៧. សំវិធានសិក្ខាបទវណ្ណនា

៤១២. ‘‘តេន ខោ បន សមយេន អញ្ញតរា ឥត្ថី’’តិ ច បាឋោ អត្ថិ, កេសុចិ នត្ថិ. នត្ថិភាវោ សុន្ទរោ ‘‘តេន ខោ សមយេនា’’តិ អធិការត្តាតិ កេចិ. ឥធ ឯកតោឧបសម្បន្នា, សិក្ខមានា, សាមណេរីតិ ឥមាបិ តិស្សោ សង្គហំ គច្ឆន្តិ. ឥមាសំ បន សមយោ រក្ខតិ, អយមិមាសំ, មាតុគាមស្ស ច វិសេសោ.

៤១៤. អបិចេត្ថ ‘‘វិញ្ញូ បដិពលា’’តិ វចនតោ អប្បដិពលា អនាបត្តិវត្ថុកាតិ ឯកេ, តំ ន យុត្តំ ទុក្កដវត្ថុកត្តា. ‘‘ភិក្ខុ សំវិទហតិ, មាតុគាមោ ន សំវិទហតិ, អាបត្តិ ទុក្កដស្សា’’តិ ហិ វុត្តំ. តថា ហិ ឧបបរិក្ខិតព្ពំ.

សំវិធានសិក្ខាបទវណ្ណនា និដ្ឋិតា.