠಿತಾ.