೬. ಭಿಕ್ಖಾದಾಯಕವಿಮಾನವಣ್ಣನಾ

ಉಚ್ಚಮಿದಂ ಮಣಿಥೂಣಂ ವಿಮಾನನ್ತಿ ಭಿಕ್ಖಾದಾಯಕವಿಮಾನಂ. ತಸ್ಸ ಕಾ ಉಪ್ಪತ್ತಿ? ಭಗವಾ ರಾಜಗಹೇ ವಿಹರತಿ ವೇಳುವನೇ. ತೇನ ಸಮಯೇನ ಅಞ್ಞತರೋ ಭಿಕ್ಖು ಅದ್ಧಾನಮಗ್ಗಪಟಿಪನ್ನೋ ಅಞ್ಞತರಂ ಗಾಮಂ ಪಿಣ್ಡಾಯ ಪವಿಟ್ಠೋ ಏಕಸ್ಸ ಘರದ್ಧಾರೇ ಅಟ್ಠಾಸಿ. ತತ್ಥ ಅಞ್ಞತರೋ ಪುರಿಸೋ ಧೋತಹತ್ಥಪಾದೋ ‘‘ಭುಞ್ಜಿಸ್ಸಾಮೀ’’ತಿ ನಿಸಿನ್ನೋ ಭೋಜನಂ ಉಪನೇತ್ವಾ ಪಾತಿಯಾ ಪಕ್ಖಿತ್ತೇ ತಂ ಭಿಕ್ಖುಂ ದಿಸ್ವಾ ಪಾತಿಯಾ ಭತ್ತಂ ತಸ್ಸ ಭಿಕ್ಖುನೋ ಪತ್ತೇ ಆಕಿರನ್ತೋ ತೇನ ‘‘ಏಕದೇಸಮೇವ ದೇಹೀ’’ತಿ ವುತ್ತೋಪಿ ಸಬ್ಬಮೇವ ಆಕಿರಿ. ಸೋ ಭಿಕ್ಖು ಅನುಮೋದನಂ ವತ್ವಾ ಪಕ್ಕಾಮಿ. ಸೋ ಪುರಿಸೋ ‘‘ಛಾತಜ್ಝತ್ತಸ್ಸ ಭಿಕ್ಖುನೋ ಮಯಾ ಅಭುಞ್ಜಿತ್ವಾ ಭತ್ತಂ ದಿನ್ನ’’ನ್ತಿ ಅನುಸ್ಸರನ್ತೋ ಉಳಾರಂ ಪೀತಿಸೋಮನಸ್ಸಂ ಪಟಿಲಭಿ. ಸೋ ಅಪರಭಾಗೇ ಕಾಲಂ ಕತ್ವಾ ತಾವತಿಂಸೇಸು ದ್ವಾದಸಯೋಜನಿಕೇ ಕನಕವಿಮಾನೇ ನಿಬ್ಬತ್ತಿ. ತಂ ಆಯಸ್ಮಾ ಮಹಾಮೋಗ್ಗಲ್ಲಾನತ್ಥೇರೋ ದೇವಚಾರಿಕಂ ಚರನ್ತೋ ಮಹತಿಯಾ ದೇವಿದ್ಧಿಯಾ ವಿರೋಚಮಾನಂ ದಿಸ್ವಾ ಇಮಾಹಿ ಗಾಥಾಹಿ ಪಟಿಪುಚ್ಛಿ –

೧೦೮೧. ‘‘ಉಚ್ಚಮಿದಂ ಮಣಿಥೂಣಂ ವಿಮಾನಂ, ಸಮನ್ತತೋ ದ್ವಾದಸ ಯೋಜನಾನಿ;

ಕೂಟಾಗಾರಾ ಸತ್ತಸತಾ ಉಳಾರಾ, ವೇಳುರಿಯಥಮ್ಭಾ ರುಚಕತ್ಥತಾ ಸುಭಾ.

೧೦೮೨. ‘‘ದೇವಿದ್ಧಿಪತ್ತೋಸಿ ಮಹಾನುಭಾವೋ…ಪೇ…

ವಣ್ಣೋ ಚ ತೇ ಸಬ್ಬದಿಸಾ ಪಭಾಸತೀ’’ತಿ.

ಸೋಪಿ ತಸ್ಸ ಇಮಾಹಿ ಗಾಥಾಹಿ ಬ್ಯಾಕಾಸಿ –

೧೦೮೩. ‘‘ಸೋ ದೇವಪುತ್ತೋ ಅತ್ತಮನೋ…ಪೇ… ಯಸ್ಸ ಕಮ್ಮಸ್ಸಿದಂ ಫಲಂ’’.

೧೦೮೪. ‘‘ಅಹಂ ಮನುಸ್ಸೇಸು ಮನುಸ್ಸಭೂತೋ, ದಿಸ್ವಾನ ಭಿಕ್ಖುಂ ತಸಿತಂ ಕಿಲನ್ತಂ;

ಏಕಾಹಂ ಭಿಕ್ಖಂ ಪಟಿಪಾದಯಿಸ್ಸಂ, ಸಮಙ್ಗಿ ಭತ್ತೇನ ತದಾ ಅಕಾಸಿಂ.

೧೦೮೫. ‘‘ತೇನ ಮೇತಾದಿಸೋ ವಣ್ಣೋ…ಪೇ… ವಣ್ಣೋ ಚ ಮೇ ಸಬ್ಬದಿಸಾ ಪಭಾಸತೀ’’ತಿ.

೧೦೮೪. ತತ್ಥ ಏಕಾಹಂ ಭಿಕ್ಖನ್ತಿ ಏಕಂ ಅಹಂ ಭಿಕ್ಖಾಮತ್ತಂ, ಏಕಂ ಭತ್ತವಡ್ಢಿತಕನ್ತಿ ಅತ್ಥೋ. ಪಟಿಪಾದಯಿಸ್ಸನ್ತಿ ಪಟಿಪಾದೇಸಿಂ ಅದಾಸಿಂ. ಸಮಙ್ಗಿ ಭತ್ತೇನಾತಿ ಭತ್ತೇನ ಸಮಙ್ಗೀಭೂತಂ, ಲದ್ಧಭಿಕ್ಖನ್ತಿ ಅತ್ಥೋ. ಏವಂ ಮಹಾಥೇರೋ ತೇನ ದೇವಪುತ್ತೇನ ಅತ್ತನೋ ಸುಚರಿತಕಮ್ಮೇ ಪಕಾಸಿತೇ ಸಪರಿವಾರಸ್ಸ ತಸ್ಸ ಧಮ್ಮಂ ದೇಸೇತ್ವಾ ಮನುಸ್ಸಲೋಕಮಾಗತೋ, ತಂ ಪವತ್ತಿಂ ಸಮ್ಮಾಸಮ್ಬುದ್ಧಸ್ಸ ಕಥೇಸಿ. ಸತ್ಥಾ ತಂ ಅಟ್ಠುಪ್ಪತ್ತಿಂ ಕತ್ವಾ ಸಮ್ಪತ್ತಮಹಾಜನಸ್ಸ ಧಮ್ಮಂ ದೇಸೇಸಿ. ಸಾ ದೇಸನಾ ಮಹಾಜನಸ್ಸ ಸಾತ್ಥಿಕಾ ಅಹೋಸೀತಿ.

ಭಿಕ್ಖಾದಾಯಕವಿಮಾನವಣ್ಣನಾ ನಿಟ್ಠಿತಾ.