៣. ឧក្កោដនសិក្ខាបទវណ្ណនា

៣៩២. តតិយេ ‘‘តស្ស ភិក្ខុនោ សន្តិកំ គន្ត្វា’’តិ វុត្តត្តា យស្ស អធិករណំ សង្ឃកម្មេន និហតំ, តស្ស សម្មុខេ ឯវ ឧក្កោដេន្តស្ស បាចិត្តិយំ. បរម្មុខេ បន ទុក្កដមេវ.

៣៩៥. ‘‘ធម្មកម្មេ អធម្មកម្មសញ្ញី ឧក្កោដេតិ, អនាបត្តី’’តិ វុត្តត្តា អនាទរិយតាទិ វិយ ឧក្កោដនំ សយំ អកុសលំ ន ហោតិ, ធម្មកម្មសញ្ញាយ, បន វិមតិយា ច ឧក្កោដនេនេវ អកុសលំ ហោតិ. យថាធម្មំ និហតតា, ជាននា, ឧក្កោដនាតិ តីណិ អង្គានិ.

ឧក្កោដនសិក្ខាបទវណ្ណនា និដ្ឋិតា.