៣-៥. ឋានិយសុត្តាទិវណ្ណនា

២០៤-២០៦. កាមរាគេន គធិតព្ពដ្ឋានភូតា កាមរាគដ្ឋានិយាតិ អាហ ‘‘អារម្មណធម្មាន’’ន្តិ. ‘‘មនសិការពហុលីការា’’តិ វុត្តត្តា ‘‘អារម្មណេនេវ កថិត’’ន្តិ វុត្តំ. វុត្តបរិច្ឆេទោតិ ឯតេន ន កេវលំ អារម្មណវសេនេវ, អថ ខោ ឧបនិស្សយវសេនបេត្ថ អត្ថោ លព្ភតីតិ ទស្សេតិ. បឋមវគ្គស្ស ហិ ទុតិយេ សុត្តេ ឧបនិស្សយវសេនេវ អត្ថោ ទស្សិតោ. មិស្សកពោជ្ឈង្គា កថិតា អវិភាគេនេវ កថិតត្តា. អបរិហានិយេតិ តីហិ សិក្ខាហិ អបរិហានាវហេ.