១០. ចីវរាបនិធានសិក្ខាបទវណ្ណនា

៣៧៩. ទសមេ យស្មា និសីទនសន្ថតំ ចីវរនិសីទនម្បីតិ ឧភយម្បិ សទសមេវ, តស្មា តំ ឧភយម្បិ ឯកតោ កត្វា ‘‘និសីទនំ នាម សទសំ វុច្ចតី’’តិ អាហ. តត្ថាបិ ចីវរគ្គហណេន ចីវរនិសីទនំ គហិតមេវាតិ អត្ថតោ សន្ថតនិសីទនមេវ វុត្តំ ហោតិ. យទិ ឯវំ ‘‘និសីទនសន្ថតំ នាម សទសំ វុច្ចតី’’តិ វត្តព្ពន្តិ? ន, ឥតរស្ស អនិសីទនអទសភាវប្បសង្គតោ. ឯត្ថ និសីទនសន្ថតស្ស បាចិត្តិយវត្ថុត្តា ឥតរម្បិ បាចិត្តិយវត្ថុមេវាតិ វេទិតព្ពំ តជ្ជាតិកត្តា. សស្សាមិកេ សូចិឃរេ សូចិគណនាយ អាបត្តិយោតិ បោរាណា.

ចីវរាបនិធានសិក្ខាបទវណ្ណនា និដ្ឋិតា.

សមត្តោ វណ្ណនាក្កមេន សុរាបានវគ្គោ ឆដ្ឋោ.