៨. នាវាភិរុហនសិក្ខាបទវណ្ណនា

១៨៩. នទិយា កុតោ គាមន្តរន្តិ ចេ? ‘‘យស្សា នទិយា’’តិអាទិមាហ. គាមន្តរគណនាយាតិ យស្មិំ គាមតិត្ថេ អារុឡ្ហោ, តំ ឋបេត្វា អញ្ញគាមគណនាយ. ‘‘មាតុគាមោបិ ឥធ សង្គហំ គច្ឆតី’’តិ អាចរិយស្ស តក្កោ, តេនេវ ‘‘ឧភយត្ថ ឯកតោ ឧបសម្បន្នាយ ទុក្កដំ, សិក្ខមានាយ សាមណេរិយា អនាបត្តី’’តិ ច ន វុត្តំ. ឯសេវ នយោ អញ្ញេសុបិ ឯវរូបេសុ.

១៩១. ‘‘លោកស្សាទមិត្តសន្ថវវសេន កេឡិបុរេក្ខារា សំវិទហិត្វា’’តិ វុត្តត្តា អកុសលចិត្តំ លោកវជ្ជន្តិ វត្តព្ពន្តិ? ន វត្តព្ពំ, ‘‘កេឡិបុរេក្ខារា’’តិ វចនំ យេភុយ្យតាយ វុត្តំ. បោរាណគណ្ឋិបទេ ច ‘‘តីណិ ចិត្តានិ តិស្សោ វេទនា’’តិ វុត្តំ, សំវិទហនកាលេ វា កេឡិបុរេក្ខារោ ភិក្ខុ សំវិទហតិ, អាបត្តិ ភិក្ខុនោ គាមន្តរោក្កមនេ, អទ្ធយោជនាតិក្កមេ វា. កុសលចិត្តោ វា ហោតិ បច្ចវេក្ខន្តោ, ចេតិយាទីនិ វា បស្សន្តោ, អព្យាកតចិត្តោ វា ហោតិ កិលមថវសេន និទ្ទាយន្តោតិ តិចិត្តានិ គហិតានីតិ វេទិតព្ពា.

នាវាភិរុហនសិក្ខាបទវណ្ណនា និដ្ឋិតា.