៩. ចម្បេយ្យក្ខន្ធកវណ្ណនា

ទ្វេនិស្សារណាទិកថាវណ្ណនា

៣៩៥. អប្បត្តោ និស្សារណន្តិ ឯត្ថ និស្សារណំ នាម កុលទូសកានំយេវ អនុញ្ញាតំ, អយំ បន កុលទូសកោ ន ហោតិ, តស្មា ‘‘អប្បត្តោ’’តិ វុត្តោ. យទិ ឯវំ កថំ សុនិស្សារិតោ ហោតីតិ? ចូឡវគ្គេ ‘‘អាកង្ខមានោ សង្ឃោ បព្ពាជនីយកម្មំ ករេយ្យា’’តិ (ចូឡវ. ២៧) វុត្តត្តា. ‘‘តស្សបាបិយសិកកម្មារហស្ស តស្សបាបិយសិកកម្មំ ករោន្តី’’តិ វចនតោ ចក្កំ ពន្ធន្តិ ញាតព្ពំ.

ឧបាលិបុច្ឆាកថាវណ្ណនា

៤០០. ‘‘បរតោតិ ឧបាលិបុច្ឆតោ បរ’’ន្តិ លិខិតំ. ទោសារិតបាឡិយំ ‘‘ឩនវីសតិវស្សោ ន អាគតោ វិប្បន្នវត្ថុកត្តា’’តិ វុត្តំ. ឥមស្មិំ ចម្បេយ្យក្ខន្ធកេ អធម្មកម្មានិយេវ ទ្វិធា កត្វា បញ្ចាគតានីតិ វេទិតព្ពំ. តេនេវ បរិវារេ ឥមស្មិំ ខន្ធកេ ‘‘បញ្ច អធម្មិកានី’’តិ វុត្តំ. ‘‘អន្ធមូគពធិរោ សោសារិតោ’’តិ ឥមិនា អបព្ពជិតស្សបិ ឧបសម្បទា រុហតីតិ សិទ្ធំ.

ចម្បេយ្យក្ខន្ធកវណ្ណនា និដ្ឋិតា.