೭. ಯವಪಾಲಕವಿಮಾನವಣ್ಣನಾ

ಉಚ್ಚಮಿದಂ ಮಣಿಥೂಣಂ ವಿಮಾನನ್ತಿ ಯವಪಾಲಕವಿಮಾನಂ. ತಸ್ಸ ಕಾ ಉಪ್ಪತ್ತಿ? ಭಗವಾ ರಾಜಗಹೇ ವಿಹರತಿ ವೇಳುವನೇ. ತೇನ ಸಮಯೇನ ರಾಜಗಹೇ ಅಞ್ಞತರೋ ದುಗ್ಗತದಾರಕೋ ಯವಖೇತ್ತಂ ರಕ್ಖತಿ. ಸೋ ಏಕದಿವಸಂ ಪಾತರಾಸತ್ಥಾಯ ಕುಮ್ಮಾಸಂ ಲಭಿತ್ವಾ ‘‘ಖೇತ್ತಂ ಗನ್ತ್ವಾ ಭುಞ್ಜಿಸ್ಸಾಮೀ’’ತಿ ತಂ ಕುಮ್ಮಾಸಂ ಗಹೇತ್ವಾ ಯವಖೇತ್ತಂ ಗನ್ತ್ವಾ ರುಕ್ಖಮೂಲೇ ನಿಸೀದಿ. ತಸ್ಮಿಂ ಖಣೇ ಅಞ್ಞತರೋ ಖೀಣಾಸವತ್ಥೇರೋ ಮಗ್ಗಪ್ಪಟಿಪನ್ನೋ ಉಪಕಟ್ಠೇ ಕಾಲೇ ತಂ ಠಾನಂ ಪತ್ವಾ ಯವಪಾಲಕೇನ ನಿಸಿನ್ನಂ ರುಕ್ಖಮೂಲಂ ಉಪಸಙ್ಕಮಿ. ಯವಪಾಲಕೋ ವೇಲಂ ಓಲೋಕೇತ್ವಾ ‘‘ಕಚ್ಚಿ, ಭನ್ತೇ, ಆಹಾರೋ ಲದ್ಧೋ’’ತಿ ಆಹ. ಥೇರೋ ತುಣ್ಹೀ ಅಹೋಸಿ. ಸೋ ಅಲದ್ಧಭಾವಂ ಞತ್ವಾ ‘‘ಭನ್ತೇ, ಉಪಕಟ್ಠಾ ವೇಲಾ, ಪಿಣ್ಡಾಯ ಚರಿತ್ವಾ ಭುಞ್ಜಿತುಂ ನ ಸಕ್ಕಾ, ಮಯ್ಹಂ ಅನುಕಮ್ಪಾಯ ಇಮಂ ಕುಮ್ಮಾಸಂ ಪರಿಭುಞ್ಜಥಾ’’ತಿ ವತ್ವಾ ಥೇರಸ್ಸ ತಂ ಕುಮ್ಮಾಸಂ ಅದಾಸಿ. ಥೇರೋ ತಂ ಅನುಕಮ್ಪನ್ತೋ ತಸ್ಸ ಪಸ್ಸನ್ತಸ್ಸೇವ ತಂ ಪರಿಭುಞ್ಜಿತ್ವಾ ಅನುಮೋದನಂ ವತ್ವಾ ಪಕ್ಕಾಮಿ. ಸೋಪಿ ದಾರಕೋ ‘‘ಸುದಿನ್ನಂ ವತ ಮಯಾ ಈದಿಸಸ್ಸ ಕುಮ್ಮಾಸದಾನಂ ದದನ್ತೇನಾ’’ತಿ ಚಿತ್ತಂ ಪಸಾದೇತ್ವಾ ಅಪರಭಾಗೇ ಕಾಲಂ ಕತ್ವಾ ತಾವತಿಂಸಭವನೇ ವುತ್ತನಯೇನೇವ ವಿಮಾನೇ ನಿಬ್ಬತ್ತಿ. ತಂ ಆಯಸ್ಮಾ ಮಹಾಮೋಗ್ಗಲ್ಲಾನತ್ಥೇರೋ ಇಮಾಹಿ ಗಾಥಾಹಿ ಪಟಿಪುಚ್ಛಿ –

೧೦೮೭. ‘‘ಉಚ್ಚಮಿದಂ ಮಣಿಥೂಣಂ ವಿಮಾನಂ…ಪೇ…

ವಣ್ಣೋ ಚ ತೇ ಸಬ್ಬದಿಸಾ ಪಭಾಸತೀ’’ತಿ.

ಸೋಪಿ ತಸ್ಸ ಇಮಾಹಿ ಗಾಥಾಹಿ ಬ್ಯಾಕಾಸಿ –

೧೦೮೯. ‘‘ಸೋ ದೇವಪುತ್ತೋ ಅತ್ತಮನೋ…ಪೇ… ಯಸ್ಸ ಕಮ್ಮಸ್ಸಿದಂ ಫಲಂ’’.

೧೦೯೦. ‘‘ಅಹಂ ಮನುಸ್ಸೇಸು ಮನುಸ್ಸಭೂತೋ, ಅಹೋಸಿಂ ಯವಪಾಲಕೋ;

ಅದ್ದಸಂ ವಿರಜಂ ಭಿಕ್ಖುಂ, ವಿಪ್ಪಸನ್ನಮನಾವಿಲಂ.

೧೦೯೧. ‘‘ತಸ್ಸ ಅದಾಸಹಂ ಭಾಗಂ, ಪಸನ್ನೋ ಸೇಹಿ ಪಾಣಿಭಿ;

ಕುಮ್ಮಾಸಪಿಣ್ಡಂ ದತ್ವಾನ, ಮೋದಾಮಿ ನನ್ದನೇ ವನೇ.

೧೦೯೨. ‘‘ತೇನ ಮೇತಾದಿಸೋ ವಣ್ಣೋ…ಪೇ…

ವಣ್ಣೋ ಚ ಮೇ ಸಬ್ಬದಿಸಾ ಪಭಾಸತೀ’’ತಿ.

ತತ್ಥ ಗಾಥಾಸುಪಿ ಅಪುಬ್ಬಂ ನತ್ಥಿ.

ಯವಪಾಲಕವಿಮಾನವಣ್ಣನಾ ನಿಟ್ಠಿತಾ.